Report sang Mga Manugbantala sang Ginharian

Gindumdom ang “Nalipatan nga mga Biktima”

SANG temprano nga bahin sang 2001, nagkadto si Haykaz, 15-anyos nga Saksi ni Jehova, sa “Nalipatan nga mga Biktima,” isa ka eksibit sa Bern, Switzerland, tuhoy sa paghingabot sang mga Nazi sa mga Saksi ni Jehova. Pagkatapos, si Haykaz nagsiling: “Nabatian ko na anay ang mapintas nga pagtratar sa mga Saksi ni Jehova kag ang ila pag-antos sang naggahom ang mga Nazi, apang karon ko pa lang nakita ang orihinal nga mga dokumento kag mga retrato sadto nga tion. Ang mga displey, mga report sang mga nakasaksi, kag ang mga komento sang mga istoryador sa eksibit may daku nga epekto sa akon hunahuna kag tagipusuon.”

Sang ulihi, sang ginhatagan si Haykaz sing asaynment nga magsulat sing report para sa iya mga kaklase sa hayskul, ginpili niya ang topiko nga “Mga Saksi ni Jehova​—⁠Ang Nalipatan nga mga Biktima Sang Nazismo.” Gin-aprobahan sang iya manunudlo ang topiko apang ginsilingan niya si Haykaz nga dapat ilakip niya ang sekular nga mga reperensia. Malipayon nga nagsugot si Haykaz. “Ginsulat ko ang sumaryo sang pila ka libro nga nabasa ko tuhoy sa mga Saksi ni Jehova sang panahon sang mga Nazi. Ginsulat ko man ang epekto sa akon sang eksibit nga ‘Nalipatan nga mga Biktima.’ Ang 43 ka pahina nga report naglakip sing mga ilustrasyon kag mga retrato.”

Sang Nobiembre 2002, ginpresentar ni Haykaz ang iya report sa iya mga kaeskwela, mga manunudlo, pamilya, kag mga abyan. Ginsundan ini sang pamangkot-kag-sabat nga bahin, diin may kahigayunan sia nga ipaathag ang iya mga ginapatihan nga pasad sa Biblia. Sang namangkot ang isa ka nagpamati nga lin-ay kon ngaa ginpili niya ini nga topiko, ginpaathag ni Haykaz nga wala ginasambit sang madamo nga libro sa maragtas ang mga Saksi ni Jehova kag luyag niya nga mahibaluan sang mga tawo kon paano ginpangapinan sing maisugon sang mga Saksi ang ila Cristianong pagtuo. Ano ang resulta sang iya presentasyon?

“Nagdayaw ang akon mga kaeskwela,” siling ni Haykaz. “Wala sila makahibalo nga ang mga Saksi ni Jehova mapintas nga ginhingabot subong isa ka grupo. Isa pa, madamo ang wala makahibalo nga ang mga Saksi nga ginbilanggo sa mga kampo konsentrasyon may pinasahi nga tanda​—⁠lila nga trianggulo.”

Pagkatapos sang iya presentasyon, pirme na masugilanon ni Haykaz ang iya mga kaklase tuhoy sa pasad-Biblia nga panindugan sang mga Saksi sa pagpatughong sing dugo, sa ilimnon nga de-alkohol, kag sa moralidad. “Ang akon mga kaeskwela wala nagyaoyao ukon nag-uligyat sa akon,” siling ni Haykaz. Dugang pa, ginbutang ang iya report sa librarya sang eskwelahan. Ginasiguro sini nga ang maisugon nga panindugan sang mga Saksi ni Jehova indi na malipatan.