Isa ka Dayon nga Dulot Gikan sa Manunuga

WALA ka bala matingala nga ang mga rason nga ginapatihan sang mga sientipiko nga amo ang kabangdanan sang kabuhi sa bisan ano nga planeta makita ukon ginapaathag sa nahauna nga kapitulo sang Biblia? Ano ini?

Agod magpadayon ang kabuhi, dapat may bugana nga tubig, subong sang ginsambit sa Genesis 1:2. Ang temperatura dapat hustuhan lang agod magpabilin nga likido ang tubig. Nagakinahanglan ini nga hustuhan ang kalayuon sang planeta sa adlaw. Pirme ginapatuhuyan sang kasaysayan sa Genesis ang adlaw kag ang epekto sini sa duta.

Agod mapuy-an sang mga tawo ang planeta, dapat may atmospera ini nga may hustuhan nga mikskla sang mga gas. Ining importante nga kahimtangan ginsambit sa Genesis 1:6-8. Ang pagtubo sang gamhon, nga ginlaragway sa Genesis 1:11, 12, nagaaman sing bugana nga suplay sang oksiheno. Agod mabuhi ang nagkalainlain nga sahi sang sapat sa isa ka planeta, dapat may mamala ini nga mga kontinente kag matambok nga duta, subong sang ginlaragway sa Genesis 1:9-12. Sa katapusan, agod maayo ang klima, ang isa ka planeta dapat nga nagahilay sa nagakaigo nga anggulo—kag amo sini ang nagakatabo sa duta, bangod sang resulta sa pila ka bahin sang pagbutong sang grabidad halin sa aton bulan. Ang pagluntad sining satelayt kag ang pila ka benepisyo sini ginpadaku sa Genesis 1:14, 16.

Paano nahibaluan sang dumaan nga manunulat nga si Moises, nga wala sing bulig sang moderno nga siensia, ang bag-o lang ginsambit nga mga rason? Abanse lang bala si Moises sa iya mga katubotubo sa paghangop sini? Ang paathag amo nga gin-inspirar sia sang Manunuga sang mga langit kag duta. Talalupangdon ini kay ining kasaysayan sa Genesis sibu sa siensia.

Ginasakdag sang Biblia nga may katuyuan sa mga kalatingalahan nga aton makita sa uniberso. “Nahanungod sa mga langit, ang mga langit iya ni Jehova,” siling sang Salmo 115:16, “apang ginhatag niya ang duta sa mga anak sang mga tawo.” Ang isa pa ka salmo nagsiling: “Ginpasad niya ang duta sa malig-on nga mga duog sini; indi ini mationg tubtob sa tion nga walay latid, ukon sing dayon.” (Salmo 104:5) Kon ang uniberso kag ang aton matahom nga planeta gindesinyo kag gintuga sang isa ka Manunuga, pat-od gid nga indi mabudlay patihan nga may ikasarang man sia nga sakdagon ini. Buot silingon, makasalig ikaw nga matuman ang makalilipay nga saad: “Ang mga matarong magapanag-iya sang duta, kag magapuyo sila sing dayon sa sini.” (Salmo 37:29) Siempre, ang Dios “wala magtuga [sang duta] sa walay pulos” kundi “naghuman sini agod puy-an” sing dayon sang mainapresyahon nga mga tawo nga nagakilala sang iya mga binuhatan.—Isaias 45:18.

Suno sa Kasulatan, nagkari si Jesus sa duta agod tudluan kita tuhoy sa Dios kag sa Iya katuyuan nga hatagan sing dayon nga kabuhi ang matinumanon nga katawhan. (Juan 3:16) Ginapasalig kita nga sa dili madugay ang Dios ‘magalaglag sa mga nagalaglag sang duta,’ samtang maluwas ang mahigugmaon sa paghidait nga katawhan gikan sa tanan nga kapungsuran nga nagbaton sang iya aman para sa kaluwasan. (Bugna 7:9, 14; 11:18) Makalilipay gid ang kabuhi para sa katawhan samtang padayon sila nga nagatukib kag nagakasadya sing dayon sa mga kalatingalahan sang tinuga sang Dios!—Manugwali 3:11; Roma 8:21.

[Credit Line sang piktyur sa pahina 8]

NASA photo