Kon Nagagamit sing Awtoridad, Iluga si Cristo

SANG katuigan 1970, ang isa ka eksperimento tuhoy sa pamatasan sang tawo may makapakibot nga mga resulta. Ang mga nakigbahin sa eksperimento gintunga sa duha ka grupo. Ang isa ka grupo ginhimo nga mga guardia kag pagabantayan nila ang isa ka grupo, nga ginhimo naman nga mga bilanggo. Ano ang resulta?

“Sa sulod sang pila ka adlaw,” ginreport nga ang “kalabanan [nga mga guardia] nangin abusado kag nagapangdaugdaug, kag masunson nga nagasilot, samtang ang mga bilanggo naman pirme ginahadlukan kag nangin sunodsunuran na lamang.” Ang konklusion sang mga manugpanalawsaw amo: Halos tanan mahimo masiod sa pag-abuso sang awtoridad.

Nagakaigo kag Di-nagakaigo nga Paggamit sing Awtoridad

Sa pagkamatuod, ang husto nga paggamit sing awtoridad may maayo nga epekto sa iban. Makagiya ini sa husto nga direksion kag makahatag sing pisikal, emosyonal, kag espirituwal nga mga kaayuhan. (Hulubaton 1:5; Isaias 48:17, 18) Apang, subong sang ginpakita sang nahinambitan nga eksperimento, yara pirme ang katalagman nga abusuhan ang awtoridad. Ginapatalupangod sang Biblia ining katalagman kag nagsiling: “Kon nagagahom ang malaut nga tawo, ang katawhan nagapanghayhay.”—Hulubaton 29:2; Manugwali 8:9.

Ang pag-abuso sa awtoridad makahalalit, bisan pa nga maayo ang motibo. Halimbawa, sining karon lang, ang isa ka relihioso kag nagapanudlo nga grupo sa Ireland nangayo sing pasaylo sa publiko bangod sang pag-abuso sang pila ka manunudlo sa ila awtoridad sa mga kabataan nga ila ginatudluan. Walay duhaduha nga maayo ang mga intension sang madamo sini nga mga manunudlo, apang ang mga paagi nga gingamit sang iban tuman gid ka makahalalit. Ginreport sang isa ka pamantalaan nga “madamo nga kabataan ang naapektuhan sa emosyon bangod sang tuman nga kasingki kag pagkaestrikto sang mga pamaagi sang madamo sini nga mga manunudlo.” (The Irish Times) Paano mo, nian, gamiton ang awtoridad agod mapahulag ang iban nga himuon ang ila pinakamaayo sa baylo nga magpalayo sila sa imo ukon masaklaw sila sa imo ginahambal ukon ginahimo?—Hulubaton 12:18.

“Ang Bug-os nga Awtoridad” nga Ginhatag kay Jesucristo

Binagbinaga ang halimbawa ni Jesucristo. Wala madugay antes sia magkayab sa langit, ginsilingan niya ang iya mga disipulo: “Ginhatag sa akon ang bug-os nga awtoridad sa langit kag sa duta.” (Mateo 28:18) Hinadlukan bala ang iya mga disipulo sa iya  ginhambal? Nagbatyag bala sila nga mangin kaangay si Jesus sang mga Cesar sang Roma, nga kilala sa pagdugmok sa mga nagaprotesta ukon nagaribok batok sa gobierno?

Ang rekord sa Biblia nagsabat gid nga wala! Ginagamit ni Jesucristo ang iya awtoridad kaangay sa paggamit sang iya Amay. Bisan pa nga si Jehova amo ang nagakadapat nga labing gamhanan nga Soberano sa Bug-os nga Uniberso, luyag niya nga mag-alagad sing kinabubut-ot ang iya mga sakop, indi nga nagatuman lang nga wala nagapamensar, nahadlok, ukon nagapaulipon. (Mateo 22:37) Wala gid ginaabusuhan ni Jehova ang iya awtoridad. Ang isa ka talalupangdon nga palanan-awon nga ginhatag kay manalagna Ezequiel nagapamatuod sa sini.

Nakita ni Ezequiel sa palanan-awon ang apat ka angheliko nga tinuga nga nagsakdag sang soberanya sang Dios. Ang kada isa may apat ka nawong. “Nahanungod sa kaangay sang ila mga nawong,” siling ni Ezequiel, “sila nga apat may nawong sang tawo kag may nawong sang leon sa tuo, kag sila nga apat may nawong sang baka sa wala; kag sila nga apat may nawong man sang agila.” (Ezequiel 1:10) Ginarepresentar sining mga nawong ang apat ka panguna nga kinaiya sang Dios nga himpit ang pagkatimbang. Espesipiko nga ginsambit ini sa Pulong sang Dios nga amo ang: gugma, nga ginarepresentar sang nawong sang tawo; katarungan, nga ginarepresentar sang nawong sang leon; kag kaalam, nga ginarepresentar sang nawong sang agila. Ining tatlo ka kinaiya nagapanghikot upod sa ikap-at—gahom, nga ginarepresentar sang nawong sang baka. Ano ang kahulugan sini nga tanan? Ginapakita sang palanan-awon nga wala gid ginagamit ni Jehova ang iya wala-latid nga gahom kag awtoridad sa paagi nga wala nagahisanto sa iya iban pa panguna nga mga kinaiya.

Bilang pag-ilog sa iya Amay, pirme ginagamit ni Jesucristo ang iya awtoridad nga nahisanto gid sa gugma, kaalam, kag katarungan. Ang iya mga disipulo nakabatyag sing daku gid nga kaumpawan sa pag-alagad sa idalom sang awtoridad ni Jesus. (Mateo  11:28-30) Kon may isa ka kinaiya nga nagalaragway kay Jehova nga Dios kag kay Jesucristo, ini amo ang gugma, indi ang gahom ukon ang awtoridad!—1 Corinto 13:13; 1 Juan 4:8.

Paano Mo Ginagamit ang Imo Awtoridad?

Paano mo ginagamit ang imo awtoridad? Halimbawa, sa sulod sang pamilya, ginagamit mo bala ang imo awtoridad sa pagkontrol sang mga butang agod matuman ang imo mga luyag? Ginatuman bala sang iban nga katapo sang imo pamilya ang imo mga desisyon bangod nahadlok sila sa imo ukon bangod ginahigugma ka nila? Ginatuman ka bala nila bangod mas makusog ka sa ila? Amo ini ang mga pamangkot nga dapat binagbinagon sang mga ulo sang pamilya agod mahuptan nila ang teokratikong kahimusan sa sulod sang pamilya.—1 Corinto 11:3.

Ano naman kon may awtoridad ka sa Cristianong kongregasyon? Agod masiguro mo nga ginagamit mo ini sing nagakaigo, tan-awa kon ginaaplikar mo ang masunod nga mga prinsipio nga gin-inspirar ni Jehova nga Dios kag ginpakita ni Jesucristo.

“Ang ulipon sang Ginuo . . . dapat magmalulo sa tanan, . . . nagapugong sang iya kaugalingon sa idalom sang kalautan, nagatudlo sing malulo sa mga wala nagaugyon.”—2 Timoteo 2:24, 25.

Ang pila ka mga indibiduwal sa Cristianong kongregasyon sang una may daku nga awtoridad. Halimbawa, mahimo pa gani “suguon [ni Timoteo] ang pila ka tawo nga indi magtudlo sing tuhay nga doktrina.” (1 Timoteo 1:3) Apang, makasiguro kita nga nagpakita si Timoteo sang diosnon nga mga kinaiya sa tanan niya nga ginhimo, kay wala sing duhaduha nga nanghikot sia nahisanto sa laygay ni Pablo nga magpanudlo “sing malulo” kag “magmalulo sa tanan” sa pagtatap sang Cristianong kongregasyon. Bangod mas hoben sia sangsa kalabanan nga mga gulang sadtong tion, dapat mangin kaangay sia sang isa ka matinahuron nga anak sa mga may edad kag mangin isa ka mainulikdon nga utod sa mga mas bataon. (1 Timoteo 5:1, 2) Bangod sining mapinalanggaon nga pagtatap, ang Cristianong kongregasyon daw nangin subong sang isa ka mainulikdon kag mahigugmaon nga pamilya, indi subong sang isa ka korporasyon nga wala sing pag-ulikid kag wala sing balatyagon.—1 Corinto 4:14; 1 Tesalonica 2:7, 8.

“Ang mga manuggahom sang mga pungsod nagapakaginuo sa ila kag ang mga kadalagkuan may awtoridad sa ila. Indi subong sini sa inyo; kundi ang bisan sin-o nga luyag mangin daku sa inyo mangin alagad ninyo.”—Mateo 20:25, 26.

Ang kalibutanon nga mga manuggahom “nagapakaginuo” sa ila mga sakop paagi sa pagpilit sang ila luyag kag pag-insister nga himuon ang mga butang sa paagi nga luyag nila kag pagpahog nga silutan ang indi magtuman sa ila. Apang ginpadaku ni Jesucristo ang pag-alagad sa iban kag indi ang pagpilit sa ila. (Mateo 20:27, 28) Ginapakig-angutan niya pirme ang iya mga disipulo sing mapinalanggaon kag mainulikdon. Kon sundon mo ang  halimbawa ni Jesus, mas mahapos nga makigkooperar ang iban sa imo. (Hebreo 13:7, 17) Kag mas mahapos man para sa ila ang ‘mag-alagad sing kapin pa,’ ginahimo ini sing kinabubut-on kag wala ginapilit.—Mateo 5:41.

“Bantayi ninyo ang panong sang Dios nga yara sa inyo pag-atipan, . . . indi nga nagapakaginuo sa mga palanublion sang Dios, kundi mangin mga huwaran sa panong.”—1 Pedro 5:2, 3.

Nahibaluan sang mga manugtatap karon nga sila ang manabat sa espirituwal nga kaayuhan sang tanan nga katapo sang kongregasyon. Gani ginahimo nila sing serioso ini nga responsibilidad. Ginatinguhaan nila nga atipanon ang panong sang Dios sing kinabubut-on, sing bug-os tagipusuon, kag sing mahigugmaon. Kaangay ni apostol Pablo, ginapanikasugan nila nga palig-unon kag pabakuron ang pagtuo sang panong, nga wala nagapakaagalon sa ila pagtuo.—2 Corinto 1:24.

Kon kinahanglan maghatag sing nagakaigo nga laygay, ginahimo ini sang mga gulang nga may kalulo agod pasibuon ang isa nga nakasala ukon mabuligan ang isa ka masigka-Cristiano nga mag-uswag sa espirituwal. Ginadumdom nila ang laygay ni apostol Pablo: “Mga kauturan, bisan pa ang isa ka tawo makahimo sing sayop nga tikang antes niya matalupangdan ini, kamo nga may espirituwal nga mga kalipikasyon magtinguha nga pasibuon ina nga tawo sa espiritu sang pagkalulo, samtang ginabantayan sang kada isa ang iya kaugalingon, kay basi masulay man kamo.”—Galacia 6:1; Hebreo 6:1, 9-12.

“Padayon kamo nga magpinaumuray sa isa kag isa kag hilway nga magpinatawaray sa isa . . . Panapti ninyo ang inyo kaugalingon sang gugma, kay amo ini ang himpit nga higot sang paghiusa.”—Colosas 3:13, 14.

Paano mo ginapakig-angutan ang isa nga wala makasunod sing himpit sa Cristianong mga talaksan? Ginahatagan mo bala sing konsiderasyon ang ila mga di-kahimpitan kaangay sang ginahimo ni Jehova kag ni Jesucristo? (Isaias 42:2-4) Ukon ginainsister mo gid nga tumanon sing estrikto ang kasuguan sang Dios sa tanan nga kahimtangan? (Salmo 130:3) Dumduma nga nagakaigo nga magpakita sing pagkamaluluy-on kon posible kag sing kalig-on kon kinahanglan lamang. Kon ginapakig-angutan mo sing mahigugmaon ang imo ginadumalahan magatubo ang mabakod nga pagsalig sa tunga ninyo.

Kon ginhatagan ka sing bisan ano nga sahi sang awtoridad, panikasugi nga ilugon si Jehova nga Dios kag si Jesucristo. Dumduma ang matahom nga paglaragway sang salmista sa kon paano ni Jehova gingamit ang iya awtoridad sa iya katawhan. Si David nag-amba: “Si Jehova amo ang akon Manugbantay. Wala sing makulang sa akon. Sa madabong nga mga halalban ginapahigda niya ako; sa luyo sang tubigon nga mga palahuwayan ginatuytuyan niya ako. Ginapabaskog niya ang akon kalag. Ginatuytuyan niya ako sa mga banas sang pagkamatarong tungod sa iya ngalan.” Sing kaanggid, mabasa naton ang ginsiling ni Jesus: “Ako ang maayo nga manugbantay, kag kilala ko ang akon mga karnero kag ang akon mga karnero nakakilala sa akon, subong nga ang Amay nakakilala sa akon kag ako nakakilala sa Amay; kag ginahatag ko ang akon kabuhi para sa mga karnero.” Sin-o pa abi ang mas maayo nga mga huwaran naton sa paggamit sang awtoridad?—Salmo 23:1-3; Juan 10:14, 15.

[Blurb sa pahina 18]

Pirme ginagamit ni Jehova ang iya gahom nga nahisanto gid sa iya katarungan, kaalam, kag gugma

[Retrato sa pahina 18]

Kon kaisa, ang mga gulang kinahanglan maghatag sing mahigugmaon nga laygay sa mga nakasala

[Retrato sa pahina 19]

Ginlaygayan ni Pablo si Timoteo nga mangin isa ka matinahuron nga anak kag isa ka mainulikdon nga utod

[Retrato sa pahina 20]

Gingamit ni Jesucristo ang iya awtoridad sing maalamon, sing makatarunganon, kag sing mahigugmaon