“Wala Sila Magkompromiso”

“MALIPAYON kamo kon ginapakahuy-an kamo sang mga tawo kag ginahingabot kamo kag binutig nga ginahambalan kamo sang tanan nga sahi sang kalautan tungod sa akon,” siling ni Jesucristo sa iya mga disipulo. (Mateo 5:11) Ang mga Saksi ni Jehova karon malipayon bangod nagpabilin sila nga “indi bahin sang kalibutan” kag nagpanindugan gid sing neutral sa politika kag naghupot sing integridad sa Dios sa tanan nga sahi sang kahimtangan, nahisanto sa panudlo kag halimbawa ni Cristo.​—⁠Juan 17:14; Mateo 4:8-10.

Tuhoy sa indi pagkompromiso sang mga Saksi ni Jehova sa anay Unyon Sobyet, lakip sang mga yara sa Estonia, nagsulat ang Luterano nga teologo kag manugbadbad sang Biblia nga si Toomas Paul sa iya libro nga Kirik keset küla (Ang Simbahan sa Tunga Sang Minuro): “Diutay gid lang ang nakabati sa natabo sang kaagahon sang Abril 1, 1951. Isa ka kampanya ang ginplano agod tabugon ang mga Saksi ni Jehova kag ang ila mga sumalakdag​—⁠279 ka tawo tanan ang gindakop kag gintapok sa Siberia . . . Ginhatagan sila sing kahigayunan nga pirmahan ang pormas nga nagasikway sang ila pagtuo agod indi sila matapok ukon mabilanggo. . . . Upod sa una nga gin-aresto, may 353 ka ginbilanggo, lakip ang 171 ka tawo nga bag-o lang nagpakig-upod sa ila mga kongregasyon. Wala sila magkompromiso​—⁠bisan sa Siberia. . . . Diutay lamang sa miembro sang [Luterano] nga Simbahan [sa Estonia] ang may pagtuo nga kaangay sang iya sang mga Saksi ni Jehova.”

Ang mga Saksi ni Jehova sa bug-os nga kalibutan nagasalig sa Dios nga buligan sila nga magpabilin nga matutom kag matinumanon sa iya walay sapayan sang paghingabot. Nalipay sila nga daku ang padya sa ila katutom.​—⁠Mateo 5:12.