Ang Biblia Makabulig sa Inyo Pag-asawahay

PAG-ASAWAHAY​​—⁠para sa iban, ang tinaga makalilipay hunahunaon. Para sa iban naman, nagabunga ini sing kasakit. “Nagbatyag ako nga daw ginbulagan,” panganduhoy sang isa ka asawa. “Nagbatyag ako nga ginpabay-an kag masubo sa tanan nga tion.”

Ano ang mga kabangdanan nga ang duha ka tawo nga nagsumpaanay anay nga maghigugmaanay kag magpalanggaanay nangin malas-ay sa isa kag isa? Ang isa ka rason amo ang kakulang sang ihibalo kon ano ang mga nadalahig sa pag-asawahay. “Nagapakasal kita nga wala sing bisan ano nga paghanas,” siling sang isa ka dyurnalista sa medisina.

Napamatud-an nga diutay lamang karon ang may ihibalo tuhoy sa pag-asawahay paagi sa isa ka pagtuon nga ginhimo sang The National Marriage Project, isa ka panalawsaw nga ginpatigayon sang Unibersidad sang Rutgers sa New Jersey, E.⁠U.⁠A. “Madamo sa sining gintun-an ang nagdaku sa indi malipayon ukon sa nagdiborsio nga mga ginikanan,” sulat sang mga direktor sang proyekto. “Nahibaluan gid nila kon ano ang indi madinalag-on nga pag-asawahay, apang indi nila mapat-od kon ano ang madinalag-on nga pag-asawahay. Malaragway lamang sang iban ang isa ka madinalag-on nga pag-asawahay subong ‘amo ang kabaliskaran sang ila sang akon mga ginikanan.’”

Ang mga Cristiano bala indi apektado sang mga problema sa pag-asawahay? Apektado man. Ang matuod, ang iban nga mga Cristiano sang unang siglo nagkinahanglan sang matigdas nga laygay nga ‘indi magpanginpalus’ gikan sa pag-asawahay. (1 Corinto 7:27) Sing maathag, sa pag-asawahay sang duha ka di-himpit nga tawo may magaluntad gid nga mga problema, apang may matigayon kita nga bulig. Mapauswag sang mga bana kag mga asawa ang ila kaangtanan paagi sa pag-aplikar sang mga prinsipio sang Biblia.

Matuod, ang Biblia indi isa ka libro sa pag-asawahay. Apang, bangod gin-inspirar ini sang Isa nga nagtukod sang kahimusan sang pag-asawahay, mapaabot naton nga makabulig ang mga prinsipio sini. Paagi kay manalagna Isaias, si Jehova nga Dios nagsiling: “Ako, si Jehova, amo ang imo Dios, ang Isa nga nagatudlo sa imo agod makabenepisyo ka, ang Isa nga nagatuytoy sa imo sa dalanon nga dapat mo laktan. O kon talupangdon mo lamang ang akon mga sugo! Nian ang imo paghidait mangin subong sang suba, kag ang imo pagkamatarong subong sang mga balod sang dagat.”​​—⁠Isaias 48:​17, 18.

Nag-ugdaw na bala ang paghigugmaanay ninyo sang imo tiayon? Daw nasiod ka bala sa wala sing gugma nga pag-asawahay? Ang isa ka asawa nga kasado sa sulod sang 26 ka tuig nagsiling: “Indi gid malaragway ang kasakit nga nabatyagan sa sini nga sahi sang pag-asawahay. Dalayon ini.” Sa baylo nga batunon na lang ang indi madinalag-on nga pag-asawahay, ngaa indi mangin determinado sa paghimo sing pila ka butang tuhoy sa sini? Ipakita sang masunod nga artikulo sa mga bana kag mga asawa kon paano ang mga prinsipio sang Biblia makabulig sa ila pag-asawahay sa isa ka espesipiko nga bahin​​—⁠ang determinasyon nga tumanon ang panumpa sa pag-asawahay.