Pagtipig sang Aton Cristianong Identidad

“‘Kamo akon mga saksi,’ siling ni Jehova.”​—⁠ISAIAS 43:10.

1. Ano nga sahi sang mga tawo ang ginabuyok ni Jehova sa iya?

SAMTANG yara ka sa Kingdom Hall, tan-awa sing maayo ang imo palibot. Sin-o ang makita mo sa sini nga duog? Mahimo makita mo ang mga pamatan-on nga maukod nga nagapamati sing Makasulatanhon nga kaalam. (Salmo 148:​12, 13) Makita mo man ang mga amay nga nagatinguha sa pagpahamuot sa Dios samtang nagakabuhi sa kalibutan nga nagaguba sa pamilya. Ayhan makita mo man ang mga tigulang, nga padayon nga nagakabuhi sa ila dedikasyon kay Jehova walay sapayan sang ila katigulangon. (Hulubaton 16:31) Ang tanan nagahigugma sing tudok kay Jehova. Kag nalipay sia nga may yara sia kaangtanan sa ila. “Wala sing tawo nga makakari sa akon,” siling sang Anak sang Dios, “luwas kon buyukon sia sang Amay, nga nagpadala sa akon.”​—⁠Juan 6:​37, 44, 65.

2, 3. Ngaa mabudlay gid huptan ang aton Cristianong identidad?

² Indi bala kita malipay nga bahin kita sang katawhan nga ginakahamut-an kag ginapakamaayo ni Jehova? Apang mabudlay gid mahuptan ang aton identidad subong Cristiano sa sining “makahalanguyos nga mga tion nga mabudlay pakigbagayan.” (2 Timoteo 3:1) Matuod gid ini ilabi na sa mga pamatan-on nga ginapadaku sang Cristianong pamilya. “Bisan pa nga nagatambong ako sa Cristianong mga miting,” baton sang isa ka  pamatan-on, “wala ako sing pat-od nga espirituwal nga mga tulumuron kag, sing prangka, wala ako sing handum nga mag-alagad kay Jehova.”

³ Ang iban naman nga luyag gid mag-alagad kay Jehova mahimo nga maupangan sang mabaskog nga pag-ipit sang mga katubotubo, sang impluwensia sang kalibutan, kag sang makasasala nga mga huyog. Kon ipiton kita sing grabe, mahimo nga amat-amat nga madula naton ang aton Cristianong identidad. Halimbawa, madamo karon sa kalibutan ang nagatamod sa talaksan sa moral sang Biblia nga dinumaan na ukon indi na realistiko para sa aton karon. (1 Pedro 4:4) Ang iban nagahunahuna nga indi na kinahanglan nga simbahon ang Dios suno sa ginasiling niya. (Juan 4:24) Sa iya sulat sa mga taga-Efeso, ginsambit ni Pablo nga ang kalibutan may “espiritu,” ukon nagapangibabaw nga panimuot. (Efeso 2:2) Ini nga espiritu nagaipit sa mga katawhan agod magsunod sa panghunahuna sang isa ka katilingban nga wala nakakilala kay Jehova.

4. Paano ginpadaku ni Jesus ang pagkinahanglan nga tipigan ang aton maathag nga identidad subong mga Cristiano?

⁴ Apang, subong dedikado nga mga alagad ni Jehova, nahibaluan naton nga daku gid nga kalisod para kay bisan sin-o sa aton​​—⁠bata man ukon tigulang​​—⁠nga madula ang aton Cristianong identidad. Ang nagakaigo nga pagtamod sa Cristianong identidad mapasad lamang sa mga talaksan ni Jehova kag sa iya mga ginapaabot sa aton. Kay man, gintuga kita sa larawan sang Dios. (Genesis 1:​26; Miqueas 6:8) Ang Biblia nagapaanggid sang aton putli nga identidad subong mga Cristiano sa nagua nga mga panapton, nga makita sang tanan. Nahanungod sa aton tion, si Jesus nagpaandam: “Yari karon! Nagakari ako subong sang makawat. Malipayon ang isa nga nagamata kag nagatipig sang iya nagua nga mga panapton, agod nga indi sia maglakat nga hublas kag magkahuya sa atubangan sang mga tawo.”⁠ * (Bugna 16:15) Indi naton luyag nga ubahon ang aton Cristianong mga kinaiya kag mga talaksan sa paggawi kag tugutan ang kalibutan ni Satanas nga dihunon kita. Kon matabo ina, mahublasan kita sang aton “nagua nga mga panapton.” Ina nga kahimtangan makapasubo kag makahuluya gid.

5, 6. Ngaa importante ang espirituwal nga kalig-on?

⁵ Ang pagpabalor gid sang aton Cristianong identidad nagagiya sa aton pagsinalayo. Paano? Kon magduhaduha sa iya identidad ang sumilimba ni Jehova, matublag gid sia, kag wala sing pat-od nga padulungan ukon mga tulumuron. Ang Biblia sulitsulit nga nagapaandam sa aton batok sining pagpangduhaduha. “Sia nga nagaduhaduha,” paandam ni disipulo Santiago, “kaangay sang balod sa dagat nga ginapalid sang hangin kag ginatumbotumbo. Sa katunayan, indi maghunahuna inang tawo nga magabaton sia sing bisan ano gikan kay Jehova; isa sia ka tawo nga indi makapamat-od, indi malig-on sa tanan niya nga dalanon.”​—⁠Santiago 1:6-8; Efeso 4:14; Hebreo 13:9.

⁶ Paano naton matipigan ang aton Cristianong identidad? Ano ang makabulig sa aton agod mapauswag ang aton pagpabalor sa aton dakung pribilehiyo nga simbahon ang Labing Mataas? Palihug binagbinaga ang masunod nga mga paagi.

 Lig-una ang Inyo Cristianong Identidad

7. Ngaa mapuslanon nga magpangabay kay Jehova nga usisaon kita?

⁷ Padayon nga palig-una ang inyo kaangtanan kay Jehova. Ang personal nga kaangtanan sa Dios amo ang pinakabilidhon nga ginaangkon sang isa ka Cristiano. (Salmo 25:14; Hulubaton 3:32) Kon magsugod kita sa pagduhaduha sa aton Cristianong identidad, dapat naton usisaon sing maayo ang kalidad kag ang kadalumon sang aton kaangtanan sa Iya. Ang salmista nagakaigo nga nagpangabay: “Usisaa ako, O Jehova, kag tilawi ako; putlia ang akon mga batobato kag ang akon tagipusuon.” (Salmo 26:2) Ngaa importante gid ini nga pag-usisa? Bangod indi naton mahibaluan sing bug-os ang aton tudok nga mga motibo kag nasulod nga mga huyog. Si Jehova lamang ang makatungkad sang aton pagkatawo​​—⁠sang aton mga motibo, hunahuna kag mga balatyagon.​—⁠Jeremias 17:​9, 10.

8. (a) Paano kita makabenepisyo sa pagtilaw ni Jehova? (b) Paano ka ginabuligan agod mag-uswag subong isa ka Cristiano?

⁸ Paagi sa pagpangabay kay Jehova nga usisaon kita, ginaagda naton sia nga tilawan kita. Mahimo nga tugutan niya ang mga kahimtangan agod mapahayag ang aton matuod nga mga motibo kag kahimtangan sang tagipusuon. (Hebreo 4:​12, 13; Santiago 1:​22-​25) Dapat naton atubangon ini nga mga pagtilaw bangod nagahatag ini sa aton sing kahigayunan nga ipakita ang kadalumon sang aton pagkamainunungon kay Jehova. Ginapakita sini kon bala kita “bug-os kag maayo sa tanan nga bahin, nga wala ginakulang sa bisan ano.” (Santiago 1:2-4) Sa amo, mahimo kita mag-uswag sa espirituwal.​—⁠Efeso 4:​22-​24.

9. Ngaa dapat kumbinsido kita nga ang ginatudlo sang Biblia matuod? Ipaathag.

⁹ Mangin kumbinsido sang kamatuoran sa Biblia. Mahimo magluya ang aton identidad subong mga alagad ni Jehova kon wala ini napasad sing malig-on sa ihibalo sang Kasulatan. (Filipos 1:​9, 10) Ang kada Cristiano​​—⁠bata man ukon tigulang​​—⁠dapat makapamatuod sa iya kaugalingon nga ang iya ginatuuhan amo gid ang kamatuoran nga masapwan sa Biblia. Ginpalig-on ni Pablo ang masigkatumuluo: “Pat-ura ninyo ang tanan nga butang; hupti sing malig-on ang maayo.” (1 Tesalonica 5:21) Dapat marealisar sang mga Cristianong pamatan-on nga nagdaku sa mahinadlukon-sa-Dios nga pamilya nga indi sila mangin matuod nga mga Cristiano bangod sang pagtuo sang ila mga ginikanan. Ang amay ni Solomon nga si David naglaygay sa iya nga ‘kilalahon niya ang Dios sang iya amay kag alagdon sia nga may himpit nga tagipusuon.’ (1 Cronica 28:9) Indi bastante nga saksihan lamang sang pamatan-on nga si Solomon kon paano ang iya amay nagtuo kay Jehova. Kinahanglan nga sia mismo ang magkilala kay Jehova, kag amo sini ang iya ginhimo. Nakitluoy sia sa Dios: “Hatagi ako karon sing kaalam kag ihibalo agod makagua kag makasulod sa atubangan sini nga katawhan.”​​—⁠2 Cronica 1:⁠10.

10. Ngaa indi sayop ang bunayag nga mga pamangkot nga may husto nga motibo?

¹⁰ Ang mabakod nga pagtuo napasad sa ihibalo. “Ang pagtuo nagasunod sa butang nga nabatian,” siling ni Pablo. (Roma 10:17) Ano ang iya buot silingon? Buot niya silingon nga paagi sa pagtuon sa Pulong sang Dios, ginapalig-on naton ang aton pagtuo kag pagsalig kay Jehova, sa iya mga saad, kag sa iya organisasyon. Ang sinsero nga mga pamangkot tuhoy sa Biblia magadul-ong sa makapalig-on nga mga sabat. Dugang pa, sa Roma 12:​2, masapwan naton ang laygay ni Pablo: ‘Pamatud-an ninyo sa inyo kaugalingon ang maayo kag kalahamut-an kag himpit nga kabubut-on sang Dios.’ Paano naton matigayon ini? Paagi sa pagtigayon sing “sibu nga ihibalo sang kamatuoran” (Tito 1:1) Ginabuligan kita sang espiritu ni Jehova sa paghangop bisan sang mabudlay nga mga topiko. (1 Corinto 2:​11, 12) Dapat kita mangamuyo para sa bulig sang Dios kon may mga butang nga indi naton mahangpan. (Salmo 119:​10, 11, 27) Luyag ni Jehova nga mahangpan gid naton ang iya Pulong, tuuhan ini, kag tumanon ini. Ginapamatian niya ang bunayag nga mga pamangkot nga may husto nga motibo.

Pahamut-i Gid ang Dios

11. (a) Anong kinaugali nga handum ang mahimo magsiod sa aton? (b) Paano kita makapangisog sa pag-atubang sang pag-ipit sang katubotubo?

¹¹ Pahamut-i ang Dios, indi ang tawo. Natural lamang nga luyag naton kilalahon subong bahin sang isa ka grupo. Ang tagsatagsa nagakinahanglan sing mga abyan, kag mabatyagan  naton ang kalipay kag kalig-unan kon batunon kita sang iban. Sa tion sang pagkatin-edyer​—⁠kag bisan pa hamtong na ang isa ​—⁠mabaskog gid ang pag-ipit sang katubotubo, nga mahimo nga tunaan sang mabaskog nga handum nga sundon ukon pahamut-an ang iban. Apang ang mga abyan kag mga katubotubo wala gid sa masami nagakabalaka sa aton kaayuhan. Kon kaisa luyag lang nila nga may kaupod sila sa paghimo sing sayop. (Hulubaton 1:​11-​19) Kon ang isa ka Cristiano naimpluwensiahan sing indi maayo nga kaupod, masami niya ginahinago ang iya identidad. (Salmo 26:4) “Indi kamo magsunod sa mga pagginawi sang mga tawo sa sini nga kalibutan,” paandam ni apostol Pablo. (Roma 12:​2, Maayong Balita nga Biblia) Ginaamanan kita ni Jehova sing nasulod nga kalig-on agod nga mapamatukan naton ang mga pag-ipit sa palibot.​—⁠Hebreo 13:6.

12. Ano nga prinsipio kag halimbawa ang makapalig-on sa aton sa pagpabilin nga matutom kon gintilawan ang aton pagsalig sa Dios?

¹² Kon daw gub-on sang pag-ipit sa palibot ang aton Cristianong identidad, mas maayo nga dumdumon nga ang aton pagkamainunungon sa Dios amo ang mas importante sangsa ginasiling ukon ginabuhat sang kalabanan. Ang pinamulong sa Exodo 23:2 isa ka makabulig nga prinsipio: “Dili ka magsunod sa kadam-an sa paghimo sing malaut.” Sang ang kalabanan sang Israelinhon nagduhaduha sa ikasarang ni Jehova sa pagtuman sang Iya mga saad, si Caleb malig-on nga nangindi sa pagsunod sa kadam-an. Napat-od niya nga masaligan ang mga saad sang Dios, kag ginpadyaan gid sia sing bugana bangod sini. (Numeros 13:30; Josue 14:​6-​11) Handa ka man bala nga magpamatok sa pag-ipit sang popular nga opinyon agod matipigan ang imo kaangtanan sa Dios?

13. Ngaa maalamon nga ipahibalo ang aton Cristianong identidad?

¹³ Ipahayag ang imo Cristianong identidad. Agod mahuptan ang aton Cristianong identidad dapat naton sundon ang halambalanon nga ang labing maayo nga depensa amo ang maayo nga opensa. Sang ginpamatukan ang matutom nga mga Israelinhon sa paghimo sang kabubut-on ni Jehova sang panahon ni Esdras, nagsiling sila: “Mga alagad kami sang Dios sang langit kag sang duta.” (Esdras 5:11) Kon sapakon naton ang mga reaksion kag pagmulay sang makiawayon nga mga tawo, mahimo nga maparalisar kita sang kahadlok. Ang pagpahamuot pirme sa tanan mahimo magapaluya sa aton. Gani indi gid magkahadlok. Maayo nga ipakilala mo gid pirme ang imo kaugalingon nga isa sa mga Saksi ni Jehova. Sa matinahuron kag malig-on nga paagi, mapaathag mo sa iban ang imo mga prinsipio, ginapatihan, kag tindog subong Cristiano. Ipahibalo sa iban nga desidido ka nga huptan ang mataas nga talaksan ni Jehova sa moral. Ipaathag sa ila nga ang imo Cristianong integridad indi mationg. Ipabugal ang talaksan sa moral nga imo ginasunod. (Salmo 64:10) Ang kakugi subong Cristiano mahimo nga makapabakod man sa imo, magaamlig sa imo, kag makapahulag pa gani sa iban nga usisaon ang tuhoy kay Jehova kag sa iya katawhan.

14. Dapat bala kita magluya bangod sang pagyaoyao ukon pagpamatok? Ipaathag.

¹⁴ Huo, mahimo nga yaoyaohon ukon pamatukan  ka sang iban. (Judas 18) Indi maluyahan sing buot kon indi magpamati ang iban sa pagpaathag mo sang imo mga prinsipio. (Ezequiel 3:​7, 8) Bisan ano pa ang imo himuon, indi mo gid mapapati ang mga tawo nga wala sing handum nga magpati. Dumduma si Paraon. Wala sing kalalat-an ukon milagro​—⁠bisan pa ang pagkapatay sang iya panganay nga anak​—⁠ang nagkumbinsi kay Paraon nga si Moises tiglawas ni Jehova. Gani indi magkahadlok sa tawo. Malandas naton ang kahadlok paagi sa pagsalig kag pagtuo kay Jehova.​—⁠Hulubaton 3:​5, 6; 29:25.

Lig-una ang Palaabuton Paagi sa Pagtuon sa Nagliligad

15, 16. (a) Ano ang aton espirituwal nga palanublion? (b) Paano kita makabenepisyo sa pagpamalandong sa aton espirituwal nga palanublion sa Pulong sang Dios?

¹⁵ Pakabahandia ang imo espirituwal nga palanublion. Paagi sa Pulong sang Dios, makabenepisyo ang mga Cristiano paagi sa pagpamalandong sang ila espirituwal nga palanublion. Nagalakip ini sa kamatuoran sang Pulong ni Jehova, sang paglaum nga kabuhi nga walay katapusan, kag sang kadungganan nga mangin representante sang Dios sa pagbantala sang maayong balita. Nakita mo bala ang imo papel sa tunga sang iya mga Saksi, ang katawhan nga gintangduan sang nagaluwas kabuhi nga hilikuton nga pagbantala sing Ginharian? Dumduma nga si Jehova mismo ang nagsiling: “Kamo akon mga saksi.”​—⁠Isaias 43:10.

¹⁶ Mahimo mo pamangkuton ang imo kaugalingon subong sang: ‘Daw ano ka hamili para sa akon ining espirituwal nga palanublion? Ginapabaloran ko gid bala ini agod ang paghimo sang kabubut-on sang Dios amo ang mangin panguna  sa akon kabuhi? Mabakod na bala ang akon apresasyon sa sini nga mapamatukan ko ang bisan ano nga mga tentasyon nga mahimo magdula sini nga palanublion?’ Ang aton espirituwal nga palanublion magapatudok man sa aton sing espirituwal nga kalig-unan nga matigayon lamang naton sa sulod sang organisasyon ni Jehova. (Salmo 91:​1, 2) Ang pagrepaso sang talalupangdon nga mga hitabo sa maragtas sang modernong adlaw nga organisasyon ni Jehova magapasalig sa aton nga wala sing bisan sin-o ukon bisan ano nga butang ang makalaglag sang katawhan ni Jehova.​—⁠Isaias 54:17; Jeremias 1:⁠19.

17. Ano ang dugang pa nga kinahanglan sangsa magsandig lamang sa aton espirituwal nga palanublion?

¹⁷ Sa pagkamatuod, indi lamang ang aton espirituwal nga palanublion ang aton dapat sandigan. Ang tagsatagsa sa aton dapat magpalambo sing suod nga kaangtanan sa Dios. Pagkatapos nagpangabudlay sa pagpalig-on sang pagtuo sang mga Cristiano sa Filipos, si Pablo nagsulat sa ila: “Busa, mga hinigugma ko, sa paagi nga pirme kamo nagmasinulundon, indi lamang sa tion sang akon presensia, kundi labi na gid karon sa tion nga ako wala, padayon ninyo nga panikasugi ang inyo kaugalingon nga kaluwasan nga may kahadlok kag pagkurog.” (Filipos 2:12) Indi naton masalig sa iban ang aton kaluwasan.

18. Paano ang Cristianong mga hilikuton magapalambo sang aton Cristianong identidad?

¹⁸ Manghikot sing bug-os sa Cristianong mga hilikuton. Ginsiling nga “ang hilikuton may makusog nga impluwensia sa personal nga identidad.” Gintangdo ang mga Cristiano karon sa isa ka importante nga hilikuton, ang pagbantala tuhoy sa natukod na nga Ginharian sang Dios. Nagsiling si Pablo: “Bangod ako, sa pagkamatuod, isa ka apostol sa mga pungsod, ginahimaya ko ang akon ministeryo.” (Roma 11:13) Ang aton pagbantala nga hilikuton nagapatuhay sa aton sa kalibutan, kag ang aton pagpakigbahin sa sini magapalambo sang aton Cristianong identidad. Ang bug-os nga pagpanghikot sa teokratiko nga mga hilikuton, subong sang Cristianong mga miting, pagpanukod sang mga duog sang pagsimba, pagbulig sa mga nagakinahanglan, kag ang mga hilikuton kaanggid sini, makapalig-on sang aton identidad subong mga Cristiano.​—⁠Galacia 6:​9, 10; Hebreo 10:​23, 24.

Pagpakamaayo Gid ang Maathag nga Identidad

19, 20. (a) Ano nga mga pagpakamaayo ang imo natigayon subong Cristiano? (b) Ano ang basihan sang aton matuod nga identidad?

¹⁹ Pamalandungi sing makadali ang madamong pagpakamaayo kag bentaha nga matigayon bangod matuod kita nga mga Cristiano. Pribilehiyo naton nga makilala mismo ni Jehova. Nagsiling si manalagna Malaquias: “Sa sina nga tion ang mga nagakahadlok kay Jehova nagsinilingay, ang kada isa sa iya kaupod, kag si Jehova padayon nga nagtalupangod kag nagpamati. Kag isa ka tulun-an sang handumanan ang ginsulat sa atubangan niya para sa mga nagakahadlok kay Jehova kag para sa mga nagapainuino sa iya ngalan.” (Malaquias 3:16) Mahimo kita tamdon sang Dios subong iya mga abyan. (Santiago 2:23) Ginapunihan ang aton kabuhi sang maathag nga katuyuan, sang matuod nga kahulugan, kag sang maayo kag mabungahon nga mga tulumuron. Kag may paglaum kita nga mabuhi sing walay katapusan.​—⁠Salmo 37:9.

²⁰ Dumduma nga ang imo matuod nga pagkatawo kag balor nagadepende sa pagtamod sa imo sang Dios, indi sa kon ano ang ginahunahuna sa imo sang mga tawo. Mahimo nga hukman kita sang iban pasad sa di-sangkol nga tawhanon nga mga talaksan. Apang ang gugma kag interes sang Dios sa aton amo ang basihan sang aton matuod nga balor​—⁠nga iya kita ni Jehova. (Mateo 10:29-​31) Sa amo, ang aton gugma sa Dios nagahatag sing kapat-uran sa aton identidad kag sing labing maathag nga panuytoy sa kabuhi. “Kon ginahigugma sang bisan sin-o ang Dios, ginakilala niya ining isa.”​—⁠1 Corinto 8:3.

[Nota]

Madumduman Mo Bala?

• Ngaa importante sa mga Cristiano nga tipigan ang ila espirituwal nga identidad?

• Paano naton mapalig-on ang aton Cristianong identidad?

• Kon nagaatubang sing pamangkot kon sin-o ang aton pahamut-an, ano ang makabulig sa aton agod makadesisyon sing husto?

• Paano ang maathag nga paghangop sa aton identidad nagadihon sang aton palaabuton subong Cristiano?

[Mga Pamangkot sa Pagtinuon]

[Mga retrato sa pahina 21]

Ang pagpanghikot sing bug-os sa Cristianong mga hilikuton makapauswag sa aton Cristianong identidad