“Dili Kamo Magpagota sing Sampihakan”

SUBONG sang makita mo diri, ang kamelyo kag ang baka nga nagaarado sing magkaupod ginabudlayan gid. Ang gota nga nagatabid sa ila​—⁠nga gintuyo para sa duha ka sapat nga pareho sing kadakuon kag kusog⁠—nagapabudlay gid sa duha ka sapat. Nabalaka sa kaayuhan sang mga sapat nga ginagamit sa pagpangabudlay, ginsugo sang Dios ang mga Israelinhon: “Dili ka mag-arado nga magkaupod ang baka kag ang asno.” (Deuteronomio 22:10) Amo man nga prinsipio ang naaplikar sa baka kag sa kamelyo.

Kinaandan na nga wala ginapabudlayan sing subong sini sang isa ka mangunguma ang iya mga kasapatan. Apang kon wala sia sing duha ka baka, mahimo itabid niya sa gota ang iya bisan ano man nga duha ka sapat. Maathag nga amo sini ang ginhimo sang mangunguma sang ika-19 nga siglo sa ilustrasyon. Bangod magkatuhay ang ila kadakuon kag kabug-aton, ang mas maluya nga sapat kinahanglan maghimakas nga makadungan, kag ang mas makusog nga sapat mas mabug-atan.

Gingamit ni apostol Pablo ang ilustrasyon sang sampihakan nga paggota agod tudluan kita sing isa ka importante nga leksion. “Dili kamo magpagota sing sampihakan upod sa mga di-tumuluo,” sulat niya. “Kay ano bala ang pag-updanay sang pagkamatarong kag pagkamalinapason? Ukon ano bala ang paghiambit sang kapawa sa kadudulman?” (2 Corinto 6:14) Paano ang isa ka Cristiano nagapagota sing sampihakan?

Ang isa ka paagi amo kon ang isa ka Cristiano magminyo sa indi pareho sa iya sing pagtuluuhan. Ini nga pag-asawahay mangin mabudlay para sa ila nga duha, kay indi sila mag-intiendihanay sa sadsaran nga mga hulusayon.

Sang ginpatok ni Jehova ang pag-asawahay, ginhatag niya sa asawa ang katungdanan nga mangin “katuwang,” ukon “katimbang.” (Genesis 2:18) Subong man, paagi kay manalagna Malaquias, ginpatuhuyan sang Dios ang asawa subong ‘kaparis.’ (Malaquias 2:14) Luyag sang aton Manunuga nga ang mga mag-asawa magpangabudlay sing magkaupod sa isa lang ka espirituwal nga direksion, nagaambitay sing pareho nga lulan kag pareho nga nagaani sing mga benepisyo.

Paagi sa pagminyo “lamang sa Ginuo,” ginapakita sang isa ka Cristiano ang pagtahod sa laygay sang aton langitnon nga Amay. (1 Corinto 7:39) Nagapasad ini sing sadsaran para sa isa ka nahiusa nga pag-asawahay, nga makahatag sing kadayawan kag dungog sa Dios samtang ginaalagad sia sang magtiayon subong ‘tunay nga mga katuwang’ sa pinasahi nga kahulugan.​—⁠Filipos 4:3.

[Credit Line sang retrato sa pahina 32]

Camel and ox: From the book La Tierra Santa, Volume 1, 1830