Ang Katawhan sang Dios Dapat Maghigugma sang Kaayo

“Ano bala ang ginapatuman ni Jehova sa imo kundi ang paghimo sing katarungan kag ang paghigugma sa kaayo kag ang paglakat sing maugdang upod sa imo Dios?”​​—⁠MIQUEAS 6:​8, NW.

1, 2. (a) Ngaa indi kita matingala nga ginapaabot ni Jehova nga ang iya katawhan magpakita sing kaayo? (b) Anong mga pamangkot may kaangtanan sa kaayo ang dapat naton binagbinagon?

SI Jehova isa ka Dios sang kaayo. (Roma 2:⁠4; 11:22) Nagpasalamat gid ang unang mag-asawa nga sanday Adan kag Eva tungod sa kaayo sang Dios! Sa hardin sang Eden, napalibutan sila sang kitaon nga mga tinuga nga nagapamatuod sang kaayo sang Dios sa mga tawo, nga may ikasarang sa pag-agom sini. Kag ang Dios padayon nga nangin mainayuhon sa tanan, bisan sa walay kabalaslan kag malauton nga mga tawo.

² Bangod ginhimo sila sa larawan sang Dios, sarang mapakita sang mga tawo ang diosnon nga mga kinaiya. (Genesis 1:26) Indi katingalahan nga ginapaabot ni Jehova nga magpakita kita sing kaayo. Subong sang ginasiling sa Miqueas 6:​8, ang katawhan sang Dios dapat ‘maghigugma sa kaayo.’ Apang ano ang kaayo? Paano ini naangot sa iban pa nga diosnon nga mga kinaiya? Bangod sarang mapakita sang mga tawo ang kaayo, ngaa ang kalibutan isa ka mapintas kag di-mainabyanon nga duog? Subong mga Cristiano, ngaa dapat kita manikasog sa pagpakita sing kaayo sa aton pagpakig-angot sa iban?

Ano ang Kaayo?

3. Paano mo hatagan kahulugan ang kaayo?

³ Ang kaayo amo ang pagpakita sing aktibo nga interes sa kaayuhan sang iban. Mapakita ini paagi sa mabinuligon nga mga buhat kag mapatugsilingon nga mga pulong. Ang kaayo nagakahulugan sang paghimo sing maayo sa baylo sang paghimo sing malain. Ang mainayuhon nga tawo mainabyanon, malulo, mahinuklugon, kag mabuot. Maalwan sia kag mapatugsilingon sa iban. Si apostol Pablo naglaygay sa mga Cristiano: “Panapti ang inyo kaugalingon sing mapinalanggaon nga gugma nga may kaawa, kaayo, nagapaubos nga panghunahuna, kalulo, kag pagkamainantuson.” (Colosas 3:​12, NW) Kon amo, ang kaayo bahin sang malaragwayon nga panapton sang tagsa ka matuod nga Cristiano.

4. Paano nanguna si Jehova sa pagpakita sing kaayo sa katawhan?

⁴ Si Jehova nga Dios nanguna sa pagpakita sing kaayo. Subong sang ginsiling ni Pablo, “sang ang kaayo kag ang gugma sa tawo sang aton Manluluwas, ang Dios, napahayag” amo nga “ginluwas niya kita paagi sa panghugas nga nagdala sa aton sa kabuhi kag paagi sa pagpabag-o sa aton sang balaan nga espiritu.” (Tito 3:​4, 5, NW) ‘Ginahugasan,’ ukon ginatinluan, sang Dios ang hinaplas nga mga Cristiano sa dugo ni Jesus, buot silingon, ginaaplikar niya ang balor sang halad-gawad ni Cristo tungod sa ila. Ginhimo man sila nga bag-o paagi sa balaan nga espiritu, sa amo nangin ‘bag-o nga tinuga’ subong ginpanganak-sa-espiritu nga mga anak sang Dios. (2 Corinto 5:17) Dugang pa, ang kaayo kag gugma sang Dios ginapakita man sa “dakung kadam-an,” nga ‘naglaba sang ila mga panapton nga malaba kag ginpaputi ini sa dugo sang Kordero.’​​—⁠Bugna 7:​9, 14, NW; 1 Juan 2:​1, 2.

5. Ngaa ang mga ginatuytuyan sang espiritu sang Dios dapat magpakita sing kaayo?

⁵ Ang kaayo bahin man sang bunga sang balaan nga espiritu, ukon aktibo nga kusog, sang Dios. Si Pablo nagsiling: “Ang mga bunga sang espiritu amo ang gugma, kalipay, paghidait, pagkamapinasensiahon, pagkamainayuhon, pagkaayo, pagtuo, kalulo, pagpugong sa kaugalingon. Batok sa sining mga butang wala sing kasuguan.” (Galacia 5:​22, 23, NW) Gani, indi bala dapat nga magpakita man sing kaayo sa iban ang mga ginatuytuyan sang espiritu sang Dios?

Ang Matuod nga Kaayo Indi Kaluyahon

6. San-o ang kaayo isa ka kaluyahon, kag ngaa?

⁶ Ginatamod sang iban ang kaayo subong kaluyahon. Nagabatyag sila nga ang isa ka tawo dapat  mangin matigdas, di-matinahuron pa gani kon kaisa, agod makita sang iban ang iya kabakod. Apang, ang matuod, kinahanglan gid ang kabakod agod mangin tunay nga mainayuhon kag agod malikawan ang pagpakita sing sayop nga kaayo. Sanglit ang matuod nga kaayo bahin sang bunga sang espiritu sang Dios, indi ini isa ka maluya kag nagakompromiso nga panimuot sa sayop nga paggawi. Sa pihak nga bahin, ang sayop nga kaayo isa ka kaluyahon nga ginabangdan sang pagkunsinti sang isa sa sayop nga buhat.

7. (a) Paano si Eli napamatud-an nga mapinatumbayaon? (b) Ngaa ang mga gulang dapat magbantay batok sa sayop nga kaayo?

⁷ Binagbinaga, halimbawa, ang mataas nga saserdote sang Israel nga si Eli. Nagpatumbaya sia sa pagdisiplina sa iya mga anak nga lalaki, nga sanday Ofni kag Finehas, nga nag-alagad subong mga saserdote sa tabernakulo. Bangod indi sila kontento sa bahin sang halad nga ginahatag sa ila sang Kasuguan sang Dios, ginsugo nila ang alagad nga mangayo sing hilaw nga karne gikan sa isa nga nagahalad antes sunugon ang sapay sang halad sa halaran. Ang mga anak nga lalaki ni Eli imoral nga naghulid man sa mga babayi nga nagaalagad sa ganhaan sang tabernakulo. Apang, sa baylo nga pahalinon sanday Ofni kag Finehas sa ila katungdanan, malulo lamang nga ginsaway sila ni Eli. (1 Samuel 2:12-29) Indi katingalahan nga “ang pulong sang GINUO sa sadto nga mga adlaw bilidhon”! (1 Samuel 3:1) Ang Cristianong mga gulang dapat maghalong nga wala sila nagapakita sing sayop nga kaayo sa mga nakasala nga mahimo magbutang sa katalagman sang espirituwalidad sang kongregasyon. Ang matuod nga kaayo indi bulag sa malaut nga mga pulong kag mga buhat nga nagasupak sa mga talaksan sang Dios.

8. Paano nagpakita si Jesus sing matuod nga kaayo?

⁸ Ang aton Huwaran, nga si Jesucristo, wala gid magpakita sing sayop nga kaayo. Sia ang pinakamaayo nga halimbawa sang matuod nga kaayo. Halimbawa, ‘nagbatyag sia sing malum-ok nga pagpalangga sa mga tawo kay napanitan sila kag nagdalangdalang subong sang mga karnero nga walay manugpahalab.’ Ang bunayag-sing-tagipusuon nga mga tawo wala nahadlok sa pagpalapit kay Jesus, kay gindala pa gani nila sa iya ang ila magagmay nga mga kabataan. Hunahunaa lamang ang kaayo kag kaluoy nga ginpakita niya sang ‘ginkugos niya ang mga kabataan kag ginpakamaayo sila.’ (Mateo 9:​36, NW; Marcos 10:13-16) Bisan pa mainayuhon si Jesus, malig-on gid sia sa kon ano ang matarong sa itululok sang iya langitnon nga Amay. Wala gid niya ginkunsinti ang kalautan; may hatag-Dios nga kaisog sia nga pakamalauton ang salimpapaw nga relihioso nga mga lider. Subong sang ginasiling sa Mateo 23:13-26, pila ka beses nga ginsulit niya ang pinamulong: “Kailo kamo, mga escriba kag mga Fariseo, mga salimpapaw!”

Ang Kaayo kag ang Iban Pa nga Diosnon nga mga Kinaiya

9. Paano ang kaayo naangot sa pagkamapinasensiahon kag pagkaayo?

⁹ Ang kaayo naangot sa iban pa nga mga kinaiya nga ginapatubas sang espiritu sang Dios, subong sang pagkamapinasensiahon kag pagkaayo. Sa pagkamatuod, ang tawo nga nagapalambo sing kaayo nagapakita sini nga kinaiya paagi sa pagkamapinasensiahon. Mapailubon sia bisan sa mga di-mainayuhon. Ang kaayo (kindness, sa Ingles) naangot sa pagkaayo (goodness) amo nga masami ini makita sa mabuligon nga mga buhat para sa kaayuhan sang iban. Kon kaisa, ang Griegong tinaga nga  gingamit sa Biblia para sa “kaayo” mahimo mabadbad nga “pagkaayo.” Natingala gid ang mga pagano nga ini nga kinaiya makita sa tunga sang unang mga Cristiano amo nga, suno kay Tertullian, gintawag nila ang mga sumulunod ni Jesus subong ‘mga tawo nga ang panguna nga kinaiya amo ang kaayo.’

10. Paano naangot ang kaayo kag ang gugma?

¹⁰ Ang kaayo naangot sa gugma. Tuhoy sa iya mga sumulunod, si Jesus nagsiling: “Sa sini ang tanan nga tawo makahibalo nga kamo mga gintutun-an ko, kon maghigugmaanay kamo.” (Juan 13:35) Kag tuhoy sini nga gugma, si Pablo nagsiling: “Ang gugma mapinasensiahon kag mainayuhon.” (1 Corinto 13:​4, NW) Ang kaayo naangot man sa gugma sa tinaga nga “mahigugmaon nga kaayo,” nga masami ginagamit sa Kasulatan. Ini ang kaayo nga naghalin sa mainunungon nga gugma. Ang Hebreong nombre nga ginbadbad nga “mahigugmaon nga kaayo” nagalakip sing kapin pa sa mapinalanggaon nga kalulo. Ini ang kaayo nga mahigugmaon nga nagaulikid sa isa ka butang tubtob nga ang katuyuan may kaangtanan sa sini matuman. Ang mahigugmaon nga kaayo, ukon mainunungon nga gugma, ni Jehova ginapakita sa nanuhaytuhay nga mga paagi. Halimbawa, makita ini sa iya mga buhat sang pagluwas kag pag-amlig.​​—⁠Salmo 6:⁠4; 40:11; 143:12.

11. Ano nga pasalig ang ginahatag sa aton sang mahigugmaon nga kaayo sang Dios?

¹¹ Bangod sang mahigugmaon nga kaayo ni Jehova, ang mga tawo naganyat sa iya. (Jeremias 31:3) Kon ang matutom nga mga alagad sang Dios nagakinahanglan sing pagluwas ukon bulig, nahibaluan nila nga magapakita gid sia sing mahigugmaon nga kaayo. Indi ini magapaslaw sa ila. Gani, makapangamuyo sila sing masinaligon, kaangay sang salmista nga nagsiling: “Para sa akon, nagsalig ako sa imo mahigugmaon nga kaayo; magkalipay kuntani ang akon tagipusuon sa imo pagluwas.” (Salmo 13:​5, NW) Sanglit ang gugma sang Dios mainunungon, ang iya mga alagad makasalig sing bug-os sa iya. Ginapasalig sila: “Ang GINUO indi magsikway sang iya katawhan; indi sia magbiya sang iya panublion.”​​—⁠Salmo 94:14.

Ngaa ang Kalibutan Tuman Kapintas?

12. San-o kag paano nagsugod ang mapiguson nga paggahom?

¹² Ang sabat sa sining pamangkot may yara kaangtanan sa natabo sa hardin sang Eden. Sadtong maaga nga bahin sang maragtas sang tawo, ang isa ka espiritu nga tinuga nga nangin mahamkunon kag matinaastaason nagpadugi nga mangin manuggahom sang bug-os nga kalibutan. Subong resulta sang iya padugi, nangin “punuan [sia] sini nga kalibutan,” isa nga tuman ka mapiguson. (Juan 12:31) Nakilal-an sia subong si Satanas nga Yawa, ang mortal nga manugpamatok sang Dios kag sang tawo. (Juan 8:44; Bugna 12:9) Ang iya mahamkunon nga padugi sa pagtukod sing isa ka pagginahom nga katupong sang mainayuhon nga pagginahom ni Jehova nadayag wala madugay sa tapos gintuga si Eva. Busa, ang malain nga paggahom nagsugod sang ginpili ni Adan ang dalanon nga hilway gikan sa paggahom sang Dios, sa amo ginsikway niya sing bug-os ang Iya kaayo. (Genesis 3:1-6) Sa baylo nga mangin bug-os nga hilway, sanday Adan kag Eva aktual nga napaidalom sa mahamkunon kag bugalon nga impluwensia sang Yawa kag nangin mga sakop sang iya paggahom.

13-15. (a) Ano ang pila sa mga resulta sang pagsikway sa matarong nga paggahom ni Jehova? (b) Ngaa ining kalibutan isa ka masingki nga duog?

¹³ Binagbinaga ang pila sa mga resulta. Sanday Adan kag Eva gintabog gikan sa isa ka bahin sang duta nga isa anay ka paraiso. Nagbalhin ang ila kahimtangan gikan sa pagkabuhi sa mabungahon nga parke nga madali makakuha sing mapagros nga utanon kag bungang-kahoy pakadto sa mabudlay nga kahimtangan sa gua sang hardin sang Eden. Ang Dios nagsiling kay Adan: “Bangod nga nagpamati ka sa tingog sang imo asawa, kag nagkaon sang kahoy nga ginsugo ko sa imo, nga nagasiling, ‘Dili ka magkaon sa iya,’ pinakamalaut ang duta bangod sa imo; magakaon ka gikan sa iya nga may pangabudlay sa tanan nga adlaw sang imo kabuhi; magapatubo ini sa imo sing mga sapinit man kag mga ragiwriw.” Ang pagpakamalaut batok sa duta nagkahulugan nga tuman kabudlay na ini pangumahon. Ang mga epekto sang ginpakamalaut nga duta, nga may mga sapinit kag mga ragiwriw, nabatyagan gid sang mga kaliwat ni Adan amo nga ang amay ni Noe, nga si Lamec, naghambal tuhoy sa ‘pagpangabudlay sang ila mga kamot bangod sang duta nga ginpakamalaut sang GINUO.’​​—⁠Genesis 3:17-19; 5:⁠29.

¹⁴ Ginbaylo man nanday Adan kag Eva ang kalinungan  sa kalisdanan. Ang Dios nagsiling kay Eva: “Padamuon ko sing tama ang imo kasakit kag ang imo pagdala; sa kasakit magapanganak ka, apang ang imo handum mangin sa imo bana, kag sia magagahom sa imo.” Sang ulihi, ginpatay sang panganay nga anak nanday Adan kag Eva nga si Cain ang iya manghod nga si Abel.​​—⁠Genesis 3:​16; 4:⁠8.

¹⁵ “Ang bug-os nga kalibutan yara sa gahom sang malauton,” siling ni apostol Juan. (1 Juan 5:19) Kaangay sang manuggahom sini, ginapadayag karon sang kalibutan ang malaut nga mga kinaiya nga nagalakip sang kakagod kag bugal. Indi katingalahan nga ang kalibutan puno sang kasingki kag kapintas! Apang indi amo sini pirme ang mangin kahimtangan. Pat-uron ni Jehova nga magaluntad sa iya Ginharian ang kaayo kag kaawa sa baylo sang kasingki kag kapintas.

Magaluntad ang Kaayo sa Idalom sang Ginharian sang Dios

16. Ngaa ang paggahom sang Dios paagi kay Cristo Jesus makilal-an tungod sa kaayo, kag ano ang ginaobligar sini sa aton nga himuon?

¹⁶ Si Jehova kag ang iya gintangdo nga Hari sang Iya Ginharian, nga si Cristo Jesus, nagapatuman nga ang ila mga sakop makilal-an tungod sa ila kaayo. (Miqueas 6:8) Si Jesucristo naghatag sa aton sing pasiplat kon paano ang pagdumalahan nga gintugyan sa iya sang iya Amay makilal-an tungod sa kaayo. (Hebreo 1:3) Makita ini sa pinamulong ni Jesus nga nagbuyagyag sa butig nga relihiosong mga lider, nga nagpabug-at sa mga tawo sing mabug-at nga mga lulan. Sia nagsiling: “Kari sa akon, tanan kamo nga ginabudlayan kag ginabug-atan, kag papahuwayon ko kamo. Itakod ang akon gota sa inyo, kag magtuon kamo sa akon; kay ako mapainubuson kag malulo sa tagipusuon, kag makakita kamo sing kapahuwayan sa inyo mga kalag. Kay ang akon gota mahulas, kag ang akon lulan mamag-an.” (Mateo 11:28-30) Ginpabug-atan sang tuman kadamo nga relihioso nga mga manuggahom ukon sang iban pa nga sahi sang mga manuggahom sa duta ang mga tawo sing makapalapyo nga mga lulan sang daw wala katapusan nga mga pagsulundan kag ginapasapayanan nga mga katungdanan. Apang, ang ginapatuman ni Jesus sa iya mga sumulunod bagay gid sa ila mga kinahanglanon kag mga ikasarang. Isa gid ini ka makaparepresko kag mahulas nga gota! Wala bala kita napahulag nga ilugon sia sa pagpakita sing kaayo sa iban?​​—⁠Juan 13:15.

17, 18. Ngaa makasalig kita nga ang mga magagahom kaupod ni Cristo sa langit kag ang iya dutan-on nga mga tiglawas magapakita sing kaayo?

¹⁷ Ang talalupangdon nga pinamulong ni Jesus sa iya mga apostoles nagapatalupangod sang daku nga kinatuhayan sang paggahom sang Ginharian sang Dios kag sang paggahom sang tawo. Ang Biblia nagasiling: “Nag-abot man ang kasuayon sa tunga nila [mga disipulo], kon sin-o sa ila ang makabig nga labing daku. Kag nagsiling sia sa ila, ‘Ang mga hari sang mga Gentil nagapakaginuo sa ila; kag ang mga may pagbulut-an sa ila ginatawag nga mga manughimo sing maayo. Apang indi kamo subong sina; kundi ang labing daku sa tunga ninyo mangin subong sang kamanghuran, kag ang pangulo mangin subong sang nagaalagad. Kay sin-o bala ang  daku pa, ang nagalingkod sa pagkaon, ukon ang nagaalagad? Indi bala ang nagalingkod sa pagkaon? Apang ako yari sa tunga ninyo subong sang nagaalagad.’”​​—⁠Lucas 22:24-​27.

¹⁸ Ang tawhanon nga mga manuggahom nagapanikasog sa pagpasad sang ila pagkadaku paagi sa ‘pagpakaginuo’ sa mga tawo kag paagi sa pagpanikasog nga matigayon ang mataas nga mga titulo, daw subong nga ang mga titulo nagahimo sa ila nga mas mataas sangsa ginagahuman nila. Apang nagsiling si Jesus nga ang matuod nga pagkadaku matigayon paagi sa pag-alagad sa iban​​—⁠nga maukod kag padayon nga nagapanikasog sa pag-alagad. Ang tanan nga magagahom kaupod ni Cristo sa langit ukon magaalagad subong iya dutan-on nga mga tiglawas dapat manikasog nga ilugon ang iya halimbawa sang pagkamapainubuson kag kaayo.

19, 20. (a) Paano ginpaalinton ni Jesus ang kasangkaron sang kaayo ni Jehova? (b) Paano naton mailog si Jehova sa pagpakita sing kaayo?

¹⁹ Tan-awon naton ang iban pa nga mahigugmaon nga laygay nga ginhatag ni Jesus. Sa pagpakita kon tubtob sa anong kasangkaron ipakita ang kaayo ni Jehova, si Jesus nagsiling: “Kon kamo maghigugma sa mga nagahigugma sa inyo, ano bala ang pasalamatan sa inyo? Kay bisan pa ang mga makasasala nagahigugma sa mga nagahigugma sa ila. Kag kon maghimo kamo sing maayo sa mga nagahimo sing maayo sa inyo, ano bala ang pasalamatan sa inyo? Kay bisan pa ang mga makasasala nagahimo sing subong. Kag kon kamo magpahulam sa mga may ginapaabot kamo nga batunon, ano bala ang pasalamatan sa inyo? Bisan pa ang mga makasasala nagapahulam sa mga makasasala, sa pagbaton liwat sing amo man nga kadamuon. Apang higugmaa ang inyo mga kaaway, kag himui sila sing maayo, kag magpahulam kamo, nga wala nagapaabot nga ulian; kag ang inyo balos mangin daku, kag mangin anak kamo sang Labing Mataas; kay sia mainayuhon sa mga di-mapasalamaton kag mga malaut. Magmaluluy-on kamo, subong nga ang inyo Amay maluluy-on.”​​—⁠Lucas 6:​32-​36.

²⁰ Ang diosnon nga kaayo indi mahamkunon. Wala ini nagapangayo kag nagapaabot sing balos. Si Jehova mainayuhon nga ‘nagapasubang sang iya adlaw sa mga malauton kag sa mga maayo, kag nagapaulan sa mga matarong kag sa mga di-matarong.’ (Mateo 5:43-45; Binuhatan 14:​16, 17) Bilang  pag-ilog sa aton langitnon nga Amay, wala na naton ginahalitan ang mga di-mapasalamaton kundi ginahimuan naton sila sing maayo, bisan pa ang aton mga kaaway. Paagi sa pagpakita sing kaayo, ginapakita naton kay Jehova kag kay Jesus nga luyag naton magkabuhi sa idalom sang Ginharian sang Dios, diin ang kaayo kag ang iban pa nga diosnon nga mga kinaiya magapangibabaw sa tanan nga tawhanon nga mga kaangtanan.

Ngaa Dapat Kita Magpakita sing Kaayo?

21, 22. Ngaa dapat kita magpakita sing kaayo?

²¹ Para sa isa ka matuod nga Cristiano, ang pagpakita sing kaayo importante gid. Pamatuod ini nga ang espiritu sang Dios nagapanghikot sa aton. Dugang pa, kon ginapakita naton ang matuod nga kaayo, ginailog naton si Jehova nga Dios kag si Cristo Jesus. Ang kaayo ginapatuman man para sa mga tawo nga mangin sakop sang Ginharian sang Dios. Kon amo, dapat naton higugmaon ang kaayo kag tun-an nga ipakita ini.

²² Ano ang pila ka praktikal nga mga paagi nga sarang naton mapakita ang kaayo sa aton adlaw-adlaw nga kabuhi? Binagbinagon ini sa masunod nga artikulo.

Paano Mo Sabton?

• Ano ang kaayo?

• Ngaa ang kalibutan isa ka mapintas kag masingki nga duog?

• Paano naton nahibaluan nga magaluntad ang kaayo sa idalom sang paggahom sang Dios?

• Ngaa ang pagpakita sing kaayo importante para sa mga luyag magkabuhi sa idalom sang Ginharian sang Dios?

[Mga Pamangkot sa Pagtinuon]

[Retrato sa pahina 13]

Ang Cristianong mga gulang nagapanikasog nga mangin mainayuhon sa pagpakig-angot sa panong

[Retrato sa pahina 15]

Ang mahigugmaon nga kaayo ni Jehova indi magapaslaw sa iya mga alagad sa mabudlay nga mga tion

[Mga retrato sa pahina 16]

Si Jehova mainayuhon nga nagapasubang sang adlaw kag nagapaulan sa tanan nga katawhan