Importante nga mga Leksion Para sa Kabataan

NAGATRABAHO si Gladys sa isa ka eskwelahan sa Mendoza, Argentina. Isa ka adlaw nalabayan niya ang isa ka hulot-klasehan kag natalupangdan niya nga ginabasahan sang isa ka manunudlo ang iya ikap-at nga grado nga mga estudyante sang Ang Akon Libro Sang mga Sugilanon sa Biblia. * Nagpakilala si Gladys sa manunudlo nga sia isa ka Saksi ni Jehova kag ginpakita kon paano gamiton sing maayo ang libro. Tungod nagdayaw sa ginpaathag ni Gladys sa iya, luyag sang manunudlo nga regular nga gamiton ang libro sa klase. Apang, kinahanglan nga maglisensia anay sia sa nagadumala sang eskwelahan. Daku gid ang iya kalipay sang gintugutan sia.

Sang ulihi, sa isa ka programa sang eskwelahan sa Adlaw Sang mga Libro, gintangdo sang manunudlo ang iya mga estudyante nga basahon sing mabaskog ang isa ka kapitulo sang libro sa atubangan sang ila mga kabutho. Tungod nangin maayo ang resulta sining programa, gin-agda nga mangin dinapit ang manunudlo sa isa ka programa sa telebisyon sa ila lugar. Sang ginhinambitan ang pamatasan sang kabataan sa eskwelahan, ang nagadumala sa programa nagpamangkot sa iya, “Ano ang ginahimo mo agod magbuot ang imo mga estudyante?” Ginsiling sang manunudlo nga ginagamit niya ang isa ka libro nga may tig-ulo nga Ang Akon Libro Sang mga Sugilanon sa Biblia. Ginpaathag niya nga bisan wala sia nagatudlo sing relihion sa iya klase, paagi sa sini nga libro ginapatudok niya ang maayo nga mga pamatasan subong sang pagtahod, pagkamapasensiahon, paghiusa, pagbuligay, pagkamatinumanon, kag gugma. Nag-ugyon ang tanan nga importante ini nga mga leksion nga dapat matun-an sang kabataan.

Luyag mo bala ipatudok ining mga pamatasan sa imo kabataan? Makapangabay ka sing kopya sining matahom nga publikasyon nga natig-uluhan Ang Akon Libro Sang mga Sugilanon sa Biblia sa isa sa mga Saksi ni Jehova.

[Footnote]