“Espada ni Jehova kag ni Gideon!”

SUBONG sila kadamo sa mga apan, nga nagahimo sa mauya nga mga kaumhan nga mangin lamgod nga duta. Nahanabo ini sang panahon nga ang mga hukom nagagahom sa Israel, kag ang mga Israelinhon nadulaan na sing paglaum. Sa sulod sang pito ka tuig, sa tion nga ang ginsab-og nga binhi nagasugod pa lang sa pagtugdo, ang nagapang-ati nga mga guban sang nagasakay sa kamelyo nga mga Midianhon, Amaleknon, kag mga taga-Sidlangan nagasalakay sa duta. Ang ila mga panong nagalinapta sa pagpangita sang halalban kag nagahalab sing tanan nga pananom. Apang ang katawhan sang Israel wala sing bisan asno ukon toro ukon karnero. Bangod tuman ka makakulugmat ang paggahom sang mga Midianhon, ang imol kaayo nga mga Israelinhon napilitan sa pagpanago sa mga kuweba sa kabukiran, kag sa mga duog nga mabudlay katama kadtuan.

Ngaa natabo ini? Ang apostata nga Israel nag-alagad sa butig nga mga dios. Gani, gintugyan sila ni Jehova sa mga manugpigos. Sang indi na ini mabatas sang mga Israelinhon, nagpangayo sila sing bulig kay Jehova. Mamati bala sia? Ano ang matun-an naton sa inagihan sang Israel?​—⁠Hukom 6:1-6.

Mainandamon nga Mangunguma Ukon Isa nga “Isganan kag Gamhanan”?

Ang Israelinhon nga mga mangunguma kinaandan na nga nagalinas sing trigo paagi sa baka kag inuglinas sa wayang kag mahangin nga duog agod nga paliron sang hangin ang upa kag painon ini gikan sa mga uyas. Apang madali ini mamutikan sang mga guban nga determinado sa pag-ati sang duta. Nagapanago sa mga Midianhon, ginalinas ni Gideon ang mga trigo sa linasan sang mga ubas​—⁠mahimo nga isa ka daku, naatupan nga suludlan sang alak nga gin-ukit sa bato. (Hukom 6:11) Sa sini, mahimo paraspason sing tigdiutay paagi sa lipak ang mga uyas. Sa sini nga mga kahimtangan, si Gideon nangin mapahituon.

Handurawa lang ang kakibot ni Gideon sang nagpakita sa iya ang anghel ni Jehova kag nagsiling: “Si Jehova nagaupod sa imo, ikaw nga isganan kag gamhanan.” (Hukom 6:12) Subong isa ka tawo nga tago nga nagalinas sang mga uyas sa linasan sang mga ubas, pat-od gid nga wala nagbatyag si Gideon nga isganan sia. Apang, ini nga mga pulong nagapakita nga ang Dios nagasalig nga si Gideon mangin isa ka isganan nga lider sa Israel. Walay sapayan sini, sia mismo nagakinahanglan nga makumbinsi.

Sang ginsugo sia ni Jehova nga ‘luwason ang Israel sa palad sang Midian,’ maugdang nga ginsiling ni Gideon: “Pasayluha ako, Jehova. Paano ko luwason ang Israel? Yari karon! Ang akon linibo amo ang pinakadiutay sa Manases, kag ako ang pinakakubos sa panimalay sang akon amay.” Ang mainandamon nga si Gideon nagpangabay sing tanda nga ang Dios magaupod sa iya sa pagpukan sa Midian, kag handa si Jehova nga pasugtan ang makatarunganon nga pangabay sang pasalig ni Gideon. Nian nagdulot si Gideon sing pagkaon sa iya anghel nga dumuluaw, kag ang kalayo nga naggikan sa igang naglamon sa dulot. Sa tapos nga mapahaganhagan ni Jehova ang kahadlok ni Gideon, nagtukod si Gideon sing halaran sa sina nga duog.​—⁠Hukom 6:12-24.

“Pabayai nga Magpakigsumpong si Baal”

Ang pinakadaku nga palaligban sang Israel indi ang pagpamigos sang mga Midianhon. Kundi ang ila pagkaulipon sa pagsimba kay Baal. Si Jehova “isa ka maimon nga Dios,” kag wala sang makaalagad sa iya sing kalahamut-an samtang nagasimba sa iban nga mga dios. (Exodo 34:14) Gani, ginsugo ni Jehova si Gideon nga gub-on ang halaran sang iya amay kay Baal kag tumbahon ang sagrado nga mga haligi. Bangod nahadlok sa mangin reaksion sang iya amay kag sang iban kon himuon niya ini sa adlaw, ginhimo ini ni Gideon sa gab-i, upod ang bulig sang napulo ka alagad.

 Makatarunganon ang pagkamainandamon ni Gideon, kay sang matukiban ang iya “walay katahuran sa sagrado nga mga butang,” luyag sang tumandok nga mga sumilimba ni Baal nga patyon sia. Apang, paagi sa di-masuay nga pangatarungan, nangatarungan ang amay ni Gideon nga si Joas sa mga tawo nga kon si Baal Dios, sarang niya mapangapinan ang iya mismo kaugalingon. Sa sina, nagakaigo nga gintawag ni Joas ang ngalan sang iya anak nga Jerubbaal, nga nagakahulugan “Pabay-i nga Mangapin si Baal Batok sa Iya.”​—⁠Hukom 6:25-32.

Ginapakamaayo pirme sang Dios ang iya mga alagad nga maisog nga nagapanindugan sa matuod nga pagsimba. Sang ginsalakay liwat sang mga Midianhon kag sang ila mga kaalyado ang teritoryo sang Israel, ‘ang espiritu ni Jehova naglikop kay Gideon.’ (Hukom 6:34) Sa idalom sang impluwensia sang espiritu sang Dios, ukon aktibo nga puersa, gintipon ni Gideon ang mga hangaway gikan sa mga tribo sang Manases, Aser, Zebulon, kag Neptali.​—⁠Hukom 6:35.

Naghanda Para sa Pagpakig-away

Bisan pa nga may 32,000 na ka hangaway si Gideon karon, nangayo sia sing palatandaan sa Dios. Kon ang panit nga ginbilin sa salog sang linasan mabasa sang tun-og samtang ang duta magapabilin nga mamala, ini magapakita nga luwason sang Dios ang Israel paagi sa iya. Ginpahanabo ni Jehova ini nga milagro, kag nangayo kag nabaton ni Gideon ang pamatuod sang ang tanda ginbaliskad​—⁠basa nga duta kag mamala nga panit. Nasobrahan bala ang pagkamainandamon ni Gideon? Maathag nga wala, kay ginhatag ni Jehova ang iya mga pangabay sang pasalig. (Hukom 6:36-40) Wala kita nagapaabot sing kaangay nga mga milagro karon. Apang, makabaton kita gihapon sing panuytoy kag pasalig ni Jehova gikan sa iya Pulong.

Ginsiling karon sang Dios nga ang hangaway ni Gideon tuman kadamo. Kon magdaug sila batok sa ila mga kaaway, mahimo nga ang mga Israelinhon magpabugal nga sila ang nagluwas sang ila kaugalingon. Apang si Jehova ang dapat padunggan sa nagahilapit nga kadalag-an. Ang solusyon? Gin-aplikar ni Gideon ang isa ka probisyon sang Mosaikong Kasuguan paagi sa pagpangabay sa mga mahinadlukon nga magpauli. Kag sa amo, 22,000 sang iya mga hangaway ang nagbiya, kag 10,000 na lamang ang nabilin.​—⁠Deuteronomio 20:⁠8; Hukom 7:​2, 3.

Sa pagtamod sang Dios, tuman kadamo gihapon ang mga hangaway. Ginsilingan si Gideon nga padulhugon sila sa tubig. Ang Judiyo nga istoryador nga si Josephus nagsiling nga ginsugo sang Dios si Gideon nga pakadtuon ang iya mga hangaway sa isa ka suba sa mapaang nga kaadlawon. Ano man ang kahimtangan, ginpanilagan ni Gideon kon paano ang mga lalaki naga-inom. Tatlo ka gatos lang ang nagkuha sing tubig paagi sa isa ka kamot kag nag-inom sa sini samtang nagabantay sa posible nga pagsalakay sang kaaway. Ang 300 ka isganan lang ang magaupod kay Gideon. (Hukom 7:4-8) Ibutang ang imo kaugalingon sa ila lugar. Sanglit ang imo kaaway nagadamo sing 135,000, pat-od gid nga maghinakop ka nga ang kadalag-an paagi lamang sa gahom ni Jehova, indi sa imo!

Gin-agda sang Dios si Gideon sa pag-upod sang isa ka suluguon kag mag-espiya sa kampo sang mga Midianhon. Samtang didto sila, nabatian ni Gideon ang isa ka lalaki nga nagasaysay sang iya damgo sa iya kaupod nga wala nagapangalag-ag sa  pagpatpat nga ini nagakahulugan nga pat-od gid nga itugyan sang Dios ang Midian sa kamot ni Gideon. Amo gid ini ang kinahanglan mabatian ni Gideon. Napat-od niya nga ihatag ni Jehova sa iya kag sa iya 300 ka hangaway ang kadalag-an batok sa Midian.​—⁠Hukom 7:9-15.

Estratehiya sa Inaway

Gintunga ang 300 sa tatlo ka tig-100 nga grupo. Ang tagsa ka tawo ginhatagan sing isa ka budyong kag isa ka daku, wala sing unod nga tibod. Natago sa tibod ang isa ka sulo. Ang una nga sugo ni Gideon amo sini: ‘Tulok kamo sa akon, kag sunda ang akon himuon. Kon patunugon ko ang budyong, patunugon man ninyo ang inyo, kag magsinggit “espada ni Jehova kag ni Gideon!”’​—⁠Hukom 7:16-18, 20.

Hinayhinay nga nagpalapit sa kampo sang kaaway ang 300 ka Israelinhon nga hangaway. Mga alas dies sang gab-i​—⁠sa tapos lang ginbuslan ang bantay. Daw amo ini ang nagakaigo nga higayon sa pagsalakay, kay nagakinahanglan sing pila ka tion antes maanad ang mata sang nagbulos nga bantay sa kadulom.

Daw ano nga kakugmat ang nabatyagan sang mga Midianhon! Sing hinali, ang kalinong ginbuslan sang pagbuka sang 300 ka tibod, sang tunog sang 300 ka budyong, kag sang singgit sang 300 ka lalaki. Bangod nakibot, ilabi na sang singgit nga “ang espada ni Jehova kag ni Gideon!,” nagsininggit ang mga Midianhon nga nagpadugang pa gid sing gahod. Bangod nagsalasala, imposible para sa ila nga makilal-an kon sin-o ang kaaway. Nagpabilin nga nagatindog ang 300 sa ila natangdo nga nahamtangan samtang ginpahanabo sang Dios nga magpinatyanay ang ila mga kaaway. Naagaw ang kampo, wala sang gintugutan nga makapalagyo, kag ang pagbihag ukon pagpatay sa nagkalabilin nga mga kaaway nga naglakip sa paglagas sa ila, permanente nga nagdula sang katalagman sa Midianhon. Ang malawig kag makamamatay nga pagpanalakay natapos sang ulihi.​—⁠Hukom 7:19-25; 8:10-12, 28.

Bisan pa sa tapos sining kadalag-an, maugdang gihapon si Gideon. Sang ang mga taga-Efraim​—⁠nga maathag nga nagbatyag nga na-insulto bangod wala gin-agda sa pagpakig-away​—⁠nakigbais sa iya, malulo sia nga nagsabat. Ang iya malulo nga sabat nagpaugdaw sang ila kaakig kag nagpakalma sa ila.​—⁠Hukom 8:1-3; Hulubaton 15:1.

Karon nga nagluntad na ang paghidait, ginhingyo sang mga Israelinhon si Gideon nga mangin hari nila. Makasululay gid! Apang wala ini ginbaton ni Gideon. Wala niya ginkalimtan kon sin-o ang nagpadaug batok sa Midian. “Indi gid ako magpangulo sa inyo, kag indi man ang akon anak nga lalaki magpangulo sa inyo,” siling niya. “Si Jehova amo ang magpangulo sa inyo.”​—⁠Hukom 8:23.

Apang, bangod sa pagkadi-himpit, nakahimo man sing di-maayo nga desisyon si Gideon. Sa wala mahibaluan nga kabangdanan, ginhimo niya ang isa ka efod gikan sa mga inati sa inaway kag ginpasundayag ini sa iya siudad. Ang rekord nagasiling nga ang tanan sa Israel nagsugod sa “imoral nga pagpakighilawas” sa efod. Ginsimba nila ini, kag nangin siod ini bisan pa kay Gideon kag sa iya panimalay. Apang, wala sia ginkabig nga idolatroso, kay ang Kasulatan nagkilala sa iya subong isa ka tawo nga may pagtuo kay Jehova.​—⁠Hukom 8:27; Hebreo 11:32-34.

Leksion Para sa Aton

Ang sugilanon ni Gideon nagahatag sing mga leksion tuhoy sa pagpaandam kag pagpalig-on. Nagapaandam ini sa aton nga kon kuhaon ni Jehova ang iya espiritu kag pagpakamaayo bangod sang aton malain nga paggawi, ang aton espirituwal nga kahimtangan mangin kasubong sa imol kaayo nga mga pumuluyo sang isa ka duta nga ginsalakay sang mga apan. Nagakabuhi kita sa mabudlay nga mga tion kag indi gid naton pagkalimtan nga ang pagpakamaayo ni Jehova ‘amo ang nagapamanggad, kag wala sia nagadugang sing kasakit sa sini.’ (Hulubaton 10:22) Ginpakamaayo kita sang Dios bangod ‘ginaalagad naton sia nga may himpit nga tagipusuon kag may malipayon nga kalag.’ Kay kon indi, sikwayon niya kita.​—⁠1 Cronica 28:9.

Mapalig-on kita sang rekord ni Gideon, kay ini nagapamatuod nga sarang maluwas ni Jehova ang iya katawhan gikan sa bisan ano man nga katalagman, nga nagagamit pa gani sa mga daw maluya ukon di-sangkol. Ang pagdaug ni Gideon kag sang iya 300 ka hangaway batok sa 135,000 ka Midianhon nagapamatuod sang walay latid nga gahom sang Dios. Mahimo masapwan naton ang aton mga kaugalingon sa mabudlay nga mga kahimtangan kag subong bala nga daw mas madamo ang aton mga kaaway. Apang, ang rekord sang Biblia tuhoy kay Gideon nagapalig-on sa aton sa pagsalig kay Jehova, nga magapakamaayo kag magaluwas sa tanan nga nagatuo sa Iya.