Magpakaisog Kaangay ni Jeremias

“Maglaum ka kay Jehova; magpakaisog ka kag pabakura ang imo tagipusuon. Huo, maglaum ka kay Jehova.”​—SALMO 27:14, NW.

1. Anong bugana nga pagpakamaayo ang ginaagom sang mga Saksi ni Jehova?

NAGAPUYO ang mga Saksi ni Jehova sa isa ka espirituwal nga paraiso. (Isaias 11:​6-9) Sa sining magamo gid nga kalibutan, nagabenepisyo sila gikan sa isa ka tumalagsahon nga espirituwal nga kahimtangan upod sa ila mga masigka-Cristiano, nga may paghidait kay Jehova nga Dios kag sa isa kag isa. (Salmo 29:11; Isaias 54:13) Kag nagasangkad ang ila espirituwal nga paraiso. Ang tanan nga “nagahimo sang kabubut-on sang Dios gikan sa tagipusuon” nagapakigbahin sa pagpasangkad sini. (Efeso 6:6) Paano? Paagi sa pagsunod sa mga prinsipio sang Biblia kag paagi sa pagtudlo sa iban nga himuon man ini, sa amo ginaagda nila sila nga maagom man ang bugana nga mga pagpakamaayo sini nga paraiso.​—Mateo 28:19, 20; Juan 15:8.

2, 3. Ano ang dapat batason sang matuod nga mga Cristiano?

² Apang, ang aton pagpuyo sa isa ka espirituwal nga paraiso wala nagakahulugan nga wala kita sing batason nga mga pagtilaw. Indi pa kita himpit kag nagabalatian gihapon, nagatigulang, kag nagakapatay sa ulihi. Dugang pa, ginasaksihan naton ang katumanan sang mga tagna tuhoy sa “katapusan nga mga adlaw.” (2 Timoteo 3:1) Ang mga inaway, krimen, balatian, gutom, kag iban pa nga daku nga mga kabudlayan nagapaantos sa tanan nga katawhan, kag indi puera ang mga Saksi ni Jehova.​—Marcos 13:​3-​10; Lucas 21:10, 11.

³ Luwas pa sini tanan, nakahibalo gid kita nga walay sapayan nga naamligan kita sa sulod sang aton espirituwal nga paraiso, mabaskog nga ginapamatukan kita sa gua sini. Ginpaandaman ni Jesus ang iya mga sumulunod: “Bangod nga kamo indi iya sang kalibutan, kundi ginpili ko kamo gikan sa kalibutan, busa ang kalibutan nagadumot sa inyo. Dumduma ang pulong nga ginsiling ko sa inyo, ‘Ang ulipon indi daku pa sa iya agalon.’ Kon ginhingabot nila ako, hingabuton man nila kamo.” (Juan 15:18-​21) Indi tuhay ang mga kahimtangan karon. Indi gihapon mahangpan ukon wala ginaapresyar sang kalabanan nga mga tawo ang aton paagi sang pagsimba. Subong sang ginpaandam ni Jesus, ginamulay kita, ginayaoyao, ukon ginadumtan pa gani sang iban. (Mateo 10:22) Masami nga kita ang ginapuntariya sang sayop nga mga impormasyon kag makahalalit nga propaganda paagi sa media. (Salmo 109:​1-3) Huo, nagaatubang kita tanan sing makahalangkat nga mga kahimtangan, kag mahimo nga ang iban sa aton maluyahan sing buot. Paano kita makabatas?

4. Kay sin-o kita nagapangayo sing bulig agod makabatas kita?

⁴ Buligan kita ni Jehova. Gin-inspirar ang salmista sa pagsulat: “Madamo ang kapipit-an sang matarong; apang ang GINUO nagaluwas sa iya sa sini tanan sa ila.” (Salmo 34:19; 1 Corinto 10:13) Madamo sa aton ang makapamatuod nga kon magsalig kita sing bug-os kay Jehova, hatagan niya kita sing kusog sa pagbatas sang bisan ano nga kabudlayan. Ang aton gugma sa iya kag ang kalipay nga ginabutang sa aton atubang magabulig sa aton agod malandas ang pagluya sang buot kag kahadlok. (Hebreo 12:2) Gani, walay sapayan sang mga kabudlayan, padayon kita nga nagabatas.

Ginpalig-on si Jeremias sang Pulong sang Dios

5, 6. (a) Sin-o sa matuod nga mga sumilimba ang nagpakita sa aton sing halimbawa sa pagbatas? (b) Ano ang reaksion ni Jeremias sang gintawag sia nga mangin manalagna?

⁵ Sa bug-os nga maragtas, nakasapo sing kalipay ang matutom nga mga alagad ni Jehova  walay sapayan sang mabudlay nga mga kahimtangan. Ang iban nagkabuhi sa tion sang paghukom sang ginpabutyag ni Jehova ang iya kasingkal batok sa mga di-matutom. Lakip sa sining matutom nga mga sumilimba amo si Jeremias kag ang pila sang iya mga kadungan, subong man ang mga Cristiano sang nahauna nga siglo. Ginrekord sa Biblia ining maragtason nga mga halimbawa agod mapalig-on kita, kag daku ang matun-an naton sa sini. (Roma 15:4) Halimbawa, binagbinaga si Jeremias.

⁶ Bata pa si Jeremias sang gintawag sia nga mag-alagad subong isa ka manalagna sa Juda. Indi ini isa ka mahapos nga tulumanon sadto. Madamo ang nagasimba sa butig nga mga dios. Bisan pa matutom ang hari nga si Josias sang ginsugdan ni Jeremias ang iya ministeryo, ang tanan nga nagsunod nga mga hari nangin di-matutom, kag ang kalabanan nga may salabton sa pagtudlo sa katawhan​—ang mga manalagna kag mga saserdote​—wala magpabilin sa kamatuoran. (Jeremias 1:​1, 2; 6:​13; 23:11) Gani, ano ang ginbatyag ni Jeremias sang gintawag sia ni Jehova agod mangin isa ka manalagna? Hinadlukan sia! (Jeremias 1:​8, 17) Ginhinumdom ni Jeremias ang iya una nga reaksion: “Nagsiling ako, ‘Ah, Ginuong DIOS! Yari karon, indi ako makahibalo maghambal, kay bata ako.’”​—Jeremias 1:6.

7. Ano nga reaksion ang nasumalang ni Jeremias sa iya teritoryo, kag ano ang iya ginhimo?

⁷ Ang kalabanan nga mga tawo sa teritoryo ni Jeremias matig-a sing buot, kag masami nga nagpamatok sa iya sing mabaskog. Sang isa ka bes, ginbunal sia ni Pasur, nga isa ka saserdote, kag ginpabutang sa mga pandog. Nagsugid si Jeremias kon ano ang ginbatyag niya sadtong tion: “Nagasiling ako: ‘Indi na gid ako magsambit sa iya [Jehova], ukon magpamulong pa sa iya ngalan.’” Ayhan amo man sini kon kaisa ang imo ginabatyag​—luyag mo na mangampo. Talupangda kon ano ang nakabulig kay Jeremias sa pagbatas. Nagsiling sia: “Yara sa akon tagipusuon ang [pulong, ukon mensahe sang Dios] subong sang kalayo nga nagadabdab nga natakpan sa akon mga tul-an, kag ginalapyo ako sa pagbatas, kag indi ako makapugong.” (Jeremias 20:9) Amo man bala sini ang epekto sa imo sang mga pulong sang Dios?

Mga Kaupod ni Jeremias

8, 9. (a) Ano nga kaluyahon ang ginpakita ni manalagna Urias, kag ano ang nangin resulta? (b) Ngaa nagluya ang buot ni Baruc, kag paano sia nabuligan?

⁸ Indi isahanon si Jeremias sa iya pagpanagna. May mga kaupod sia, kag nagpalig-on gid ini sa iya. Apang, ang iya mga kaupod indi nangin maalamon kon kaisa. Halimbawa, ang iya masigkamanalagna nga si Urias makugi nga nagpaandam batok sa Jerusalem kag Juda “suno sa tanan nga pulong ni Jeremias.” Apang, sang nagmando si Hari Joaquim nga ipapatay si Urias, nalagyo ang manalagna sa Egipto. Wala ini magluwas sa iya. Ginlagas sia sang mga tinawo sang hari, gindakop, kag ginbalik sa Jerusalem, diin ginpatay sia. Pat-od nga natublag gid sa sini si Jeremias!​—Jeremias 26:20-​23.

⁹ Ang isa pa ka kaupod ni Jeremias amo ang iya sekretaryo nga si Baruc. Maayo gid nga bulig si Baruc kay Jeremias, apang sia man sang isa ka bes wala magpakita sing nagakaigo nga pagtamod. Nagsugod sia sa pagreklamo, nga nagasiling: “Kailo ako karon! kay ang GINUO nagdugang sing kasubo sa akon kasakit; ginalapyo ako  sa akon pag-ugayong, kag wala ako sing pahuway.” Bangod nagluya ang buot, nadula ni Baruc ang apresasyon sa espirituwal nga mga butang. Walay sapayan sini, mainayuhon nga ginhatagan ni Jehova si Baruc sing maalamon nga laygay, kag nabuligan sia. Gani, ginpasalig sia nga maluwas sia kon malaglag ang Jerusalem. (Jeremias 45:​1-5) Pat-od gid nga napalig-on si Jeremias sang mapanumbalik ni Baruc ang iya espirituwal nga pagkabalanse!

Ginbuligan ni Jehova ang Iya Manalagna

10. Ano nga bulig ang ginsaad ni Jehova kay Jeremias?

¹⁰ Labing importante, wala ginbayaan ni Jehova si Jeremias. Nahangpan niya kon ano ang ginbatyag sang iya manalagna kag ginhatag niya sa iya ang kusog kag bulig nga ginakinahanglan niya. Halimbawa, sang magduhaduha si Jeremias sa iya ikasangkol sa pagsugod sang iya ministeryo, nagsiling sa iya si Jehova: “Dili ka mahadlok bangod sa ila, kay ako nagaupod sa imo sa pagluwas sa imo, nagasiling ang GINUO.” Kag, pagkatapos mapahibalo ang iya manalagna tuhoy sa iya tulumanon, si Jehova nagsiling: “Magapakig-away sila sa imo; apang indi sila makadaug sa imo, kay ako nagaupod sa imo, nagasiling ang GINUO, sa pagluwas sa imo.” (Jeremias 1:​8, 19) Daw ano ka makapalig-on ini! Kag gintuman matuod ni Jehova ang iya panaad.

11. Paano naton nahibaluan nga gintuman ni Jehova ang iya panaad nga buligan si Jeremias?

¹¹ Gani, bisan pa ginbutang sia sa mga pandog kag ginyaoyao sang publiko, may pagsalig nga nagsiling si Jeremias: “Ang GINUO upod sa akon subong nga gamhanan kag makakulugmat; busa ang mga manughingabot sa akon masandad, indi sila maglandas. Pakahuy-an sila sing bug-os.” (Jeremias 20:11) Pagligad sang mga tinuig sang ginbuko nga patyon si Jeremias, si Jehova wala magbiya sa iya, kag kaangay ni Baruc, naluwas si Jeremias sang malaglag ang Jerusalem subong isa ka hilway nga tawo, samtang ang mga  naghingabot kag ang mga nagsikway sa iya mga paandam nagkalamatay ukon gindala nga mga bihag sa Babilonia.

12. Walay sapayan sang mga kabangdanan sang pagluya sang buot, ano ang dapat naton dumdumon?

¹² Kaangay ni Jeremias, madamo nga mga Saksi ni Jehova karon ang nagabatas sing mga kabudlayan. Subong sang nasambit kaina, ang ginatunaan sini nga mga kabudlayan amo kon kaisa ang aton mga di-kahimpitan, ang kagamo sa kalibutan, kag ang mga nagapamatok sa aton hilikuton. Makapaluya sang buot ini nga mga kabudlayan. Kaangay ni Jeremias, mahimo nga magaduhaduha kita kon bala makapadayon pa kita sa pag-alagad. Sa pagkamatuod, mahimo magluya ang aton buot kon kaisa. Ang pagluya sang buot isa ka pagtilaw kon daw ano ka tudok ang aton gugma kay Jehova. Gani mangin determinado kita nga indi pagpauntaton sang pagluya sang buot ang aton pag-alagad kay Jehova subong sang ginhimo ni Urias. Sa baylo, ilugon naton si Jeremias kag magsalig sa bulig ni Jehova.

Kon Paano Landason ang Pagluya sang Buot

13. Paano naton mailog ang mga halimbawa ni Jeremias kag ni David?

¹³ Regular nga nagpakig-angot si Jeremias kay Jehova nga Dios, nga ginasugiran sia sang iya pinakatudok nga mga balatyagon kag nagapakiluoy sa Iya nga hatagan sia sing kusog. Isa ini ka maayong halimbawa nga ilugon. Si David sang dumaan nga tion, nga nagdangop sa pareho man nga Tuburan sang kusog, nagsulat: “Lingga, O GINUO, ang akon mga pulong; talupangda ang akon pagpamalandong. Pamatii ang tingog sang akon pagtuaw, Hari ko, kag Dios ko, kay sa imo nagapangamuyo ako.” (Salmo 5:​1, 2) Ginapakita sang gin-inspirar nga rekord sang kabuhi ni David nga sa liwat kag liwat ginsabat ni Jehova ang nagapangayo sing bulig nga mga pangamuyo ni David. (Salmo 18:​1, 2; 21:​1-5) Gani man, kon daw indi na naton masarangan ang mga pag-ipit sa aton ukon ang aton mga problema, makapalig-on gid nga magdangop kita kay Jehova sa pangamuyo kag buksan ang aton tagipusuon sa iya. (Filipos 4:​6, 7; 1 Tesalonica 5:​16-​18) Si Jehova wala nagapangindi sa pagpamati sa aton. Sa baylo, ginapasalig niya kita nga ‘sia nagakabalaka sa aton.’ (1 Pedro 5:​6, 7) Apang, indi makatarunganon nga mangamuyo kita kay Jehova kag pagkatapos indi kita mamati sa iya isiling, indi bala?

14. Ano ang nangin epekto kay Jeremias sang mga pulong ni Jehova?

¹⁴ Paano si Jehova nagapakighambal sa aton? Binagbinaga liwat si Jeremias. Sanglit si Jeremias isa ka manalagna, direkta nga nakig-angot sa iya si Jehova. Ginlaragway ni Jeremias ang epekto sa iya sang mga pulong sang Dios: “Ang imo mga pulong nakit-an, kag ginkaon ko sila, kag ang imo mga pulong kalipay sa akon kag kasadya sang akon tagipusuon; kay ginatawag ako sa imo ngalan, O GINUO, Dios sang mga kasuldadusan.” (Jeremias 15:16) Huo, nagkalipay si Jeremias nga gintawag sia sa ngalan sang Dios, kag hamili sa iya ang mga pulong sang Dios. Busa, kaangay ni apostol Pablo, nalangkag si Jeremias nga ibantala ang mensahe nga gintugyan sa iya.​—Roma 1:​15, 16.

15. Paano naton mapatudok sa aton tagipusuon ang mga pulong ni Jehova, kag ano ang binagbinagon naton agod mangin determinado kita nga indi maghipos?

¹⁵ Si Jehova wala nagapakig-angot sing direkta kay bisan sin-o sa karon. Apang, masapwan naton ang mga pulong sang Dios sa mga pahina sang Biblia. Busa, kon serioso nga tun-an naton ang Biblia kag hanuot nga pamalandungan ang aton matun-an, ang mga pulong sang Dios mangin ‘kalipay kag kasadya’ man sa aton tagipusuon. Kag makunyag kita nga madala naton ang ngalan ni Jehova kon ginapaambit naton ining mga pulong sa iban. Indi gid naton pagkalipatan nga wala na sing iban pa nga katawhan sa kalibutan karon ang nagabantala sang ngalan ni Jehova. Ang iya mga Saksi lamang ang nagabantala sing maayong balita sang natukod na nga Ginharian sang Dios kag nagatudlo sa mga mahagop nga mangin mga disipulo ni Jesucristo. (Mateo 28:19, 20) Makalilipay gid ini! Bangod sang mahigugmaon nga gintugyan sa aton ni Jehova, paano kita makahipos?

Bantayan Naton ang Aton Pagpakig-upod

16, 17. Ano ang pagtamod ni Jeremias sa mga pagpakig-upod, kag paano naton sia mailog?

¹⁶ May ginsugid pa si Jeremias nga nakabulig  sa iya agod mangin maisugon sia. Sia nagsiling: “Wala ako maglingkod sa katilingban sang mga nagakinasadya, ukon nagkalipay; bangod sang imo kamot naglingkod ako nga isa lamang, kay ginpuno mo ako sing kaalipungot.” (Jeremias 15:17) Ginpakamaayo ni Jeremias nga mag-isahanon sangsa maimpluwensiahan sia sang malain nga mga kaupod. Amo man kita sini karon. Wala gid naton ginakalipatan ang paandam ni apostol Pablo nga “ang malaut nga mga paghiliupod nagadunot sang maayo nga mga pamatasan,” bisan sang aton madugay na nga mapuslanon nga mga pamatasan.​—1 Corinto 15:33.

¹⁷ Bangod sang malaut nga mga pagpakig-upod mahimo nga mapatiko sang espiritu sang kalibutan ang aton panghunahuna. (1 Corinto 2:​12; Efeso 2:2; Santiago 4:4) Busa, hanason naton ang aton ikasarang sa paghantop nga makilala ang makahalalit nga mga pagpakig-upod kag likawan ini sing bug-os. (Hebreo 5:​14, NW) Kon buhi karon si Pablo sa duta, ano sa banta mo ang isiling niya sa isa ka Cristiano nga nagatan-aw sing imoral ukon masingki nga mga sine ukon masingki nga mga isport? Paano niya laygayan ang isa ka utod nga nagapakig-abyan sa mga estranghero sa Internet? Ano ayhan ang hunahunaon niya tuhoy sa isa ka Cristiano nga nagapaduyog sa paghampang sing mga video game ukon sa pagtan-aw sing telebisyon apang wala sing maayong personal nga batasan sa pagtuon?​—2 Corinto 6:​14b; Efeso 5:​3-5, 15, 16.

Magpabilin sa Espirituwal nga Paraiso

18. Ano ang magabulig sa aton sa pagpabilin nga malig-on sa espirituwal?

¹⁸ Ginapakabahandi naton ang aton espirituwal nga paraiso. Wala ini sing kaanggid sa kalibutan karon. Bisan gani ang mga di-tumuluo nagakomento tuhoy sa gugma, pagpatugsiling, kag kaayo nga ginapakita sang mga Cristiano sa isa kag isa. (Efeso 4:​31, 32) Walay sapayan sini, kapin sa bisan ano nga tion, dapat naton landason ang pagluya sang buot. Ang maayong pagpakig-upod, pangamuyo, kag maayong mga batasan sa pagtuon makabulig sa aton sa pagpabilin nga malig-on sa espirituwal. Magapalig-on ini sa aton sa pag-atubang sa bisan anong pagtilaw nga nagasalig sing bug-os kay Jehova.​—2 Corinto 4:​7, 8.

19, 20. (a) Ano ang makabulig sa aton sa pagbatas? (b) Kay sin-o ginapatuhoy ang masunod nga artikulo, kag sin-o pa ang mangin interesado sa sini?

¹⁹ Indi gid naton pagtugutan ang mga nagadumot sa aton Makasulatanhon nga mensahe nga magpahadlok sa aton kag magpaluya sang aton pagtuo. Kaangay sang mga kaaway nga naghingabot kay Jeremias, ang mga nagapakig-away sa aton nagapakig-away sa Dios. Indi sila magadaug. Si Jehova, nga mas makusog gid sangsa aton mga kaaway, nagasiling sa aton: “Maglaum ka kay Jehova; magpakaisog ka kag pabakura ang imo tagipusuon. Huo, maglaum ka kay Jehova.” (Salmo 27:14, NW) Ginapatudok ang paglaum kay Jehova sa aton tagipusuon, kabay nga mangin determinado kita nga indi magpakaluya sa paghimo sing maayo. Kabay nga magsalig kita nga, kaangay ni Jeremias kag ni Baruc, magaani kita kon indi kita pagpunawon.​—Galacia 6:9.

²⁰ Ang paglandas sa pagluya sang buot isa ka dalayon nga pagpakig-away para sa madamo nga mga Cristiano. Ang mga pamatan-on ilabi na, nagaatubang sing partikular nga mga pagtilaw. Apang may yara man sila maayo gid nga mga kahigayunan. Ang masunod nga artikulo direkta nga ginapatuhoy sa aton mga pamatan-on. Mangin interesado man sa sini ang mga ginikanan kag ang tanan nga dedikado nga mga hamtong sa kongregasyon nga paagi sa pulong, sa halimbawa, kag sa direkta nga pagsuporta sarang makabulig sa mga pamatan-on sa kongregasyon.

Paano Mo Sabton?

• Ngaa mapaabot naton ang makapaluya sang buot nga mga kahimtangan, kag kay sin-o kita mangayo sing bulig?

• Paano nalandas ni Jeremias ang pagluya sang buot walay sapayan sang iya mabudlay nga tulumanon?

• Ano ang ‘magapahalipay kag magapasadya’ sang aton tagipusuon walay sapayan sang mga kabudlayan?

[Mga Pamangkot sa Pagtinuon]

[Retrato sa pahina 9]

Ginhunahuna ni Jeremias nga bata pa sia kag indi eksperiensiado agod mangin isa ka manalagna

[Retrato sa pahina 10]

Bisan sang ginahingabot, nahibaluan ni Jeremias nga si Jehova upod sa iya “kaangay sang isa nga makakulugmat”