Mga Suluptan sang Tubig nga Indi Makasupot sing Tubig

SA PANAHON sang Biblia, ang mga suluptan sang tubig artipisyal nga mga bubon nga gingamit panguna agod magsalod sang tubig. Sa sulod sang malawig nga tion, sa Ginsaad nga Duta, ini lamang amo ang paagi agod masustener ang kinahanglanon gid nga suplay sang tubig.

Sa pagrekord sang isa ka kapahayagan sang Dios, gingamit ni manalagna Jeremias ang mga suluptan sang tubig sa malaragwayon nga paagi, nga nagasiling: “Ang akon katawhan naghimo sing duha ka malaut; ginbayaan nila ako ang tuburan sang mga tubig nga buhi, kag nagkutkot sila sing kaugalingon nga mga suluptan sang tubig, suluptan nga tahus, nga indi makasupot sing tubig.”​​—⁠Jeremias 2:⁠13.

Ginbiyaan sang mga Israelinhon ang ila Dios, si Jehova​​—⁠“ang tuburan sang mga tubig nga buhi”⁠​—⁠kag nagdangop sa di-masaligan nga mga pagpakig-alyansa-militar upod sa pagano nga mga pungsod kag nagsimba sa wala sing gahom, butig nga mga diosdios. Ining ginalauman nga dalangpan nangin, suno sa pagpaanggid ni Jeremias, kaangay sang tahus nga mga suluptan sang tubig nga wala sing gahom sa pag-amlig ukon pagluwas.​​—⁠Deuteronomio 28:20.

May leksion bala para sa aton karon ining maragtason nga halimbawa? Kaangay sang kahimtangan sa adlaw ni Jeremias, si Jehova, ang dayon nga Dios, nagapabilin nga amo lamang ang Tuburan sang nagahatag-kabuhi nga mga tubig. (Salmo 36:⁠9; Bugna 4:11) Gikan sa iya lamang, paagi sa iya Anak, nga si Jesucristo, matigayon sang mga tawo ang kabuhi nga wala sing katapusan. (Juan 4:​14; 17:3) Apang, kaangay sang mga kadungan ni Jeremias, madamo gid nga tawo karon ang nagasikway kag nagapakanubo pa gani sa pulong sang Dios nga nasulat sa Biblia. Sa baylo, nagsalig sila sa umalagi nga mga solusyon sa politika, sa walay pulos nga tawhanon nga mga pangatarungan, kag mga ideolohiya kag mga pilosopiya nga nagatamay sa Dios. (1 Corinto 3:​18-​20; Colosas 2:8) Maathag kon ano ang dapat pilion. Kay sin-o ka magasalig? Sa “tuburan [bala] sang mga tubig nga buhi,” nga si Jehova, ukon sa ‘mga suluptan sang tubig nga indi makasupot sing tubig’?

[Retrato sa pahina 32]

“Terra-cotta” nga pigurin sang isa ka iloy nga diosa nga nakit-an sa isa ka lulubngan sa Israel

[Credit Line]

Photograph taken by courtesy of the British Museum