‘Magpadayon sa Pagtigayon sing Kusog sa Ginuo’

“Magpadayon kamo sa pagtigayon sing kusog sa Ginuo kag sa gahom sang iya kusog.”​—⁠EFESO 6:10.

1. (a) Anong tumalagsahon nga inaway ang natabo sang nagligad nga mga 3,000 ka tuig? (b) Ngaa nagdaug si David?

MGA 3,000 ka tuig ang nagligad na, duha ka tawo ang nag-engkwentrohanay sa ulot sang duha ka nagasumpunganay nga hangaway sa patag-awayan. Ang mas bata amo ang isa ka manugbantay sing karnero nga si David. Sa atubangan niya amo si Goliat, isa ka tawo nga may tumalagsahon nga kusog kag kataason. Ang iya kutamaya mga 57 kilos sa kabug-aton, kag ang iya bangkaw kag espada daku gid kaayo. Wala sing bisan ano nga panagang si David, kag isa lamang ka labyog ang iya armas. Nainsulto ang Filistinhon nga higante nga si Goliat nga ang Israelinhon nga nag-atubang sa iya isa lamang ka bata. (1 Samuel 17:42-44) Sa magtimbang nga bahin, daw maathag na sa ila panan-aw kon sin-o ang magadaug. Apang indi ang makusog ang pirme nagadaug sa inaway. (Manugwali 9:11) Nagdaug si David bangod nagpakig-away sia sa kusog ni Jehova. “Ang inaway iya ni Jehova,” siling niya. Ang kasaysayan sang Biblia nagasiling nga “si David, paagi sa isa ka labyog kag isa ka bato, nangin mas makusog sangsa Filistinhon.”​—⁠1 Samuel 17:​47, 50.

2. Sa anong sahi sang pagpakig-away nagapakigbahin ang mga Cristiano?

² Wala nagapakigbahin ang mga Cristiano sa pisikal nga pagpakig-away. Bisan pa mahidaiton sila sa tanan nga tawo, nagapakig-away sila sa espirituwal nga paagi batok sa tuman ka gamhanan nga mga kasumpong. (Roma 12:18) Sa katapusan nga kapitulo sang iya sulat sa mga taga-Efeso, ginlaragway ni Pablo ang pagpakig-away nga nagadalahig sa tagsa ka Cristiano. Nagsulat sia: “Nagapakigdumog kita, indi batok sa dugo kag unod, kundi batok sa mga panguluhan, batok sa mga awtoridad, batok sa mga manuggahom sang kalibutan sining kadudulman, batok sa malaut nga mga puersa nga espiritu sa langitnon nga mga duog.”​—⁠Efeso 6:12.

3. Suno sa Efeso 6:​10, ano ang kinahanglan naton agod sigurado nga magadaug kita?

³ Ining “malaut nga mga puersa nga espiritu” amo si Satanas kag ang mga demonyo, nga nagahandum nga gub-on ang aton relasyon kay Jehova nga Dios. Bangod mas makusog sila sangsa aton, yara man kita sa kahimtangan nga kaangay sang kay David, kag indi kita magmadinalag-on luwas kon magsandig kita sa Dios para sa kusog. Ginalaygayan gid kita ni Pablo nga “magpadayon . . . sa pagtigayon sing kusog sa Ginuo kag sa gahom sang iya kusog.” (Efeso 6:10) Sa tapos mahatag ini nga laygay, ginlaragway sang apostol ang espirituwal nga mga bulig kag ang Cristianong mga kinaiya nga makabulig sa aton agod magdaug kita sa inaway.​—⁠Efeso 6:11-17.

4. Anong duha ka panguna nga punto ang binagbinagon naton sa sining artikulo?

 ⁴ Usisaon naton karon ang ginasiling sang Kasulatan tuhoy sa kusog kag mga taktika sang aton kaaway. Pagkatapos, binagbinagon naton kon ano nga depensa ang dapat naton gamiton agod maamligan ang aton kaugalingon. Kon sundon naton ang mga instruksion ni Jehova, makasalig gid kita nga indi magdaug ang aton mga kaaway.

Pagpakigdumog Batok sa Malaut nga mga Puersa nga Espiritu

5. Paano ang paggamit sa termino nga ‘pagpakigdumog’ sa Efeso 6:12 nagabulig sa aton agod mahangpan naton ang pahito ni Satanas?

⁵ Ginpaathag ni Pablo nga “nagapakigdumog kita . . . batok sa malaut nga mga puersa nga espiritu sa langitnon nga mga duog.” Sa pagkamatuod, ang panguna nga malaut nga espiritu amo si Satanas nga Yawa, “ang manuggahom sang mga demonyo.” (Mateo 12:24-26) Ginalaragway sang Biblia ang aton pagpakig-away subong isa ka ‘pagpakigdumog,’ ukon manomano nga pagpakig-away. Sa pagdumugay ukon wrestling nga mga sambuwa sang dumaan nga Gresya, ginatinguhaan sang tagsa ka humalampang nga madula ang balanse sang iya kasumpong agod tumbahon sia. Sing kaanggid, luyag man sang Yawa nga madula naton ang aton espirituwal nga pagkabalanse. Paano niya ini mapahanabo sa aton?

6. Ipakita gikan sa Kasulatan kon paano magamit sang Yawa ang nanuhaytuhay nga mga taktika agod paluyahon ang aton pagtuo.

⁶ Mahimo magpanghikot ang Yawa subong sang man-ug, subong sang nagangurob nga leon, ukon subong sang anghel sang kapawa. (2 Corinto 11:​3, 14; 1 Pedro 5:8) Mahimo niya gamiton ang iya tawhanon nga mga sakop agod hingabuton ukon paluyahon kita. (Bugna 2:10) Sanglit kontrolado ni Satanas ang bug-os nga kalibutan, sarang niya magamit ang mga kailigbon kag mga pangganyat sini agod masiod kita. (2 Timoteo 2:26; 1 Juan 2:16; 5:19) Sarang niya magamit ang kalibutanon ukon apostata nga panghunahuna agod patalangon kita, subong sang paglimbong niya kay Eva.​—⁠1 Timoteo 2:14.

7. Ano ang mga limitasyon sang mga demonyo, kag ano ang aton mga bentaha?

⁷ Bisan pa daw makahalawhaw ang mga hinganiban kag gahom ni Satanas kag sang iya mga demonyo, may mga limitasyon ini. Indi kita mapilit sining malaut nga mga espiritu sa paghimo sing malaut nga mga butang nga wala nagapahamuot sa aton langitnon nga Amay. May ikasarang kita sa pagpili kon ano ang husto kag sayop, kag kontrolado naton ang aton mga panghunahuna kag mga buhat. Isa pa, wala kita nagapakig-away nga kita lamang. Ang natabo anay kay Eliseo matuod man sa aton karon: “Ang nagaupod sa aton mas madamo pa sa mga nagaupod sa ila.” (2 Hari 6:16) Ginapasalig kita sang Biblia nga kon magpasakop kita sa Dios kag pamatukan ang Yawa, magapalagyo sia sa aton.​—⁠Santiago 4:7.

Nahibaluan Naton ang mga Pahito ni Satanas

8, 9. Ano nga mga pagtilaw ang ginpahanabo ni Satanas kay Job agod bungkagon ang iya integridad, kag anong espirituwal nga mga katalagman ang ginaatubang naton karon?

⁸ Indi kita ignorante sa mga pahito ni Satanas bangod ginasugid sang Kasulatan ang iya mga taktika. (2 Corinto 2:11) Gingamit sang Yawa batok sa  matarong nga si Job ang mabug-at nga mga problema sa pangabuhi, ang pagkapatay sang mga hinigugma, ang pagpamatok sang pamilya, ang pisikal nga pag-antos, kag ang walay basehan nga mga pagmulay sang salimpapaw nga mga abyan. Nagkasubo gid si Job kag pagdumdom niya ginbiyaan na sia sang Dios. (Job 10:​1, 2) Bisan pa mahimo nga indi direkta nga pahanabuon ni Satanas ini nga mga problema karon, ini nga mga kabudlayan nagaapektar sa madamo nga mga Cristiano, kag mahimo ini gamiton sang Yawa para sa iya bentaha.

⁹ Madasig nga nagdamo ang espirituwal nga mga katalagman sa sining tion sang katapusan. Nagakabuhi kita sa kalibutan diin ang paghimud-os sa materyal nga mga butang ginauna sangsa espirituwal nga mga tulumuron. Pirme ginalaragway sang media ang ginadumilian nga sekso subong tuburan sang kalipay sa baylo sang kasubo. Kag ang kalabanan nga mga tawo nangin “mga mahigugmaon sa kinasadya sa baylo sang sa Dios.” (2 Timoteo 3:1-5) Ini nga panghunahuna makadula sang aton espirituwal nga pagkabalanse luwas kon “makig-away [kita] sing lakas para sa pagtuo.”​—⁠Judas 3.

10-12. (a) Ano ang isa ka paandam nga ginhatag ni Jesus sa iya ilustrasyon tuhoy sa manugsab-ug? (b) Iilustrar kon paano maupangan ang espirituwal nga mga hilikuton.

¹⁰ Ang isa ka madinalag-on gid nga taktika ni Satanas amo ang paghimo sa aton nga mangin masako sa sining kalibutan kag sa materyalistiko nga mga paghimud-os sini. Sa iya ilustrasyon tuhoy sa manugsab-ug, nagpaandam si Jesus nga sa pila ka kaso “ang kabalaka sining sistema sang mga butang kag ang malimbungon nga gahom sang manggad nagalumos sang pulong [sang Ginharian].” (Mateo 13:​18, 22) Ang Griego nga tinaga diri nga ginbadbad “nagalumos” nagakahulugan sing “nagakuga sing bug-os.”

¹¹ Sa mga kagulangan sa tropiko, mahimo makakita ang isa sing lunok nga kahoy. Amat-amat ini nga nagatubo samtang ginaputos sini ang puno sang kahoy nga iya ginasamburan. Sing amat-amat, ginaputos sang balagon ang kahoy nga iya ginasamburan sing mga gamot nga nagabakod kag nagabakod. Sa ulihi, ginasuyop sang madamo nga gamot sang lunok ang mga sustansia sang duta sa puno sang kahoy, samtang ginakulapan sang iya mga dahon ang kahoy nga ginasamburan sini amo nga indi na ini masilakan sang adlaw. Nian, ang kahoy nga ginasamburan sini mapatay sa ulihi.

¹² Sa kaanggid nga paagi, ang mga kabalaka sining sistema kag ang pagtinguha sa manggad kag sa komportable nga pangabuhi mahimo nga amat-amat nga magakuha sang aton tion kag kusog. Kon ang aton atension napatuhoy na sa mga butang sang kalibutan, mahimo nga madali naton patumbayaan ang personal nga pagtuon sa Biblia kag indi na kita pirme makatambong sa Cristianong mga miting, gani indi na kita makatigayon sing espirituwal nga sustansia. Ang espirituwal nga mga hilikuton ginabuslan na karon sang materyalistiko nga mga tulumuron, kag sa ulihi madali na kita mabiktima ni Satanas.

Dapat Kita Magtindog sing Malig-on

13, 14. Ano ang dapat naton himuon kon mag-atake si Satanas?

¹³ Ginlaygayan ni Pablo ang iya mga masigkatumuluo nga ‘magtindog sing malig-on batok sa mga pahito sang Yawa.’ (Efeso 6:11) Sa pagkamatuod, indi naton malutos ang Yawa kag ang iya mga demonyo. Si Jesucristo ang gintulinan sang Dios sa paghimo sini. (Bugna 20:​1, 2) Apang, tubtob yara  pa si Satanas, dapat kita ‘magtindog sing malig-on’ agod indi kita malutos kon mag-atake sia.

¹⁴ Ginpadaku man ni apostol Pedro ang kinahanglanon nga magtindog sing malig-on batok kay Satanas. “Hupti ang inyo kaligdong, magmabinantayon,” sulat ni Pedro. “Ang inyo kaaway, ang Yawa, nagaluyong subong sang isa ka nagangurob nga leon, nga nagapangita sing bisan sin-o man nga matukob. Apang magtindog kamo batok sa iya, malig-on sa pagtuo, nga nakahibalo nga ang amo man nga mga pag-antos nagakatabo sa bug-os nga katilingban sang inyo mga utod sa kalibutan.” (1 Pedro 5:​8, 9) Ang matuod, importante gid ang bulig sang aton espirituwal nga mga kauturan agod makatindog kita sing malig-on kon mag-atake ang Yawa kaangay sang isa ka nagangurob nga leon.

15, 16. Maghatag sing Makasulatanhon nga halimbawa kon paano ang bulig sang mga masigkatumuluo makabulig sa aton sa pagtindog sing malig-on.

¹⁵ Kon ang isa ka leon nga indi tanto kalayo magngurob sa kapatagan sang Aprika, mahimo nga magdinalagan dayon sing madasig gid ang mga sapat nga antelope tubtob nga hilway na sila sa katalagman. Apang, ang mga elepante nagahatag sing isa ka halimbawa sang pagbuligay. Ang libro nga Elephants​​—⁠Gentle Giants of Africa and Asia nagapaathag: “Ang depensa nga masami ginagamit sang kinaandan nga panong sang mga elepante amo ang pagporma sing tipulon, ang mga hamtong nagaatubang sa peligro kag ang mga magamay naamligan sa sulod sang tipulon.” Bangod sini nga kusog kag pagbuligay, talagsa lang ginaatake sang mga leon bisan ang magamay nga mga elepante.

¹⁶ Kon mag-atake si Satanas kag ang iya mga demonyo, dapat man kita mag-inupuray, nagaunong sa aton mga kauturan nga malig-on sa pagtuo. Ginbaton ni Pablo nga ang pila sang iya mga masigka-Cristiano nangin “nagapalig-on nga bulig” sa iya sang nabilanggo sia sa Roma. (Colosas 4:​10, 11) Ang Griegong tinaga nga ginbadbad “nagapalig-on nga bulig” makaisa lang gingamit sa Cristianong Griegong Kasulatan. Suno sa Expository Dictionary of New Testament Words ni Vine, “ang berbo nga porma sang tinaga nagapatuhoy sa bulong nga nagapakanay sang iritasyon.” Kaangay sang makapaumpaw nga banyos, ang bulig sang hamtong nga mga sumilimba ni Jehova makapahaganhagan sang kasakit bangod sang emosyonal ukon pisikal nga pag-antos.

17. Ano ang makabulig sa aton agod magmatutom kita sa Dios?

¹⁷ Ang pagpalig-on sang mga masigka-Cristiano karon makapabakod sang aton determinasyon nga mag-alagad sa Dios sing matutom. Ilabi na nga nalangkag ang Cristianong mga gulang sa paghatag sing espirituwal nga bulig. (Santiago 5:13-15) Ang mga bulig agod magpabilin kita nga matutom nagalakip sang regular nga pagtuon sa Biblia kag pagtambong sa Cristianong mga miting, mga asambleya, kag mga kombension. Ang aton mismo suod nga relasyon sa Dios nagabulig sa aton agod magpabilin kita nga matutom sa iya. Sa pagkamatuod, nagakaon man kita, nagainom, ukon bisan ano man ang aton ginahimo, dapat naton himuon ang tanan nga butang para sa himaya sang Dios. (1 Corinto 10:31) Kag natural lamang nga dapat kita magsandig kag magpangamuyo kay Jehova agod padayon nga mapahamut-an naton sia.—Salmo 37:5.

18. Ngaa indi kita dapat mag-untat bisan pa nagaluya kita bangod sang mabudlay nga mga kahimtangan?

¹⁸ Kon kaisa ginaatake kita ni Satanas kon maluya kita sa espirituwal. Ginalumpatan kag ginagus-ab sang leon ang isa ka sapat kon maluya na ini.  Ang mga problema sa pamilya, mabudlay nga pangabuhi, ukon balatian mahimo magpaluya sa aton sa espirituwal. Apang indi gid kita mag-untat sa paghimo sang kalahamut-an sa Dios, kay nagsiling si Pablo: “Kon maluya ako, nian gamhanan ako.” (2 Corinto 12:10; Galacia 6:⁠9; 2 Tesalonica 3:13) Ano ang buot niya silingon? Buot niya silingon nga ang gahom sang Dios makapabaskog sa aton, kon mangayo kita sing kusog kay Jehova. Ginapakita sang pagdaug ni David batok kay Goliat nga mapabakod kag ginapabakod sang Dios ang iya katawhan. Makapamatuod ang mga Saksi ni Jehova karon nga sa tion sang daku gid nga kabudlayan, nabatyagan nila ang nagapalig-on nga kamot sang Dios.​—⁠Daniel 10:19.

19. Maghatag sing halimbawa sa pagpakita kon paano mapalig-on ni Jehova ang iya mga alagad.

¹⁹ Tuhoy sa bulig sang Dios sa ila, nagsulat ang isa ka mag-asawa: “Sa sulod sang mga tinuig, nag-alagad kami kay Jehova subong mag-asawa kag madamo nga pagpakamaayo ang naagom namon kag madamo nga mabuot nga mga tawo ang nakilala namon. Ginhanas man kami kag ginpalig-on ni Jehova agod mabatas namon ang mga kabudlayan. Kaangay ni Job, kon kaisa indi namon mahangpan ang mga nagakatabo, apang nahibaluan namon nga indi kami pagpabay-an ni Jehova.”

20. Anong Makasulatanhon nga pamatuod ang nagapakita nga ginabuligan pirme ni Jehova ang iya katawhan?

²⁰ Indi malip-ot ang kamot ni Jehova agod magbulig kag magpalig-on sa iya matutom nga katawhan. (Isaias 59:1) Nag-amba si salmista David: “Si Jehova nagaalay-ay sang tanan nga nagakapukan, kag nagapabangon sang tanan nga nagadungok.” (Salmo 145:14) Sa pagkamatuod, ang aton langitnon nga Amay ‘adlaw-adlaw nga nagadala sang aton lulan’ kag ginahatag niya kon ano gid ang ginakinahanglan naton.​—⁠Salmo 68:19.

Kinahanglan Naton ang “Kompleto nga Hinganib Gikan sa Dios”

21. Paano ginpadaku ni Pablo nga kinahanglan ang espirituwal nga hinganib?

²¹ Nabinagbinag na naton ang pila sang mga metodo ni Satanas kag narealisar naton nga dapat kita magtindog sing malig-on walay sapayan sang iya mga pag-atake. Dapat naton binagbinagon karon ang isa pa ka importante nga bulig agod madepensahan naton ang aton pagtuo. Makaduha sa iya sulat sa mga taga-Efeso, ginsambit ni apostol Pablo ang isa ka importante nga butang agod makatindog kita sing malig-on batok sa mga pahito ni Satanas kag kon paano kita magmadinalag-on sa aton pagpakigdumog batok sa malaut nga mga puersa nga espiritu. Nagsulat si Pablo: “Isuklob ang kompleto nga hinganib gikan sa Dios agod makatindog kamo sing malig-on batok sa mga pahito sang Yawa . . . Kuhaa ninyo ang kompleto nga hinganib sang Dios, agod nga mabatuan ninyo ang malaut nga adlaw kag, sa tapos ninyo mahimo sing bug-os ang tanan nga butang, makatindog sing malig-on.”​—⁠Efeso 6:​11, 13.

22, 23. (a) Ano ang ginalakip sang aton espirituwal nga hinganib? (b) Ano ang binagbinagon naton sa masunod nga artikulo?

²² Huo, dapat naton isuklob “ang kompleto nga hinganib gikan sa Dios.” Sang ginsulat ni Pablo ang iya sulat para sa mga taga-Efeso, ginguardiahan  sia sang isa ka Romano nga soldado, nga kon kaisa mahimo nga nagasuklob sing kompleto nga hinganib. Apang, ang Dios ang nag-inspirar sa apostol nga ipaathag ang espirituwal nga hinganib nga kinahanglan gid sang tagsa ka alagad ni Jehova.

²³ Ining hinganib gikan sa Dios nagalakip sang mga kinaiya nga dapat matigayon sang isa ka Cristiano subong man sang espirituwal nga mga kahimusan nga ginhimo ni Jehova. Sa masunod nga artikulo, usisaon naton ang tagsa ka bahin sang espirituwal nga hinganib. Makabulig ini sa aton sa paghibalo kon daw ano kita kahanda para sa aton espirituwal nga pagpakig-away. Subong man, tan-awon naton kon paano ang dalayawon nga halimbawa ni Jesucristo nagabulig sa aton agod magmadinalag-on kita sa pagpamatok kay Satanas nga Yawa.

Paano Mo Sabton?

• Ano ang pagpakig-away sang tanan nga Cristiano?

• Ilaragway ang pila sang mga taktika ni Satanas.

• Paano ang bulig sang mga masigkatumuluo makapalig-on sa aton?

• Kay sin-o kusog dapat kita magsandig, kag ngaa?

[Mga Pamangkot sa Pagtinuon]

[Mga retrato sa pahina 11]

Ang mga Cristiano may ‘pagpakigdumog batok sa malaut nga mga puersa nga espiritu’

[Retrato sa pahina 12]

Ang mga kabalaka sining sistema makalumos sa pulong sang Ginharian

[Retrato sa pahina 13]

Ang mga masigka-Cristiano mahimo mangin “nagapalig-on nga bulig”

[Retrato sa pahina 14]

Nagapangamuyo ka bala sa Dios para sa kusog?