Ginahingabot Apang Malipayon

“Malipayon kamo kon ginapakahuy-an kamo sang mga tawo kag ginahingabot kamo kag binutig nga ginahambalan kamo sing tanan nga sahi sang kalautan tungod sa akon.”​—⁠⁠MATEO 5:11.

1. Ano nga pasalig ang ginhatag ni Jesus sa iya mga sumulunod tuhoy sa kalipay kag paghingabot?

SANG primero nga ginpadala ni Jesus ang iya mga apostoles agod ibantala ang Ginharian, ginpaandaman niya sila nga makasumalang sila sing pagpamatok. Nagsiling sia sa ila: “Dumtan kamo sang tanan nga tawo bangod sa akon ngalan.” (Mateo 10:5-18, 22) Apang antes sini, sa iya Sermon sa Bukid, ginpasalig niya ang iya mga apostoles kag ang iban pa nga indi madula ang ila tudok nga kalipay bangod sini nga pagpamatok. Sa katunayan, nagsiling pa gani si Jesus nga malipayon ang mga Cristiano kon ginahingabot sila! Paano ang paghingabot makahatag sing kalipay?

Nagaantos Bangod sa Pagkamatarong

2. Suno kay Jesus kag kay apostol Pedro, ano nga pag-antos ang nagahatag sing kalipay?

² Ang ikawalo nga rason sa pagkalipay nga  ginsiling ni Jesus amo: “Malipayon ang mga ginahingabot tungod sa pagkamatarong, kay ila ang ginharian sang mga langit.” (Mateo 5:10) Ang pag-antos indi dalayawon. Nagsulat si apostol Pedro: “Ano bala ang dalayawon, kon sa pagpakasala ninyo kag pagsakit sa inyo, nagabatas kamo? Apang, kon sa paghimo ninyo sing maayo kag pag-antos ninyo, nagabatas kamo, isa ini ka butang nga kalahamut-an sa Dios.” Nagsiling pa sia: “Apang, indi mag-antos ang bisan sin-o sa inyo subong isa nga nakapatay ukon makawat ukon manugbuhat sing kalautan ukon isa nga mahilabtunon sa mga butang sang iban. Apang kon nagaantos sia subong isa ka Cristiano, indi sia magkahuya, kundi padayon niya nga himayaon ang Dios sa sini nga ngalan.” (1 Pedro 2:20; 4:​15, 16) Suno kay Jesus, ang pag-antos nagahatag sing kalipay kon ginabatas ini bangod sa pagkamatarong.

3. (a) Ano ang buot silingon sang paghingabot bangod sa pagkamatarong? (b) Ano ang epekto sang paghingabot sa unang mga Cristiano?

³ Ang matuod nga pagkamatarong sang isa ka tawo ginatakus suno sa iya pagtuman sa kabubut-on sang Dios kag sa Iya mga sugo. Busa, ang pag-antos bangod sa pagkamatarong, nagakahulugan sing pag-antos bangod ginapamatukan sang isa ka tawo ang pag-ipit nga lapason ang mga talaksan ukon ginapatuman sang Dios. Ginhingabot ang mga apostoles sang Judiyong mga lider bangod wala sila nag-untat sa pagbantala sa ngalan ni Jesus. (Binuhatan 4:18-20; 5:27-29, 40) Nadula bala ang ila kalipay ukon nag-untat bala sila sa pagbantala bangod sini? Wala! “Naghalin sila sa atubangan sang Sanhedrin, nga nagakalipay bangod naisipan sila nga takus nga pakahuy-an tungod sa iya ngalan. Kag sa adlaw-adlaw sa templo kag sa balaybalay nagpadayon sila nga walay untat sa pagpanudlo kag sa pagpahayag sing maayong balita nahanungod kay Cristo, si Jesus.” (Binuhatan 5:​41, 42) Ini nga paghingabot naghatag sa ila sing kalipay kag nagpapagsik liwat sang ila kakugi sa pagbantala. Sang ulihi, ginhingabot sang mga Romano ang unang mga Cristiano bangod wala sila nagsimba sa emperador.

4. Ano ang pila ka rason kon ngaa ginahingabot ang mga Cristiano?

⁴ Sa modernong mga tion, ginahingabot ang mga Saksi ni Jehova bangod wala sila nagauntat sa pagbantala sing “maayong balita sang ginharian.” (Mateo 24:14) Kon ginadumilian ang ila Cristianong mga miting, handa sila nga mag-antos sa baylo nga untatan ang ila pagtilipon nga ginasugo sang Biblia. (Hebreo 10:​24, 25) Ginahingabot sila bangod sang ila Cristianong neutralidad ukon bangod sang sayop nga paggamit sa dugo. (Juan 17:14; Binuhatan 15:​28, 29) Apang, ini nga panindugan bangod sa pagkamatarong nagahatag karon sa katawhan sang Dios sing tudok nga paghidait kag kalipay.​​—⁠⁠1 Pedro 3:14.

Ginapakahuy-an Bangod kay Cristo

5. Ano gid ang rason kon ngaa ginahingabot ang katawhan ni Jehova karon?

⁵ Ang ikasiam nga rason sa pagkalipay nga ginsambit ni Jesus sa iya Sermon sa Bukid nagabinagbinag man sang topiko tuhoy sa paghingabot. Nagsiling sia: “Malipayon kamo kon ginapakahuy-an kamo sang mga tawo kag ginahingabot kamo kag binutig nga ginahambalan kamo sing tanan nga sahi sang kalautan tungod sa akon.” (Mateo 5:11) Ang rason gid kon ngaa ginahingabot ang katawhan ni Jehova amo, bangod indi sila bahin sang malaut nga sistema sang mga butang karon. Nagsiling si Jesus sa iya mga disipulo: “Kon kamo bahin sang kalibutan, kahamut-an sang kalibutan ang sa iya kaugalingon. Karon bangod kamo indi bahin sang kalibutan, kundi ginpili ko kamo gikan sa kalibutan, sa sining kabangdanan ang kalibutan nagadumot sa inyo.” (Juan 15:19) Nagsiling man si apostol Pedro: “Bangod wala kamo nagapadayon sa pagdalagan sa sini nga dalanon sa amo man nga malaut nga pagpatuyang, nagakatingala sila kag padayon nga nagapasipala sa inyo.”​​—⁠⁠1 Pedro 4:4.

6. (a) Ngaa ginapakahuy-an kag ginahingabot ang nagkalabilin kag ang ila mga kaupod? (b) Nabuhinan bala ang aton kalipay bangod sini nga pagpakahuya?

⁶ Nahangpan na naton nga ginhingabot ang unang mga Cristiano bangod wala sila nag-untat sa pagbantala sa ngalan ni Jesus. Ginsugo  ni Cristo ang iya mga sumulunod: “Mangin mga saksi ko kamo . . . tubtob sa ukbong sang duta.” (Binuhatan 1:8) Ini nga sugo makugi nga ginatuman sang matutom nga mga nagkalabilin sang hinaplas nga mga kauturan ni Cristo, sa bulig sang ila matutom nga mga kaupod, ang “dakung kadam-an.” (Bugna 7:9) Amo kon ngaa nagapakig-away si Satanas batok sa “mga nabilin sang iya binhi [ang binhi sang “babayi,” ang langitnon nga organisasyon sang Dios], nga nagatuman sang mga sugo sang Dios kag may hilikuton sa pagpanaksi tuhoy kay Jesus.” (Bugna 12:​9, 17) Subong mga Saksi ni Jehova, nagapanaksi kita kay Jesus, ang nagagahom karon nga Hari sa Ginharian nga panguluhan, nga magalaglag sa mga panguluhan sang tawo nga nagaupang sa matarong nga bag-ong kalibutan sang Dios. (Daniel 2:44; 2 Pedro 3:13) Bangod sini, ginapakahuy-an kag ginahingabot kita, apang malipayon kita nga nagaantos tungod sa ngalan ni Cristo.​​—⁠⁠1 Pedro 4:14.

7, 8. Ano ang binutig nga ginsiling sang mga manugpamatok batok sa unang mga Cristiano?

⁷ Nagsiling si Jesus nga dapat magkalipay ang iya mga sumulunod bisan pa ang mga tawo ‘binutig nga nagahambal sing tanan nga sahi sang kalautan’ batok sa ila tungod sa iya. (Mateo 5:11) Natabo gid ini anay sa unang mga Cristiano. Sang ginbilanggo si apostol Pablo sa Roma, sang mga 59-61 C.⁠E., ang Judiyong mga lider didto nagsiling tuhoy sa mga Cristiano: “Nahanungod sini nga sekta nahibaluan gid namon nga bisan diin ginapakalain ini.” (Binuhatan 28:22) Ginsumbong sanday Pablo kag Silas nga ‘ginpabaliskad nila ang napuy-an nga duta,’ kag nagapanghikot “batok sa mando ni Cesar.”​​—⁠⁠Binuhatan 17:​6, 7.

⁸ Tuhoy sa mga Cristiano sang panahon sang Romanong Emperyo, ang istoryador nga si K. S. Latourette nagsulat: “Lainlain ang mga panumbungon. Gintawag nga mga ateista ang mga Cristiano bangod wala sila magpakigbahin sa pagano nga mga seremonya. Bangod wala sila magpakigbahin sa madamo nga hilikuton sang komunidad​​—⁠⁠sa pagano nga mga piesta, sa mga kalingawan sang publiko . . . ginyaguta sila kag ginsingganan nga ginadumtan nila ang kaliwatan sang tawo. . . . Ang mga lalaki kag mga babayi nagatipon kuno kon gab-i . . . kag nagahinirupay. . . . Ang katunayan nga [ang Memoryal sang kamatayon ni Cristo] ginsaulog sang mga tumuluo lamang gintunaan sang mga huringhuring nga ang mga Cristiano regular nga nagahalad sing lapsag kag ginakaon nila ang dugo kag unod sini.” Dugang pa, bangod nangindi ang unang mga Cristiano sa pagsimba sa emperador, ginsumbong sila nga mga kaaway sang Estado.

9. Ano ang ginhimo sang mga Cristiano sang nahauna nga siglo bangod sa butig nga mga panumbungon batok sa ila, kag ano ang kahimtangan karon?

⁹ Yadtong butig nga mga panumbungon wala magpugong sa unang mga Cristiano sa pagtuman sa ginsugo sa ila nga ibantala ang maayong balita sang Ginharian. Sang tuig 60-61 C.⁠E., ginbantala ni Pablo ang “maayong balita” nga “nagapamunga kag nagalambo sa bug-os nga kalibutan” kag “ginbantala sa tanan nga tinuga sa idalom sang langit.” (Colosas 1:​5, 6, 23) Amo man ang nagakatabo karon. Kaangay sang mga Cristiano sang nahauna nga siglo, binutig man nga ginasumbong ang mga Saksi ni Jehova karon. Walay sapayan sini, ang hilikuton nga pagbantala sing mensahe sang Ginharian nagauswag kag nagapahalipay gid ini sa tanan nga nagapakigbahin sa sini.

Malipayon nga Ginahingabot Kaangay sang mga Manalagna

10, 11. (a) Paano gintapos ni Jesus ang iya pagbinagbinag sa ikasiam nga rason sa pagkalipay? (b) Ngaa ginhingabot ang mga manalagna? Maghatag sing mga halimbawa.

¹⁰ Gintapos ni Jesus ang iya pagbinagbinag sa ikasiam nga rason sa pagkalipay paagi sa pagsiling: “Magkasadya kamo . . . , kay sa sina nga paagi ginhingabot nila ang mga manalagna nga nauna sa inyo.” (Mateo 5:12) Ang mga manalagna nga ginpadala ni Jehova agod magpaandam sa di-matutom nga Israel ginsikway kag masami nga ginhingabot. (Jeremias 7:​25, 26) Ginpamatud-an ini ni apostol Pablo, sang magsulat sia: “Ano pa ang isiling ko? Kay kulangon ako sing tion kon isugid ko pa ang tuhoy . . . sa iban pa nga mga manalagna, nga paagi sa pagtuo . . . nakaagi sing pagtilaw paagi sa mga pag-uligyat kag mga pagbunal, kag kapin pa gani  sa sina, paagi sa mga gapos kag mga bilangguan.”​​—⁠⁠Hebreo 11:32-38.

¹¹ Sang nagagahom ang malaut nga si Hari Ahab kag ang iya asawa nga si Jezebel, madamo nga manalagna ni Jehova ang ginpatay paagi sa espada. (1 Hari 18:​4, 13; 19:10) Si manalagna Jeremias ginbutang sa pandog kag sang ulihi ginhaboy sa isa ka lunangon nga buho. (Jeremias 20:​1, 2; 38:6) Si manalagna Daniel ginhaboy sa lungib sang mga leon. (Daniel 6:​16, 17) Ini sila tanan nga mga manalagna antes sang panahon sang mga Cristiano ginhingabot bangod ginpangapinan nila ang putli nga pagsimba kay Jehova. Madamo nga manalagna ang ginhingabot sang relihioso nga mga lider sang mga Judiyo. Gintawag ni Jesus ang mga escriba kag mga Fariseo nga “mga anak sang mga nagpamatay sa mga manalagna.”​​—⁠⁠Mateo 23:31.

12. Ngaa, subong mga Saksi ni Jehova, ginakabig naton nga isa ka pribilehiyo nga hingabuton kaangay sang mga manalagna sang una?

¹² Sa karon, subong mga Saksi ni Jehova, masami kita ginahingabot bangod ginabantala naton sing makugi ang maayong balita sang Ginharian. Nagapanumbungon ang aton mga kaaway nga “masupog [kita] nga nagapangumbertir,” apang nahibaluan naton nga amo man sini anay ang ginmulay sa matutom nga mga sumilimba ni Jehova nga nauna sa aton. (Jeremias 11:21; 20:​8, 11) Ginakabig naton nga isa ka pribilehiyo nga mag-antos bangod sa rason man nga nag-antos anay ang mga manalagna sang una. Nagsulat si disipulo Santiago: “Mga utod, gamita subong huwaran sang pag-antos sa kalautan kag sang pagpailob ang mga manalagna, nga naghambal sa ngalan ni Jehova. Yari karon! Ginapahayag naton nga malipayon ang mga nagbatas.”​​​—⁠⁠Santiago 5:​10, 11.

Daku nga mga Rason sa Pagkalipay

13. (a) Ngaa wala nagaluya ang aton buot bangod sang paghingabot? (b) Ano ang nagabulig sa aton sa pagtindog sing malig-on, kag ano ang ginapamatud-an sini?

¹³ Sa baylo nga magluya ang aton buot bangod sang paghingabot, malugpayan kita sa paghunahuna nga ginasunod naton ang mga tikang sang mga manalagna, sang unang mga Cristiano, kag ni Cristo Jesus mismo. (1 Pedro 2:21) Ginalipay kita sang Kasulatan, subong sang masunod nga mga pulong ni apostol Pedro: “Mga hinigugma, dili kamo matingala nahanungod sa kalayuhon nga pagtilaw sa tunga ninyo, nga nagakatabo sa inyo subong isa ka pagtilaw, subong nga daw isa ka kalatingalahan nga butang ang nahanabo sa inyo. Kon ginapakahuy-an kamo tungod sa ngalan ni Cristo, malipayon kamo, bangod ang espiritu sang himaya, ang espiritu mismo sang Dios, yara sa inyo.” (1 Pedro 4:​12, 14) Pasad sa aton naeksperiensiahan, nahibaluan naton nga makatindog lamang kita sing malig-on sa tion sang paghingabot bangod ang espiritu ni Jehova yara sa aton kag nagapabakod sa aton. Ang bulig sang balaan nga espiritu isa ka pamatuod nga si Jehova nagapakamaayo sa aton, kag ginakalipay gid naton ini.​​—⁠⁠Salmo 5:12; Filipos 1:27-29.

14. Ano ang aton mga rason sa pagkasadya nga ginahingabot kita bangod sa pagkamatarong?

¹⁴ Ang isa pa ka rason kon ngaa ginakalipay naton ang pagpamatok kag paghingabot bangod  sa pagkamatarong amo nga ginapamatud-an sini nga nagakabuhi kita subong matuod nga mga Cristiano nga may diosnon nga debosyon. Nagsulat si apostol Pablo: “Ang tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man.” (2 Timoteo 3:12) Malipayon gid kita nga ang aton pagpabilin nga malig-on sa tion sang pagtilaw nagahatag sing dugang pa nga sabat sa hangkat ni Satanas nga ang tanan nga tinuga ni Jehova nagaalagad sa Iya bangod sang makagod nga motibo. (Job 1:9-11; 2: 3, 4) Nagakasadya kita nga may bahin kita, bisan diutay lang, sa pagbindikar sa matarong nga pagkasoberano ni Jehova.​​—⁠⁠Hulubaton 27:11.

Magtumbo sa Kalipay sa Padya

15, 16. (a) Ano nga rason ang ginhatag ni Jesus agod “magkasadya [kita] kag magtumbo sa kalipay”? (b) Ano nga padya ang nagahulat sa langit para sa hinaplas nga mga Cristiano, kag paano padyaan man ang ila kaupod nga “iban nga mga karnero”?

¹⁵ Naghatag si Jesus sing dugang pa nga rason sa pagkalipay bisan ginapasipalahan kag ginahingabot kita kaangay sang mga manalagna sang una. Sa paghinakop sang ikasiam nga rason sa pagkalipay, nagsiling sia: “Magkasadya kamo kag magtumbo sa kalipay, kay daku ang inyo padya sa mga langit.” (Mateo 5:12) Nagsulat si apostol Pablo: “Ang bayad nga ginabayad sa sala amo ang kamatayon, apang ang dulot nga ginahatag sang Dios amo ang kabuhi nga walay katapusan paagi kay Cristo Jesus nga aton Ginuo.” (Roma 6:23) Huo, ang ‘daku nga padya’ amo ang kabuhi, kag indi ini isa ka sueldo nga mapangabudlayan naton. Isa ini ka regalo. Nagsiling si Jesus nga ang padya yara “sa mga langit” bangod magagikan ini kay Jehova.

¹⁶ Mabaton sang mga hinaplas “ang purongpurong sang kabuhi,” kon sayuron, ang di-mamalatyon nga kabuhi upod kay Cristo sa langit. (Santiago 1:​12, 17) Ang may dutan-on nga paglaum, ang “iban nga mga karnero,” nagapaabot nga makapanubli sing kabuhi nga walay katapusan sa isa ka dutan-on nga paraiso. (Juan 10:16; Bugna 21:3-5) Ang “padya” para sa sining duha ka klase indi isa ka butang nga ginpangabudlayan nila. Mabaton sang mga hinaplas kag sang “iban nga mga karnero” ang ila padya bangod sa “labaw nga di-bagay nga kaayo” ni Jehova, nga nagpahulag kay apostol Pablo  sa pagsiling: “Salamat sa Dios bangod sa iya di-malaragway nga walay bayad nga dulot.”​​—⁠⁠2 Corinto 9:​14, 15.

17. Ngaa mahimo kita magmalipayon kon ginahingabot kag malaragwayon nga “magtumbo sa kalipay”?

¹⁷ Sa mga Cristiano, nga ang iban sa ila mapintas nga pagahingabuton ni Emperador Nero sa indi madugay, nagsulat si apostol Pablo: “Magkasadya kita samtang sa mga kapipit-an, sanglit nahibaluan naton nga ang kapipit-an nagapatubas sing pagbatas; ang pagbatas naman, sing kalahamut-an nga kahimtangan, ang kalahamut-an nga kahimtangan naman, sing paglaum, kag ang paglaum wala nagadul-ong sa kabang-awan.” Nagsiling man sia: “Magkasadya kamo sa paglaum. Magbatas kamo sa idalom sang kapipit-an.” (Roma 5:3-5; 12:12) Langitnon man ukon dutan-on ang aton paglaum, ang aton padya kon magmatutom kita sa tion sang pagtilaw mas daku gid sangsa nagakabagay sa aton. Wala sing latid ang mangin kalipay naton sa aton ginalauman nga kabuhi nga dayon agod mag-alagad kag magdayaw sa aton mahigugmaon nga Amay, si Jehova, sa idalom sang aton Hari nga si Jesucristo. Malaragwayon kita nga ‘magatumbo sa kalipay.’

18. Ano ang mapaabot naton nga himuon sang mga pungsod samtang nagahilapit ang katapusan, kag ano ang himuon ni Jehova?

¹⁸ Sa pila ka pungsod, ginahingabot gihapon ang mga Saksi ni Jehova. Sa gintagna ni Jesus tuhoy sa katapusan sang sistema sang mga butang, nagpaandam sia sa matuod nga mga Cristiano: “Dumtan kamo sang tanan nga pungsod tungod sa akon ngalan.” (Mateo 24:9) Samtang nagahilapit kita sa katapusan, pahulagon ni Satanas ang mga pungsod nga ipakita ang ila dumot batok sa katawhan ni Jehova. (Ezequiel 38:10-12, 14-16) Magapatimaan ini sang paghulag ni Jehova. “Pat-od nga pakadakuon ko ang akon kaugalingon kag pakabalaanon ang akon kaugalingon kag ipakilala ko ang akon kaugalingon sa mga mata sang madamo nga pungsod; kag makilala gid nila nga ako amo si Jehova.” (Ezequiel 38:23) Sa amo, pakabalaanon ni Jehova ang iya daku nga ngalan kag luwason ang iya katawhan gikan sa paghingabot. Busa, “malipayon ang tawo nga padayon nga nagabatas sang pagtilaw.”​​—⁠⁠Santiago 1:12.

19. Samtang ginahulat naton ang daku nga “adlaw ni Jehova,” ano ang dapat naton himuon?

¹⁹ Samtang nagalapit pa inang “adlaw ni Jehova,” magkalipay kita bangod “naisipan [kita] nga takus nga pakahuy-an” tungod sa ngalan ni Jesus. (2 Pedro 3:10-13; Binuhatan 5:41) Kaangay sang unang mga Cristiano, kabay nga magpadayon kita “nga walay untat sa pagpanudlo kag sa pagpahayag sing maayong balita nahanungod kay Cristo” kag sa panguluhan sang iya Ginharian samtang ginahulat naton ang aton padya sa matarong nga bag-ong kalibutan ni Jehova.​​—⁠⁠Binuhatan 5:42; Santiago 5:11.

Subong Repaso

• Ano ang buot silingon sang pag-antos bangod sa pagkamatarong?

• Ano ang epekto sang paghingabot sa unang mga Cristiano?

• Ngaa masiling nga ginahingabot ang mga Saksi ni Jehova kaangay sang mga manalagna sang una?

• Ngaa mahimo kita “magkasadya kag magtumbo sa kalipay” kon ginahingabot?

[Mga Pamangkot sa Pagtinuon]

[Mga retrato sa pahina 16, 17]

“Malipayon kamo kon ginapakahuy-an kamo sang mga tawo kag ginahingabot kamo”

[Credit Line]

Grupo nga nabilanggo: Chicago Herald-American