Maglakat Ka sa Dalanon sang Integridad

“Nahanungod sa akon, magalakat ako sa akon integridad.”​—⁠SALMO 26:11.

1, 2. (a) Ngaa ang integridad sang tawo nangin importante nga bahin sa hulusayon sang pagkasoberano sang Dios? (b) Paano mapakita sang intelihente nga mga tinuga nga dampig sila sa pagkasoberano ni Jehova?

SANG nagrebelde si Satanas sa hardin sang Eden, ginpautwas niya ang bug-os uniberso nga hulusayon sa kon bala may kinamatarong ang Dios sa paggahom sa tanan Niya nga tinuga. Sang ulihi, nagsiling sia nga ang mga tawo magaalagad lamang sa Dios kon may makuha sila nga bentaha. (Job 1:​9-​11; 2:4) Busa, ang integridad sang tawo nangin importante nga bahin sa hulusayon sang bug-os uniberso nga pagkasoberano ni Jehova.

² Bisan pa ang pagkasoberano sang Dios wala nagadepende sa integridad sang iya mga tinuga, mapakita sang mga tawo kag sang espiritu nga mga anak sang Dios kon diin sila madampig sa sini nga hulusayon. Paano? Paagi sa pagpili nga sundon ukon indi ang dalanon sang integridad. Kon amo, ang integridad sang indibiduwal amo ang mabakod nga basihan sang paghukom sa iya.

3. (a) Ano ang luyag ni Job kag ni David nga usisaon kag hukman ni Jehova? (b) Ano nga mga pamangkot ang nag-utwas tuhoy sa integridad?

³ Masinaligon nga nagsiling si Job: “Timbangon [ni Jehova] ako sa sibu nga timbangan kag mahibaluan sang Dios ang akon integridad.” (Job 31:6) Luyag ni Hari David nga usisaon ni Jehova ang iya integridad sang nangamuyo sia: “Hukmi ako, O Jehova, kay naglakat ako sa akon integridad, kag kay Jehova ako nagsalig, agod indi ako makadalin-as.” (Salmo 26:1) Daw ano ka importante nga maglakat man kita sa dalanon sang integridad! Apang ano ang integridad, kag ano ang buot silingon sang paglakat sa sini? Ano ang magabulig sa aton sa pagpabilin sa dalanon sang integridad?

“Naglakat Ako sa Akon Integridad”

4. Ano ang integridad?

⁴ Ang integridad nagakahulugan sing pagkatadlong, pagkawalay kasawayan, pagkatarong, kag pagkawalay kasaypanan. Apang, ang integridad wala lamang nagakahulugan sang paghimo sing matarong. Kaligdong ini sa moral ukon bug-os tagipusuon nga debosyon sa Dios. Ginpangduhaduhaan ni Satanas ang motibo ni Job sang nagsiling sia sa Dios: “Agod mangin lain naman, untaya ang imo kamot, palihug, kag tanduga ang iya [ni Job] tul-an kag ang iya unod kag sikwayon ka niya sa imo nawong.” (Job 2:5) Luwas sa husto nga buhat, ang integridad nagakinahanglan man sing husto nga motibo sang tagipusuon.

5. Ngaa ang paghupot sang integridad wala nagakinahanglan nga mangin himpit kita?

⁵ Apang, ang paghupot sing integridad wala nagakahulugan sing kahimpitan. Si Hari David di-himpit kag nakahimo sing pila ka mabug-at nga sala sa iya kabuhi. Apang, ginatawag sia sang Biblia subong ang tawo nga naglakat nga “may integridad sa tagipusuon.” (1 Hari 9:4) Ngaa? Bangod ginhigugma ni David si Jehova. Ang iya tagipusuon debotado sa Dios. Ginbaton niya ang iya mga kasaypanan, nagbaton sing pagsabdong, kag nagtadlong sang iya mga dalanon. Sa pagkamatuod, ang integridad ni David makita sa iya bug-os tagipusuon nga debosyon kag gugma sa iya Dios, si Jehova.​​​—⁠⁠Deuteronomio 6:​5, 6.

6, 7. Ano ang nadalahig sa paglakat sa integridad?

⁶ Ang integridad indi lamang sa isa ka aspekto sang paggawi sang tawo, subong sang relihioso nga debosyon. Nagadalahig ini sa aton bug-os nga pagsinalayo. Si David ‘naglakat’ sa iya integridad. “Ang berbo nga ‘paglakat’ nagapahangop sing ‘pagkabuhi’ ukon ‘estilo sang pagkabuhi,’” siling sang The New Interpreter’s Bible. Nagapamulong tuhoy sa mga “walay kasawayan sa ila dalanon,” ang salmista nag-amba: “Malipayon ang  mga nagatuman sa iya [sang Dios] mga pahanumdom; nga nagapangita sa iya sa bug-os nga tagipusuon. Sa pagkamatuod wala sila nagabuhat sing pagkadimatarong. Naglakat sila sa iya mga dalanon.” (Salmo 119:1-3) Ang integridad nagakinahanglan sing dalayon nga pagpanikasog sa paghimo sang kabubut-on sang Dios kag paglakat sa iya dalanon.

⁷ Ang paglakat sa integridad nagakinahanglan sing mainunungon nga debosyon sa Dios, bisan sa di-maayo nga mga kahimtangan. Kon nagabatas kita sa idalom sang mga pagtilaw, nagapabilin nga malig-on walay sapayan sang mga kapiutan, ukon nagapamatok sa mga pagsulay sang di-diosnon nga kalibutan, ang aton integridad mapadayag. ‘Mapahalipay naton si Jehova’ bangod masabat na niya ang isa nga nagayaguta sa iya. (Hulubaton 27:11) Nian, makapamat-od kita kaangay ni Job: “Tubtob nga mapatay ako indi ko pag-isikway ang akon integridad gikan sa akon!” (Job 27:5) Ginapakita sang ika-26 nga Salmo kon ano ang makabulig sa aton sa paglakat nga may integridad.

“Putlia ang Akon mga Batobato kag ang Akon Tagipusuon”

8. Ano ang matun-an mo sa pangabay ni David nga usisaon ni Jehova ang iya mga batobato kag tagipusuon?

⁸ Si David nangamuyo: “Usisaa ako, O Jehova, kag tilawi ako; putlia ang akon mga batobato kag ang akon tagipusuon.” (Salmo 26:2) Ang mga batobato nahamtang sa pinakasulod nga bahin sang lawas. Sing malaragwayon, ginarepresentar sang mga batobato ang pinakamadalom nga mga panghunahuna kag mga balatyagon sang isa. Kag ang malaragwayon nga tagipusuon amo ang bug-os nasulod nga pagkatawo​​—⁠⁠ang iya motibasyon, mga balatyagon, kag kaalam. Sang nangabay si David kay Jehova nga usisaon sia, luyag niya nga usisaon ni Jehova ang iya nasulod gid nga mga panghunahuna kag mga balatyagon.

9. Sa anong paagi ginaputli ni Jehova ang aton malaragwayon nga mga batobato kag tagipusuon?

⁹ Nangabay si David nga putlion ang iya mga batobato kag tagipusuon. Paano ginaputli ni Jehova ang aton nasulod nga pagkatawo? Si David nag-amba: “Pakamaayuhon ko si Jehova, nga nagalaygay sa akon. Sa pagkamatuod, sa mga kagab-ihon gintadlong ako sang akon mga batobato.” (Salmo 16:7) Ano ang buot silingon sini? Nagakahulugan ini nga ang laygay sang Dios naglab-ot sa pinakamadalom nga mga bahin sang pagkatawo ni David kag nagpabilin didto, nagatadlong sang iya nasulod gid nga mga panghunahuna kag mga balatyagon. Amo man ang matabo sa aton kon mapinasalamaton nga ginapamalandungan naton ang laygay nga nabaton naton paagi sa Pulong sang Dios, sa iya mga tiglawas, kag sa iya organisasyon kag tugutan ini nga magtudok sa aton. Ang regular nga pagpangamuyo kay Jehova nga putlion kita sa sining paagi magabulig sa aton sa paglakat nga may integridad.

 ‘Ang Imo Mahigugmaon nga Kaayo Yara sa Akon Atubangan’

10. Ano ang nagbulig kay David sa paglakat sa kamatuoran sang Dios?

¹⁰ “Ang imo mahigugmaon nga kaayo yara sa atubangan sang akon mga mata,” padayon ni David, “kag naglakat ako sa imo kamatuoran.” (Salmo 26:3) Nahibaluan gid ni David ang mga buhat sang mahigugmaon nga kaayo sang Dios, kag mainapresyahon niya ini nga ginpamalandungan. “Pakamaayuha si Jehova, O kalag ko,” amba niya, “kag indi pagkalimti ang tanan niya nga mga buhat.” Ginadumdom ang isa sa “mga buhat” sang Dios, si David nagpadayon: “Si Jehova nagapadapat sang iya matarong nga mga buhat kag sang hudisyal nga mga desisyon para sa tanan nga ginadayaan. Ginpahibalo niya kay Moises ang tanan niya nga dalanon, kag ang iya tanan nga pagpakig-angot sa mga anak ni Israel.” (Salmo 103:​2, 6, 7) Ayhan nadumduman ni David ang pagdaya sang mga Egiptohanon sa mga Israelinhon sang panahon ni Moises. Kon amo, ang pagpamalandong kon paano ginpahibalo ni Jehova ang iya mga paagi sang pagluwas kay Moises mahimo nagtandog gid sa tagipusuon ni David kag nagpabakod sang iya determinasyon nga maglakat sa kamatuoran sang Dios.

11. Ano ang makabulig sa aton sa paglakat sa dalanon sang integridad?

¹¹ Ang pagtuon sa Pulong sang Dios sing regular kag ang pagpamalandong sang aton natun-an sa sini magabulig man sa aton sa paglakat sa dalanon sang integridad. Halimbawa, ang pagdumdom nga nagpalagyo si Jose sa imoral nga paghaylo sang asawa ni Potifar magapalig-on gid sa aton nga malagyo man sa kaanggid nga mga paghaylo sa aton ginaobrahan, sa eskwelahan, ukon bisan diin. (Genesis 39:​7-​12) Kamusta naman kon ginasulay kita sang mga oportunidad nga mangin manggaranon ukon mangin prominente kag mangin gamhanan sa kalibutan? Yara ang halimbawa ni Moises, nga nagsikway sang mga kahimayaan sang Egipto. (Hebreo 11:24-​26) Ang pagdumdom sa pagbatas ni Job wala sing duhaduha nga magabulig sa aton sa pagpabakod sang aton determinasyon nga magpabilin nga mainunungon kay Jehova walay sapayan sang mga balatian kag mga kalamidad. (Santiago 5:11) Paano kon ginahingabot kita? Bueno, ang pagdumdom sa naagihan ni Daniel sa lungib sang mga leon magahatag gid sa aton sing kaisog!​​​—⁠⁠Daniel 6:​16-​22.

“Wala Ako Maglingkod Upod sa mga Tawo nga Butigon”

12, 13. Ano nga sahi sang kaupdanan ang dapat naton likawan?

¹² Nagapatuhoy sa isa pa ka butang nga nagpabakod sang iya integridad, si David nagsiling: “Wala ako maglingkod upod sa mga tawo nga butigon; kag wala ako nagasulod upod sa mga nagapakunokuno. Ginadumtan ko ang kongregasyon sang mga nagahimo sing malaut, kag wala ako  nagalingkod upod sa mga malauton.” (Salmo 26:​4, 5) Wala gid maglingkod si David upod sa mga malauton. Ginadumtan niya ang malain nga mga kaupdanan.

¹³ Kamusta naman kita? Wala bala kita nagalingkod upod sa mga tawo nga butigon paagi sa mga programa sa telebisyon, video, pelikula, Internet, ukon sa iban pa nga mga paagi? Ginalikawan bala naton ang mga nagapakunokuno? Ang pila sa eskwelahan ukon sa aton ulubrahan mahimo magpakunokuno nga makig-abyan sa aton sa tuyo nga manglimbong. Luyag gid bala naton makigsuod sa mga wala nagalakat sa kamatuoran sang Dios? Bisan nagapangangkon nga sinsero, mahimo man ihinago sang mga apostata ang ila katuyuan nga ipahilayo kita sa pag-alagad kay Jehova. Ano abi kon may pila sa Cristianong kongregasyon nga nagakabuhi sing doble-kara? Nagapakunokuno man sila. Si Jayson, nga nagaalagad na karon subong isa ka ministeryal nga alagad, may subong sini nga mga abyan sang pamatan-on pa sia. Nagsiling sia tuhoy sa ila: “Isa ka adlaw isa sa ila ang nagsiling sa akon: ‘Wala sing kaso kon ano ang himuon naton karon kay kon mag-abot ang bag-ong sistema, mapatay man lang kita. Indi naton mahibaluan nga may nawasi kita.’ Ina nga panghambal nagpabugtaw sa akon. Indi ko luyag mapatay kon mag-abot ang bag-ong sistema.” Maalamon nga ginlikawan na sila ni Jayson. “Indi kamo magtalang,” paandam ni apostol Pablo. “Ang malain nga kaupdanan nagadunot sang mapuslanon nga mga batasan.” (1 Corinto 15:33) Daw ano gid ka importante nga likawan naton ang malain nga mga kaupdanan!

‘Ipahayag Ko ang Imo Tanan nga Makatilingala nga mga Binuhatan’

14, 15. Paano kita ‘makalibot sa halaran ni Jehova’?

¹⁴ “Hinawan ko ang akon kamot sa pagkawalay sala, kag magalibot ako sa imo halaran, O Jehova,” padayon ni David. Ngaa? “Agod nga mapabati ko sing mabaskog ang pagpasalamat, kag mapahayag ko ang imo tanan nga makatilingala nga mga binuhatan.” (Salmo 26:​6, 7) Luyag ni David nga magpabilin nga matinlo sa moral agod masimba niya si Jehova kag mapahayag ang iya debosyon sa Dios.

¹⁵ Ang tanan nga pagsimba nga ginhimo sa tabernakulo kag sa ulihi sa templo “isa ka tipiko nga representasyon kag isa ka landong sang langitnon nga mga butang.” (Hebreo 8:⁠5; 9:23) Ginlaragway sang halaran ang kabubut-on ni Jehova sa pagbaton sang halad ni Jesucristo sa paggawad sa katawhan. (Hebreo 10:​5-​10) Ginahinawan naton ang aton mga kamot sa pagkawalay sala kag ‘magalibot sa halaran ni Jehova’ paagi sa pagpasundayag sang aton pagtuo sa sina nga halad.​​​—⁠⁠Juan 3:​16-​18.

16. Paano kita makabenepisyo sa pagpahayag sang makatilingala nga mga binuhatan sang Dios sa iban?

¹⁶ Kon dumdumon naton ang tanan nga mahimo sang gawad, indi bala kita magpasalamat sing daku kay Jehova kag sa iya bugtong nga Anak? Kon, upod ang mapinasalamaton nga tagipusuon, ipahayag naton sa iban ang makatilingala nga mga binuhatan sang Dios​​—⁠⁠halin sa pagtuga sang tawo sa hardin sang Eden tubtob sa bug-os nga pagpasag-uli sang tanan nga butang sa bag-ong kalibutan sang Dios. (Genesis 2:⁠7; Binuhatan 3:21) Kag daw ano nga pangamlig sa espirituwal ang pagbantala sing Ginharian kag paghimo-disipulo nga hilikuton! (Mateo 24:14; 28:​19, 20) Ang pagpabilin nga masako nagapasanag sang aton paglaum sa palaabuton, nagapabakod sang aton pagtuo sa mga saad sang Dios, kag nagapapagsik sang aton gugma kay Jehova kag sa aton mga isigkatawo.

“Ginhigugma Ko ang Ginahamtangan sang Imo Balay”

17, 18. Ano dapat ang aton panimuot sa Cristianong mga miting?

¹⁷ Ang tabernakulo, upod ang altar sini para sa mga halad, amo ang sentro sang pagsimba sang Israel kay Jehova. Bilang pagpabutyag sang iya kalipay sa sini nga duog, si David nangamuyo: “Jehova, ginhigugma ko ang ginahamtangan sang imo balay kag ang duog nga ginapuy-an sang imo himaya.”​​—⁠⁠Salmo 26:8.

¹⁸ Nanamian bala kita magtipon sa mga duog diin nagatuon kita tuhoy kay Jehova? Ang tanan nga Kingdom Hall upod ang regular nga programa sang espirituwal nga pagpanudlo amo ang sentro sang matuod nga pagsimba sa komunidad. Dugang pa, may yara kita tuigan nga mga kombension, sirkito nga mga asambleya, kag mga adlaw sang pinasahi nga asambleya. Ginabinagbinag sa sini nga mga pagtililipon ang “mga pahanumdom”  ni Jehova. Kon matun-an naton nga ‘higugmaon ini sing lakas,’ manikasog gid kita sa pagtambong sa mga miting kag mangin atentibo samtang nagatambong. (Salmo 119:167) Makaparepresko gid nga makaupod ang mga masigkatumuluo nga interesado sa aton personal nga kaayuhan kag nagabulig sa aton nga magpabilin sa dalanon sang integridad!​​​—⁠⁠Hebreo 10:​24, 25.

‘Dili Pagkuhaa ang Akon Kabuhi’

19. Ano nga mga sala ang ginlikawan gid ni David?

¹⁹ Nakahibalo gid kon ano ang mangin mga resulta sang indi paglakat sa kamatuoran sang Dios, si David nangabay: “Dili pagkuhaa ang akon kalag upod sa mga makasasala, ni ang akon kabuhi upod sa mga tawo nga nakasala sa dugo, nga ang mga kamot may lugak nga paggawi, kag ang natuo nga kamot puno sing paghamham.” (Salmo 26:​9, 10) Indi luyag ni David nga malakip sa di-diosnon nga mga tawo nga nagahimo sing lugak nga paggawi ukon paghamham.

20, 21. Ano ang makadul-ong sa aton sa dalanon sang mga di-diosnon?

²⁰ Ang kalibutan karon puno sang imoral nga mga buhat. Ang telebisyon, mga magasin, kag mga pelikula nagapalig-on sang lugak nga paggawi​​—⁠⁠“pagkamakihilawason; pagkadimatinlo; malaw-ay nga paggawi.” (Galacia 5:19) Ang iban nangin ulipon sang pornograpiya, nga masami nagaresulta sa imoral nga paggawi. Mahapos sini maapektuhan ilabi na ang mga pamatan-on. Sa pila ka kadutaan, ang pagpakig-date isa ka kinabatasan, kag ang mga tin-edyer ginaipit sa paghunahuna nga dapat man magdate. Madamo nga pamatan-on ang nagnobyonobyo, bisan hoben pa sila agod magminyo. Agod mapaayawan ang seksuwal nga handum nga nagalambo sa sulod nila, wala magdugay magahimo sila sing imoral nga paggawi tubtob sa punto nga makighilawas.

²¹ Ang mga adulto indi luwas sa sining malain nga mga impluwensia. Ang di-bunayag nga mga buhat sa negosyo kag ang huyog sa paghimo sing mga desisyon pasad sa makagod nga mga motibo mga ebidensia sang kakulang sang integridad. Ang pagsunod sa mga dalanon sang kalibutan magapahilayo lamang sa aton gikan kay Jehova. ‘Dumtan naton ang malaut, kag higugmaon ang maayo’ kag padayunon naton ang paglakat sa dalanon sang integridad.​​—⁠⁠Amos 5:15.

 “O Tubsa Ako kag Kaluuyi Ako”

22-24. (a) Ano nga pagpalig-on ang imo nasapwan sa nagahinakop nga mga pulong sang Salmo 26? (b) Ano nga siod ang pagabinagbinagon sa masunod nga artikulo?

²² Ginhinakpan ni David ang iya pagpabutyag sa Dios, nga nagasiling: “Nahanungod sa akon, magalakat ako sa akon integridad. O tubsa ako kag kaluuyi ako. Ang akon tiil pat-od nga magatindog sa matapan nga duog; sa tunga sang nagtipon nga katilingban pakamaayuhon ko si Jehova.” (Salmo 26:​11, 12) Ang determinasyon ni David nga huptan ang iya integridad naangot sing suod sa iya pagpangabay sing pagtubos. Daw ano gid ini ka makapalig-on! Walay sapayan sang aton pagkamakasasala, buligan kita ni Jehova kon determinado kita nga maglakat sa dalanon sang integridad.

²³ Kabay nga ang aton paagi sang pagkabuhi nagapakita nga ginatahod kag ginaapresyar naton ang soberanya sang Dios sa tanan nga bahin sang aton kabuhi. Ang kada isa sa aton makapangamuyo kay Jehova nga usisaon kag putlion ang aton nasulod gid nga mga panghunahuna kag mga balatyagon. Dalayon naton nga madumduman ang iya kamatuoran paagi sa maukod nga pagtuon sang iya Pulong. Busa, kabay nga likawan naton ang malain nga mga kaupdanan apang pakamaayuhon si Jehova sa tunga sang katilingban. Kabay nga makugi kita nga makigbahin sa pagbantala-sing-Ginharian kag paghimo-disipulo nga hilikuton, nga wala ginatugutan ang kalibutan sa pagguba sang aton hamili nga kaangtanan sa Dios. Samtang ginahimo naton ang aton masarangan sa paglakat sa dalanon sang integridad, makasalig kita nga kahamut-an kita ni Jehova.

²⁴ Bangod ang integridad nagadalahig sang tanan nga bahin sang aton kabuhi, dapat naton bantayan ang isa ka makamamatay nga siod​​—⁠⁠ang pag-abuso sa alkohol. Binagbinagon ini sa masunod nga artikulo.

Madumduman Mo Bala?

• Ngaa makatarunganon nga hukman ang intelihente nga mga tinuga pasad sa ila integridad?

• Ano ang integridad, kag ano ang nadalahig sa paglakat sa dalanon sini?

• Ano ang makabulig sa aton sa paglakat sa dalanon sang integridad?

• Agod mahuptan ang integridad, ano nga mga katalagman ang dapat naton bantayan kag likawan?

[Mga Pamangkot sa Pagtinuon]

[Retrato sa pahina 14]

Regular ka bala nga nagapangabay kay Jehova nga usisaon ang imo nasulod gid nga mga panghunahuna?

[Retrato sa pahina 14]

Ginahuptan mo bala ang mga buhat ni Jehova sang mahigugmaon nga kaayo sa atubangan sang imo mga mata?

[Mga retrato sa pahina 15]

Ang aton paghupot sang integridad sa idalom sang mga pagtilaw nagapahalipay sang tagipusuon ni Jehova

[Mga retrato sa pahina 17]

Ginahimuslan mo bala ang mga aman ni Jehova agod buligan ka sa paglakat sa dalanon sang integridad?