Matuod Gid Bala nga May Yawa?

ANO ang masiling mo sa Yawa? Ginahunahuna mo bala sia subong isa ka matuod nga persona nga nagasulay sa mga tawo sa paghimo sing kalautan, ukon simbulo lamang bala sia sang kalautan? Ang Yawa bala isa nga dapat kahadlukan, ukon dapat bala sia balewalaon subong mito ukon himuhimo lamang? Ang tinaga bala nga “yawa” nagapatuhoy sa isa lamang ka malaglagon nga puersa sa uniberso? Simbulo lamang bala ini sang kalainan sang mga tawo, subong sang ginasiling sang madamong moderno nga mga teologo?

Indi makapakibot nga lainlain ang opinyon sang mga tawo sa kon sin-o gid ang Yawa. Hunahunaa lamang kon daw ano kabudlay nga makilala gid ang isa nga sampaton sa pagpakunokuno! Ilabi na gid nga amo sini kon determinado sia nga ihinago kon sin-o sia. Ginalaragway sang Biblia nga ang Yawa amo sini nga persona. Gintawag sia nga si Satanas, ini nagasiling: “Si Satanas mismo nagahimo sang iya kaugalingon nga anghel sang kapawa.” (2 Corinto 11:14) Walay sapayan nga malaut sia, nagapakunokuno ang Yawa nga maayo agod limbungan ang iban. Kag kon mapapati niya ang mga tawo nga wala sia nagaluntad, mas bentaha ini para sa iya katuyuan.

Kon amo, sin-o gid ang Yawa? San-o kag paano sia nagluntad? Paano niya karon ginaimpluwensiahan ang mga tawo? May mahimo bala kita agod mapamatukan ina nga impluwensia? Sibu nga ginasugid sang Biblia ang kasaysayan sang Yawa kutob sa iya ginsuguran kag maminatud-on nga ginasabat sini ini nga mga pamangkot.

[Retrato sa pahina 3]

Daw ano kabudlay nga makilala gid ang isa nga sampaton sa pagpakunokuno!