Pamatud-i ang Imo Kaugalingon nga Handa Para sa Adlaw ni Jehova

“Pamatud-i . . . ninyo ang inyo kaugalingon nga handa, bangod sa oras nga wala ninyo ginahunahuna, magaabot ang Anak sang tawo.”​​—⁠MATEO 24:44.

1. Ngaa dapat kita mabalaka tuhoy sa adlaw ni Jehova?

MANGIN isa ini ka adlaw sang inaway kag kasingkal, sang kalisang kag kasisit-an, sang kadulom kag sang paghapay. Ang “daku kag makahaladlok nga adlaw” ni Jehova pat-od nga magaabot sa sining malaut nga sistema sang mga butang, subong nga ginlumsan sang Anaw ang malaut nga kalibutan sang adlaw ni Noe. Sigurado gid ini. Apang, “ang tanan nga nagatawag sa ngalan ni Jehova maluwas.” (Joel 2:​30-​32; Amos 5:​18-​20) Laglagon sang Dios ang iya mga kaaway kag luwason ang iya katawhan. Ginabatyag ang pagkahilingagawon sang tion, si manalagna Sofonias nagsiling: “Ang dakung adlaw ni Jehova malapit na. Malapit na ini, kag nagadalidali ini sing tama.” (Sofonias 1:14) Apang, san-o matabo ining paghukom sang Dios?

2, 3. Ngaa importante nga maghanda kita para sa adlaw ni Jehova?

² “May kaangtanan sa sinang adlaw kag oras wala sing nakahibalo, bisan pa ang mga anghel sang mga langit bisan pa ang Anak, kundi ang Amay lamang,” siling ni Jesus. (Mateo 24:36) Sanglit wala kita makahibalo sang eksakto nga tion,  importante nga pamatian naton ang aton tuigan nga teksto para sa 2004: “Magpadayon kamo sa pagbantay . . . Pamatud-i man ninyo ang inyo kaugalingon nga handa.”​​—⁠Mateo 24:​42, 44.

³ Sa pagpakita kon daw ano ka hinali nga ang mga nakahanda tipunon para sa kaluwasan samtang ang iban biyaan, si Jesus nagsiling: “May duha ka tawo sa latagon: ang isa kuhaon kag ang isa bayaan; duha ka babayi magagaling sa galingan: ang isa kuhaon kag ang isa bayaan.” (Mateo 24:​40, 41) Sa sinang ital-ital nga tion, ano ang aton personal nga kahimtangan? Handa ayhan kita, ukon maabtan ayhan kita sina nga adlaw nga wala makapangaman? Daku ang nasandig sa mga tikang nga ginahimo naton karon. Agod mapamatud-an ang aton kaugalingon nga handa para sa adlaw ni Jehova, kinahanglan nga likawan naton ang panimuot nga lapnag karon. Maghalong kita nga indi mahulog sa isa ka partikular nga espirituwal nga kahimtangan, kag likawan naton ang pila ka estilo sang pagkabuhi.

Likawi ang Wala Nagasapak nga Panimuot

4. Ano ang panimuot sang mga tawo sang adlaw ni Noe?

⁴ Binagbinaga ang mga adlaw ni Noe. “Bangod sa pagtuo si Noe, pagkatapos ginhatagan sing paandam sang Dios nahanungod sa mga butang nga wala pa makita, nagpakita sing diosnon nga kahadlok kag nagtukod sing arka agod maluwas ang iya panimalay,” siling sang Biblia. (Hebreo 11:7) Ang arka mangin isa ka tumalagsahon kag kitaon nga butang. Dugang pa, si Noe isa ka “manugbantala sang pagkamatarong.” (2 Pedro 2:5) Ang pagtukod ni Noe sing arka kag ang iya pagbantala wala magpahulag sa mga tawo sang iya adlaw. Ngaa? Bangod “nagakaon [sila] kag nagainom, ang mga lalaki nagapangasawa kag ang mga babayi ginahatag sa pag-asawahay.” Ang mga ginbantalaan ni Noe nangin masako gid sa ila personal nga mga hilikuton kag pagpangalipay amo nga “wala sila magsapak tubtob nga nag-abot ang anaw kag nag-anod sa ila tanan.”​​—⁠Mateo 24:​38, 39.

5. Ano ang pagtamod sang mga pumuluyo sang Sodoma sang adlaw ni Lot?

⁵ Amo man sang mga adlaw ni Lot. Ang Kasulatan nagasugid sa aton: “Nagkalaon sila, nag-ilinom sila, nagpamakal sila, nagpamaligya sila, nagpananom sila, nagpatindog sila. Apang sang adlaw nga naggua si Lot sa Sodoma nag-ulan sing kalayo kag asupre gikan sa langit kag naglaglag sa ila tanan.” (Lucas 17:​28, 29) Sa tapos mapaandaman si Lot sang mga anghel tuhoy sa nagahilapit nga kalaglagan, ginhambal niya ang iya mga umagad nga lalaki. Apang, sa ila panulok, “daw sa nagalahog sia.”​​—⁠Genesis 19:14.

6. Ano nga panimuot ang dapat naton likawan?

⁶ Subong sang mga adlaw ni Noe kag ni Lot, ‘amo man sa presensia sang Anak sang tawo,’ siling ni Jesus. (Mateo 24:39; Lucas 17:30) Sa pagkamatuod, kalabanan nga mga tawo karon wala nagasapak. Dapat kita magbantay nga indi maimpluwensiahan sini. Wala sing malain sa pagkaon sing manamit nga pagkaon kag sa pag-inom sing haganhagan. Subong man, ang pag-asawahay isa ka kahimusan sang Dios. Apang, kon ini nga mga butang himuon nga pinakaimportante sa aton kabuhi kag mapatumbayaan na ang espirituwal nga mga intereses, handa bala kita sa makahaladlok nga adlaw ni Jehova?

7. Ano ang importante nga ipamangkot naton antes kita maghimo sing bisan ano, kag ngaa?

⁷ “Ang tion nga nabilin ginpalip-ot,” siling ni apostol Pablo. “Kutob karon ang mga may asawa mangin daw subong nga wala.” (1 Corinto 7:​29-​31) Diutay na lamang nga tion ang nabilin agod tapuson naton ang pagbantala sa Ginharian nga hilikuton nga ginhatag sa aton sang Dios. (Mateo 24:14) Bisan gani ang mga mag-asawa ginlaygayan ni Pablo nga indi pag-ipatuhoy ang bug-os nga atension sa ila tiayon amo nga ikaduha na lamang sa ila kabuhi ang mga intereses sang Ginharian. Maathag nga ang panimuot sang panghunahuna nga ginrekomendar ni Pablo amo ang kabaliskaran sang indi pagsapak. Si Jesus nagsiling: ‘Padayon, nian, nga pangitaa anay ang ginharian kag ang pagkamatarong sang Dios.’ (Mateo 6:33) Antes magdesisyon ukon maghimo sing bisan ano, ang importante nga ipamangkot amo, ‘Paano sini maapektuhan ang akon pag-una sa mga intereses sang Ginharian?’

8. Kon ang aton pagsinalayo sa adlaw-adlaw amo ang aton una nga ginakabalak-an, ano ang dapat naton himuon?

 ⁸ Ano kon marealisar naton nga sa aton normal nga pagsinalayo sa adlaw-adlaw masapwan naton nga wala nalakip ang espirituwal nga mga intereses? Diutay lamang bala ang kinatuhayan kon ipaanggid naton ang aton pagsinalayo sa aton mga kaingod nga wala sing sibu nga ihibalo sa Kasulatan kag indi mga manugbantala sang Ginharian? Kon amo sini, dapat naton ini ipangamuyo. Mabuligan kita ni Jehova sa pagtigayon sing husto nga panimuot sang panghunahuna. (Roma 15:⁠5; Filipos 3:15) Mabuligan niya kita sa pag-una sa mga intereses sang Ginharian, sa paghimo sang kon ano ang husto, kag sa pagtuman sang aton obligasyon sa iya.​​—⁠Roma 12:⁠2; 2 Corinto 13:7.

Pamatuki ang Espirituwal nga Pagkatuyo

9. Suno sa Bugna 16:14-​16, ngaa importante nga pamatukan ang espirituwal nga pagkatuyo?

⁹ Ang tagna mismo nga nagasambit sang nagapakari nga “inaway sang dakung adlaw sang Dios nga Labing Gamhanan” sa Armagedon nagapaandam nga ang iban mahimo nga indi magpabilin nga nagamata. “Yari karon! Nagakari ako subong sang makawat,” siling ni Ginuong Jesucristo. “Malipayon ang isa nga nagamata kag nagatipig sang iya nagua nga mga panapton, agod nga indi sia maglakat nga hublas kag magkahuya sa atubangan sang mga tawo.” (Bugna 16:14-​16) Ang nagua nga mga panapton nga ginasambit diri nagapatuhoy sa kon ano ang nagapakilala sa aton subong Cristianong mga Saksi ni Jehova. Nagalakip ini sang aton hilikuton subong mga manugbantala sang Ginharian kag sang aton Cristianong paggawi. Kon mahulog kita sa daw nagakatulog nga kahimtangan paagi sa pagkadiaktibo, mahimo mahublasan kita sang aton Cristianong identidad. Makahuluya ini kag makatalagam. Dapat naton pamatukan ang espirituwal nga pagkatuyo ukon pagkauyaya. Paano naton ini mapamatukan?

10. Ngaa ang pagbasa sing Biblia adlaw-adlaw nagabulig sa aton sa pagpabilin nga alisto sa espirituwal?

¹⁰ Sulitsulit nga ginapadaku sang Biblia ang kinahanglanon nga dapat kita magpabilin nga nagamata kag maligdong. Halimbawa, ang mga rekord sang Ebanghelyo nagapahanumdom sa aton: “Magpadayon kamo sa pagbantay” (Mateo 24:42; 25:13; Marcos 13:​35, 37); ‘pamatud-i ang inyo kaugalingon nga handa’ (Mateo 24:44); “magpabilin kamo nga nagabantay, magpabilin kamo nga nagamata” (Marcos 13:33); “magpabilin kamo nga handa” (Lucas 12:40). Sa tapos mahambal nga ang adlaw ni Jehova magakari nga wala ginapaabot sa sining kalibutan, ginlaygayan ni apostol Pablo ang mga masigkatumuluo: “Indi kita magtulog subong sang ginahimo sang iban, kundi magpabilin kita nga nagamata kag huptan ang aton kaligdong.” (1 Tesalonica 5:6) Sa katapusan  nga tulun-an sang Biblia, ginpadaku sang ginhimaya nga si Cristo Jesus ang iya hinali nga pag-abot, nga nagasiling: “Magakari ako sing madali.” (Bugna 3:​11; 22:​7, 12, 20) Madamo man nga Hebreong mga manalagna ang naglaragway kag nagpaandam tuhoy sa dakung adlaw sang paghukom ni Jehova. (Isaias 2:​12, 17; Jeremias 30:⁠7; Joel 2:​11; Sofonias 3:8) Ang pagbasa sa Pulong sang Dios, ang Biblia, sa adlaw-adlaw kag ang pagpamalandong sa aton ginabasa isa ka maayo nga bulig agod makapabilin kita nga alisto sa espirituwal.

11. Ngaa kinahanglanon ang personal nga pagtuon sa Biblia sa pagpabilin nga nagamata sa espirituwal?

¹¹ Huo, isa gid ka pangpapagsik agod makapabilin kita nga nagamata sa espirituwal ang maukod nga personal nga pagtuon sa Kasulatan nga ginagamit ang napasad sa Biblia nga mga publikasyon nga ginaaman sang “matutom kag mainandamon nga ulipon”! (Mateo 24:45-​47) Apang, agod mangin mapuslanon ang personal nga pagtuon, dapat nga progresibo ini kag tayuyon. (Hebreo 5:⁠14⁠–​​6:3) Dapat kita mangin regular sa pagkaon sing matig-a nga espirituwal nga pagkaon. Mahimo nga isa ka hangkat karon ang pagpangita sing tion para sa sini. (Efeso 5:​15, 16) Apang, ang pagbasa sing Biblia kag sing Makasulatanhon nga mga publikasyon kon kombenyente lamang sa aton indi pa tuman. Kinahanglanon ang regular nga personal nga pagtuon kon luyag naton magpabilin nga ‘mapagros sa pagtuo’ kag nagamata.​​—⁠Tito 1:⁠13.

12. Paano ang Cristianong mga miting, mga asambleya, kag mga kombension nagabulig sa aton sa pagpakig-away batok sa espirituwal nga pagkatuyo?

¹² Ang Cristianong mga miting, mga asambleya, kag mga kombension nagabulig man sa aton sa pagpakig-away batok sa espirituwal nga pagkatuyo. Paano? Paagi sa mga instruksion nga ginabaton naton. Sa sining mga pagtilipon, indi bala regular nga ginapahanumdom kita tuhoy sa pagkalapit sang adlaw ni Jehova? Ang Cristianong mga miting kada semana nagahatag man sing mga kahigayunan sa ‘pagpukaw sa isa kag isa sa gugma kag sa maayong mga buhat.’ Ini nga pagpukaw, ukon pagpapagsik, makabulig sa pagpabilin nga nagamata sa espirituwal. Amo kon ngaa indi makapakibot nga ginasugo kita nga magtipon sing regular samtang “ginatan-aw [naton] nga nagapalapit ang adlaw.”​—⁠Hebreo 10:​24, 25.

13. Paano ang Cristianong ministeryo nagabulig sa aton sa pagpabilin nga nagamata sa espirituwal?

¹³ Mabuligan man kita sa pagpabilin nga nagamata kon bug-os tagipusuon nga nagapakigbahin kita sa Cristianong ministeryo. Ano pa bala ang mas maayo nga paagi agod mahuptan naton nga lab-as sa hunahuna ang mga tanda sang mga tion kag ang kahulugan sini sangsa ipakighambal ini sa iban? Kag kon makita naton ang mga ginatudluan naton sing Biblia nga nagauswag kag nagasugod sa pag-aplikar sang ila ginatun-an, labi pa nga ginabatyag naton ang pagkahilingagawon sang tion. “Ihanda ninyo ang inyo hunahuna para sa hilikuton,” siling ni apostol Pedro, “hupti nga bug-os ang inyo kaligdong.” (1 Pedro 1:13) Ang “madamo pirme sing ginahimo sa hilikuton sang Ginuo” isa ka maayo nga remedyo sa espirituwal nga pagkataka.​​—⁠1 Corinto 15:58.

Likawi ang Makahalit sa Espirituwal nga mga Estilo sang Pagkabuhi

14. Suno sa ginlaragway sa Lucas 21:34-​36, nagpaandam si Jesus batok sa ano nga mga estilo sang pagkabuhi?

¹⁴ Sa iya daku nga tagna tuhoy sa tanda sang iya presensia, naghatag si Jesus sing isa pa ka paandam. Sia nagsiling: “Hatagi sing igtalupangod ang inyo kaugalingon nga ang inyo mga tagipusuon indi gid mabug-atan sang sobra nga pagkaon kag lakas nga pag-inom kag mga kabalaka sa kabuhi, kag yadto nga adlaw magaabot sa inyo sing hinali subong sang siod. Kay magaabot ini sa tanan nga nagapuyo sa nawong sang bug-os nga duta. Magpabilin nga nagamata, nian, sa tanan nga tion nga nagaampo nga magmadinalag-on kamo sa pagpalagyo sa sining tanan nga butang nga natalana nga mahanabo, kag sa pagtindog sa atubangan sang Anak sang tawo.” (Lucas 21:34-36) Sibu nga ginlaragway ni Jesus ang mga estilo sang pagkabuhi sang mga tawo sa kabilugan: ang sobra nga pagpatuyang sa pagkaon, pagpahubog, kag isa ka dalanon sang kabuhi nga nagadala sing mga kabalaka.

15. Ngaa dapat naton likawan ang sobra nga pagpatuyang sa pagkaon kag sa pag-inom?

¹⁵ Ang sobra nga pagkaon kag lakas nga pag-inom wala nagahisanto sa mga prinsipio sang Biblia kag dapat likawan. “Indi ka makig-upod sa mga lakas mag-inom sing alak, sa mga mahakog magkaon sing karne,” siling sang Biblia. (Hulubaton 23:20) Apang, makatalagam gihapon bisan pa kon ang pagkaon kag pag-inom indi pa masiling nga  sobra. Ang pagkaon kag pag-inom, bisan pa indi sobra, mahimo bangdan sang pagkatuyo kag pagkatamaran. “Ang matamad nagahandum,” siling sang isa ka hulubaton sa Biblia, “apang ang iya kalag walay bisan ano.” (Hulubaton 13:4) Mahimo nga ginahandum sini nga tawo nga himuon ang kabubut-on sang Dios, apang ini nga handum niya nagapabilin nga isa lamang gihapon ka handum bangod sang iya pagpatumbaya.

16. Paano naton malikawan nga mabug-atan kita sang mga kabalaka sa aton pamilya?

¹⁶ Ano ang mga kabalaka sa kabuhi nga ginpaandam ni Jesus? Nagadalahig ini sa personal nga mga kabalaka, pag-aman para sa pamilya, kag mga butang kaangay sini. Indi gid maalamon nga tugutan ini nga magpabug-at sa aton! “Sin-o bala sa inyo nga bangod sa pagkabalaka makadugang sing isa ka maniko sa kalawigon sang iya kabuhi?” pamangkot ni Jesus. Ginlaygayan niya ang iya mga tagpalamati: “Indi gid kamo magkabalaka kag magsiling, ‘Ano bala ang kaunon naton?’ ukon, ‘Ano bala ang imnon naton?’ ukon, ‘Ano bala ang ipanapot naton?’ Kay ini tanan amo ang mga butang nga ginatinguhaan nga maagom sang mga pungsod. Kay ang inyo langitnon nga Amay nakahibalo nga kinahanglan ninyo ini tanan nga butang.” Ang pag-una sa mga intereses sang Ginharian kag ang pagsalig nga si Jehova magaaman para sa aton makabulig agod makontrol naton ang mga kabalaka kag makapabilin kita nga nagamata sa espirituwal.​—⁠Mateo 6:​25-​34.

17. Paano ang materyal nga mga pagtinguha mahimo bangdan sang kabalaka?

¹⁷ Ang materyalistiko nga mga pagtinguha mahimo man bangdan sang kabalaka. Halimbawa, ginahimo sang iban nga mangin komplikado ang ila kabuhi paagi sa pagkabuhi nga lampas sa ila masarangan. Ang iban nahaylo sang madali magpamanggad nga mga padihot kag sang marisgo nga pinansial nga mga puhunan. Sa iban naman, ang sekular nga edukasyon subong isa ka paagi agod magmadinalag-on sa pinansial nangin isa ka siod. Matuod, ang isa ka nibel sang edukasyon mahimo nga makabulig agod makakita ang isa sing trabaho. Apang, ang kamatuoran amo nga bangod sang nagaubos sing tion nga pagtinguha nga makatigayon sing mataas nga edukasyon, nahalitan sang iban ang ila kaugalingon sa espirituwal.  Makatalagam gid ini samtang nagahilapit ang adlaw ni Jehova! Ang Biblia nagapaandam: “Ang mga determinado nga magmanggaranon nagakahulog sa pagsulay kag sa siod kag sa madamong binuang kag makahalalit nga kailigbon, nga nagatugdang sang mga tawo sa kalaglagan kag kahapayan.”​​—⁠1 Timoteo 6:9.

18. Agod indi kita mahaylo sa materyalistiko nga pagkabuhi, ano nga ikasarang ang dapat naton palambuon?

¹⁸ Agod indi kita mahaylo sang materyalistiko nga pagkabuhi, kinahanglan nga palambuon naton ang aton ikasarang sa pagkilala kon ano ang husto kag kon ano ang sayop kon nagahimo kita sing mga desisyon. Mapalambo ini nga ikasarang paagi sa regular nga pagkaon sing “pagkaon nga matig-a para sa hamtong nga mga tawo” kag ‘paagi sa paghanas sang aton mga ikasarang sa paghantop.’ (Hebreo 5:​13, 14) Ang pagpat-od sa “mas importante nga mga butang” kon nagapili sing mga prioridad magaamlig man sa aton agod indi kita makahimo sing sayop nga mga desisyon.​​—⁠Filipos 1:⁠10.

19. Kon marealisar naton nga diutay lamang ang aton tion para sa espirituwal nga mga butang, ano ang dapat naton himuon?

¹⁹ Ang materyalistiko nga pagkabuhi makabulag sa aton, amo nga diutay lamang ukon wala gid kita sing tion para sa espirituwal nga mga butang. Paano naton mausisa ang aton kaugalingon kag malikawan nga masiod kita sini nga estilo sang pagkabuhi? Dapat naton binagbinagon sing mapangamuyuon kon paano kag kon tubtob sa anong kasangkaron mapasimple naton ang aton kabuhi. Si Hari Solomon sang dumaan nga Israel nagsiling: “Matam-is ang katulugon sang isa nga nagaalagad, bisan nagakaon sia sing diutay ukon madamo; apang ang pagkabusog sang manggaranon indi magtugot sa iya sa pagtulog.” (Manugwali 5:12) Daku bala nga tion kag enerhiya ang ginahinguyang naton sa pag-atipan sa di-kinahanglanon nga materyal nga mga pagkabutang? Samtang nagadugang ang mga butang nga ginapanag-iyahan naton, dugang man nga mga butang ang dapat naton mentenahon, ipasiguro, kag amligan. Mangin sa bentaha bala naton kon pasimplehon naton ang aton kabuhi paagi sa pagbuhin sang iban naton nga mga pagkabutang?

Pamatud-i Gid Ninyo nga Handa Kamo

20, 21. (a) Ano nga pasalig ang ginahatag ni apostol Pedro tuhoy sa adlaw ni Jehova? (b) Ano nga mga paggawi kag mga buhat ang dapat naton himuon sing padayon samtang ginapamatud-an naton ang aton kaugalingon nga handa para sa adlaw ni Jehova?

²⁰ Natapos ang tion para sa kalibutan sang adlaw ni Noe, kag matapos man ini para sa sistema sang mga butang karon. Ginapasalig kita ni apostol Pedro: “Ang adlaw ni Jehova magaabot subong sang kawatan, nga sa sini ang mga langit magataliwan nga may nagasagitsit nga kagahod, apang ang mga elemento bangod sa sobra nga kainit matunaw, kag ang duta kag ang mga buhat nga yara sa sini madayag.” Ang simbuliko nga mga langit​​—⁠ang malaut nga mga gobierno⁠​—⁠ukon ang simbuliko nga duta​​—⁠ang katawhan nga napain sa Dios​​—⁠indi makalampuwas sa kasingkal sang nagadabdab nga kaakig sang Dios. Sa pagpakita kon paano naton mapamatud-an nga handa kita para sa sina nga adlaw, si Pedro nagtuaw: “Sanglit ini tanan nga butang tunawon sing amo sina, ano bala nga sahi sang mga tawo dapat mangin amo kamo sa balaan nga paggawi kag sa mga buhat sang diosnon nga debosyon, nga nagahulat kag ginadumdom gid pirme ang presensia sang adlaw ni Jehova!”​​—⁠2 Pedro 3:​10-​12.

²¹ Ang aton regular nga pagtambong sa Cristianong mga miting kag pagpakigbahin sa pagbantala sing maayong balita nalakip sa sining mga paggawi kag mga buhat sang diosnon nga debosyon. Kabay nga himuon naton ini nga may bug-os tagipusuon nga debosyon sa Dios samtang mapailubon nga ginahulat naton ang dakung adlaw ni Jehova. Busa, ‘himuon naton ang aton labing masarangan agod nga sa katapusan masapwan kita sang Dios nga walay dagta kag walay kasawayan kag sa paghidait.’​​—⁠2 Pedro 3:⁠14.

Madumduman Mo Bala?

• Ngaa dapat naton pamatud-an ang aton kaugalingon nga handa para sa adlaw ni Jehova?

• Kon ang una nga ginakabalak-an naton amo ang normal nga mga butang nga ginatinguhaan sa kabuhi, ano ang dapat naton himuon?

• Ano ang makabulig sa aton agod mapamatukan ang espirituwal nga pagkatuyo?

• Anong makahalalit nga mga estilo sang pagkabuhi ang dapat naton likawan, kag paano?

[Mga Pamangkot sa Pagtinuon]

[Mga retrato sa pahina 20, 21]

Wala ginsapak sang mga tawo sang adlaw ni Noe ang nagahilapit nga paghukom sadto​​—⁠ikaw man bala?

[Retrato sa pahina 23]

Mapasimple mo bala ang imo kabuhi agod nga may kapin ka nga tion para sa espirituwal nga mga butang?