Ngaa Likawan ang Pagpasobra?

SI Jehova amo ang labing maayo nga halimbawa sang pagkabalanse. “Ang iya binuhatan himpit,” kag indi mapintas ang iya katarungan, kay pirme ini naupdan sing kaluoy. (Deuteronomio 32:4) Ang iya gugma may prinsipio, bangod nagapanghikot sia nahisuno sa himpit nga mga kasuguan. (Salmo 89:14; 103:13, 14) Ang aton unang mga ginikanan gintuga nga balanse sa tanan nga butang. Wala sila nagabuhat sing bisan ano nga pagpasobra. Apang, ang pagsulod sang sala nagdala sing “depekto”—pagkadihimpit—nga amo ang kabangdanan sang pagkadula sini nga pagkabalanse.—Deuteronomio 32:5.

Sa pag-ilustrar: Nakasakay ka na bala sa isa ka salakyan ukon bisikleta nga may daku nga bukol ang goma? Walay duhaduha nga bangod sini nga bukol ang imo dalagan maundag kag makatalagam. Dapat ini kay-uhon antes magdugang ang guba ukon magkupos ang goma. Sing kaanggid, madamo man sing depekto ang aton di-himpit nga personalidad. Kon tugutan naton nga magdaku ining mga “bukol,” ang aton paglakat sa dalanon sang kabuhi mangin mabudlay, ukon makatalagam pa gani.

Kon kaisa, ang aton maayo nga mga kinaiya, ang aton mga ikasarang, mahimo nga magsobra. Halimbawa, ginpatuman sang Mosaikong Kasuguan nga butangan sang mga Israelinhon sing plekos ang ila mga panapton, apang ang mga Fariseo sang panahon ni Jesus ‘nagpalaba sang mga plekos sang ila mga panapton’ sing tuman gid agod ipakitakita sa mga tawo. Luyag nila nga mas balaan sila tulukon sangsa ila isigkatawo.—Mateo 23:5; Numeros 15:38-40.

Sa karon, may mga tawo nga nagahimo sang bisan ano nga paagi agod nga matalupangdan sila, bisan paagi sa mga butang nga makapakibot sa iban nga tawo. Mahimo gid nga isa ini ka pakitluoy: “Talupangda ako! Nagaluntad man ako!” Apang ang pagpasobra sa pagpamayo, panimuot, kag mga buhat indi makahatag sing kaayawan sa matuod nga kinahanglanon sang isa ka Cristiano.

Ang Balanse nga Pagtamod sa Trabaho

Bisan sin-o man kita kag bisan diin man kita nagapuyo, ang makalilipay nga trabaho isa ka butang nga nagahatag sing katuyuan sa aton kabuhi. Gintuga kita agod magkalipay sa sini nga trabaho. (Genesis 2:15) Sing nagakaigo, ginapakamalaut sang Biblia ang katamad. Si apostol Pablo maathag nga nagsiling: “Kon ang bisan sin-o indi luyag mag-obra, indi man sia pagpakan-a.” (2 Tesalonica 3:10) Sa pagkamatuod, ang katamad magadala indi lamang sing kaimulon kag pagkadikontento kundi sang di-kahamuot man sang Dios.

Sa pihak nga bahin, madamo ang sobra naman kapisan, nga nagiyan na sa ila mga trabaho kag hungod nga nagapaulipon sa ila mga trabaho. Temprano pa sila nagahalin sa ila balay kon aga kag gab-i na nagapauli, ayhan nagapangatarungan nga ang ila trabaho para sa kaayuhan sang ila pamilya. Apang, ang matuod ang ila mga pamilya mahimo nga biktima sang ila pagkagiyan sa trabaho. Ang isa ka asawa nga ang iya bana masami nga nagahinguyang sing malawig nga tion sa iya trabaho, nagsiling: “Ibaylo ko ang tanan nga butang sa sining matahom nga balay sa higayon nga makaupod ko kag sang amon kabataan ang akon bana.” Dapat binagbinagon sing maayo sang mga sobra magtrabaho ang eksperiensia mismo ni Hari Solomon: “Nagtulok ako sa tanan nga binuhatan nga ginhimo sang akon mga kamot kag kinabudlayan ko sa paghimo, kag, tan-awa! ang tanan walay pulos kag pagpanikasog sa hangin.”—Manugwali 2:11.

 Huo, dapat naton likawan ang katamad ukon ang sobra nga kapisan. Mahimo kita mangin mabakas nga mga manugpangabudlay, samtang ginadumdom naton nga ang pagpaulipon sa trabaho makadula sang aton kalipay kag ayhan sang kapin pa sa sini.—Manugwali 4:5, 6.

Likawi ang Sobra nga Pagtamod sa Kinasadya

Ang Biblia nagtagna tuhoy sa aton tion: “Ang mga tawo mangin . . . mahigugmaon sa kinasadya sa baylo nga mahigugmaon sa Dios.” (2 Timoteo 3:2, 4) Ang paghingamo sing kinasadya amo ang isa sa labing epektibo nga pahito ni Satanas agod mahamulag ang tawo sa Dios. Ang pagpatuyang sa paglingawlingaw kag kalingawan, subong sang indi kinaandan ukon “makatalagam” nga mga isport nagalapnag. Labi nga nagadamo ini nga mga aktibidades, kag mas madamo ang nagaentra sa sini. Ngaa tuman gid ini ka popular? Madamo nga tawo nga indi kontento sa ila kabuhi, ang nagapangita sing dugang pa nga kakunyagan. Apang, agod padayon nga mabatyagan ini nga kakunyag kinahanglan nga dugangan ang risgo. Ginalikawan sang sinsero nga mga Cristiano ang makatalagam nga mga isport bangod ginatahod nila ang dulot nga kabuhi kag ang Manughatag sini.—Salmo 36:9.

Sang gintuga sang Dios ang una nga mag-asawa, sa diin niya sila ginbutang? Sa hardin sang Eden, nga sa orihinal nga lenguahe nagakahulugan sing “Kalipay,” ukon “Kaayawan.” (Genesis 2:8) Maathag gid nga ang kalipay ukon kaayawan bahin sang katuyuan ni Jehova para sa mga tawo.

Si Jesus naghatag sang isa ka himpit nga huwaran sang balanse nga pagtamod sa kinasadya. Matutom gid sia sa pagtuman sa kabubut-on ni Jehova, kag wala gid sia mag-untat sa pagkabuhi nahisuno sa mga kasuguan kag mga prinsipio sang Dios. Naghinguyang sia sing tion sa mga nagakinahanglan, bisan pa sa mga higayon nga kapoy na sia. (Mateo 14:13, 14) Huo, ginbaton ni Jesus ang mga pangagda nga magkaon kag ginhatagan niya sing tion ang pagpahuway kag pagpaliwaliwa. Siempre pa, nahibaluan niya nga ginapakamalaut sia sang mga kaaway bangod sa paghimo niya sining mga butang. Nagsiling sila tuhoy sa iya: “Yari karon! Ang tawo nga hakugan kag palainom sing alak.” (Lucas 7:34; 10:38; 11:37) Apang, nahibaluan ni Jesus nga ang katutom sa Dios wala nagakahulugan nga indi na gid puede magkasadya ang isa.

Sing maathag, maalamon nga likawan naton ang bisan ano nga pagpasobra sa paglingawlingaw. Ang pag-una sa kinasadya kag kalingawan sa aton kabuhi indi gid makahatag sing matuod nga kalipay. Mahimo nga bangod sini mapatumbayaan naton ang mas importante nga mga butang, lakip ang aton kaangtanan sa Dios. Apang, indi naton dapat pagdingutan ang aton kaugalingon sang tanan nga kinasadya ukon pakamalauton ang iban nga nagakalipay sa kabuhi sa balanse nga paagi.—Manugwali 2:24; 3:1-4.

Magkalipay sa Balanse nga Pagkabuhi

Ang disipulo nga si Santiago nagsulat: “Kita tanan nagakasandad sing madamong beses.” (Santiago 3:2) Ayhan naeksperiensiahan naton nga matuod ini samtang nagapanikasog kita nga likawan ang pagpasobra. Ano ang makabulig sa aton agod makapabilin nga balanse? Ti, dapat naton kilalahon ang aton mga ikasarang kag mga kaluyahon. Ini nga pagkabunayag sa kaugalingon indi mahapos. Mahimo nga indi naton matalupangdan nga nagapasobra na gali kita. Kon amo, maalamon nga magpabilin kita nga suod sa hamtong nga mga Cristiano kag mamati sa balanse nga mga laygay. (Galacia 6:1) Makapangayo man kita sing laygay sa isa ka masaligan nga abyan ukon sa eksperiensiado nga gulang sa kongregasyon. Upod sa Kasulatan mismo, ining pasad sa Biblia nga mga laygay mangin kaangay sa “isa ka salaming” agod nga makita naton kon daw ano gid kita sa pagtamod ni Jehova.—Santiago 1:22-25.

Sing makalilipay, indi naton kinahanglan nga magkabuhi sa di-malikawan nga mga pagpasobra. Upod ang aton determinasyon kag pagpakamaayo ni Jehova, mahimo kita mangin balanse kag busa mangin malipayon nga mga indibiduwal. Magauswag ang aton kaangtanan sa aton Cristianong mga kauturan, kag mangin mas maayo kita nga huwaran sa aton mga ginabantalaan. Labaw sa tanan, mailog naton sing dugang pa ang aton balanse kag mahigugmaon nga Dios nga si Jehova.—Efeso 5:1.

[Credit Line sang piktyur sa pahina 28]

©Greg Epperson/age fotostock