Mga Pamangkot Gikan sa mga Bumalasa

Sanglit wala ginsambit sa Biblia ang pag-toast (pag-inom para sa kadungganan ukon maayong panglawas), ngaa ginalikawan sang mga Saksi ni Jehova ang pagpakigbahin sa sini?

Ang pag-toast sa isa ka baso nga alak (ukon iban nga sahi sang alkoholiko nga ilimnon) madugay na kag lapnag gid nga kinabatasan, bisan pa nga mahimo lainlain ang pamaagi sa paghimo sini sa kada pungsod. Kon kaisa ginapasantik sang mga naga-toast ang ila mga baso. Ang isa nga nagadulot sang toast masami nga nagapangabay ukon nagahandum nga ang isa makatigayon sing kalipay, maayong panglawas, malawig nga kabuhi, ukon iban pa nga butang. Mahimo nga ihambal sang iban nga naga-toast ang ila pag-ugyon ukon ibayaw ang ila mga baso kag mag-inom sing alak. Para sa madamo, daw isa lamang ini ka indi malain nga kustombre ukon buhat sang pagtahod, apang may makatarunganon nga mga rason kon ngaa wala naga-toast ang mga Saksi ni Jehova.

Indi ini bangod ang mga Cristiano wala naluyag nga ang iban mangin malipayon ukon may maayo nga panglawas. Sa isa ka sulat sa mga kongregasyon, ang nagadumala nga hubon sang unang siglo naghinakop sa tinaga nga mahimo badbaron nga “maayong panglawas sa inyo,” “magpabilin nga maayo,” ukon “mangin madinalag-on.” (Binuhatan 15:29) Kag may pila ka matuod nga mga sumilimba nga nagsiling sa tawhanon nga mga hari: ‘Magkabuhi sa gihapon ang akon ginuo’ ukon “Magkabuhi ang hari tubtob sa tion nga walay latid.”—1 Hari 1:31; Nehemias 2:3.

Apang, diin naghalin ang kustombre nga mag-toast? Ginkutlo sang Enero 1, 1968, nga The Watchtower ang The Encyclopædia Britannica (1910), Tomo 13, pahina 121 nga nagasiling: “Ang kustombre nga pag-inom sang alak sa pagpangabay sing ‘maayong panglawas’ para sa iban mahimo gid nga naghalin sa dumaan nga relihioso nga rituwal sang pag-inom subong halad sa mga dios kag mga patay. Kon tigkalaon, ang mga Griego kag mga Romano nagaula sing ilimnon para sa ila mga dios, kag sa seremonyal nga mga pagkinaon naga-toast sila para sa ila mga dios kag sa mga patay.” Ang ensiklopedia nagdugang: “May kaangtanan gid ining kustombre sang pag-inom subong isa ka sahi sang halad sa pag-inom para sa kapagros sang mga nagakabuhi.”

Ini bala nga pagpati nagapadayon gihapon tubtob karon? Ang 1995 International Handbook on Alcohol and Culture nagsiling: “[Ang pag-toast] mahimo nga isa ka sekular nga bahin sang dumaan nga paghalad sang ilimnon diin ang sagrado nga likido ginahalad sa mga dios: dugo ukon alak kabaylo sang isa ka pangabay, isa ka pangamuyo nga masumaryo sa mga tinaga nga ‘malawig nga kabuhi!’ ukon ‘sa imo kapagros!’”

Sa pagkamatuod, ang isa ka butang, isa ka desinyo, ukon isa ka kinabatasan nga naghalin ukon kaangay sa ginahimo sang dumaan nga butig nga relihion wala pirme nagakahulugan nga indi na ini mapanag-iyahan ukon magamit sang isa ka matuod nga sumilimba. Binagbinaga ang bunga sang kahoy nga granada. Ang isa ka kilala nga ensiklopedia sa Biblia nagreport: “Ang granada daw ginagamit man nga sagrado nga simbulo sang pagano nga mga relihion.” Walay sapayan sini, ang Dios nagsugo nga butangan sing mga granada nga human sa hilo ang sidsid sang panapton sang mataas nga saserdote, kag mga granada ang ginpuni sa saway nga mga haligi sang templo ni Solomon. (Exodo 28:33; 2 Hari 25:17) Dugang pa, may tion nga ang singsing sa kasal may relihioso nga kahulugan. Apang, wala ini mahibaluan sang kalabanan nga tawo karon kag ang singsing sa kasal ginatamod lamang subong pamatuod nga ang isa may tiayon na.

Apang, ano naman ang tuhoy sa paggamit sing alak sa relihioso nga mga buhat? Halimbawa, sang isa ka tion ang mga lalaki nga sumilimba ni Baal sa Siquem “nagsulod sa balay sang ila dios kag nagkaon kag nag-inom kag nagpakamalaut kay Abimelec,” nga anak ni Gideon. (Hukom 9:22-28) Sa banta mo ayhan ang isa nga matutom kay Jehova nagpakigbahin sa sini nga pag-inom, nga nagapangayo sing gahom sa isa ka butig nga dios batok  kay Abimelec? Nagalaragway sang isa ka tion nga madamo sa Israel ang nagribok batok kay Jehova, si Amos nagsiling: “Nagahuliray sila sa luyo sang tagsa ka halaran; kag sa balay sang ila dios nagainom sila sang alak sang mga ginmultahan.” (Amos 2:8) Nagpakigbahin bala sa sini ang matuod nga mga sumilimba, ayhan nag-ula sang alak subong halad sa mga dios ukon nag-inom sini para sa amo nga katuyuan? (Jeremias 7:18) Ukon ang isa bala ka matuod nga sumilimba magabayaw sing baso sang alak kag magapangabay sing gahom gikan sa butig nga dios nga buligan ang isa ka tawo ukon sing maayo nga palaabuton para sa iya?

Sing talalupangdon, may mga tion nga ang mga sumilimba ni Jehova nagbayaw sang ila mga kamot kag nagpangabay sing kaayuhan. Ginbayaw nila ang ila mga kamot sa matuod nga Dios. Mabasa naton: “Nian nagtindog si Solomon sa atubangan sang halaran ni Jehova . . . kag nagbayaw sang iya mga kamot nayon sa langit; kag nagsiling sia: ‘O Jehova, ang Dios sang Israel, walay Dios kaangay sa imo . . . kag kabay nga magpamati ka sa langit nga imo puluy-an, kag magpamati ka kag magpatawad.’” (1 Hari 8:22, 23, 30) Sing kaanggid, “Si Esdras nagpakamaayo kay Jehova . . . kag ang bug-os nga katawhan nagsabat, ‘Kabay pa! Kabay pa!’ nga nagabayaw sang ila mga kamot. Nian nagsimba sila kay Jehova samtang nagaduko kag nagahapa sa duta.” (Nehemias 8:6; 1 Timoteo 2:8) Sing maathag, ining mga matutom wala nagabayaw sang ila mga kamot nayon sa langit agod pakamaayuhon sang isa ka dios sang suerte.—Isaias 65:11.

Sa karon, madamo nga tawo nga nagapagkigbahin sa pag-toast ang mahimo wala nagahunahuna nga nagapangabay sila sang sabat ukon pagpakamaayo gikan sa isa ka dios, apang indi man nila mapaathag kon ngaa ginabayaw nila ang ila mga baso sang alak. Apang, ang katunayan nga wala nila mabinagbinag sing maayo ini nga butang indi rason agod ilugon man sang matuod nga mga Cristiano ang ila mga ginahimo.

Madamo ang nakahibalo nga madamo pa nga butang nga ginahimo sang kalabanan, ang wala ginahimo sang mga Saksi ni Jehova. Halimbawa, madamo nga tawo ang nagasaludo sa mga emblema sang pungsod, ukon mga bandera kag wala nila ini ginatamod nga mga buhat sang pagsimba. Ang matuod nga mga Cristiano wala nagapasilabot sa sini nga mga buhat, apang wala sila nagapakigbahin. Nahibaluan sang madamo nga Saksi ang mga okasyon nga ayhan himuon ini nga mga seremonya, gani nagahulag sila sing maalamon agod indi masaklaw ang iban. Sa ano man nga kahimtangan, determinado sila nga indi maghimo sing nasyonalistiko nga buhat nga supak sa Biblia. (Exodo 20:4, 5; 1 Juan 5:21) Sa karon, mahimo nga para sa madamo ang pag-toast wala sing kaangtanan sa relihion. Sa gihapon, may mabakod nga mga rason kon ngaa ang mga Cristiano wala naga-toast, bangod may relihioso ini nga ginhalinan kag bisan sa karon mahimo ini tamdon subong pagpangabay sa ‘langit’ sing pagpakamaayo, nga kaangay sa pagpangabay sing bulig sa puersa nga labaw sa tawo.—Exodo 23:2.