“Daw Ano ang Paghigugma Ko sa Imo Kasuguan!”

ANG Salmo 119 isa ka ambahanon nahanungod sa balatyagon sang nagkomposo tuhoy sa inspirado nga mensahe ukon pulong sang Dios. Ang salmista nag-amba: “Sa akon tagipusuon gintipigan ko ang imo pinamulong.” “Ipakita ko ang kalipay sa imo mga palatukuran.” “Ang akon kalag nadugmok sa paghandum sa imo hudisyal nga mga desisyon sa tanan nga tion.” “Ang imo mga pahanumdom akon naluyagan.” “Ginakalangkagan ko ang imo mga mando.” “Ipakita ko ang kaluyag sa imo mga sugo nga akon ginahigugma.” “Talupangdon ko ang imo mga pagsulundan.” “Daw ano ang paghigugma ko sa imo kasuguan! Ginahunahuna ko ini sa bug-os nga adlaw.”—Salmo 119:11, 16, 20, 24, 40, 47, 48, 97.

Daku gid ang pasalamat sang salmista sa ginpahayag nga pulong sang Dios! Amo man bala sini ang imo ginabatyag tuhoy sa mensahe sang Pulong sang Dios, ang Biblia? Luyag mo bala nga palambuon ang kalangkag sa sini? Kon amo, una sa tanan, dapat mo palambuon ang batasan nga basahon ang Biblia sing regular, kon mahimo sing adlaw-adlaw. Si Jesucristo nagsiling: “Ang tawo mabuhi, indi sa tinapay lamang, kundi sa tagsa ka pulong nga nagagua sa baba ni Jehova.” (Mateo 4:4) Ikaduha, dapat mo pamalandungan ang imo ginabasa. Ang pagpamalandong sa kamatuoran tuhoy sa Dios, sa iya mga kinaiya, sa iya kabubut-on, kag sa iya katuyuan magapadalom pa gid sang imo apresasyon sa Biblia. (Salmo 143:5) Kag ang pinakaimportante gid, dapat mo iaplikar ang maalamon nga laygay sini sa adlaw-adlaw nga pagkabuhi.—Lucas 11:28; Juan 13:17.

Ano nga benepisyo ang matigayon mo sa pagpalambo sing kalangkag sa ginasiling sang Biblia? ‘Malipayon ang mga nagatuman sa mga pahanumdom sang Dios,’ siling sang Salmo 119:2. Ang mga pahanumdom nga masapwan sa Biblia magabulig sa imo nga malandas ang mga problema sa kabuhi. (Salmo 1:1-3) Matigayon mo ang kaalam, paghantop, kag paghangop, nga magabulig sa imo nga ‘punggan ang imo tiil sa tagsa ka malain nga banas.’ (Salmo 119:98-101) Bangod sang imo ihibalo sa kamatuoran tuhoy sa Dios kag sa iya katuyuan para sa duta, ang imo kabuhi mangin mas makalilipay kag ang imo paglaum sa palaabuton mangin mas masanag.—Isaias 45:18; Juan 17:3; Bugna 21:3, 4.

Interesado gid ang mga Saksi ni Jehova sa pagbulig sa iban nga mahangpan pa gid ang Biblia kag mapalambo ang gugma sa mensahe sini. Malipay gid kami kon batunon mo ang amon tinagipusuon nga imbitasyon nga makita sa idalom.