Kay Sin-o mga Pangako ang Imo Masaligan?

“ANG iya mga pangako, kaangay niya sadto, daku gid; apang ang iya mihora, kaangay niya karon, wala.”​—King Henry the Eighth, ni William Shakespeare.

Ang daku gid nga mga pangako nga ginpatuhuyan ni Shakespeare amo ang iya sadto sang Ingles nga kardinal nga si Thomas Wolsey, nga may daku nga politikal nga impluwensia sa Inglaterra sang ika-16 nga siglo. Makasiling ang iban nga ang mga tinaga ni Shakespeare mapatuhoy man sa kalabanan nga mga pangako nga nabatian nila karon. Sa tion kag tion, madamo ang ginapangako sa mga tawo, apang pila lang ang nagakatuman. Gani, indi mabudlay hangpon kon ngaa nagapangduhaduha sila sa bisan ano nga pangako.

Madamo nga Kalugaw-an

Halimbawa, sa tion sang makakulugmat nga inaway sa Balkan sang dekada 90, ang banwa sang Bosnia nga Srebrenica gindeklarar sang United Nations Security Council nga “isa ka luwas sa katalagman nga lugar.” Ini nga garantiya sang internasyonal nga komunidad daw masaligan. Abi sang linibo ka refugee nga Muslim sa Srebrenica masaligan ini. Apang, sang ulihi, nangin walay pulos ang pangako para sa isa ka luwas-sa-katalagman nga dalangpan. (Salmo 146:⁠3) Sang Hulyo 1995, mahapos nga naagaw sang mga nagsalakay ang banwa gikan sa tropa sang Nasyones Unidas. Kapin sa 6,000 ka Muslim ang wala na makita, kag indi magkubos sa 1,200 ka Muslim nga sibilyan ang ginpatay.

Puno sing napaslawan nga mga pangako ang tagsa ka aspekto sang kabuhi. Nabatyagan sang mga tawo nga ginatonto lang sila sang “madamo nga di-matuod kag nagapatalang nga mga pasayod” nga nagabaha karon. Nalugaw-an sila sa “napaslawan nga mga pangako sang nagakampanya nga madamo nga politiko.” (The New Encyclopædia Britannica, Tomo 15, pahina 37) Ang ginasaligan nga relihioso nga mga lider nga nangako sa pag-atipan sang ila panong nag-abuso sa ila sa makangilil-ad gid nga paagi. Bisan sa mga propesyon sang edukasyon kag medisina​—nga dapat mangibabaw ang kaluoy kag pag-ulikid sa iban​—ginguba sang iban ang pagsalig sa ila kag gin-abusuhan ukon ginpatay pa gani ang ila mga ginaatipan. Indi makatilingala kon ngaa ginapaandaman kita sang Biblia nga indi magsalig sa tagsa ka pulong!​—Hulubaton 14:15.

 Mga Pangako nga Ginatuman

Siempre pa, madamo nga tawo ang nagatuman sang ila pangako, kon kaisa daku gid ang bili sang pagtuman sini sa ila kaugalingon. (Salmo 15:4) Ang ila pangako isa ka katipan, kag ginatuman nila ini. Sinsero ang iban nga tumanon ang ila mga pangako kag maayo gid ang ila tuyo. Handa sila nga tumanon ang ila pangako apang indi lang gid nila ini mahimo. Bisan ang pinakamaayo nga mga plano mahimo mapaslawan bangod sang mga sirkunstansia.​—Manugwali 9:​11.

Bisan ano man ang rason, ang realidad amo nga mabudlay para sa madamo nga tawo ang magsalig sa mga pangako ni bisan sin-o. Gani makapamangkot kita: May mga pangako bala nga masaligan naton? Huo. Masaligan naton ang mga pangako nga masapwan sa Pulong sang Dios, ang Biblia. Ngaa indi pag-usisaon ang masunod nga artikulo tuhoy sini? Makahinakop ka, subong nga minilyon ang nakahinakop na, nga masaligan gid naton ang mga pangako sang Dios.

[Credit Line sang retrato sa pahina 3]

AP Photo/Amel Emric