Tuman Bala ka Madumilion ang Biblia?

“SANG bata pa ako, wala ako gintudluan tuhoy sa mga talaksan sang Biblia. Wala gid masambit sa akon bisan ang tuhoy sa Dios,” panaysayon sang isa ka pamatan-on nga lalaki sa Finland. Ang amo nga pagpadaku kinaandan na karon. Para sa madamo, ilabi na para sa mga pamatan-on, ang Biblia tama ka kinaraan kag ang laygay sini tama ka madumilion. Ang mga luyag magsunod sa Biblia ginatamod sang iban subong mga tawo nga ginadingutan, kay ang ila kabuhi ginapabug-atan sing mga pagdumili kag mga sugo. Gani, para sa iban, mas maayo pa nga indi na pagbasahon ang Biblia kag sa iban na lang magpangita sing laygay.

Nangin amo sini ang pagtamod sa Biblia bangod sang madugay nga pagpamintas nga ginhimo sang mga simbahan sang Cristiandad. Halimbawa, sadto anay sa ginatawag sang pila ka istoryador nga Dark Ages, ginkontrol sang Iglesia Katolika sa Europa ang halos bug-os nga kabuhi sang tawo. Ang bisan sin-o nga nangahas sa pagpamatok sa simbahan ginkastigo kag ginpatay pa gani. Ginkontrol man sang Protestante nga mga simbahan, nga nagluntad sang ulihi, ang kahilwayan sang tawo. Sa karon, ang mga termino subong sang “Calvinista” ukon “Puritano” nagapahanumdom indi lamang tuhoy sa mga miembro sini nga mga pagtuluuhan kundi sa kapintas man sini nga mga grupo. Gani, bangod mapiguson ang mga simbahan, ang mga tawo naghinakop sing sayop nga ang mga panudlo sang Biblia mapiguson man.

Sining ulihi nga mga siglo, indi na kontrolado sang Cristiandad ang kabuhi sang mga tawo, sa di-magkubos sa pila ka kadutaan. Pagkatapos isikway ang kinaandan nga mga doktrina sang simbahan, madamo ang nagpati nga may kinamatarong ang mga tawo sa pagpamat-od para sa ila kaugalingon kon ano ang husto kag kon ano ang sayop. Kag ano ang resulta? Si Ahti Laitinen, propesor sa kriminolohiya kag hudisyal nga sosyolohiya, nagpaathag: “Ang pagtahod sa awtoridad nabuhinan, kag ang paghangop sang tawo sa kon ano ang kalahamut-an kag kon ano ang indi kalahamut-an labi pa nga nagburon.” Daw indi mapatihan nga bisan ang mga lider sang simbahan amo man sini ang panghunahuna. Ang isa ka prominente nga Luterano nga obispo nagsiling: “Masami ko ginalikawan ang opinyon nga ang mga pamangkot tuhoy sa moralidad ginasabat sa bulig sang Biblia ukon sang pila ka relihioso nga awtoridad.”

Halandumon Bala ang Walay Latid nga Kahilwayan?

Daw makagalanyat, ilabi na para sa mga pamatan-on, ang ideya tuhoy sa walay latid nga kahilwayan. Pila lamang ang luyag nga magpaubos sila ukon magsunod sa mga reglamento. Apang, dapat bala mangin hilway ang tanan sa paghimo sang bisan ano nga luyag nila? Agod masabat ini nga pamangkot, binagbinaga ang isa ka ilustrasyon. Hunahunaa ang isa ka siudad nga wala sing mga kasuguan sa trapiko. Indi kinahanglan nga magkuha sing lisensia ukon test sa pagmaneho sing salakyan. Makapagusto lang ang mga tawo sa pagmaneho, bisan pa nga hubog sila, nga wala sing ginakabalak-an nga mga speed limit, stop sign, suga sa trapiko, one-way nga mga dalan, ukon mga pedestrian  crossing (talabukan sang mga tawo). Halandumon bala ini nga “kahilwayan”? Indi gid! Ang resulta amo ang kagumon, kagamo, kag aksidente. Bisan pa ang mga kasuguan sa trapiko nagalatid sang kahilwayan sang tawo, nahibaluan naton nga ini nga mga kasuguan nagaamlig sa mga tsuper kag sa mga tawo man nga nagalakat.

Sing kaanggid, si Jehova nagahatag man sing mga panuytoy kon paano kita dapat magkabuhi. Para ini sa aton kaayuhan. Kon wala ini, makahimo kita sing madamo nga kasaypanan antes naton mahibaluan kon ano ang husto, kag sa amo, mahalitan naton ang aton kaugalingon kag ang iban. Daw subong ini sang pagmaneho sa isa ka siudad nga wala sing mga kasuguan sa trapiko. Ang kamatuoran amo, kinahanglan naton ang mga pagsulundan kag mga kasuguan—ang kamatuoran nga gilayon nga ginabaton sang kalabanan nga mga tawo.

“Ang Akon Lulan Mamag-an”

Ang mga kasuguan sa trapiko mahimo maglakip sang madamo kag detalyado nga mga reglamento—sa iban nga mga lugar, ang mga pagsulundan para pa lang sa pagparada sing salakyan tuman na kadamo. Sa pihak nga bahin, ang Biblia wala nagahatag sing madamo nga pagsulundan. Sa baylo, nagahatag ini sing sadsaran nga mga prinsipio, kag indi ini mabug-at ukon di-makatarunganon. Si Jesucristo makapahalipay nga nag-agda sa iya mga kontemporaryo: “Kari sa akon, kamo tanan nga ginabudlayan kag ginabug-atan, kag paumpawan ko kamo. Kay ang akon gota mahapos kag ang akon lulan mamag-an.” (Mateo 11:28, 30) Si apostol Pablo nagsulat sa Cristiano nga kongregasyon sa Corinto: “Kon diin ang espiritu ni Jehova, may kahilwayan.”—2 Corinto 3:17.

Apang, ina nga kahilwayan may limitasyon. Maathag nga ginpakita ni Jesus nga ang mga ginapatuman sang Dios nagalakip sang pila ka simple nga mga sugo. Halimbawa, si Jesus nagsiling sa iya mga disipulo: “Ini amo ang akon sugo, nga maghigugmaanay kamo subong nga ako nagahigugma sa inyo.” (Juan 15:12) Hunahunaa lamang ang kahimtangan kon ginasunod sang tanan ina nga sugo! Gani, ang kahilwayan sang mga Cristiano may limitasyon. Si apostol Pedro nagsulat: “Mangin subong sang hilway nga mga tawo, apang ginagamit ang inyo kahilwayan, indi subong tabon sa kalainan, kundi subong mga ulipon sang Dios.”—1 Pedro 2:16.

Gani, bisan pa ang mga Cristiano wala napaidalom sa detalyado nga mga kasuguan, wala sila nagapanghikot sigun sa ila kaugalingon nga mga ideya sa kon ano ang husto kag sayop. Kinahanglan sang tawo ang mga pag-ubay nga halin sa Dios lamang. Ang Biblia maathag nga nagasiling: “Wala sa tawo nga nagalakat bisan ang pagtuytoy sa iya tikang.” (Jeremias 10:23) Kon tumanon naton ang mga panuytoy sang Dios, magabenepisyo kita sing daku.—Salmo 19:11.

Ang isa sang mga benepisyo amo ang kalipay. Ang pamatan-on nga lalaki nga ginsambit sa umpisa, halimbawa, isa anay ka makawat kag butigon. Imoral man sia. Sang matun-an niya ang mataas nga mga talaksan sang Biblia, ginbag-o niya ang iya kabuhi kag ginsunod ang mga talaksan sang Biblia. “Bisan pa wala ko gilayon masunod ang tanan nga talaksan sang Biblia,” siling niya, “nahibaluan ko nga mapuslanon ini. Wala ko sang una nabatyagan ang kalipay nga ginabatyag ko  karon. Ang pagsunod sa mga talaksan sang Biblia nagapasimple sang imo kabuhi. Nahibaluan mo kon diin ka padulong kag nahibaluan mo kon ano ang husto kag kon ano ang sayop.”

Minilyon ka tawo ang nakaeksperiensia sing amo man sini. Lakip sa mga benepisyo amo nga ang mga panuytoy sang Biblia nagbulig sa ila nga mapauswag ang pagtinamdanay, mapalambo ang timbang nga pagtamod sa trabaho, mauntat ang makahalalit nga mga bisyo, kag sa amo magkabuhi sing mas malipayon. Si Markus, * isa ka pamatan-on nga wala anay nagasunod sa mga talaksan sang Biblia, nagsiling tuhoy sa iya mismo naeksperiensiahan: “Paagi sa pagsunod sa mga talaksan sang Biblia, napauswag ko ang akon pagtahod sa kaugalingon.” *

Ano ang Masiling Mo?

Gani madumilion bala ang Biblia? Para sa kaayuhan naton tanan—huo ang sabat. Apang tuman bala ka madumilion ang Biblia? Indi ang sabat. Ang walay limitasyon nga kahilwayan nagadul-ong lamang sa mga problema. Ang mga talaksan sang Biblia timbang, kag nagahatag ini sa aton sing dugang nga kaayuhan kag kalipay. Si Markus nagsiling: “Sa pagligad sang tion narealisar ko ang kaalam sang pagsunod sa Pulong sang Dios sa kabuhi. Bisan pa nga sa madamo nga paagi ang akon kabuhi tuhay sa iya sang kalabanan nga mga tawo, wala ko gid ginahunahuna nga may nawasi ako nga mapuslanon nga butang sa kabuhi.”

Labi pa nga maapresyar mo ang Pulong sang Dios kon maeksperiensiahan mo ang mga pagpakamaayo sang pagsunod sa mga talaksan sang Biblia. Magadul-ong ini sa daku pa nga pagpakamaayo—matun-an mo nga higugmaon ang Tuburan sini, si Jehova nga Dios. “Amo ini ang kahulugan sang gugma sa Dios, nga sundon naton ang iya mga sugo; apang ang iya mga sugo indi mabug-at.”—1 Juan 5:3.

Si Jehova amo ang aton Manunuga kag ang aton langitnon nga Amay. Nahibaluan niya kon ano ang pinakamaayo para sa aton. Sa baylo nga nagadumili sa aton, ang iya mahigugmaon nga panuytoy para sa aton kaayuhan. Sing mabinalaybayon, si Jehova naglaygay sa aton: “O kon talupangdon mo lamang ang akon mga sugo! Nian ang imo paghidait mangin subong sang suba, kag ang imo pagkamatarong subong sang mga balod sang dagat.”—Isaias 48:18.

[Mga Nota]

[Retrato sa pahina 9]

Nagsiling si Jesus nga ang mga kasuguan sang Dios makaparepresko

[Retrato sa pahina 10]

Ang pagtuman sa panuytoy sang Dios nagahatag sing kalipay kag pagtahod sa kaugalingon