“Ang Ila Tingog Naglapnag sa Bug-os nga Duta”

“Himuon nga mga gintutun-an ang tanan nga kapungsuran, nga nagabawtismo sa ila sa ngalan sang Amay kag sang Anak kag sang Espiritu Santo.”​—⁠MATEO 28:19.

1, 2. (a) Ano ang ginsugo ni Jesus sa iya mga disipulo? (b) Ngaa daku gid ang nahimo sang mga Cristiano sang unang siglo?

ANTES lang gid magkayab si Jesus sa langit, ginsugo niya ang iya mga disipulo. Ginsilingan niya sila: “Himuon nga mga gintutun-an ang tanan nga kapungsuran, nga nagabawtismo sa ila sa ngalan sang Amay kag sang Anak kag sang Espiritu Santo.” (Mateo 28:19) Isa gid yadto ka daku nga hilikuton!

² Hunahunaa lamang! Sang Pentecostes 33 C.⁠E., mga 120 ka disipulo ang ginpasagahayan sang balaan nga espiritu kag nagtuman sadto nga sugo paagi sa pagsugid sa iban nga si Jesus amo ang ginsaad nga Mesias, nga paagi sa iya matigayon ang kaluwasan. (Binuhatan 2:​1-​36) Paano malab-ot sadtong diutay nga grupo ang mga tawo sang “tanan nga kapungsuran”? Para sa mga tawo imposible ini, apang “sa Dios ang tanan nga butang mahimo.” (Mateo 19:26) Ang mga Cristiano sang una ginabuligan sang balaan nga espiritu ni Jehova, kag nabatyagan nila ang pagkahilingagawon. (Zacarias 4:⁠6; 2 Timoteo 4:2) Gani, sa sulod lamang sang pila ka dekada, nasiling ni apostol Pablo nga ang maayong balita nabantala na sa “bug-os nga tinuga sa idalom sang langit.”​—⁠Colosas 1:23.

3. Ano ang nagtabon sa putli nga Cristiano nga “trigo”?

³ Sa bug-os nga unang siglo, ang matuod nga pagsimba padayon nga naglapnag. Apang gintagna ni Jesus nga magaabot ang tion nga magasab-ug si Satanas sing “mga gamhon” kag ang “trigo” nga amo ang matuod nga mga Cristiano matabunan sa sulod sang mga siglo tubtob sa tig-alani. Natabo ini sang napatay na ang mga apostoles.​—⁠Mateo 13:24-​39.

Madasig nga Pag-uswag Karon

4, 5. Sugod sang 1919, ano nga hilikuton ang ginsugdan sang hinaplas nga mga Cristiano, kag ngaa isa gid ini ka daku nga hilikuton?

⁴ Sang 1919, tion na nga painon ang putli nga Cristiano nga trigo gikan sa mga gamhon. Nahibal-an sang hinaplas nga mga Cristiano nga ang daku nga sugo ni Jesus naaplikar gihapon. Nagpati gid sila nga nagakabuhi sila sa “katapusan nga mga adlaw” kag nahibaluan nila ang tagna ni Jesus: “Iwali ining maayong balita sang ginharian sa bug-os nga kalibutan, subong nga saksi sa tanan nga kapungsuran; kag ugaling magaabot ang katapusan.” (2 Timoteo 3:⁠1; Mateo 24:14) Huo, nahibaluan nila nga madamo gid sing hilikuton.

⁵ Apang, kaangay sa mga disipulo sang 33 C.⁠E., ang hinaplas nga mga Cristiano nag-atubang sing daku gid nga hilikuton. Pila lamang sila ka libo sa pila lamang ka pungsod. Paano nila mabantala ang maayong balita “sa bug-os nga kalibutan”? Dumduma, ang populasyon sang duta nagdamo halin sa ayhan 300 milyones sang panahon sang mga Cesar tubtob sa halos 2 bilyones pagkatapos sang una nga bug-os kalibutan nga inaway. Kag sa bug-os nga ika-20 nga siglo, padayon ini nga nagdamo sing madasig.

6. Ano ang nahimo nga pag-uswag sa pagpalapnag sing maayong balita sang katuigan 1930?

 ⁶ Walay sapayan sini, ginsugdan sang hinaplas nga mga alagad ni Jehova, kaangay sa ila mga kauturan sang unang siglo, ang hilikuton nga gintangdo sa ila nga may bug-os nga pagtuo kay Jehova, kag ang iya espiritu kaupod nila. Sang tungatunga nga bahin sang katuigan 1930, mga 56,000 ka ebanghelisador ang nagbantala sing kamatuoran sang Biblia sa 115 ka kadutaan. Daku na nga hilikuton ang nahimo, apang daku pa ang dapat himuon.

7. (a) Anong bag-o nga hangkat ang gin-atubang sang hinaplas nga mga Cristiano? (b) Paagi sa bulig sang “iban nga mga karnero,” ano nga pag-uswag ang nahimo sa hilikuton nga pagtipon tubtob karon?

⁷ Nian, ang mas madalom nga paghangop tuhoy sa identidad sang “dakung kadam-an” nga ginsambit sa Bugna 7:9 naghatag sing bag-o nga hangkat kag nagpasalig man sing bulig sa mapisan nga mga Cristiano. Ang di-maisip nga kadam-an sang ‘iban nga mga karnero,’ mga tumuluo nga may dutan-on nga paglaum, dapat tipunon “gikan sa tagsa ka pungsod, gikan sa tanan nga kabikahan kag katawhan kag hambal.” (Juan 10:16) ‘Ginaalagad nila ang Dios sa adlaw kag gab-i.’ (Bugna 7:15) Nagakahulugan ini nga magabulig sila sa pagbantala kag pagpanudlo nga hilikuton. (Isaias 61:5) Gani, nalipay gid ang hinaplas nga mga Cristiano nga makita ang pagdamo sang mga ebanghelisador sing linibolibo kag sing minilyon. Sang tuig 2003, isa ka bag-o nga kataason nga 6,429,351 ang nagpakigbahin sa hilikuton nga pagbantala​—⁠ang kalabanan sa ila katapo sang dakung kadam-an.⁠ * Nagapasalamat gid ang hinaplas nga mga Cristiano sa sini nga bulig, kag ang iban nga mga karnero nagapasalamat sa pribilehiyo nga buligan ang ila hinaplas nga mga kauturan.​—⁠Mateo 25:34-​40.

8. Ano ang reaksion sang mga Saksi ni Jehova sa tuman nga pag-ipit sa ila sang ikaduha nga bug-os kalibutan nga inaway?

⁸ Sang nangin athagon liwat ang trigo nga klase, nagpakig-away sing lakas si Satanas batok sa sini. (Bugna 12:17) Ano ang iya reaksion sang nagtuhaw ang dakung kadam-an? Tuman nga kasingki! Maduhaduhaan pa bala naton nga sia ang sa likod sang bug-os kalibutan nga pagsalakay sa matuod nga pagsimba nga natabo sang ikaduha nga bug-os kalibutan nga inaway? Sa magtimbang nga bahin sang inaway, gin-ipit gid ang mga Cristiano. Madamo nga mga kauturan ang nag-antos sing grabe nga mga pagtilaw, ang iban napatay tungod sa ila pagtuo. Apang, ginpalanog nila ang pinamulong sang salmista: “Sa Dios, nga ginadayaw ko ang iya pulong, sa Dios nagsalig ako nga walay kahadlok. Ano bala ang mahimo sa akon sang unod?” (Salmo 56:⁠4; Mateo 10:28) Ang hinaplas nga mga Cristiano kag ang iban nga mga karnero, nga ginpabakod sang espiritu ni Jehova, nanindugan sing malig-on. (2 Corinto 4:7) Bilang resulta, “ang pulong sang Dios nagtubo.” (Binuhatan 6:7) Sang 1939, sang nagdabdab ang inaway, 72,475 ka matutom nga mga Cristiano ang nagreport nga nagpakigbahin sa hilikuton nga pagbantala. Apang, ginpakita sang indi kompleto nga report sang 1945, ang tuig nga natapos ang inaway, nga 156,299 ka aktibo nga mga Saksi ang nagpalapnag sing maayong balita. Isa gid ka kalutusan para kay Satanas!

9. Anong bag-o nga mga eskwelahan ang ginpahibalo sadtong Bug-os Kalibutan nga Inaway II?

⁹ Maathag nga ang kinagamo sang ikaduha nga bug-os kalibutan nga inaway wala nagpaduhaduha sa mga alagad ni Jehova nga ang hilikuton nga pagbantala matuman. Sa pagkamatuod, sang 1943, sang nagalapuyot ang inaway, ginpahibalo ang duha ka bag-o nga eskwelahan. Ang isa, nga ginatawag karon nga Teokratikong Eskwelahan Para sa Ministeryo, gindesinyo nga hiwaton sa tanan nga kongregasyon agod maghanas sa indibiduwal nga mga Saksi sa pagbantala kag sa paghimo sing mga disipulo. Ang isa pa, ang Watchtower Bible School of Gilead, para sa paghanas  sa mga misyonero nga magapasangkad sa hilikuton nga pagbantala sa iban nga mga pungsod. Huo, sang matapos ang inaway, ang matuod nga mga Cristiano handa para sa dugang pa nga hilikuton.

10. Paano nakita ang kakugi sang katawhan ni Jehova sang tuig 2003?

¹⁰ Kag daku gid nga hilikuton ang ila nahimo! Bangod nahanas sa Teokratikong Eskwelahan Para sa Ministeryo, ang tanan​—⁠bata kag tigulang, ginikanan kag kabataan, bisan ang maluya​—⁠nakigbahin kag padayon nga nagapakigbahin sa pagtuman sa daku nga sugo ni Jesus. (Salmo 148:​12, 13; Joel 2:​28, 29) Sang tuig 2003, sa promedyo kada bulan, 825,185 ang nagpakita sing pagkahilingagawon paagi sa pagpakigbahin, sing temporaryo ukon sing padayon, sa payunir nga pag-alagad. Sa amo man nga tuig, ang mga Saksi ni Jehova naghinguyang sing 1,234,796,477 ka oras sa pagpakighambal sa iban tuhoy sa maayong balita sang Ginharian. Pat-od gid nga nalipay si Jehova sa kakugi sang iya katawhan!

Sa mga Latagon sa Luwas

11, 12. Ano nga mga halimbawa ang nagapakita sing maayo nga hinimuan sang mga misyonero?

¹¹ Sa sulod sang tinuig, ang mga gradwado sa Gilead kag, sining karon lang, ang mga gradwado sa Ministerial Training School nakahimo sing talalupangdon nga rekord. Sa Brazil, halimbawa, wala pa 400 ang mga manugbantala sang nag-abot ang una nga mga misyonero sang 1945. Ini nga mga misyonero kag ang mga misyonero nga nagsunod sa ila nagpanghikot sing lakas upod sa ila makugi nga mga kauturan sa Brazil, kag ginpakamaayo gid ni Jehova ang ila mga panikasog. Makalilipay gid para kay bisan sin-o nga nakadumdom sadtong mga adlaw nga makita nga ang Brazil nagreport sing bag-o nga kataason nga 607,362 sang 2003!

¹² Binagbinaga ang Japan. Antes sang ikaduha nga bug-os kalibutan nga inaway, may yara mga isa ka gatos ka manugbantala sang Ginharian sa sini nga pungsod. Sang panahon sang inaway, nagbuhin ang ila kadamuon bangod sang mapintas nga paghingabot, kag sang matapos ang inaway, pila lamang ka Saksi ang aktibo gihapon sa espirituwal kag sa pisikal. (Hulubaton 14:32) Sang 1949, yadtong pila ka talalupangdon nga mga naghupot sing integridad pat-od nga nalipay gid sa pag-abiabi sa nahauna nga 13 ka ginhanas sa Gilead nga mga misyonero, kag madali nga nagsuod ang mga misyonero sa ila mapagsik, maabiabihon nga Hapones nga mga kauturan. Pagligad sang kapin sa 50 ka tuig, sang tuig 2003, ang Japan nagreport sing kataason nga 217,508 ka manugbantala! Ginpakamaayo gid ni Jehova ang iya katawhan sa amo nga pungsod. May kaangay man sini nga mga report gikan sa madamo iban pa nga mga pungsod. Ang mga nagbantala sa mga teritoryo sa luwas nakabulig sing daku sa pagpalapnag sing maayong balita, amo nga sang 2003 nabatian ini sa 235 ka pungsod, isla, kag mga teritoryo sa bug-os nga kalibutan. Huo, ang dakung kadam-an nagagikan sa “tagsa ka pungsod.”

“Gikan sa Tanan nga Kabikahan kag Katawhan kag Hambal”

13, 14. Sa anong paagi nga ginpakita ni Jehova nga importante ang pagbantala sing maayong balita sa “tanan nga . . . hambal”?

¹³ Ang una nga ginreport nga milagro pagkatapos nga ginhaplasan ang mga disipulo sing balaan nga espiritu sang Pentecostes 33 C.⁠E. amo ang ila paghambal sing nanuhaytuhay nga pinamulong sa nagtipon nga kadam-an. Ang tanan nga nakabati sa ila mahimo nga nagahambal sing lenguahe nga ginagamit sa madamo nga pungsod, ayhan sing Griego. Bangod “mainampuon nga mga tawo,” mahimo nga nahangpan man nila ang Hebreo nga mga serbisyo sa templo. Apang nakuha gid ang ila igtalupangod sang nabatian nila ang maayong balita sa lenguahe nga nahibaluan nila kutob sa pagkabata.​—⁠Binuhatan 2:​5, 7-​12.

¹⁴ Madamo man nga lenguahe karon ang  ginagamit sa hilikuton nga pagbantala. Gintagna nga ang dakung kadam-an magagikan indi lamang sa mga pungsod kundi sa “kabikahan kag katawhan kag hambal.” Nahisanto sa sini, si Jehova nagtagna paagi kay Zacarias: “Ang napulo ka tawo gikan sa tanan nga hambal sang mga pungsod magabuyot sang sidsid sang isa ka Judiyo, nga nagasiling, ‘Magaupod kami sa inyo, kay nabatian namon nga ang Dios nagaupod sa inyo.’” (Zacarias 8:23) Bisan pa ang mga Saksi ni Jehova wala na sing dulot nga mga hambal, nahibaluan nila nga importante ang pagtudlo sa mga tawo sa ila pinulungan.

15, 16. Paano gin-atubang sang mga misyonero kag sang iban pa ang mga kabudlayan sa pagbantala sa tumandok nga mga lenguahe?

¹⁵ Matuod, pila lamang karon ka lenguahe ang lapnag gid nga ginagamit, subong sang Ingles, Pranses, kag Kinatsila. Apang, ang mga nagbiya sa ila dutang natawhan agod mag-alagad sa iban nga mga pungsod nagtinguha nga magtuon sing lokal nga mga lenguahe agod mapaambit sing maayo ang maayong balita sa mga “kapid-an nga gintangduan sa kabuhing walay katapusan.” (Binuhatan 13:48) Mahimo nga mabudlay ini. Sang ang mga kauturan sa pungsod sang Tuvalu sa Bagatnan nga Pasipiko nagkinahanglan sang mga publikasyon sa ila tumandok nga hambal, ang isa sa mga misyonero nagbaton sini nga hilikuton agod malab-ot ini nga tulumuron. Bangod wala sing diksionaryo nga magamit, naghimo sia sing listahan sang Tuvaluan nga mga tinaga upod ang kahulugan sini. Sang ulihi, ginbalhag ang libro nga Mahimu Ka Mabuhi sing Dayon sa Paraiso sa Duta⁠ * sa Tuvaluan nga lenguahe. Sang mag-abot ang mga misyonero sa Curaçao, wala sing literatura sa Biblia kag wala sing diksionaryo sa tumandok nga lenguahe, nga Papiamento. May daku man nga di-paghisantuanay kon paano isulat ang lenguahe. Walay sapayan sini, sa sulod sang duha ka tuig nga nag-abot ang nahauna nga mga misyonero, ang una nga Cristianong tract sa Biblia ginbalhag sa amo nga hambal. Sa karon, ang Papiamento isa sa 133 ka lenguahe nga ginabalhag Ang Lalantawan sing dungan sa Ingles.

¹⁶ Sa Namibia, wala sing makita nga tumandok nga Saksi ang una nga mga misyonero agod magbulig sa ila sa pagbadbad. Dugang pa, ang isa ka lokal nga lenguahe, nga Nama, wala sing mga tinaga para sa mga ideya nga kinaandan sa aton mga publikasyon, subong sang “himpit.” Ang isa ka misyonero nagreport: “Para sa pagbadbad panguna ko nga gingamit ang mga manunudlo sa eskwelahan nga nagatuon sing Biblia. Bangod may diutay na sila nga nahibaluan sa kamatuoran nagahinguyang ako sing tion upod sa ila agod mapat-od nga ang tagsa ka dinalan sibu.” Walay sapayan sini, ang tract nga Kabuhi sa Bag-ong Kalibutan nabadbad sang ulihi sa apat ka lenguahe sa Namibia. Sa karon, Ang Lalantawan ginabalhag sing regular sa Kwanyama kag Ndonga.

17, 18. Ano nga mga hangkat ang gin-atubang sa Mexico kag sa iban pa nga mga pungsod?

¹⁷ Sa Mexico, ang panguna nga lenguahe amo ang Kinatsila. Apang, antes mag-abot ang mga Katsila, madamo nga mga lenguahe ang ginahambal  didto, kag pila sini gihapon ang ginagamit karon. Gani, ang mga literatura sang mga Saksi ni Jehova ginabalhag karon sa pito ka lenguahe sa Mexico kag subong man sa Mexican Sign Language. Ang Ministeryo sa Ginharian sa Maya nga lenguahe amo ang una nga may petsa nga publikasyon sa American Indian nga lenguahe. Sa pagkamatuod, pila ka libo nga Maya, Aztec, kag iban pa, ang nalakip sa 572,530 ka manugbantala sang Ginharian sa Mexico.

¹⁸ Sining karon lang, minilyon ang nagpalagyo sa iban nga mga pungsod subong mga refugee, ukon nagsaylo sila bangod sang kapigaduhon. Bilang resulta, madamo na nga pungsod karon ang may malapad nga teritoryo sang dumuluong nga mga lenguahe. Gin-atubang sang mga Saksi ni Jehova ang hangkat. Sa Italya, halimbawa, may mga kongregasyon kag mga grupo sa 22 ka lenguahe wala labot sa Italyano. Agod mabuligan ang mga kauturan sa pagbantala sa mga tawo nga nagahambal sing tuhay nga lenguahe, gin-organisar sining karon lang ang mga klase sa pagtudlo sing 16 ka lenguahe, pati na ang Italian Sign Language. Sa madamo iban pa nga mga pungsod, nagapanikasog man ang mga Saksi ni Jehova agod malab-ot ang madamo nga imigrante nga populasyon. Huo, paagi sa bulig ni Jehova, ang dakung kadam-an nagagikan gid sa madamo, sa madamo nga mga grupo sang lenguahe.

“Sa Bug-os nga Duta”

19, 20. Anong mga pinamulong ni Pablo ang nagakatuman sing talalupangdon karon? Ipaathag.

¹⁹ Sang unang siglo, si apostol Pablo nagsulat: “Wala bala sila makabati? Huo sa pagkamatuod; kay ‘Ang ila tingog naglapnag sa bug-os nga duta, kag ang ila mga pulong tubtob sa mga ukbong sang kalibutan.’” (Roma 10:18) Kon matuod ini sang unang siglo, labi pa gid ini nga matuod karon! Minilyon​—⁠ayhan sing kapin pa sa bisan anong tion sa maragtas​—⁠ang nagasiling: “Pakamaayuhon ko ang GINUO sa tanan nga tion; ang iya pagdayaw mangin sa akon baba sing dalayon.”​—⁠Salmo 34:1.

²⁰ Dugang pa, ang hilikuton wala nagahinay. Ang kadamuon sang mga manugbantala sang Ginharian padayon nga nagadamo. Madamo pa nga mga oras ang ginahinguyang sa hilikuton nga pagbantala. Minilyon ka pagduaw liwat kag ginatos ka libo ka pagtuon sa Biblia ang ginahiwat. Kag ang mga bag-uhan padayon nga nagapakita sing interes. Sang nagligad nga tuig, isa ka bag-o nga kataason nga 16,097,622 ang nagtambong sa pagsaulog sa Memoryal sang kamatayon ni Jesus. Maathag nga madamo pa nga hilikuton ang dapat himuon. Kabay nga padayon naton nga ilugon ang malig-on nga integridad sang aton mga kauturan nga nagbatas sing mabaskog nga paghingabot. Kag kabay nga ipakita naton ang kakugi sang tanan naton nga mga kauturan nga kutob sang 1919 naggamit sang ila kaugalingon sa pag-alagad kay Jehova. Kabay nga ang tanan padayon nga magpalanog sang ambahanon sang salmista: “Ang tagsa ka butang nga may ginhawa magdayaw sa GINUO! Dayawa ninyo ang GINUO!​—⁠Salmo 150:6.

[Mga nota]

Mapaathag Mo Bala?

• Ano nga hilikuton ang ginsugdan sang mga kauturan sang 1919, kag ngaa isa ini ka hangkat?

• Sin-o ang gintipon agod magbulig sa hilikuton nga pagbantala?

• Ano nga rekord ang nahimo sang mga misyonero kag sang iban pa nga nag-alagad sa mga pungsod sa luwas?

• Ano nga ebidensia ang makutlo mo agod ipakita nga ginapakamaayo ni Jehova ang hilikuton sang iya katawhan karon?

[Mga Pamangkot sa Pagtinuon]

 [Tsart sa pahina 18-21]

2003 SERVICE YEAR REPORT OF JEHOVAH’S WITNESSES WORLDWIDE

 (Tan-awa ang bound volume)

[Mga retrato sa pahina 14, 15]

Ang kagamo sang ikaduha nga bug-os kalibutan nga inaway wala nagpaduhaduha sa mga Cristiano nga ibantala ang maayong balita

[Credit Line]

Explosion: U.⁠S. Navy photo; others: U.⁠S. Coast Guard photo

[Retrato sa pahina 16, 17]

Ang dakung kadam-an magagikan sa tanan nga kabikahan kag hambal