Nalipay Ka Bala sa “Kasuguan ni Jehova”?

“Malipayon ang tawo nga . . . ang iya kalipay yara sa kasuguan ni Jehova.”​​—⁠SALMO 1:​1, 2.

1. Ngaa malipayon kita subong mga alagad ni Jehova?

SI Jehova nagabulig kag nagapadya sa aton subong iya mainunungon nga mga alagad. Matuod, nagaatubang kita sing madamo nga mga pagtilaw. Apang, nagabatyag man kita sing matuod nga kalipay. Indi ini makatilingala, kay nagaalagad kita sa “malipayon nga Dios,” kag ang iya balaan nga espiritu nagapatubas sing kalipay sa aton tagipusuon. (1 Timoteo 1:⁠1; Galacia 5:22) Ang matuod nga kalipay mabatyagan bilang resulta sang pagpaabot ukon pagtigayon sing isa ka maayo nga butang. Kag ang aton langitnon nga Amay nagahatag gid sa aton sing maayong mga dulot. (Santiago 1:17) Indi katingalahan nga malipayon kita!

2. Ano nga mga salmo ang binagbinagon naton?

² Ang kalipay talalupangdon nga ginapatalupangod sa tulun-an sang Salmo. Halimbawa, ginapatalupangod ini sa Salmo 1 kag 2. Ginpatungod sang unang mga sumulunod ni Jesucristo ang ikaduha nga salmo subong ginsulat ni Hari David sang Israel. (Binuhatan 4:​25, 26) Ang wala mahingadli nga manugkomposo sang nahauna nga salmo nagasugod sang iya inspirado nga ambahanon paagi sa mga pulong: “Malipayon ang tawo nga wala nagalakat sa laygay sang mga malauton.” (Salmo 1:1) Sa sini kag sa masunod nga artikulo, tan-awon naton kon paano ang Salmo 1 kag 2 nagahatag sa aton sing rason agod magkasadya.

Ang Sekreto sang Kalipay

3. Suno sa Salmo 1:​1, ano ang pila ka rason kon ngaa ang isa ka diosnon nga tawo malipayon?

³ Ginapakita sang Salmo 1 kon ngaa ang isa ka diosnon nga tawo malipayon. Samtang nagaamba ang salmista, ginhatag niya ang pila ka rason tungod sini nga kalipay, nga nagasiling: “Malipayon ang tawo nga wala nagalakat sa laygay sang mga malauton, kag sa dalanon sang mga makasasala wala nagatindog, kag sa lingkuranan sang mga mayubiton wala nagalingkod.”​​—⁠Salmo 1:1.

4. Anong huwaran nga dalanon ang ginlaktan nanday Zacarias kag Elisabet?

⁴ Agod mangin tunay nga malipayon, dapat naton sundon ang matarong nga mga ginapatuman ni Jehova. Si Zacarias kag si Elisabet, nga may makalilipay nga pribilehiyo nga mangin mga ginikanan ni Juan Bautista, “matarong sa atubangan sang Dios bangod sang paglakat nga walay kasawayan suno sa tanan nga mga sugo kag mga ginapatuman sang kasuguan ni Jehova.” (Lucas 1:​5, 6) Mangin malipayon kita kon sundon naton ang kaanggid nga dalanon kag mangindi sa ‘paglakat sa laygay sang mga malauton’ ukon sa pagpatuytoy sa ila di-diosnon nga laygay.

5. Ano ang makabulig sa aton agod malikawan ang “dalanon sang mga makasasala”?

⁵ Kon ginasikway naton ang panghunahuna sang mga malauton, indi kita ‘magatindog sa dalanon sang mga makasasala.’ Sa katunayan, literal nga indi kita magasayo sa mga lugar nga pirme nila ginasayuhan​​—⁠sa mga lugar nga may imoral nga mga kalingawan ukon may malain nga reputasyon. Ano kon masulay kita sa pagbuylog sa mga makasasala sa ila di-Makasulatanhon nga paggawi? Nian mangamuyo kita sa Dios nga buligan niya kita nga magkabuhi nahisanto  sa ginsiling ni apostol Pablo: “Dili kamo magpagota sing sampihakan upod sa mga di-tumuluo. Kay ano bala ang pag-updanay sang pagkamatarong kag pagkamalinapason? Ukon ano bala ang paghiambit sang kapawa sa kadudulman?” (2 Corinto 6:14) Kon magsandig kita sa Dios kag “putli [kita] sing tagipusuon,” sikwayon naton ang panimuot kag estilo sang pagkabuhi sang mga makasasala kag tigayunon naton ang matinlo nga mga motibo kag mga handum, upod ang “pagtuo nga indi salimpapaw.”​​—⁠Mateo 5:⁠8; 1 Timoteo 1:5.

6. Ngaa dapat kita magbantay may kaangtanan sa mga mayubiton?

⁶ Agod pahamut-an si Jehova, pat-od nga ‘indi kita magalingkod sa lingkuranan sang mga mayubiton.’ Ginayubit mismo sang iban ang pagtuman sa kasuguan sang Dios, apang sa sining “katapusan nga mga adlaw,” ang anay mga Cristiano nga nangin mga apostata masami nga matinamayon gid sa ila pagyubit. Si apostol Pedro nagpaandam sa mga masigkatumuluo: “Mga hinigugma, . . . hibalua anay ninyo ini, nga sa katapusan nga mga adlaw ang mga mayubiton magaabot nga may pagyubit, nga nagalakat suno sa ila kaugalingon nga mga kailigbon kag nagasiling: ‘Diin ining ginsaad nga presensia niya? Ti, kutob sang pagtulog sa kamatayon sang aton mga katigulangan, ang tanan nga butang nagapadayon sing subong gid kutob sa ginsuguran sang pagtuga.’” (2 Pedro 3:1-4) Kon wala gid kita ‘nagalingkod sa lingkuranan sang mga mayubiton,’ malikawan naton ang kapahamakan nga pat-od gid nga mahanabo sa ila.​​—⁠Hulubaton 1:​22-​27.

7. Ngaa dapat naton talupangdon ang ginasiling sang Salmo 1:1?

⁷ Kon indi naton talupangdon ang nagabukas nga mga pinamulong sang Salmo 1, mahimo naton mawasi ang espirituwalidad nga natigayon naton paagi sa pagtuon sa Kasulatan. Sa katunayan, ang aton kabuhi labi nga magalain. Mahimo ini mag-umpisa kon sundon naton ang laygay sang mga malauton. Nian mahimo nga pirme na kita makig-upod sa ila. Sa ulihi, mahimo pa gani kita mangin walay pagtuo nga apostata nga mga mayubiton. Maathag nga ang pagpakig-abyan sa mga malauton makapalambo sang di-diosnon nga espiritu sa sulod naton kag makaguba sang aton kaangtanan kay Jehova nga Dios. (1 Corinto 15:33; Santiago 4:4) Kabay nga indi gid naton pagtugutan nga matabo ini sa aton!

8. Ano ang magabulig sa aton agod huptan ang aton hunahuna nga napansal sa espirituwal nga mga butang?

⁸ Ang pangamuyo magabulig sa aton agod huptan ang aton hunahuna nga napansal sa espirituwal nga mga butang kag agod likawan ang pagpakig-upod sa mga malauton. “Indi kamo magkabalaka sa bisan ano nga butang,” sulat ni Pablo, “kundi sa tagsa ka butang paagi sa pangamuyo kag pag-ampo nga may pagpasalamat ipakilala sa  Dios ang inyo mga pangabay; kag ang paghidait sang Dios nga nagalabaw sa tanan nga panghunahuna magabantay sa inyo tagipusuon kag sa inyo ikasarang sa paghunahuna paagi kay Cristo Jesus.” Ginpalig-on sang apostol ang pagbinagbinag sa mga butang nga matuod, serioso nga hunahunaon, matarong, putli, hiligugmaon, ginahambal nga maayo, halangdon, kag dalayawon. (Filipos 4:6-8) Magpanghikot kita nahisanto sa laygay ni Pablo kag indi gid pag-iluga ang mga malauton sa ila kalautan.

9. Bisan pa ginalikawan naton ang malaut nga mga buhat, paano naton ginatinguhaan nga buligan ang tanan nga sahi sang mga tawo?

⁹ Bisan pa ginasikway naton ang malaut nga mga buhat, nagapanaksi kita sing mataktikanhon sa iban, kaangay kay apostol Pablo nga nagpamulong kay Gobernador Felix sang Roma “tuhoy sa pagkamatarong kag pagpugong sa kaugalingon kag sa paghukom nga magaabot.” (Binuhatan 24:​24, 25; Colosas 4:6) Ginabantala naton ang maayong balita sang Ginharian sa tanan nga sahi sang mga tawo, kag ginapakig-angutan naton sila sing mainayuhon. Nagasalig kita nga ang “husto nga nahuyog sa kabuhi nga walay katapusan” mangin mga tumuluo kag magakalipay sila sa kasuguan sang Dios.​—⁠Binuhatan 13:48.

Nalipay Sia sa Kasuguan ni Jehova

10. Sa tion sang aton personal nga pagtuon, ano ang magabulig agod magtudok sa aton hunahuna kag tagipusuon ang aton ginabasa?

¹⁰ Nahanungod sa malipayon nga tawo, ang salmista padayon nga nagsiling: “Ang iya kalipay yara sa kasuguan ni Jehova, kag sa iya kasuguan nagabasa sia sing mahinay sa adlaw kag gab-i.” (Salmo 1:2) Subong mga alagad sang Dios, ‘nalipay kita sa kasuguan ni Jehova.’ Kon posible, sa tion sang aton personal nga pagtuon kag pagpamalandong, mahimo kita magbasa “sing mahinay,” nga ginamitlang ang mga tinaga. Ang pagmitlang sang mga tinaga kon nagabasa sang bisan ano nga bahin sang Kasulatan magabulig agod magtudok ini sa aton hunahuna kag tagipusuon.

11. Ngaa dapat naton basahon ang Biblia “adlaw kag gab-i”?

¹¹ “Ang matutom kag mainandamon nga ulipon” nagapalig-on sa aton nga basahon ang Biblia adlaw-adlaw. (Mateo 24:45) Bangod sang daku nga handum nga mangin pamilyar sa mensahe ni Jehova para sa katawhan, nagakaigo nga basahon naton ang Biblia “adlaw kag gab-i”​​—⁠huo, bisan pa kon indi kita makatulog bangod sang pila ka rason. Si Pedro naglaygay sa aton: “Subong sang mga lapsag nga bag-o natawo, magtigayon kamo sing kahidlaw sa wala masimbugan nga gatas nga natungod sa pulong, agod nga paagi sini magatubo kamo sa kaluwasan.” (1 Pedro 2:​1, 2) Nalipay ka bala nga basahon ang Biblia adlaw-adlaw kag pamalandungan ang Pulong kag mga katuyuan sang Dios sa gab-i? Ang salmista nalipay gid.​​—⁠Salmo 63:6.

12. Ano ang himuon naton kon nalipay kita sa kasuguan ni Jehova?

¹² Ang aton dayon nga kalipay nasandig sa pagkalipay naton sa kasuguan sang Dios. Ini himpit kag matarong, kag may daku nga padya sa pagsunod sa sini. (Salmo 19:7-11) Si disipulo Santiago nagsulat: “Sia nga nagatan-aw sa himpit nga kasuguan nga natungod sa kahilwayan kag nagapadayon sa sini, ini nga tawo, bangod sia nangin, indi malipaton nga manugpamati, kundi manugtuman sang hilikuton, mangin malipayon sa paghimo niya sini.” (Santiago 1:25) Kon nalipay gid kita sa kasuguan ni Jehova, binagbinagon naton adlaw-adlaw ang espirituwal nga mga butang. Sa pagkamatuod, mapahulag kita nga ‘usisaon ang madalom nga mga butang sang Dios’ kag unahon  sa aton kabuhi ang mga intereses sang Ginharian.​​—⁠1 Corinto 2:10-13; Mateo 6:33.

Mangin Kaangay Sia sang Kahoy

13-15. Sa anong kahulugan mangin kaangay kita sang isa ka kahoy nga natanom sa ubay sang mga kasulgan sang tubig?

¹³ Sa dugang nga paglaragway sa matarong nga tawo, ang salmista nagsiling: “Mangin kaangay sia sang kahoy nga natanom sa ubay sang mga kasulgan sang tubig, nga nagapamunga sa iya panag-on kag ang iya dahon indi malaya, kag ang bisan ano nga ginahimo niya magamadinalag-on.” (Salmo 1:3) Kaangay sang tanan iban pa nga di-himpit nga mga tawo, kita nga nagaalagad kay Jehova nagaeksperiensia sing mga kabudlayan sa kabuhi. (Job 14:1) Mahimo kita mag-antos sing paghingabot kag iban pa nga mga pagtilaw may kaangtanan sa aton pagtuo. (Mateo 5:10-12) Apang, sa bulig sang Dios, nabatas naton ining mga pagtilaw sing madinalag-on, subong sang pagbato sang isa ka mapagros nga kahoy sa mamadlos nga hangin.

¹⁴ Ang isa ka kahoy nga natanom sa wala nagakahubsan nga tuburan sang tubig indi malayong sa tig-ilinit ukon sa tigpalamangag. Kon kita mahinadlukon-sa-Dios nga mga indibiduwal, ang aton kusog nagahalin sa wala nagakahubsan nga Tuburan​​—⁠si Jehova nga Dios. Si Pablo nagpangayo sing bulig sa Dios kag nakasiling sia: “Sa tanan nga butang may kusog ako bangod sa iya [si Jehova] nga nagahatag sing gahom sa akon.” (Filipos 4:13) Kon ginaubayan kita kag ginasakdag sa espirituwal sang balaan nga espiritu ni Jehova, indi kita magaluya, nga mangin di-mabungahon ukon patay sa espirituwal. Mabungahon kita nga nagaalagad sa Dios kag nagapadayag man sang mga bunga sang iya espiritu.​​—⁠Jeremias 17:​7, 8; Galacia 5:​22, 23.

¹⁵ Paagi sa paggamit sa Hebreong tinaga nga ginbadbad nga “kaangay,” ang salmista nagagamit sing simile. Ginapaanggid niya ang duha ka butang nga magkatuhay, walay sapayan nga magkapareho sila sa isa ka partikular nga kinaiya. Ang mga tawo tuhay sa mga kahoy, apang ang pagkamabungahon sang isa ka kahoy nga natanom sa ubay sang mga kasulgan sang tubig ayhan nagpahanumdom sa salmista sa espirituwal nga kahamungayaan sadtong ang ila “kalipay yara sa kasuguan ni Jehova.” Kon nalipay kita sa kasuguan ni Jehova, ang aton mga adlaw mangin kaangay sang mga adlaw sang isa ka kahoy. Sa katunayan, mahimo kita mabuhi sing dayon.​​—⁠Juan 17:3.

16. Ngaa kag paano nga ‘ang tanan nga ginahimo naton nagamadinalag-on’?

¹⁶ Samtang nagalakat kita sa matadlong nga dalanon, si Jehova nagabulig sa aton agod mabatas naton ang mga pagtilaw kag mga kabudlayan. Malipayon kag mabungahon kita nga nagaalagad sa Dios. (Mateo 13:23; Lucas 8:15) ‘Ang tanan nga ginahimo naton nagamadinalag-on’ bangod ang aton panguna nga tulumuron amo ang paghimo sang kabubut-on ni Jehova. Sanglit ang iya mga katuyuan pirme nagamadinalag-on kag nagakalipay kita sa iya mga sugo, hamungaya kita sa espirituwal. (Genesis 39:23; Josue 1:​7, 8; Isaias 55:11) Matuod ini bisan pa kon nagaatubang kita sing mga kabudlayan.​​—⁠Salmo 112:​1-3; 3 Juan 2.

Ang mga Malauton Daw Nagahamungaya

17, 18. (a) Sa ano ginpaanggid sang salmista ang mga malauton? (b) Bisan pa ang mga malauton hamungaya sa materyal, ngaa wala sila sing dayon nga kalig-unan?

¹⁷ Tuhay gid ang kahimtangan sang mga malauton sa kahimtangan sang mga matarong! Ang mga malauton daw nagahamungaya sa materyal sa malip-ot nga tion, apang wala sila nagahamungaya sa espirituwal. Makita ini sa dugang nga ginsiling sang salmista: “Ang mga malauton indi subong sini, kundi kaangay sang labhang nga ginapalid sang hangin. Amo kon ngaa ang mga malauton indi makatindog sa paghukom, ukon ang mga makasasala sa katilingban sang mga matarong.” (Salmo 1:​4, 5) Talupangda nga ang salmista nagsiling, “ang mga malauton indi subong sini.” Ang iya buot silingon amo nga indi sila kaangay sang diosnon nga mga tawo, nga ginpaanggid bag-o lang sa mabungahon kag nagadugay nga mga kahoy.

¹⁸ Bisan pa ang mga malauton hamungaya sa materyal, wala sila sing dayon nga kalig-unan. (Salmo 37:16; 73:​3, 12) Kaangay sila sang di-makatarunganon nga manggaranon nga tawo nga ginsambit ni Jesus sa isa ka ilustrasyon sang ginpangabay sia nga desisyunan ang isa ka problema may kaangtanan sa palanublion. Si Jesus nagsiling sa mga nagapamati: “Huptan ninyo nga nagamuklat ang inyo mga mata kag mag-andam batok sa tanan nga sahi sang pagkamahamkunon, kay bisan pa may kabuganaan ang isa ka tawo ang iya kabuhi indi resulta sang mga butang nga ginapanag-iyahan niya.” Gin-ilustrar ni Jesus ini nga punto  paagi sa pagsiling nga ang uma sang isa ka manggaranon nga tawo may maayo gid nga patubas amo nga nagplano sia sa pagguba sang iya mga tambubo kag magpatindog sing dakudaku agod mataguan sang iya tanan nga bugana nga patubas. Nian nagplano ang tawo nga magkaon, mag-inom, kag maglipaylipay. Apang ang Dios nagsiling: “Ikaw nga di-makatarunganon, karon nga gab-i pangayuon nila sa imo ang imo kalag. Sin-o, nian, ang magatag-iya sang mga butang nga gintipon mo?” Agod ipatalupangod ang iya punto, si Jesus nagdugang: “Gani amo sina ang nagakatabo sa tawo nga nagatipon sing bahandi para sa iya kaugalingon apang indi manggaranon sa Dios.”​​—⁠Lucas 12:13-​21.

19, 20. (a) Ilaragway ang dumaan nga proseso sa paglinas kag pagpahangin. (b) Ngaa ang mga malauton ginpaanggid sa labhang?

¹⁹ Ang mga malauton indi “manggaranon sa Dios.” Gani, ang ila seguridad kag kalig-unan kaangay lamang sang labhang ukon upa, ang manipis nga panit sang uyas. Sadto, sa tapos maani ang uyas, ginadala ini sa linasan, nga sa masami isa ka matapan nga bahin sa mataas nga lugar. Didto ang mga inuglinas nga may matalom nga bato ukon salsalon nga ngipon sa idalom nga bahin ginaguyod sang sapat agod linason ang mga uhay kag hukason ang labhang. Pagkatapos, ginapala ini kag ginatumbo agod mapahanginan. (Isaias 30:24) Ang uyas nagatupa liwat sa linasan, samtang ang labhang ginapalid sang hangin. (Rut 3:2) Sa tapos ayagon ang uyas agod makuha ang magagmay nga mga bato kag ang iban pa nga indi kinahanglanon, ginahanda na ini agod taguon ukon galingon. (Lucas 22:31) Apang ang labhang wala na.

²⁰ Subong nga ang uyas nagakahulog sa duta kag ginaamligan samtang ang labhang ginapalid sang hangin, sa amo ang mga matarong magapabilin kag ang mga malauton naman laglagon. Apang, malipayon gid kita nga ining mga malauton dulaon sing dayon. Kon madula na sila, ang mga tawo nga nagakalipay sa kasuguan ni Jehova pakamaayuhon sing daku. Sa pagkamatuod, ang matinumanon nga mga tawo magabaton sa ulihi sang dulot sang Dios nga kabuhi nga walay katapusan.​​—⁠Mateo 25:34-​46; Roma 6:⁠23.

Ang Ginapakamaayo nga “Dalanon sang mga Matarong”

21. Paano si Jehova ‘nagahibalo sa mga matarong’?

²¹ Ang nahaunang salmo nagahinakop sa sining mga pulong: “Ginahibalo ni Jehova ang dalanon sang mga matarong, apang ang dalanon sang mga malauton mawala.” (Salmo 1:6) Paano ang Dios ‘nagahibalo sa mga matarong’? Ti, kon maglakat kita sa matadlong nga dalanon, makapat-od kita  nga kilalahon sang aton langitnon nga Amay ang aton diosnon nga pagkabuhi kag tamdon niya kita subong iya kalahamut-an nga mga alagad. Nian, sarang kag dapat naton itugyan sa iya ang tanan naton nga kabalaka upod ang pagsalig nga nagaulikid gid sia sa aton.​​—⁠Ezequiel 34:11; 1 Pedro 5:​6, 7.

22, 23. Ano ang matabo sa mga malauton kag sa mga matarong?

²² “Ang dalanon sang mga matarong” magapabilin sing dayon, apang ang indi na matadlong nga mga malauton laglagon ni Jehova. Kag ang ila “dalanon,” ukon pagkabuhi, madula upod sa ila. Makasalig kita sa katumanan sang pinamulong ni David: “Sa diutay pa nga tion, kag ang malauton wala na; kag usisaon mo sing maayo ang iya duog, kag wala na sia didto. Apang ang mga mahagop magapanag-iya sang duta, kag makasapo gid sila sing daku nga kalipay sa kabuganaan sang paghidait. Ang mga matarong magapanag-iya sang duta, kag magapuyo sila sing dayon sa sini.”​—⁠Salmo 37:​10, 11, 29.

²³ Daw ano gid nga kalipay ang maeksperiensiahan naton kon hatagan kita sing kahigayunan nga magkabuhi sa paraiso nga duta sa tion nga ang mga malauton wala na! Nian ang mga mahagop kag mga matarong magaagom sing matuod nga paghidait bangod pirme sila magakalipay sa “kasuguan ni Jehova.” Apang, antes sini, ang “mando ni Jehova” dapat ipatuman. (Salmo 2:7a) Buligan kita sang masunod nga artikulo nga mahangpan kon ano ini nga mando kag kon ano ang kahulugan sini para sa aton kag para sa bug-os tawhanon nga pamilya.

Paano Mo Sabton?

• Ngaa ang diosnon nga tawo malipayon?

• Ano ang nagapakita nga nalipay kita sa kasuguan ni Jehova?

• Paano ang isa ka indibiduwal mangin kaangay sang isa ka kahoy nga natanom sa ubay sang mga kasulgan sang tubig?

• Paano ang dalanon sang mga matarong tuhay sa dalanon sang mga malauton?

[Mga Pamangkot sa Pagtinuon]

[Retrato sa pahina 11]

Ang pangamuyo magabulig sa aton nga likawan ang pagpakig-upod sa mga malauton

[Retrato sa pahina 12]

Ngaa ang matarong nga tawo kaangay sang kahoy?