Ang Panihapon sang Ginuo—Paano Ini Ginasaulog?

GINAPAATHAG ang pagsaulog sa Panihapon sang Ginuo, ang Cristianong si apostol Pablo nagsulat: “Ginbaton ko sa Ginuo ang ginpalaton ko man sa inyo, nga si Ginuong Jesus sang gab-i nga gintugyan sia nagkuha sing tinapay, kag sang nakapasalamat sia, gintipiktipik niya ini, kag nagsiling, ‘Ini amo ang akon lawas nga ginatipiktipik tungod sa inyo. Himua ini sa handumanan nakon.’ Sa amo man nga bagay ang tagayan, sa tapos ang panihapon, nga nagasiling, ‘Ini nga tagayan amo ang bag-ong katipan sa akon dugo. Himua ini, sa masunson nga pag-inom ninyo sini, sa handumanan nakon.’ Kay sa masunson nga nagakaon kamo sining tinapay kag nagainom sa tagayan, ginabantala ninyo ang kamatayon sang Ginuo tubtob nga magkari sia.”​​—⁠⁠1 Corinto 11:23-​26.

Suno sa ginsiling ni Pablo, ginsugdan ni Jesus ang Panihapon sang Ginuo “sang gab-i nga gintugyan” ni Judas Iscariote si Jesus sa Judiyong mga lider sang relihion nga nag-ipit sa mga Romano nga ilansang si Cristo. Ini nga panihapon natabo sang gab-i sang Huebes, Marso 31, 33 C.⁠E. Napatay si Jesus sa usok sang pag-antos sang Biernes sang hapon, Abril 1. Bangod ang mga adlaw sang Judiyong kalendaryo nagasugod sa gab-i sang isa ka adlaw tubtob sa gab-i sang masunod nga adlaw, ang Panihapon sang Ginuo kag ang kamatayon ni Jesucristo natabo sa pareho nga adlaw​​—⁠⁠Nisan 14, 33 C.⁠E.

Ang mga umalambit sa tinapay kag alak dapat padayon nga ‘maghimo sini’ sa handumanan ni Jesus. Suno sa isa ka pagbadbad, si Jesus nagsiling: “Himua ini subong memoryal sa akon.” (1 Corinto 11:​24, The Jerusalem Bible) Ang Panihapon sang Ginuo ginatawag man nga Memoryal sang kamatayon ni Cristo.

Ngaa Dapat Saulugon ang Kamatayon ni Jesus?

Ang sabat matigayon paagi sa paghangop sa kahulugan sang kamatayon ni Jesus. Si Jesus napatay subong panguna nga tagsakdag sang pagkasoberano ni Jehova. Sa amo, ginpamatud-an niya nga butigon si Satanas sa pagsumbong nga ginaalagad lamang sang mga tawo ang Dios bangod sang kakagod. (Job 2:​1-5; Hulubaton 27:11) Paagi sa iya kamatayon subong himpit nga tawo, ginhatag man ni Jesus ang “iya kabuhi nga gawad sang madamo.” (Mateo 20:28) Sang nagpakasala si Adan batok sa Dios, nadula niya ang himpit nga kabuhi kag ang mga paglaum sini. Apang “ginhigugma gid sang Dios ang kalibutan [sang katawhan] sa bagay nga ginhatag niya ang iya  bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Isa pa, “ang bayad sang sala kamatayon, apang ang bunayag nga dulot sang Dios kabuhi nga walay katapusan kay Cristo Jesus nga aton Ginuo.”​​—⁠⁠Roma 6:23.

Busa, ang kamatayon ni Jesucristo nagadalahig sang duha ka pinakadaku nga pagpahayag sang gugma​​—⁠⁠ang daku nga gugma nga ginpakita ni Jehova sa katawhan paagi sa paghatag sa iya Anak kag ang masinakripisyuhon nga gugma nga ginpakita ni Jesus sa katawhan paagi sa kinabubut-on nga paghatag sang iya tawhanon nga kabuhi. Ang Memoryal sang kamatayon ni Jesus nagapadaku sining duha ka pagpahayag sang gugma. Bangod kita ang nagbaton sini nga gugma, indi bala dapat nga ipakita naton ang aton pagpasalamat sa sini? Ang isa ka paagi sa paghimo sini amo ang pagtambong sa pagsaulog sa Panihapon sang Ginuo.

Ang Kahulugan sang Tinapay kag Alak

Sang ginsugdan ni Jesus ang Panihapon sang Ginuo, naggamit sia sing tinapay kag isa ka kopa sang pula nga alak subong mga emblema, ukon mga simbulo. Ginkuha ni Jesus ang tinapay, kag “sang nakapasalamat sia, gintipiktipik niya ini, kag nagsiling, ‘Ini [nga tinapay] amo ang akon lawas nga ginatipiktipik tungod sa inyo.’” (1 Corinto 11:24) Ang tinapay dapat tipiktipikon agod mapanagtag kag kaunon bangod medyo mahagpok ini nga himo sa harina kag tubig nga wala sing tapay, ukon lebadura. Sa Kasulatan, ang tapay nagasimbulo sang sala. (Mateo 16:​11, 12; 1 Corinto 5:​6, 7) Si Jesus wala sing sala. Busa, ang iya himpit nga tawhanon nga lawas nagakaigo gid nga halad nga gawad para sa katawhan. (1 Juan 2:​1, 2) Nagakaigo gid nga ang tinapay nga gingamit nga simbulo sang wala sala nga undanon nga lawas ni Cristo wala sing tapay!

Nagpasalamat man si Jesus para sa kopa sang wala simbog nga pula nga alak kag nagsiling: “Ini nga tagayan amo ang bag-ong katipan sa akon dugo.” (1 Corinto 11:25) Ang pula nga alak sa kopa nagasimbulo sa dugo ni Jesus. Subong nga ang dugo sang ginhalad nga mga baka kag kanding nagpalig-on sa Kasuguan nga katipan sa ulot sang Dios kag sang pungsod sang Israel sang 1513 B.⁠C.⁠E., ang dugo ni Jesus nga gin-ula sa kamatayon nagpalig-on man sa bag-o nga katipan.

Sin-o ang Magaambit?

Agod mahibaluan kon sin-o ang nagakaigo nga mag-ambit sa mga emblema sa Memoryal, dapat mahangpan naton kon ano ang bag-o nga katipan kag kon sin-o ang mga bahin sini. Ang Biblia nagasiling: “‘Yari karon, nagaabot ang mga adlaw, nagasiling ang GINUO nga magahimo ako sing bag-ong katipan upod sa panimalay sang Israel kag upod sa panimalay sang Juda . . . Ibutang ko ang akon kasuguan sa sulod nila, kag isulat ko ini sa ila tagipusuon; kag ako mangin ila Dios, kag sila mangin akon katawhan. . . . Patawaron ko ang kalautan nila, kag indi na pagdumdumon ang ila sala.’”​​—⁠⁠Jeremias 31:31-​34.

Bangod sang bag-o nga katipan, mahimo matigayon ang pinasahi nga kaangtanan kay Jehova nga Dios. Paagi sa sining katipan, ang isa ka grupo sang mga indibiduwal nangin iya katawhan kag sia nangin ila Dios. Ang kasuguan ni Jehova ginsulat sa sulod nila, sa ila tagipusuon, kag bisan ang indi sirkunsidado sa pisikal nga mga Judiyo makasulod sa bag-ong katipan nga kaangtanan sa Dios. (Roma 2:29) Ang manunulat sang Biblia nga si Lucas nagsiling tuhoy sa katuyuan sang Dios nga ‘duawon ang mga Gentil, sa pagkuha sa ila sing katawhan sa iya ngalan.’ (Binuhatan 15:14) Suno sa 1 Pedro 2:​10, “sa nagligad nga tion indi [sila] katawhan apang karon katawhan [sila] sang Dios.” Ginapatuhuyan sila sang Kasulatan subong “Israel sang Dios,” buot silingon, espirituwal nga Israel. (Galacia 6:​16; 2 Corinto 1:21) Kon amo, ang bag-o nga katipan isa ka katipan  sa ulot ni Jehova nga Dios kag sang espirituwal nga Israel.

Sa katapusan nga gab-i upod sa iya mga disipulo, si Jesus mismo nakigkatipan man sa ila. “Nagapakigkatipan ako sa inyo,” siling niya sa ila, “subong nga ang akon Amay nagpakigkatipan sa akon, para sa isa ka ginharian.” (Lucas 22:​29, NW) Amo ini ang Ginharian nga katipan. Ang kadamuon sang di-himpit nga mga tawo nga nangin bahin sang Ginharian nga katipan 144,000. Pagkatapos mabanhaw pakadto sa langit, magagahom sila upod ni Cristo subong mga hari kag mga saserdote. (Bugna 5:​9, 10; 14:​1-4) Sa amo, ang mga nakigbahin sa bag-o nga katipan upod kay Jehova nga Dios mga bahin man sang Ginharian nga katipan upod kay Jesucristo. Sila lamang ang nagakaigo nga mag-ambit sa mga emblema sang Panihapon sang Ginuo.

Paano ang mga may kinamatarong sa pag-ambit sa mga emblema sa Memoryal nakahibalo nga may pinasahi sila nga kaangtanan sa Dios kag masigkamanunubli sila ni Cristo? Si Pablo nagpaathag: “Ang [balaan nga] Espiritu gid nagasaksi upod sa aton espiritu [aton disposisyon sa hunahuna] nga mga anak kita sang Dios, kag karon nga mga anak, nian mga manunubli, mga manunubli sang Dios kag mga masigkamanunubli ni Cristo, kon matuod nga nagaantos kita kaupod niya.”​​—⁠⁠Roma 8:​16, 17.

Paagi sa iya balaan nga espiritu, ukon aktibo nga puersa, ginhaplasan sang Dios ang mga masigkamanunubli ni Cristo. Sa amo, mapat-od nila nga mga manunubli sila sang Ginharian. Nagahatag ini sa hinaplas nga mga Cristiano sing langitnon nga paglaum. Ginatamod nila nga naaplikar sa ila ang tanan nga ginasiling sang Biblia tuhoy sa langitnon nga kabuhi. Dugang pa, handa sila nga isakripisyo ang tanan nga butang may kaangtanan sa dutan-on nga kabuhi, pati na ang kabuhi sa duta kag ang tanan nga tawhanon nga kaangtanan. Bisan pa nahisayran sang hinaplas sing espiritu nga mga Cristiano nga ang kabuhi sa dutan-on nga Paraiso mangin makalilipay, indi ini ang ila ginalauman. (Lucas 23:43) Indi bangod sa sayop nga relihiosong pagtamod kundi subong resulta sang pagpanghikot sang espiritu sang Dios, may yara sila malig-on nga langitnon nga paglaum kag gani nagakaigo nga mag-ambit sa mga emblema sa Memoryal.

Pananglitan indi sigurado ang isa nga bahin sia sang bag-o nga katipan kag sang Ginharian nga katipan. Ano abi kon wala man nagapanaksi sa iya ang espiritu sang Dios nga isa sia ka masigkamanunubli ni Cristo? Kon amo, sayop para sa iya nga mag-ambit sa mga emblema sang Memoryal. Sa pagkamatuod, indi mahamuot ang Dios kon ang isa ka tawo hungod nga nagapresentar sang iya kaugalingon subong isa nga gintawag nga mangin langitnon nga hari kag saserdote kon wala gid sia sing subong sini nga pagtawag.​​—⁠⁠Roma 9:​16; Bugna 22:5.

Daw Ano Kasunson Dapat Ini Saulugon?

Ang kamatayon bala ni Jesus dapat saulugon kada semana ukon ayhan adlaw-adlaw pa gani? Bueno, ginsugdan ni Cristo ang Panihapon sang Ginuo kag di-makatarunganon nga ginpatay sia sang Adlaw sang Paskua. Ginhiwat sing makaisa lamang sa isa ka tuig, sa Nisan 14, ang Paskua nagpahanumdom sang paghilway sa Israel gikan sa pagkaulipon sa Egipto. (Exodo 12:​6, 14; Levitico 23:5) Gani ang kamatayon ni “Cristo nga aton paskua” dapat saulugon lamang sing makaisa kada tuig, indi sing kada semana ukon kada adlaw. (1 Corinto 5:​7, NW) Sa pagsaulog sa Panihapon sang Ginuo, ginasunod sang mga Cristiano ang pamaagi ni Jesus sang ginsugdan niya ini.

Kon amo, ano ang kahulugan sang ginpamulong ni Pablo: “Sa masunson nga nagakaon kamo sining tinapay kag nagainom sa tagayan ginabantala ninyo ang kamatayon sang Ginuo tubtob nga magkari sia”? (1 Corinto 11:26) Sa sini nga teksto naggamit si Pablo sing tinaga nga nagakahulugan sing “sa kada tion nga,” ukon “sa tion nga.”  Sa amo, nagasiling sia nga sa tion nga ang hinaplas nga mga Cristiano mag-ambit sa mga emblema, ginabantala nila ang ila pagtuo sa halad nga gawad ni Jesus.

Ang hinaplas nga mga Cristiano dapat magsaulog sang kamatayon ni Cristo “tubtob nga magkari sia.” Ini nga pagsaulog magapadayon tubtob sa pagkari ni Jesus sa pagbaton sa iya hinaplas nga mga sumulunod pakadto sa langit paagi sa pagkabanhaw sa espiritu nga kabuhi sa tion sang iya “pag-abot” ukon presensia. (1 Tesalonica 4:​14-​17) Nahisanto ini sa pinamulong ni Cristo sa 11 ka matutom nga apostoles: “Kon ako makakadto kag makaaman sa inyo sing duog, magabalik ako kag dalhon ko kamo kaupod nakon, agod nga kon diin ako didto man kamo.”​​—⁠⁠Juan 14:3.

Ano ang Kahulugan Sini sa Imo?

Kinahanglan gid bala nga mag-ambit sa mga emblema sa Memoryal agod makabenepisyo sa halad ni Jesus kag makabaton sing kabuhi nga wala sing katapusan sa duta? Indi. Wala sing ginapahangop sa Biblia nga sa tapos sila mabanhaw sa duta, ang mahinadlukon sa Dios nga mga tawo subong nanday Noe, Abraham, Sara, Isaac, Rebeca, Jose, Moises, kag David magaambit sining mga emblema. Apang, sila kag ang tanan iban pa nga nagahandum sang wala katapusan nga kabuhi sa duta dapat magtuo sa Dios kag kay Cristo kag sa aman ni Jehova nga halad nga gawad ni Jesus. (Juan 3:​36; 14:1) Agod matigayon ang kabuhi nga wala sing katapusan, dapat magtuo ka man sa sini. Ang imo pagtambong sa tuigan nga pagsaulog sa kamatayon ni Cristo magapahanumdom sa imo tuhoy sa sining daku nga halad kag magapatudok pa sang imo pagpasalamat sa sini.

Ginpadaku ni apostol Juan ang importansia sang halad ni Jesus sang nagsiling sia: “Nagasulat ako sa inyo [mga masigkahinaplas] sini agod nga indi kamo makasala; apang kon ang bisan sin-o makasala, may mananabang kita upod sa Amay si Jesucristo nga matarong; kag sia amo ang katumbasan tungod sa aton mga sala, kag indi lamang tungod sa aton kundi man tungod sa mga sala sang bug-os nga kalibutan. (1 Juan 2:​1, 2) Ang mga hinaplas makasiling nga ang halad ni Jesus nagatumbas sa ila mga sala. Apang isa man ini ka halad para sa mga sala sang bug-os nga kalibutan, agod mangin posible ang kabuhi nga wala sing katapusan para sa matinumanon nga katawhan!

Magatambong ka bala sa Abril 4, 2004, sa pagsaulog sa kamatayon ni Jesus? Ini nga pagsaulog hiwaton sang mga Saksi ni Jehova sa bug-os nga kalibutan sa ila mga duog-tilipunan. Kon magtambong ka, magabenepisyo ka sa pagpamati sa isa ka importante katama nga diskurso sa Biblia. Magapahanumdom ini sa imo kon daw ano ka daku ang nahimo ni Jehova nga Dios kag ni Jesucristo para sa aton. Makapaladya man sa espirituwal ang pagtipon upod sa mga tawo nga may daku gid nga pagtahod sa Dios kag kay Cristo kag sa halad nga gawad ni Jesus. Ang okasyon magapabakod sang imo handum nga mabaton ang di-bagay nga kaayo sang Dios, nga nagadul-ong sa kabuhi nga wala sing katapusan. Indi pagtuguti nga may mag-upang sa imo. Magtambong sa sining makalipay nga pagsaulog nga nagapadungog kag nagapahamuot sa aton langitnon nga Amay, si Jehova nga Dios.

[Retrato sa pahina 5]

Ang kamatayon ni Jesus nagadalahig sang duha ka pinakadaku nga pagpahayag sang gugma

[Retrato sa pahina 6]

Ang tinapay nga walay tapay kag ang alak nagakaigo nga mga simbulo sang wala sala nga lawas ni Jesus kag sang iya ginpatulo nga dugo