Kon San-o ang mga Pangako Isa ka Garantiya

ANG maragtas puno sang mga pangako nga wala matuman. Masami nga napaslawan ang mga pungsod sa pagtuman sang ila ginpirmahan sing pormal nga mga kasugtanan nga maglikaw sa pagpanalakay sa iban pa nga mga pungsod, amo nga ang ila mga pumuluyo nakaeksperiensia sing makakulugmat nga mga inaway. Si Napoleon nagsiling sang una: “Ginatuman lang sang mga gobierno ang ila mga pangako kon mapilitan sila, ukon kon mangin bentaha ini para sa ila.”

Paano naman ang mga pangako sang mga indibiduwal? Masubo gid kon indi matuman sang isa ka tawo ang iya pangako! Labi na gid kon kilala mo sia kag ginasaligan. Matuod, ang mga tawo mahimo nga di-makasarang ukon di-luyag magtuman sang ila mga pangako.

Tuhay gid ang mga pangako sang Dios sa mga pangako sang tawo! Ang mga pangako sang Dios lubos gid nga malauman kag masaligan. Isa ka garantiya ang ano man nga ginpangako ni Jehova nga Dios. Pat-od gid nga matuman ini. Tuhoy sa di-mapaslawan nga pulong sang Dios, ang Isaias 55:11 nagasiling: “Mangin amo man ang pulong nga nagagua sa akon baba. Indi ini magabalik sa akon nga wala sing mga resulta, kundi himuon gid sini ang akon nahamut-an, kag pat-od nga magamadinalag-on ini sa butang nga tungod sina ginpadala ko ini.”

Gani, nian, paano naton tamdon ang mga pangako sang Dios nga narekord sa Biblia? Pat-od gid nga makasalig kita sa sini. Halimbawa, si apostol Juan nagsulat: “Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” (Bugna 21:​3, 4) Maagom mo ining mga pagpakamaayo kon tumanon mo ang pinamulong ni Jesus: “Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”​​—⁠Juan 17:3.