Indi Pagbulaga ang Gintingob sang Dios
Indi Pagbulaga ang Gintingob sang Dios
“Indi na sila duha, kundi isa ka unod. Gani, ang gintingob sang Dios indi pagbulagon sang tawo.”—MATEO 19:6.
1, 2. Ngaa Makasulatanhon kag realistiko nga paabuton nga ang magtiayon makasumalang sing mga problema kon kaisa?
HANDURAWA nga mamaneho ka sing salakyan kag kalayo gid sang imo kaladtuan. May mga problema ka bala nga masumalang? Isa gid ka kabuangan kon hunahunaon mo nga wala! Halimbawa, mahimo nga maglain ang tiempo, gani kinahanglan ka maghinayhinay kag maghalong. Ukon ayhan maaberiya ka kag indi mo ini makay-o, amo nga kinahanglan mo ipahigad ang salakyan kag mangayo sing bulig. Bangod sini, masiling ka bala nga kuntani wala ka na lang naglakbay kag pabay-an mo na lang bala ang salakyan? Indi. Kon nagalakbay ka sing malawig, ginapaabot mo na nga may mga problema kag maalamon nga nagapangita ka sing mga paagi agod maatubang ini.
2 Amo man sa pag-asawahay. Indi malikawan nga may mga problema, kag isa gid ka kabuangan para sa magnobya nga nagaplano nga magpakasal nga paabuton nga ini puro lang kalipay. Sa 1 Corinto 7:28, prangka nga nagasiling ang Biblia nga ang mga bana kag mga asawa may “kapipit-an sa ila unod.” Ngaa subong sini? Ini bangod di-himpit ang mga bana kag mga asawa, kag nagakabuhi kita sa “makahalanguyos nga mga tion nga mabudlay atubangon.” (2 Timoteo 3:1; Roma 3:23) Busa, bisan ang nagasahuay gid kag mahunahunaon sa espirituwal nga magtiayon makaatubang sing mga problema kon kaisa.
3. (a) Paano ginatamod sang madamo sa kalibutan ang pag-asawahay? (b) Ngaa ginatinguhaan sang mga Cristiano nga huptan ang ila pag-asawahay?
3 Sa kalibutan karon, ang una nga reaksion sang pila ka mag-asawa kon may problema sila amo ang pagbulagay. Sa madamo nga pungsod, nagadamo pa gid ang nagadiborsio. Apang, ginasolbar sang matuod nga mga Cristiano ang mga problema sa baylo nga magdiborsio dayon. Ngaa? Bangod ginatamod nila ang pag-asawahay nga isa ka sagrado nga dulot gikan kay Jehova. Amo sini ang ginsiling ni Jesus tuhoy sa mga mag-asawa: “Ang gintingob sang Dios indi pagbulagon sang tawo.” (Mateo 19:6) Matuod, kon kaisa mabudlay sundon ini nga talaksan. Halimbawa, ang mga paryente kag iban pa—lakip na ang pila ka manuglaygay tuhoy sa pag-asawahay—nga wala nagakilala sa mga prinsipio sang Biblia masami nga nagaengganyo sa mga mag-asawa nga magbulagay ukon magdiborsio bisan pa ang mga rason indi Makasulatanhon. * Apang nahibaluan sang mga Cristiano nga mas maayo nga solbaron kag huptan ang pag-asawahay sangsa tapuson ini sing padasudaso. Sa pagkamatuod, importante gid nga sa umpisa pa lang determinado na kita nga himuon ang mga butang suno sa paagi ni Jehova—indi suno sa laygay sang iban.—Hulubaton 14:12.
Paglandas sa mga Kabudlayan
4, 5. (a) Ano nga mga problema ang dapat atubangon sa pag-asawahay? (b) Ngaa ang mga prinsipio nga masapwan sa Pulong sang Dios epektibo gid, bisan pa kon mag-utwas ang mga problema sa pag-asawahay?
4 Ang matuod, kinahanglan nga hatagan sing pinasahi nga igtalupangod ang pag-asawahay sa tion kag tion. Sa masami, may kaangtanan ini sa paghusay sa magagmay nga di-paghangpanay. Apang sa pila ka pag-asawahay, may mas serioso nga mga problema nga nagabutang sa katalagman sa pundasyon sang kaangtanan. Kon kaisa, kinahanglan mo mangabay sing bulig gikan sa isa ka eksperiensiado kag minyo nga Cristianong gulang. Apang, ini nga kahimtangan wala nagakahulugan nga napaslawan ang inyo pag-asawahay. Ginapadaku lamang sini ang importansia sang pagsunod sing maayo sa mga prinsipio sang Biblia sa pagpangita sing solusyon.
5 Subong Manunuga sang tawhanon nga rasa kag ang Tagtukod sang kahimusan sang pag-asawahay, nahibaluan ni Jehova labaw kay bisan sin-o ang kinahanglanon naton agod magmadinalag-on ang aton nga pag-asawahay. Ang pamangkot amo, Pamatian bala naton ang laygay nga masapwan sa iya Pulong kag sundon ini? Magabenepisyo gid kita kon himuon naton ini. Si Jehova nagsiling sa iya katawhan sang una: “O kon talupangdon mo lamang ang akon mga sugo! Nian ang imo paghidait mangin subong sang suba, kag ang imo pagkamatarong subong sang mga balod sang dagat.” (Isaias 48:18) Ang pagsunod sa mga panuytoy sang Biblia makabulig agod magmadinalag-on ang pag-asawahay. Binagbinagon anay naton ang laygay nga ginhatag sang Biblia sa mga bana.
“Padayon nga Higugmaa ang Inyo Asawa”
6. Ano ang Makasulatanhon nga laygay para sa mga bana?
6 Ang sulat ni apostol Pablo sa mga taga-Efeso nagaunod sing maathag nga mga panuytoy para sa mga bana. Si Pablo nagsulat: “Mga bana, padayon nga higugmaa ang inyo asawa, subong nga si Cristo naghigugma man sang kongregasyon kag nagtugyan sang iya kaugalingon tungod sa sini. Sa sining paagi ang mga bana dapat maghigugma sang ila asawa subong sang ila kaugalingon nga lawas. Sia nga nagahigugma sang iya asawa nagahigugma sang iya kaugalingon, kay wala sing tawo nga nagadumot sang iya kaugalingon nga unod; kundi ginapakaon kag ginapalangga niya ini, subong sang ginahimo ni Cristo sa kongregasyon. Apang, ang kada isa sa inyo maghigugma man sang iya asawa subong sang paghigugma niya sa iya kaugalingon.”—Efeso 5:25, 28, 29, 33.
7. (a) Ano dapat ang mangin importante nga bahin sang pundasyon sang isa ka Cristianong pag-asawahay? (b) Paano padayon nga mahigugma sang mga bana ang ila asawa?
7 Wala ginbinagbinag ni Pablo ang tanan nga problema nga mahimo mag-utwas sa ulot sang bana kag asawa. Sa baylo, ginbinagbinag niya ang panguna nga solusyon sa problema sang mag-asawa paagi sa pagtudlo kon ano dapat ang importante nga bahin sang pundasyon sang tagsa ka Cristianong pag-asawahay—ang gugma. Sa katunayan, ang gugma ginsambit sing anom ka beses sa mga bersikulo sa ibabaw. Talupangda man, nga ginsilingan ni Pablo ang mga bana: “Padayon nga higugmaa ang inyo asawa.” Walay duhaduha nga nahibaluan ni Pablo nga mahapos ang maghigugma sangsa kon paano huptan nga mainit ini nga gugma. Matuod ini ilabi na sa sining tion sang “katapusan nga mga adlaw,” kay madamo ang “mahigugmaon sa kaugalingon” kag “indi magsugot sa bisan ano nga kasugtanan.” (2 Timoteo 3:1-3) Ginaguba sining di-maayo nga mga kinaiya ang madamo nga pag-asawahay karon, apang indi pagtugutan sang isa ka mahigugmaon nga bana ang makagod nga mga kinaiya sining kalibutan nga mag-impluwensia sa iya panghunahuna kag mga buhat.—Roma 12:2.
Paano Mo Atipanon ang mga Kinahanglanon sang Imo Asawa?
8, 9. Sa anong mga paagi nga ginaamanan sang Cristianong bana ang iya asawa?
8 Kon ikaw isa ka Cristiano nga bana, paano mo mapamatukan ang makagod nga mga huyog kag mapakita ang matuod nga gugma sa imo asawa? Sa ginsiling ni Pablo sa mga taga-Efeso nga ginkutlo kaina, ginsugid niya ang duha ka butang nga dapat mo himuon—atipanon ang mga kinahanglanon sang imo asawa, kag palanggaon sia subong sang ginahimo mo sa imo kaugalingon nga lawas. Paano mo maamanan ang imo asawa? Ang isa ka paagi amo ang sa materyal—pag-atipan sa pisikal nga mga kinahanglanon sang imo asawa. Si Pablo nagsulat kay Timoteo: “Kon sin-o man ang wala nagaaman para sa mga natungod sa iya, kag ilabi na para sa mga katapo sang iya panimalay, ginapanghiwala niya ang pagtuo kag malain pa sa tawo nga wala sing pagtuo.”—1 Timoteo 5:8.
9 Apang, kapin pa ang nadalahig sangsa pag-aman lamang sing pagkaon, panapton, kag puluy-an. Ngaa? Bangod mahimo nga maayo gid mag-aman ang bana sa materyal nga mga kinahanglanon sang iya asawa apang wala niya ginahatag ang emosyonal kag espirituwal nga mga kinahanglanon sang iya asawa. Ang pag-atipan sa emosyonal kag espirituwal nga mga kinahanglanon sang iya asawa importante gid. Matuod, madamong Cristianong bana ang masako gid sa pag-atipan sa mga butang may kaangtanan sa kongregasyon. Apang ang pagtigayon sing mabug-at nga mga responsibilidad sa kongregasyon wala nagakahulugan nga mahimo na patumbayaan sang bana ang pagtuman sa iya hatag-Dios nga obligasyon subong ulo sang pamilya. (1 Timoteo 3:5, 12) Nagakomento tuhoy sa sini nga butang, pila ka tuig ang nagligad ini nga balasahon naghatag sing masunod nga pinamulong: “Suno sa mga ginapatuman sa Biblia, masiling nga ang ‘pagbantay nagasugod sa puluy-an.’ Kon ginapatumbayaan sang isa ka gulang ang iya pamilya, mahimo madula niya ang iya pribilehiyo subong isa ka gulang.” * Sing maathag, dapat gid nga amanan mo ang imo asawa—sa pisikal, sa emosyonal, kag labing importante sa tanan, sa espirituwal.
Ano ang Buot Silingon sang Pagpalangga sa Imo Asawa?
10. Paano mapakita sang bana nga ginapalangga niya ang iya asawa?
10 Kon ginapalangga mo ang imo asawa, ginaatipan mo sia sing maayo bangod ginahigugma mo sia. May pila ka paagi nga mahimo mo ini. Una, maghinguyang sing bastante nga tion upod sa imo asawa. Kon ginapatumbayaan mo ang imo asawa sa sini nga bahin, ang iya gugma sa imo mahimo magbugnaw. Dumduma nga mahimo magkatuhay ang inyo pagtamod kon sig-ano nga tion kag igtalupangod ang kinahanglan sang imo asawa. Indi mo lamang masiling nga ginapalangga mo ang imo asawa. Dapat mabatyagan sang imo asawa nga ginapalangga mo sia. Si Pablo nagsulat: “Padayon nga pangitaon sang kada isa, indi ang iya kaugalingon nga kaayuhan, kundi ang iya sang iban nga tawo.” (1 Corinto 10:24) Subong isa ka mahigugmaon nga bana, luyag mo pat-uron nga nahibaluan mo ang kinahanglanon gid sang imo asawa.—Filipos 2:4.
11. Paano ang kaangtanan sang bana sa Dios kag sa kongregasyon maapektuhan sang iya pagpakig-angot sa iya asawa?
11 Ang isa pa ka paagi nga mapakita mo nga ginapalangga mo ang imo asawa amo ang pagpakig-angot sa iya sing mainayuhon, sa hambal kag sa buhat. (Hulubaton 12:18) Si Pablo nagsulat sa mga taga-Colosas: “Kamo nga mga bana, padayon nga higugmaa ang inyo asawa kag indi kamo magbalingaso sa kaakig sa ila.” (Colosas 3:19) Suno sa isa ka libro, ang naulihi nga bahin sang ginsiling ni Pablo mahimo badbaron nga “indi sia pagtrataha nga kaangay sang isa ka timbang” ukon “indi sia pagkabiga nga ulipon.” Ang bana nga dominante—sa pribado man ukon sa publiko—wala gid nagapakita nga ginapalangga niya ang iya asawa. Kon ginapakig-angutan niya sing matigdas ang iya asawa, maapektuhan gid ang iya kaangtanan sa Dios. Si apostol Pedro nagsulat sa mga bana: “Padayon kamo nga magpuyo kaupod [sang inyo asawa] sa kaanggid nga paagi suno sa ihibalo, nga nagahatag sa ila sang dungog subong nga sa isa ka mas maluya nga suludlan, ang isa nga babayi, sanglit mga masigkamanunubli man kamo kaupod nila sang di-bagay nga pabor sang kabuhi, agod indi masablagan ang inyo mga pangamuyo.” *—1 Pedro 3:7.
12. Ano ang matun-an sang Cristianong bana sa pagpakig-angot ni Jesus sa Cristianong kongregasyon?
12 Indi pagpasapayani ang gugma sang imo asawa. Pasaliga sia sang imo padayon nga paghigugma sa iya. Si Jesus nagpahamtang sing halimbawa para sa Cristianong mga bana sa iya pagpakig-angot sa Cristianong kongregasyon. Sia malulo, mainayuhon, kag mapinatawaron—bisan pa ang iya mga sumulunod pirme nagapakita sing di-maayo nga mga kinaiya. Busa si Jesus makasiling sa iban: “Kari sa akon, . . . kay ako malulo kag mapainubuson sang tagipusuon, kag makakita kamo sang kaumpawan sa inyo kaugalingon.” (Mateo 11:28, 29) Bilang pag-ilog kay Jesus, dapat pakig-angutan sang Cristianong bana ang iya asawa subong sang pagpakig-angot ni Jesus sa kongregasyon. Ang isa ka lalaki nga nagapalangga gid sa iya asawa, ginapakita ini sa pulong kag buhat, nagahatag sa iya sing tunay nga kaumpawan.
Mga Asawa nga Nagasunod sa mga Prinsipio sang Biblia
13. Ano nga mga prinsipio sa Biblia ang makabulig sa mga asawa?
13 Ang Biblia may mga prinsipio man nga makabulig sa mga asawa. Ang Efeso 5:22-24, 33 nagasiling: “Ang mga asawa magpasakop sa ila bana subong nga sa Ginuo, bangod ang bana amo ang ulo sang iya asawa subong nga si Cristo amo man ang ulo sang kongregasyon, kay sia ang manluluwas sini nga lawas. Sa katunayan, subong nga ang kongregasyon nagapasakop kay Cristo, amo man ang mga asawa sa ila bana sa tanan nga butang. . . . Ang asawa dapat may tudok nga pagtahod sa iya bana.”
14. Ngaa ang Makasulatanhon nga prinsipio sang pagpasakop wala nagapakanubo sa mga babayi?
14 Talupangda ang pagpadaku ni Pablo tuhoy sa pagpasakop kag pagtahod. Ginapahanumdom ang asawa nga magpasakop sa iya bana. Nahisanto ini sa kahimusan sang Dios. Ang tagsa ka buhi nga tinuga sa langit kag sa duta may ginapasakupan. Bisan gani si Jesus nagapasakop kay Jehova nga Dios. (1 Corinto 11:3) Sa pagkamatuod, ang bana nga nagapakita sang iya pagkaulo sa nagakaigo nga paagi mas mahapos nga pasakupan sang iya asawa.
15. Ano ang pila ka laygay para sa mga asawa nga masapwan sa Biblia?
15 Si Pablo nagsiling man nga ang asawa “dapat may tudok nga pagtahod sa iya bana.” Dapat ipakita sang Cristianong asawa ang “malinong kag malulo nga espiritu,” nga wala ginahangkat ang awtoridad sang iya bana ukon wala nagapakita sing independiente nga panimuot. (1 Pedro 3:4) Ang diosnon nga asawa nagapangabudlay sing lakas para sa kaayuhan sang iya panimalay kag nagahatag sing kadungganan sa iya ulo. (Tito 2:4, 5) Panikasugan niya nga maghambal sing maayo tuhoy sa iya bana kag busa wala nagahimo sing isa ka butang nga tunaan nga indi magtahod ang iban sa iya bana. Panikasugan man sang asawa nga magmadinalag-on ang desisyon sang iya bana.—Hulubaton 14:1.
16. Ano ang matun-an sang Cristianong mga asawa gikan sa mga halimbawa nanday Sara kag Rebeka?
16 Ang pagtigayon sing malinong kag malulo nga espiritu wala nagakahulugan nga ang Cristianong asawa indi na gid makahatag sing opinyon ukon nga ang iya panghunahuna indi importante. Ang diosnon nga mga babayi sang una, subong nanday Sara kag Rebeka, nagpautwas sang ila kabalaka sa mga butang, kag ginapakita sang rekord sang Biblia nga ginbaton ni Jehova ang ila ginhimo. (Genesis 21:8-12; 27:46–28:4) Mapautwas man sang Cristianong mga asawa ang ila balatyagon. Apang, dapat nga himuon nila ini sing mapatugsilingon, indi sa nagapakanubo nga tono sang tingog. Mahimo gid nga ini nga komunikasyon mangin labi ka kalahamut-an kag epektibo.
Ang Papel sang Panaad
17, 18. Ano ang pila ka paagi nga ang mga bana kag asawa makapamatok sa mga panikasog ni Satanas agod gub-on ang pag-asawahay?
17 Ang pag-asawahay isa ka tubtob buhi nga panaad. Busa, ang bana kag asawa dapat may hanuot gid nga handum agod magmadinalag-on ang pag-asawahay. Kon wala sing bukas nga komunikasyon, ang mga problema mahimo magdugang kag mangin serioso sa ulihi. Masami nga kon may problema gani nga mag-utwas, ang magtiayon nagauntat sa paghambalanay kag ginabangdan ini sang mga paghinakit. Ang pila ka mag-asawa nagapangita pa gani sing paagi agod matapos na ang relasyon, ayhan nagapangita sing lain nga kahagugma. Si Jesus nagpaandam: “Ang tagsatagsa nga padayon nga nagatulok sa isa ka babayi nga may kaibog sa iya nakapanghilahi na sa iya sa tagipusuon niya.”—Mateo 5:28.
18 Si apostol Pablo naglaygay sa tanan nga Cristiano, lakip na sa minyo nga mga Cristiano: “Kon mangakig kamo, indi kamo magpakasala; indi pagpatunura ang adlaw nga akig kamo, kag indi paghatagi sing duog ang Yawa.” (Efeso 4:26, 27) Ang aton panguna nga kaaway nga si Satanas, nagahimulos gid sa mga di-paghangpanay nga mahimo mag-utwas sa mga Cristiano. Indi pagtuguti nga magmadinalag-on sia! Kon mag-utwas ang mga problema, manalawsaw kon ano ang ginasiling sang Biblia tuhoy sa pagtamod ni Jehova sa mga butang nga ginagamit ang pasad sa Biblia nga mga publikasyon. Hambali ang mga di-paghangpanay sing kalma kag bunayag. Ipahisanto ang imo nahibaluan tuhoy sa mga talaksan ni Jehova kag ang imo ginabuhat agod maaplikar ini. (Santiago 1:22-25) Kon tuhoy sa inyo pag-asawahay, mangin determinado nga magpadayon sa paglakat kaupod sa Dios subong mag-asawa, kag indi pagtuguti ang bisan sin-o ukon ang bisan ano nga bulagon ang iya gintingob!—Miqueas 6:8.
[Mga nota]
^ par. 3 Tan-awa ang kahon nga “Diborsio kag Pagbulagay” sa Pebrero 8, 2002, nga Magmata! pahina 10, nga ginbalhag sang mga Saksi ni Jehova.
^ par. 9 Tan-awa Ang Lalantawan, Mayo 15, 1989, pahina 12.
^ par. 11 Agod makalipikar para sa mga pribilehiyo sa Cristianong kongregasyon, ang isa ka lalaki dapat wala “nagapanakit”—buot silingon, isa nga nagasakit sa iban sa pisikal ukon nagadaugdaug sa ila paagi sa masakit nga hambal. Busa, ang Septiembre 1, 1990, nga gua sang Ang Lalantawan nagsiling sa pahina 25: “Ang isa ka lalaki indi kalipikado kon nagagawi sia sing diosnon sa iban nga duog apang mapintas sia sa iya puluy-an.”—1 Timoteo 3:2-5, 12.
Madumduman Mo Bala?
• Ngaa bisan ang Cristianong pag-asawahay makaeksperiensia sing mga problema?
• Paano maatipan sang bana ang kinahanglanon sang iya asawa kag mapakita nga ginapalangga niya ang iya asawa?
• Ano ang mahimo sang asawa agod ipakita nga tudok nga ginatahod niya ang iya bana?
• Paano mapabakod sang bana kag asawa ang ila panaad sa isa kag isa?
[Mga Pamangkot sa Pagtinuon]
[Piktyur sa pahina 20]
Dapat atipanon sang bana ang iya asawa, indi lamang sa materyal kundi sa espirituwal man
[Piktyur sa pahina 21]
Ang lalaki nga nagapalangga sa iya asawa nagahatag gid sing kaumpawan sa iya
[Piktyur sa pahina 23]
Ginapautwas sang Cristianong mga asawa ang ila balatyagon sa matinahuron nga paagi
