O Jehova, “Tilawi Ako”

“ANG GINOO nagatilaw sang mga tagiposoon.” (Hulubaton 17:3) Makapalig-on gid ini para sa aton tanan. Ngaa? Bangod indi kaangay sa mga tawo, nga nagahukom pasad sa ila makita, ang aton langitnon nga Amay “nagatolok sa tagiposoon.”—1 Samuel 16:7.

Sa pagkamatuod, indi naton masaligan bisan ang aton kaugalingon sa pag-usisa sang aton matuodtuod nga mga motibo kag mga handum. Ngaa? Bangod ang aton “tagiposoon malimbongon labaw sa tanan nga butang, kag lakas gid kadunut; sin-o ang makahibalo sini?” Nahibaluan gid ini sang Dios kay nagsiling sia: “Ako nga GINOO nagausisa sang [“mga batubato,” NW] kag nagatilaw sang tagiposoon.” (Jeremias 17:9, 10) Huo, mahantop ni Jehova ang aton “tagiposoon,” lakip ang aton matuodtuod nga mga motibo kag ang aton “mga batubato,” nga amo ang aton pinakamadalom nga panghunahuna kag mga balatyagon.

Ngaa Ginatilawan?

Indi katingalahan kon ngaa nagsiling si Hari David tuhoy sa Dios: “Usisaa ako, O GINOO, kag tilawi ako; tilawi ang akon tagiposoon kag ang akon hunahuna.” (Salmo 26:2) Wala bala sing sayop si David sa iya mga pulong kag mga buhat amo nga wala sia nahadlok nga tilawan ni Jehova? Kaangay naton, si David indi man himpit kag indi niya masunod sing bug-os ang mga talaksan sang Dios. Bangod sang iya mga kaluyahon, nakakomiter sia sing pila ka mabug-at nga sala, apang walay sapayan sini, ginsunod niya ang Dios nga may “kalubus sang tagiposoon.” (1 Hari 9:4) Paano? Paagi sa pagbaton sing pagsabdong kag pagtadlong. Sa sini nga paagi napakita niya nga matuod gid ang iya gugma kay Jehova kag bug-os gid ang iya debosyon sa Dios.

Kamusta naman kita karon? Nahibaluan ni Jehova nga di-himpit kita kag mahimo kita makasala sa pulong kag buhat. Apang, wala niya gintalana kon ano ang aton madangatan paagi sa paggamit sang iya ikasarang sa paghibalo sa palaabuton. Gintuga niya kita nga may kahilwayan sa pagpili sa husto kag sayop, kag ginatahod niya ini nga kahilwayan, kay ini nga kahilwayan isa ka maayo nga dulot gikan sa Iya.

Walay sapayan sini, kon kaisa mahimo nga tilawan ni Jehova ang aton nasulod nga pagkatawo, lakip ang aton mga motibo. Ginahimo niya ini agod mahatagan kita sing kahigayunan nga mapadayag ang kahimtangan sang aton tagipusuon. Ginatugutan man niya ang nanuhaytuhay nga kahimtangan ukon kabudlayan agod mapadayag ang aton matuodtuod nga mga handum. Nagahatag ini sa aton sing kahigayunan agod mapakita ang aton pagkamainunungon kag katutom kay Jehova. Ang mga pagtilaw nga ginatugutan ni Jehova mahimo magapadayag kon ano ang kalidad sang aton pagtuo, kon bala ‘himpit kita kag bug-os nga walay kakulangan.’—Santiago 1:2-4.

Gintilawan ang Isa ka Patriarka

Ang pagtilaw sa pagtuo kag mga motibo indi na bag-o sa mga alagad ni Jehova. Binagbinaga ang patriarka nga si Abraham. “Ang Dios nagtilaw kay Abraham.” (Genesis 22:1) Sang ginpamulong ini nga mga tinaga, ang pagtuo ni Abraham sa Dios natilawan na. Mga pila ka tuig antes sini, ginpangabay ni Jehova si Abraham nga magbiya sa matin-ad nga siudad sang Ur kag manlugayaw sa isa ka duog nga wala pa niya makadtuan. (Genesis 11:31; Binuhatan 7:2-4) Si Abraham, nga mahimo nagapanag-iya sing balay sa Ur, wala nagbakal sing permanente nga puluy-an sa Canaan, nga iya ginpuy-an sing mga 100 ka tuig. (Hebreo 11:9) Bangod sang pagpanglugayaw ni Abraham, nabutang sia kag ang iya pamilya sa katalagman, subong sang gutom, armado  nga mga guban, kag sa pagano nga mga gumalahom sa duog nga ila ginkadtuan. Bisan pa sa sini, napamatud-an nga mapag-on gid ang pagtuo ni Abraham.

Nian ginhatagan ni Jehova si Abraham sing isa ka mas mabudlay nga pagtilaw. “Kuhaa ang imo anak, ang imo bugtong nga anak si Isaac, nga ginahigugma mo kag . . . ihalad mo sia . . . subong nga halad-nga-sinonog.” (Genesis 22:2) Para kay Abraham, si Isaac indi lamang isa ka ordinaryo nga anak. Bugtong sia nga bata nanday Abraham kag Sara. Si Isaac amo ang anak nga ginsaad sa iya, ang lamang nga paglaum ni Abraham agod ang iya “binhi” makapanubli sang duta sang Canaan. Kag paagi lamang sa sini nga “binhi” nga pakamaayuhon ang madamo nga tawo, suno sa saad sang Dios. Kay man, si Isaac amo ang anak nga ginpaabot ni Abraham kag nabun-ag bangod sa milagro sang Dios!—Genesis 15:2-4, 7.

Hunahunaa kon daw ano kabudlay para kay Abraham nga hangpon ini nga sugo. Ginakinahanglan gid bala ni Jehova ang isa ka halad nga tawo? Ngaa ginlipay pa ni Jehova si Abraham paagi sa paghatag sa iya sing anak sa tion nga nagahinunod na ang iya kabuhi, kag sang ulihi pangabayon nga ihalad ang amo nga bata? *

Bisan pa wala mahangpan ni Abraham ini nga sugo, gilayon nga gintuman niya ini. Tatlo ka adlaw sia nga naglakbay pakadto sa ginsiling nga bukid. Pag-abot didto naghimo sia sing isa ka altar kag gintungtungan niya ini sing mga inuggatong. Yara na sia sa pinakamabudlay nga bahin sang pagtilaw. Ginauyatan na ni Abraham ang inugdodo nga kutsilyo, apang sang nagahana na sia nga patyon ang iya anak, ginpunggan sia ni Jehova paagi sa isa ka anghel kag nagsiling: “Karon nakilala ko nga ikaw nagakahadluk sa Dios, sa ginatan-aw nga wala mo pag-idumili sa akon ang imo anak nga bugtong.” (Genesis 22:3, 11, 12) Hunahunaa lamang kon daw ano ka daku nga paumpaw kay Abraham sang mabatian niya ini nga mga pinamulong! Husto gid ang pagbanta ni Jehova sa iya pagtuo. (Genesis 15:5, 6) Sa tapos sini, ginhalad ni Abraham ang isa ka laki nga karnero kabaylo ni Isaac. Nian ginpalig-on ni Jehova ang iya saad nga katipan tuhoy sa binhi ni Abraham. Bangod sini nakilal-an si Abraham nga  abyan ni Jehova.—Genesis 22:13-18; Santiago 2:21-23.

Ginatilawan Man ang Aton Pagtuo

Nahibaluan naton nga indi hilway sa mga pagtilaw ang mga alagad sang Dios karon. Apang, sa aton bahin, ang daku nga pagtilaw amo ang pagbatas sa ginatugutan ni Jehova nga pagtilaw, indi ang pagtuman sa iya ginapahimo.

Nagsulat si apostol Pablo: “Ang tanan nga buut magkabuhi sing diosnon kay Cristo Jesus magaantus sing paghingabut.” (2 Timoteo 3:12) Ini nga mga paghingabot mahimo nga magagikan sa aton mga kabutho, mga abyan, mga paryente, mga kaingod, ukon sa mga opisyal sang gobierno nga nakabaton sing sayop nga impormasyon tuhoy sa aton. Mahimo ini magadalahig sang pagpakalain kag pagsakit sa mga Cristiano kag pagpasilabot sa ila palangabuhian. Ang matuod nga Cristiano mahimo man makaeksperiensia sing mga problema nga kinaandan sa mga tawo, subong sang balatian, pagluya sing buot, kag inhustisya. Ini tanan nagatilaw sa pagtuo sang isa ka tawo.

Ginpatalupangod ni apostol Pedro ang positibo nga bahin sang isa ka natilawan nga pagtuo: “Kinahanglan mag-antus kamo sang mga sarisari nga pagtilaw, agud nga ang pagkaulay sang inyo pagtoo, nga hamili pa sa bulawan nga bisan nagakawala ginatilawan ini sa kalayo, masapwan nga sa kadayawan kag himaya kag kadungganan sa pagpahayag ni Jesu-Cristo.” (1 Pedro 1:6, 7) Huo ang epekto sang pagtilaw mapaanggid sa pag-ulay sang bulawan sa kalayo. Ginapadayag sini nga pag-ulay ang puro nga bulawan kag ginakakas ang mga indi bulawan. Amo man sini ang matabo sa aton pagtuo kon makaeksperiensia sing mga pagtilaw.

Halimbawa, mahimo nga mamigado kita bangod sang isa ka aksidente ukon kinaugali nga kalamidad. Apang, yadtong may matuod nga pagtuo wala nagapadala sa tuman nga kabalaka. Makasapo sila sing paumpaw sa pasalig ni Jehova: “Indi ko ikaw nga mas-a pagpalugaw-an ukon pagpatumbayaan.” (Hebreo 13:5) Ginapadayon gihapon nila ang ila pag-alagad, nga nagasalig nga pakamaayuhon ni Jehova nga Dios ang ila mga panikasog agod matigayon ang ila mga ginakinahanglan. Bisan pa sa sini nga mga kabudlayan, ginasakdag sila sang ila pagtuo kag ginabuligan agod indi mangin komplikado ang ila kahimtangan bangod sang di-nagakaigo nga kabalaka.

Ang katunayan nga ginapadayag sang mga pagtilaw ang mga kaluyahon sang aton pagtuo makabulig man sa aton agod mahibaluan naton kon ano ang dapat naton bag-uhon sa aton kaugalingon. Busa, dapat pamangkuton sang isa ang iya kaugalingon: ‘Paano ko mapabakod ang akon pagtuo? Kinahanglan ko gid bala ang dugang pa nga tion sa maid-id nga pagtuon kag pagpamalandong sa Pulong sang Dios? Ginahingalitan ko bala sing bug-os ang mga aman agod makatambong sa mga pagtilipon upod sa akon mga masigkatumuluo? Kon may problema, nagasalig bala ako sa akon kaugalingon ukon ginapangamuyo ko ini kay Jehova nga Dios?’ Apang ini nga mga pamangkot panugod lamang sa pag-usisa sa aton kaugalingon.

Ang aton pagpabakod sang aton pagtuo nagakinahanglan sing pagpauswag sang aton ‘handum sa gatas nga espirituhanon nga walay simbog.’ (1 Pedro 2:2; Hebreo 5:12-14) Dapat naton tinguhaan nga mangin kaangay sang tawo nga ginlaragway sang salmista: “Ang iya kawilihan yara sa kasogoan sang GINOO, kag sa iya kasogoan nagpamalandong sia sa adlaw kag gab-i.”—Salmo 1:2.

Nagapahangop ini sang kapin pa sangsa pagbasa lamang sing Biblia. Importante nga binagbinagon naton kon ano ang ginasiling sang Pulong sang Dios sa aton kag iaplikar ang laygay sini. (Santiago 1:22-25) Subong resulta, ang aton gugma sa Dios magalambo, ang aton mga pangamuyo mangin mas espesipiko kag mas personal, kag ang aton pagtuo sa iya magabakod.

 Ang Balor sang Natilawan nga Pagtuo

Ginapahulag kita nga pabakuron ang aton pagtuo bangod nahibaluan naton nga importante gid ini agod matigayon ang kahamuot sang Dios. Ang Biblia nagpahanumdom sa aton: “Sa walay pagtoo indi mahimo ang pagpahamuut sa iya. Kay ang nagapalapit sa Dios kinahanglan magtoo nga amo sia kag nga sia manugbalus sa mga nagpangita sa iya.” (Hebreo 11:6) Busa, kinahanglan nga pareho ang aton balatyagon sa tawo nga nakitluoy kay Jesus: “Tabangi ang akon pagkadimatinoohon!”—Marcos 9:24.

Makabulig man sa iban ang pagtilaw sang aton pagtuo. Halimbawa, kon mapatyan sing hinigugma ang isa ka Cristiano, ang iya malig-on nga pagtuo sa saad sang Dios nga pagkabanhaw magapabakod sa iya. Nagalalaw sia, apang wala sia ‘nagakasubu subong sang iban nga walay paglaum.’ (1 Tesalonica 4:13, 14) Kon maobserbahan sang iban ini nga sahi sang pagtuo, mahimo nga marealisar nila nga may ginahuptan sia nga isa ka bilidhon gid nga butang. Mahimo ini magapahulag sa ila nga handumon ini nga sahi sang pagtuo kag magatiklod sa ila nga tun-an ang Pulong sang Dios kag mangin disipulo ni Jesucristo.

Nahibaluan ni Jehova nga daku ang balor sang natilawan nga pagtuo. Dugang pa, paagi sa pagtilaw sang aton pagtuo mahibaluan naton kon bala nagasakdag gid ini sa aton. Mabuligan kita sini nga mahibaluan ang kaluyahon sang aton pagtuo, sa amo malandas naton ang aton mga kaluyahon. Sa ulihi, ang madinalag-on nga paglandas sa mga pagtilaw mahimo nga magabulig sa iban nga mangin disipulo ni Jesus. Busa, kabay pa nga himuon naton ang aton bug-os nga masarangan nga huptan nga mabakod ang aton pagtuo, pagtuo nga bisan pa makaeksperiensia sing madamo nga pagtilaw “masapwan nga sa kadayawan kag himaya kag kadungganan sa pagpahayag ni Jesu-Cristo.”—1 Pedro 1:7.

[Footnote]

[Piktyur sa pahina 13]

Bangod sang mga buhat sang pagtuo ni Abraham nangin abyan sia ni Jehova

[Mga retrato sa pahina 15]

Ang mga pagtilaw magapamatuod kon bala ang aton pagtuo nagasakdag gid sa aton

[Credit Line sang retrato sa pahina 12]

Gikan sa Illustrated Edition of the Holy Scriptures, nanday Cassell, Petter, & Galpin