‘Pangitaa Kon Sin-o ang Takus’

ANG Damasco isa ka mauswagon nga siudad sang unang siglo sang aton Kumon nga Dag-on. Bangod napalibutan sang katamnan sang mga kahoy, nangin dalangpan ini sang mga guban sang mga manuglakbay gikan sa kadutaan sa sidlangan. Wala lang madugay nga napatay si Jesucristo, may isa ka Cristianong kongregasyon sa Damasco. Lakip sa mga miembro sini amo ang mga Judiyo nga mahimo nangin mga sumulunod ni Jesus sang Piesta sang Pentecostes sa Jerusalem sang 33 C.⁠E. (Binuhatan 2:​5, 41) Mahimo nga nagsaylo sa Damasco ang pila ka disipulo nga taga-Judea sang nag-utwas ang paghingabot sa tapos ginbato si Esteban tubtob mapatay.​—⁠Binuhatan 8:1.

Nakabaton sing tumalagsahon nga asaynment ang isa ka Cristiano sa Damasco nga si Ananias sang mga 34 C.⁠E. Ginsilingan sia sang Ginuo: “Tindog ka, kadto sa dalan nga ginatawag Matadlong, kag sa balay ni Judas pangitaa ang tawo nga si Saulo, gikan sa Tarso. Kay, yari karon! nagapangamuyo sia.”​—⁠Binuhatan 9:11.

Ang dalan nga ginatawag Matadlong mga isa ka kilometro kag tunga nga nagalapus sa sentro sang Damasco. Paagi sa ginsilsil nga laragway sang ika-19 nga siglo sa sini nga pahina, mahanduraw naton kon ano ang hitsura sini nga dalan sang una. Bangod sang desinyo sini nga dalan, mahimo nga nadugayan si Ananias sa pagpangita sang balay ni Judas. Apang, nakita ini ni Ananias kag bangod sang iya pagduaw, si Saulo nangin si apostol Pablo, isa ka mapisan nga manugbantala sing maayong balita.​—⁠Binuhatan 9:12-19.

Ginpadala ni Jesus ang iya mga disipulo kag ginsilingan sila nga ‘pangitaon kon sin-o ang takus’ sa maayong balita. (Mateo 10:11) Literal nga ginpangita ni Ananias si Saulo. Kaangay ni Ananias, malipayon nga ginapangita sang mga Saksi ni Jehova ang mga takus kag nalipay sila kon batunon sang mga tawo ang maayong balita sang Ginharian. Takus gid ang tanan nga panikasog sa pagpangita sa ila.​—⁠1 Corinto 15:58.

[Retrato sa pahina 32]

Ang “dalan nga ginatawag Matadlong” sa karon

[Credit Line sang retrato sa pahina 32]

From the book La Tierra Santa, Volume II, 1830