Magsalig sa Pulong ni Jehova

“Nagsalig ako sa imo pulong.”​​—⁠⁠SALMO 119:42.

1. Ano ang masiling mo tuhoy sa kon sin-o ang nagsulat sang Salmo 119 kag tuhoy sa iya panimuot?

ANG pulong ni Jehova ginpakabahandi sang manugkomposo sang Salmo 119. Mahimo nga sia si Prinsipe Ezequias sang Juda. Ang balatyagon nga ginpabutyag sa sining inspirado nga pulong nagabagay sa panimuot ni Ezequias, nga “padayon . . . nga nagpanguyapot kay Jehova” samtang nagahari sia sa Juda. (2 Hari 18:3-7) Isa ka butang ang pat-od: Ang manugkomposo mahunahunaon sang iya espirituwal nga kinahanglanon.​​—⁠⁠Mateo 5:3.

2. Ano ang tema sang Salmo 119, kag paano gin-areglar ini nga ambahanon?

² Ang yabi nga punto sang Salmo 119 amo ang balor sang pulong ukon mensahe sang Dios.⁠⁠ * Agod mahapos madumduman, ginhimo ini sang manunulat nga isa ka alpabetiko nga ambahanon. Ang 176 ka bersikulo sini ginpasad sa pasunod nga mga letra sang Hebreo nga alpabeto. Sa orihinal nga Hebreo, ang tagsa sa 22 ka stansa sang salmo may 8 ka linya nga nagasugod sa pareho nga letra. Ini nga salmo nagapatuhoy sa pulong, kasuguan, mga pahanumdom, mga dalanon, mga mando, mga pagsulundan, mga sugo, hudisyal nga mga desisyon, mga pinamulong, kag mga palatukuran sang Dios. Sa sini nga artikulo kag sa masunod, binagbinagon ang Salmo 119 suno sa sibu nga pagbadbad sa Hebreo nga teksto sang Biblia. Ang pagpamalandong sa mga naeksperiensiahan sang mga alagad ni Jehova sang una kag karon dapat magpauswag sang aton paghangop sa sining gin-inspirar sang Dios nga ambahanon kag sang aton pagpasalamat bangod sa nasulat nga Pulong sang Dios, ang Biblia.

Tumana ang Pulong sang Dios kag Mangin Malipayon

3. Ipaathag kag iilustrar kon ano ang kahulugan sang mangin walay kasawayan.

³ Ang matuod nga kalipay matigayon kon tumanon naton ang kasuguan sang Dios. (Salmo 119:1-⁠8) Kon himuon naton ini, kabigon kita ni Jehova nga ‘walay kasawayan sa aton dalanon.’ (Salmo 119:1) Apang, wala ini nagakahulugan nga himpit kita, kundi ginapakita sini nga nagatinguha gid kita nga himuon ang kabubut-on ni Jehova nga Dios. Ginpamatud-an ni Noe “ang iya kaugalingon nga walay kasawayan sa iya mga kadungan” subong isa ka tawo nga “naglakat upod sa [matuod nga] Dios.” Ining matutom nga patriarka kag ang iya pamilya naluwas sa Anaw bangod ginsunod niya ang dalanon sang kabuhi nga ginpatuman ni Jehova. (Genesis 6:⁠9; 1 Pedro 3:20) Sa kaanggid nga paagi, ang aton kaluwasan sa tion nga laglagon na ang kalibutan karon nagadepende sa aton ‘pagtuman gid sang mga sugo sang Dios,’ sa amo ginahimo ang iya kabubut-on.​​—⁠⁠Salmo 119:4.

4. Paano kita mangin malipayon kag madinalag-on?

⁴ Indi gid kita pagbayaan ni Jehova kon ‘dayawon naton sia nga may pagkatadlong sa tagipusuon kag padayon nga tumanon naton ang iya mga pagsulundan.’ (Salmo 119:​7, 8) Wala ginbayaan sang Dios ang Israelinhon nga lider nga si Josue, nga nagtuman sang laygay nga ‘basahon sa adlaw kag gab-i ang kasuguan agod nga himuon niya ang tanan nga nasulat sa sini.’ Bangod sini, nagmadinalag-on sia kag maalamon nga nagpanghikot. (Josue  1:8) Bisan sang malapit na mapatay si Josue, gindayaw gihapon niya ang Dios kag ginpahanumdom ang mga Israelinhon: “Nakahibalo gid kamo sa bug-os ninyo nga tagipusuon kag sa bug-os ninyo nga kalag nga wala sing isa ka tinaga sa tanan nga maayong tinaga nga ginpamulong ni Jehova nga inyo Dios sa inyo ang napaslawan.” (Josue 23:14) Kaangay ni Josue kag sang manunulat sang Salmo 119, mangin malipayon kag madinalag-on kita kon dayawon naton si Jehova kag saligan ang iya pulong.

Ang Pulong ni Jehova Nagahupot sa Aton nga Matinlo

5. (a) Ipakita kon paano kita makapabilin nga matinlo sa espirituwal. (b) Ano ang makabulig sa isa ka pamatan-on nga nakahimo sing mabug-at nga sala?

⁵ Mangin matinlo kita sa espirituwal kon padayon kita nga magbantay suno sa Pulong sang Dios. (Salmo 119:9-16) Amo sini ang matabo bisan pa ang aton mga ginikanan indi magpakita sing maayo nga halimbawa. Bisan pa ang amay ni Ezequias nagasimba sadto sa idolo, ‘gintinluan ni Ezequias ang iya banas,’ mahimo gid gikan sa pagano nga mga impluwensia. Pananglit ang isa ka pamatan-on nga nagaalagad sa Dios karon makahimo sing mabug-at nga sala. Ang paghinulsol, pangamuyo, bulig sang iya mga ginikanan, kag ang mahigugmaon nga bulig sang Cristianong mga gulang makabulig sa iya nga mangin kaangay ni Ezequias kag ‘tinluan ang iya banas kag magpadayon sa pagbantay.’​​—⁠⁠Santiago 5:13-15.

6. Sin-o nga mga babayi ang ‘nagtinlo sang ila banas kag padayon nga nagbantay suno sa pulong sang Dios’?

⁶ Bisan pa si Rahab kag si Rut madugay na nga nagkabuhi antes ginkomposo ang Salmo 119, ‘gintinluan nila ang ila banas.’ Si Rahab isa anay ka makihilawason nga babayi nga taga-Canaan, apang nagbantog sia tungod sa iya pagtuo subong isa ka sumilimba ni Jehova. (Hebreo 11:​30, 31) Ginbiyaan sang Moabnon nga si Rut ang iya mga dios, nag-alagad kay Jehova, kag nagtuman sang iya Kasuguan sa Israel. (Rut 1:14-17; 4:9-13) Ining duha ka di-Israelinhon nga mga babayi ‘padayon nga nagbantay suno sa pulong sang Dios’ kag nakatigayon sing daku nga kadungganan nga mangin katigulangan ni Jesucristo.​​—⁠⁠Mateo 1:​1, 4-6.

7. Paano si Daniel kag ang tatlo pa ka Hebreong pamatan-on naghatag sing isa ka maayong halimbawa sa paghupot sing espirituwal nga katinlo?

⁷ “Ang huyog sang tagipusuon sang tawo malaut kutob sa iya pagkapamatan-on,” apang sarang masunod sang mga pamatan-on ang isa ka matinlo nga banas, walay sapayan sang malaut nga kalibutan karon nga ginagamhan ni Satanas. (Genesis 8:21; 1 Juan 5:19) Subong mga tinapok sa Babilonia, si Daniel kag ang tatlo pa ka Hebreong pamatan-on ‘padayon nga nagbantay suno sa pulong sang Dios.’ Halimbawa, nangindi sila nga dagtaan ang ila kaugalingon “sa manamit nga mga pagkaon sang hari.” (Daniel 1:6-10) Ginakaon anay sang mga Babilonianhon ang mahigko nga mga sapat nga gindumilian sang Mosaikong Kasuguan. (Levitico 11:1-31; 20:24-26) Wala nila ginapadugo ang mga sapat nga ila ginaihaw, kag ang ila pagkaon sing wala mapadugo nga karne isa ka paglalis sa kasuguan sang Dios tuhoy sa dugo. (Genesis 9:​3, 4) Indi katingalahan nga ginpangindian sang apat ka Hebreo ang mga pagkaon sang hari! Ginhuptan sining diosnon nga mga pamatan-on ang espirituwal nga katinlo kag sa amo isa sila ka maayo nga halimbawa.

 Ang Pulong sang Dios Isa ka Bulig sa Pagkatutom

8. Ano nga panimuot kag ihibalo ang kinahanglan naton agod mahangpan naton kag maaplikar ang kasuguan sang Dios?

⁸ Ang kalipay sa pulong sang Dios isa ka importante nga butang agod magpabilin kita nga matutom kay Jehova. (Salmo 119:17-24) Kon kaangay kita sang inspirado nga manugkomposo, handumon gid naton nga mahangpan “ang makatilingala nga mga butang” sang kasuguan sang Dios. Pirme naton ‘handumon ang hudisyal nga mga desisyon ni Jehova’ kag ‘magkalipay sa iya mga pahanumdom.’ (Salmo 119:​18, 20, 24) Bisan pa bag-o lang kita nagdedikar kay Jehova, aton bala ‘ginakalangkagan ang wala masimbugan nga gatas nga iya sang pulong’? (1 Pedro 2:​1, 2) Dapat naton mahangpan ang sadsaran nga mga panudlo sang Biblia agod mahangpan man naton kag maaplikar ang kasuguan sang Dios.

9. Ano ang dapat naton himuon kon nagasumpakilay ang kasuguan sang Dios kag ang ginapahimo sang tawo?

⁹ Mahimo nga nalipay kita sa mga pahanumdom sang Dios, apang ano kon ang “mga prinsipe” maghambal batok sa aton bangod sa pila ka rason? (Salmo 119:​23, 24) Sa karon, masami nga ginapilit kita sang mga tawo nga may awtoridad nga pabaloran ang mga kasuguan sang tawo sangsa kasuguan sang Dios. Kon nagasumpakilay ang ginapahimo sang tawo kag ang kabubut-on sang Dios, ano ang himuon naton? Ang aton kalipay sa pulong sang Dios magabulig sa aton sa pagpabilin nga matutom kay Jehova. Kaangay sang ginhingabot nga mga apostoles ni Jesucristo, magasiling kita: “Dapat [naton] tumanon ang Dios subong manuggahom sa baylo sang mga tawo.”​​—⁠⁠Binuhatan 5:29.

10, 11. Iilustrar kon paano naton mahuptan ang integridad kay Jehova sa idalom sang pinakamabudlay nga mga kahimtangan.

¹⁰ Mahimo kita magpabilin nga matutom kay Jehova bisan sa idalom sang pinakamabudlay nga mga kahimtangan. (Salmo 119:25-32) Agod magmadinalag-on kita sa paghupot sang aton integridad sa Dios, dapat kita mangin mahapos tudluan kag hanuot nga mangamuyo para sa iya instruksion. Dapat man naton pilion “ang dalanon sang pagkatutom.”​​—⁠⁠Salmo 119:​26, 30.

¹¹ Ginpili ni Ezequias, nga mahimo nagsulat sang Salmo 119, “ang dalanon sang pagkatutom.” Ginhimo niya ini bisan pa napalibutan sia sang butig nga mga sumilimba kag mahimo nga ginyaguta sang mga katapo sang palasyo sang hari. Mahimo gid nga ‘wala makatulog ang iya kalag tungod sa kasubo’ sa sini nga mga kahimtangan. (Salmo 119:28) Apang si Ezequias nagsalig sa Dios, nangin isa ka maayo nga hari, kag naghimo sing “matarong sa mga mata ni Jehova.” (2 Hari 18:1-5) Mabatas man naton ang mga pagtilaw subong mga manughupot sing integridad kon magsalig kita sa Dios.​​—⁠⁠Santiago 1:5-8.

Ang Pulong ni Jehova Nagahatag sing Kaisog

12. Paano naton maaplikar ang Salmo 119:​36, 37?

¹² Ang pagsunod sa panuytoy sang pulong sang Dios nagahatag sa aton sing kaisog nga kinahanglan  agod malandas naton ang mga pagtilaw sang kabuhi. (Salmo 119:33-40) Mapainubuson nga ginahibalo naton ang mga instruksion ni Jehova agod matuman naton ang iya kasuguan “sing bug-os tagipusuon.” (Salmo 119:​33, 34) Kaangay sang salmista, nagapangabay kita sa Dios: “Ihuyog ang akon tagipusuon sa imo mga pahanumdom, kag indi sa mga ganansia,” buot silingon, indi makatarunganon nga mga ganansia. (Salmo 119:36) Kaangay ni apostol Pablo, ‘nagagawi kita sing bunayag sa tanan nga butang.’ (Hebreo 13:18) Kon suguon kita sang aton amo nga mangdaya, magpakaisog kita nga sundon ang pagtuytoy sang Dios​​—⁠⁠kag pirme ginapakamaayo ni Jehova ini nga dalanon. Ang matuod, ginabuligan niya kita nga kontrolon ang tanan naton nga malain nga mga huyog. Busa, mangamuyo kita: “Ipalayo ang akon mga mata sa pagtan-aw sa butang nga wala sing pulos.” (Salmo 119:37) Indi gid naton pagtamdon nga halandumon ang isa ka walay pulos nga butang nga ginadumtan sang Dios. (Salmo 97:10) Halimbawa, nagapahulag ini sa aton nga likawan ang pornograpiya kag ang espiritistiko nga mga buhat.​​—⁠⁠1 Corinto 6:​9, 10; Bugna 21:8.

13. Paano ang ginhingabot nga mga disipulo ni Jesus nakatigayon sing kaisog nga kinahanglanon sa pagpanaksi nga may kasidla?

¹³ Ang sibu nga ihibalo tuhoy sa pulong sang Dios nagahatag sa aton sing kompiansa nga magpanaksi sing maisugon. (Salmo 119:41-48) Kag nagakinahanglan gid kita sing kaisog sa ‘pagsabat sa nagapakahuya sa aton.’ (Salmo 119:42) Kon kaisa, mahimo nga mangin kaangay kita sang ginhingabot nga mga disipulo ni Jesus, nga nangamuyo: “Jehova, . . . itugot sa imo mga ulipon ang padayon nga pagpamulong sang imo pulong nga may bug-os nga kasidla.” Ano ang resulta? “Napuno sila tanan sing balaan nga espiritu kag nagpamulong sila sang pulong sang Dios nga may kasidla.” Ginahatagan man kita sang Soberanong Ginuo sing kaisog nga ihambal ang iya pulong nga may kasidla.​​—⁠⁠Binuhatan 4:24-31.

14. Ano ang nagabulig sa aton agod makapanaksi kita sing maisugon kaangay ni Pablo?

¹⁴ Makatigayon kita sing kaisog nga kinahanglan sa pagpanaksi nga wala nagakahuya kon pakabahandion naton “ang pulong sang kamatuoran” kag ‘tumanon pirme ang kasuguan sang Dios.’ (Salmo 119:​43, 44) Ang maukod nga pagtuon sang nasulat nga Pulong sang Dios magasangkap sa aton ‘sa paghambal tuhoy sa iya mga pahanumdom sa atubangan sang mga hari.’ (Salmo 119:46) Ang pangamuyo kag espiritu ni Jehova magabulig man sa aton sa paghambal sing husto nga mga butang sa nagakaigo nga paagi. (Mateo 10:16-20; Colosas 4:6) Maisugon nga naghambal si Pablo tuhoy sa mga pahanumdom sang Dios sa mga manuggahom sang nahauna nga siglo. Halimbawa, nagpanaksi sia kay Gobernador Felix sang Roma, nga “nagpamati sa iya tuhoy sa pagtuo kay Cristo Jesus.” (Binuhatan 24:​24, 25) Nagpanaksi man si Pablo sa atubangan ni Gobernador Festo kag ni Hari Agripa. (Binuhatan 25:22⁠⁠–​​26:32) Sa bulig ni Jehova, mahimo man kita mangin maisog nga mga saksi, nga wala gid “ginakahuya ang maayong balita.”​​—⁠⁠Roma 1:16.

Ang Pulong Sang Dios Nagalugpay sa Aton

15. Paano ang Pulong sang Dios makahatag sing lugpay kon ginayubit kita sang iban?

¹⁵ Ang Pulong ni Jehova pirme nagalugpay sa aton. (Salmo 119:49-56) May mga tion nga kinahanglan gid naton ang lugpay. Bisan pa maisugon nga nagahambal kita subong mga Saksi ni Jehova, ang “mga makahas”​​—⁠⁠ang mga tawo nga makahason nga nagapanghikot sa atubangan sang Dios⁠—⁠‘nagayubit sa aton sing sobra gid’ kon kaisa. (Salmo 119:51) Apang, samtang nagapangamuyo kita, mahimo nga madumduman naton ang positibo nga mga butang nga ginasambit sa Pulong sang Dios, sa amo ‘makasapo kita sing lugpay para sa aton kaugalingon.’ (Salmo 119:52) Sa tion nga nagapangamuyo kita, mahimo nga madumduman naton ang isa ka Makasulatanhon nga kasuguan ukon prinsipio nga nagahatag sa aton sing lugpay kag kaisog nga kinahanglan sa isa ka mahuol nga kahimtangan.

16. Ano ang wala ginhimo sang mga alagad sang Dios walay sapayan sang paghingabot?

¹⁶ Ang makahas nga nagyubit anay sa salmista amo ang mga Israelinhon​​—⁠⁠mga katapo sang isa ka pungsod nga nagdedikar sa Dios. Makahuluya gid! Apang, indi kaangay nila, mangin determinado kita nga indi gid magsipak sa kasuguan sang Dios. (Salmo 119:51) Walay sapayan sang paghingabot sang mga Nazi kag sang kaanggid sa sini nga mga pagtratar sa sulod sang mga tinuig, linibo sang mga alagad sang Dios ang wala magsipak sa mga kasuguan kag mga prinsipio nga masapwan sa Pulong sang Dios. (Juan 15:18-21) Kag indi mabudlay tumanon si Jehova, kay ang iya mga pagsulundan daw subong sang makalugpay nga mga ambahanon sa aton.​​—⁠⁠Salmo 119:54; 1 Juan 5:3.

 Mangin Mapinasalamaton Tungod sa Pulong ni Jehova

17. Ang apresasyon sa pulong sang Dios nagapahulag sa aton nga himuon ang ano?

¹⁷ Ginapamatud-an naton ang aton pagpasalamat tungod sa pulong sang Dios paagi sa pagtuman sini. (Salmo 119:57-64) ‘Nanaad ang salmista nga tumanon niya ang mga pulong ni Jehova,’ kag bisan ‘sa tungang-gabi nagbangon sia agod magpasalamat sa Dios tungod sa Iya matarong nga hudisyal nga mga desisyon.’ Isa gid ka matahom nga kahigayunan kon magbugtaw kita sa gab-i agod ipabutyag ang aton pagpasalamat sa Dios paagi sa pangamuyo! (Salmo 119:​57, 62) Ang aton apresasyon sa pulong sang Dios nagapahulag sa aton nga hibaluon ang iya mga panudlo kag nagahimo sa aton nga mangin malipayon nga ‘mga kaupod sang mga nagakahadlok kay Jehova’​​—⁠⁠mga indibiduwal nga may masimbahon nga pagkapunaw sa Dios. (Salmo 119:​63, 64) May mas maayo pa bala nga mga kaupod sangsa sini?

18. Paano ginasabat ni Jehova ang aton mga pangamuyo kon ‘ang mga lubid sang malauton nagaburambod sa aton’?

¹⁸ Kon mangamuyo kita sing bug-os tagipusuon kag mapainubuson nga mangabay kay Jehova nga tudluan kita, aton sia ‘ginaulouluhan’ sa tuyo nga matigayon ang iya kahamuot. Dapat kita mangamuyo ilabi na kon ‘ang mga lubid sang mga malauton nagaburambod sa aton.’ (Salmo 119:​58, 61) Sarang mautod ni Jehova ang mga lubid sang mga kaaway nga nagapugong sa aton agod mapadayon naton ang aton pagbantala sing Ginharian kag paghimo sing disipulo nga hilikuton. (Mateo 24:14; 28:​19, 20) Makapila ini napamatud-an sa mga kadutaan diin gindumilian ang aton hilikuton.

Tuuhi ang Pulong sang Dios

19, 20. Paano masiling nga maayo kita kon ginapapiutan kita?

¹⁹ Ang pagtuo sa Dios kag sa iya pulong nagabulig sa aton nga batason ang mga kabudlayan kag padayon nga himuon ang iya kabubut-on. (Salmo 119:65-72) Bisan pa ‘ginmusingan sia sing kabutigan sang mga makahas,’ ang salmista nag-amba: “Maayo sa akon nga ginpapiutan ako.” (Salmo 119:​66, 69, 71) Paano masiling nga maayo kon ang mga alagad ni Jehova nagabatas sing kapiot?

²⁰ Kon ginapiutan kita, walay duhaduha gid nga hanuot kita nga nagapangamuyo kay Jehova, gani labi pa nga nagasuod kita sa iya. Mahimo nga maghinguyang kita sing kapin pa nga tion sa pagtuon sang nasulat nga Pulong sang Dios kag mahimo nga manikasog kita sing dugang pa nga iaplikar ini. Nagaresulta ini sa mas malipayon nga pagkabuhi. Apang ano kon magpakita kita sing indi maayo nga mga batasan subong reaksion sa kapiot, subong sang pagkadimapailubon kag pagkamatinaastaason? Paagi sa hanuot nga pagpangamuyo kag sa bulig sang Pulong kag espiritu sang Dios, malandas naton ini nga mga kaluyahon kag dugang pa nga mapalambo naton ang ‘pagsul-ob sing bag-o nga personalidad.’ (Colosas 3:9-14) Dugang pa, magabakod ang aton pagtuo kon batason naton ang mga kabudlayan. (1 Pedro 1:​6, 7) Nakabenepisyo si Pablo gikan sa iya mga kapipit-an bangod nagpahulag ini sa iya nga magsandig sing dugang pa kay Jehova. (2 Corinto 1:8-10) Nagatinguha bala kita nga mangin maayo ang epekto sa aton sang aton pag-antos?

Magsalig Pirme kay Jehova

21. Ano ang mahanabo kon pakahuy-an na sang Dios ang mga makahas?

²¹ Ang pulong sang Dios nagahatag sa aton sing makatarunganon nga rason nga magsalig kay Jehova. (Salmo 119:73-80) Kon nagasalig gid kita sa aton Manunuga, wala kita sing rason nga mahuya. Apang, bangod sang ginahimo sang iban, nagakinahanglan kita sing lugpay kag mahimo nga daw luyag man naton mangamuyo: “Mahuy-an kuntani ang mga makahas.” (Salmo 119:76-78) Kon pakahuy-an na ni Jehova ining mga makahas, mabuyagyag ang ila malaut nga mga dalanon kag mapakabalaan ang iya balaan nga ngalan. Pat-od gid nga wala sing mapulos ang mga nagahingabot sa katawhan sang Dios. Halimbawa, wala gid nila​​—⁠⁠kag indi gid nila​​—⁠⁠malaglag ang mga Saksi ni Jehova, nga nagasalig sa Dios sa ila bug-os nga tagipusuon.​​—⁠⁠Hulubaton 3:​5, 6.

22. Sa ano nga kahulugan ang salmista daw ‘kaangay sang panit nga suludlan sa asuhan’?

 ²² Ginapabakod sang pulong sang Dios ang aton pagsalig sa iya kon ginahingabot kita. (Salmo 119:81-88) Bangod sang paghingabot sang mga makahas, ginbatyag sang salmista nga ‘nangin kaangay sia sang panit nga suludlan sa asuhan.’ (Salmo 119:​83, 86) Sang panahon nga ginsulat ang Biblia, ang mga suludlan nga human sa panit sang sapat ginagamit nga suludlan sing tubig, alak, kag iban pa nga mga likido. Kon wala ginagamit, mahimo nga magkulo ini nga mga suludlan kon isab-it malapit sa kalayo sa isa ka hulot nga wala sing guluwaan sing aso. Ginabatyag mo bala nga daw ‘kaangay ka sang panit nga suludlan sa asuhan’ bangod sang kabudlayan ukon paghingabot? Kon amo, magsalig kay Jehova, kag mangamuyo: “Suno sa imo mahigugmaon nga kaayo tipigi ako nga buhi, agod nga matuman ko ang pahanumdom sang imo baba.”​​—⁠⁠Salmo 119:88.

23. Ano ang nabinagbinag naton sa pagrepaso sang Salmo 119:1-88, kag ano ang mapamangkot naton sa aton kaugalingon samtang ginapaabot naton ang pagtuon sa Salmo 119:89-176?

²³ Ginapakita sang aton nabinagbinag na sa una nga katunga sang Salmo 119 nga si Jehova nagapakita sing mahigugmaon nga kaayo sa iya mga alagad bangod nagasalig sila sa iya pulong kag may kalipay sa iya mga palatukuran, mga pahanumdom, mga sugo, kag mga kasuguan. (Salmo 119:​16, 47, 64, 70, 77, 88) Nahamuot sia nga ang mga debotado sa iya padayon nga nagabantay suno sa iya pulong. (Salmo 119:​9, 17, 41, 42) Samtang ginapaabot mo ang pagtuon sa nabilin pa nga bahin sining matahom nga salmo, maayo nga pamangkuton mo ang imo kaugalingon, ‘Ginatugutan ko gid bala ang pulong ni Jehova nga mag-iwag sa akon dalanon?’

[Nota]

Paano Mo Sabton?

• Paano matigayon ang matuod nga kalipay?

• Paano ang pulong ni Jehova nagabulig sa aton nga magpabilin nga matinlo sa espirituwal?

• Sa anong mga paagi ang pulong sang Dios nagahatag sing kaisog kag lugpay?

• Ngaa dapat kita magtuo kay Jehova kag sa iya pulong?

[Mga Pamangkot sa Pagtinuon]

[Mga retrato sa pahina 11]

Sanday Rut, Rahab, kag ang Hebreong mga pamatan-on nga gintapok sa Babilonia ‘padayon nga nagbantay suno sa pulong sang Dios’

[Retrato sa pahina 12]

Si Pablo maisugon nga ‘naghambal tuhoy sa mga pahanumdom sang Dios sa atubangan sang mga hari’