“Ang Bulig sa Akon Nagagikan kay Jehova”

Ang mga Pamatan-on nga Nagadayaw kay Jehova Nagapauswag sang ila Kabuhi

“LUYAG ko matigayon ang pinakamaayo nga mga butang sa kabuhi!” Amo sini ang paglaragway sang isa ka tin-edyer nga lalaki sa iya mga handum. Apang paano bala matigayon sang isa ka pamatan-on ang pinakamaayo gid nga mga butang sa kabuhi? Ang Biblia naghatag sing prangka nga sabat: “Dumduma ang imo Manunuga samtang lamharon ka pa!”​​—⁠Manugwali 12:​1, Contemporary English Version.

Indi lamang mga hamtong ang makadayaw kag makaalagad kay Jehova. Si Samuel, nga anak ni Elcana kag Ana, bata pa sang nag-alagad sia kay Jehova sa tabernakulo. (1 Samuel 1:​19, 20, 24; 2:11) Ang Hebreo nga dalagita nagpakita sing bug-os nga pagtuo kay Jehova sang nagpanugda sia nga magkadto ang pangulo sang Sirianhon nga hangaway nga si Naaman kay manalagna Eliseo agod mag-ayo ang iya aro. (2 Hari 5:​2, 3) Sa Salmo 148:​7, 12, ang mga bata nga lalaki kag babayi ginsugo nga dayawon si Jehova.⁠ * Sang 12-anyos si Jesus, nagpakita sia sing hanuot nga interes sa pag-alagad sa iya Amay. (Lucas 2:​41-​49) Bangod sang paghanas sa ila paagi sa Kasulatan, ang pila ka bata nga lalaki nga nakakita kay Jesus sa templo nagsinggit: “Magluwas ka, pangamuyo namon, sa Anak ni David!”​—⁠Mateo 21:​15, 16.

Pagdayaw kay Jehova Karon

Sa karon, madamo nga pamatan-on sa mga Saksi ni Jehova ang nagapabugal sang ila pagtuluuhan kag maisog nga nagapamulong tuhoy sini sa mga eskwelahan kag bisan diin. Binagbinaga ang duha ka halimbawa.

Sa Britanya, ginhambalan sa klase sang 18-anyos nga si Stephanie ang isyu tuhoy sa aborsion kag sa iban pa nga moral nga mga isyu. Nagsiling ang maestro nga ang aborsion ginabaton na karon sing lapnag kag wala sing rason ang bisan sin-o nga pamatan-on nga babayi nga pamatukan ining buhat. Sang ang tanan sa klase nag-ugyon sa sining pagtamod, napahulag si Stephanie nga pangapinan ang iya pasad sa Biblia nga panindugan. Nag-abot ini nga kahigayunan sang ginpangabay sang maestro ang opinyon ni Stephanie. Bisan pa ginakulbaan sia sa primero, ginhimuslan ni Stephanie ini nga kahigayunan agod ihatag ang pagtamod sang Kasulatan. Ginsambit niya ang Exodo 21:22-24 kag ginpaathag nga kon sayop ang pagsamad sa wala pa mabun-ag nga lapsag, nian maathag nga supak gid sa kabubut-on sang Dios ang aborsion.

Ang maestro, nga miembro sang klerigo, wala pa gid makabasa sini nga mga teksto. Ang maisugon nga pagpanaksi ni Stephanie nagdul-ong sa madamong makawiwili nga paghinun-anon sa iya mga kaklase sa nanuhaytuhay nga topiko. Ang isa ka kaklase nga babayi ni Stephanie regular na karon nga nagabaton sing bag-o nga mga kopya sang Ang Lalantawan kag Magmata!, kag ang duha pa nagtambong sa isa ka distrito nga kombension sang mga Saksi ni Jehova agod makita ang pagpabawtismo ni Stephanie subong simbulo sang iya dedikasyon sa Dios.

Gingamit sang seis-anyos nga si Vareta, nga nagapuyo sa Suriname, Bagatnan nga Amerika, ang kahigayunan nga dayawon ang Dios sang nagakinahanglan sing lugpay gikan sa Kasulatan ang iya maestra. Sang magbalik pagkatapos sang tatlo-ka⁠-⁠adlaw nga pag-absent sa klase, ginpamangkot sang maestra ang iya mga estudyante kon nahibaluan bala nila kon ngaa nag-absent sia. Nagsabat sila,  “Nagmasakit ka, indi bala?” “Wala,” sabat sang maestra. “Ang akon magulang nga babayi napatay, kag nasubuan gid ako. Gani indi kamo maggahod kay masakit ang akon ulo.”

Sina nga hapon samtang nagapiyongpiyong ang iya iloy, masako nga nagapangbukas si Vareta sang daan nga mga magasin, nga ginabasa ang mga tig-ulo. Nakita niya Ang Lalantawan nga Hulyo 15, 2001, nga may tig-ulo “May Yara Pa Bala Kabuhi sa Tapos Sang Kamatayon?” Bangod sa kakunyag, ginpukaw niya ang iya iloy kag nagsiling, “Mommy, Mommy, tan-awa bala! Nakita ko na ang magasin tuhoy sa kamatayon para sa akon maestra!” Ang magasin ginpadala sa maestra lakip ang isa ka sulat ni Vareta. Ang sulat nagasiling: “Para gid ini sa imo. Sa Paraiso makita mo liwat ang imo magulang bangod si Jehova wala nagabutig. Nagsaad sia nga paluntaron niya ang paraiso, indi sa langit, kundi sa duta.” Nagpasalamat gid ang maestra sa pasad sa Biblia nga lugpay gikan sa sining mga artikulo.

Pagtukod Para sa Palaabuton

Si Jehova “malipayon nga Dios,” kag luyag niya nga mangin malipayon ang mga pamatan-on. (1 Timoteo 1:11) Ang iya mismo Pulong nagasiling: “Magkalipay ka sa imo pagkapamatan-on. Magkalipay ka samtang bata pa ikaw.” (Manugwali 11:​9, Today’s English Version) May ikasarang si Jehova nga makita ang palaabuton kag mahantop niya ang nagadugay nga resulta sang maayo kag malain nga paggawi. Amo kon ngaa ang iya Pulong nagalaygay: “Dumduma, karon, ang imo Dakung Manunuga sa mga adlaw sang imo pagkapamatan-on, sa wala pa magkari ang malaut nga mga adlaw, ukon mag-abot ang mga tuig nga magasiling ka: ‘Wala ako sing kalipay sa ila.’”​—⁠Manugwali 12:1.

Huo, luyag ni Jehova nga makabenepisyo ang mga pamatan-on sa hamili nga dulot sang kabuhi. Paagi sa pagdumdom kag pagdayaw sa Dios, matigayon sang mga pamatan-on ang isa ka makaalayaw kag makapaladya nga kabuhi. Bisan pa nagaatubang sing mga kabudlayan, makasiling sila sing masinaligon: “Ang bulig sa akon nagagikan kay Jehova.”​—⁠Salmo 121:2.

[Nota]

[Blurb sa pahina 9]

“Dayawa ninyo si Jehova gikan sa duta, . . . kamo nga mga pamatan-on nga lalaki kag kamo man nga mga ulay.”​—⁠SALMO 148:​7, 12.

[Kahon sa pahina 8]

GINASUPORTAHAN NI JEHOVA ANG MGA PAMATAN-ON

“Ikaw ang akon paglaum, O Soberanong Ginuo nga Jehova, ang akon salaligan kutob sa akon pagkapamatan-on.”​—⁠Salmo 71:5.

“[Ang Dios] nagabusog sang imo kabuhi sing maayo nga mga butang; ang imo pagkapamatan-on padayon nga ginabag-o kaangay sang agila.”​—⁠Salmo 103:5.