Si Jesucristo—Ang Pinakamaayo nga Misyonero
Si Jesucristo—Ang Pinakamaayo nga Misyonero
“Isa ako ka tiglawas gikan sa iya, kag ining Isa ang nagpadala sa akon.”—JUAN 7:29.
1, 2. Ano ang isa ka misyonero, kag sin-o ang pinakamaayo nga Misyonero?
ANO ang hunahunaon mo kon mabatian mo ang tinaga nga “misyonero”? Mahimo hunahunaon sang iban ang mga misyonero sang Cristiandad, nga ang kalabanan sa ila nagpasilabot sa hiligot-anon sa pulitika kag sa ekonomiya sang mga pungsod nga ginpadal-an sa ila. Apang, subong isa sa mga Saksi ni Jehova, ayhan ginahunahuna mo ang mga misyonero nga ginapadala sang Nagadumala nga Hubon agod magbantala sing maayong balita sa madamo nga pungsod. (Mat. 24:14) Ini nga mga misyonero nagahinguyang gid sang ila tion kag kusog para sa isa ka dungganon nga hilikuton, ang pagbulig sa mga tawo nga mangin suod kay Jehova nga Dios kag makatigayon sing hamili nga kaangtanan sa iya.—Sant. 4:8.
2 Ang mga tinaga nga “misyonero” kag “mga misyonero” indi mabasa sa mga teksto sang Bag-ong Kalibutan nga Badbad Sang Balaan nga Kasulatan. Apang, ang nota sa ubos sang Efeso 4:11 sa Reference Bible nagasiling nga ang Griegong tinaga nga ginbadbad “mga ebanghelisador” mahimo man badbaron nga “mga misyonero.” Si Jehova amo ang pinakamaayo nga Ebanghelisador, apang indi sia matawag nga misyonero kay man Labing Gamhanan sia kag wala gid sing isa nga nagpadala sa iya. Apang, tuhoy sa iya langitnon nga Amay, si Jesucristo nagsiling: “Isa ako ka tiglawas gikan sa iya, kag ining Isa ang nagpadala sa akon.” (Juan 7:29) Bilang pagpakita sang iya daku nga gugma sa katawhan, ginpadala ni Jehova ang iya bugtong nga Anak sa duta. (Juan 3:16) Si Jesus mahimo tawgon nga pinakamaayo nga Misyonero, bangod ang isa ka rason kon ngaa ginpadala sia sa duta amo ang ‘pagpanaksi sa kamatuoran.’ (Juan 18:37) Nagmadinalag-on gid sia sa pagbantala sing maayong balita sang Ginharian, kag makabenepisyo man kita karon sa iya ministeryo. Halimbawa, mahimo naton mailog ang iya pamaagi sa pagpanudlo sa aton ministeryo, misyonero man kita ukon indi.
3. Ano nga mga pamangkot ang aton binagbinagon?
3 Bangod nagbantala si Jesus sang Ginharian, mahimo mamangkot kita: Ano ang naeksperiensiahan ni Jesus sang nagministeryo sia sa duta? Ngaa epektibo ang iya pagpanudlo? Ngaa nagmadinalag-on ang iya ministeryo?
Handa sa Pagpasibu sa Bag-o nga Kahimtangan
4-6. Ano ang pila ka pagbag-o sa kahimtangan ni Jesus sang ginpadala sia sa duta?
4 Sa aton panahon, ang mga misyonero kag ang iban pa nga mga Cristiano nga nagsaylo sa mga duog nga diutay ang mga manugbantala sing Ginharian dapat magpasibu sa mga kahimtangan nga ayhan mas mabudlay sangsa ila naandan. Apang wala gid ini sa kamalingking kon ipaanggid sa naeksperiensiahan ni Jesus. Ang kahimtangan ni Jesus sang yari sia sa duta tuhay gid sangsa iya kahimtangan anay sa langit, diin kaupod niya ang iya Amay kag ang mga anghel nga nagaalagad kay Jehova nga may putli nga motibo. (Job 38:7) Daw ano gid ka tuhay ang iya kahimtangan sang nagkabuhi sia sa tunga sang makasasala nga mga tawo sa sining malaut nga kalibutan! (Mar. 7:20-23) Kinahanglan pa gani batason ni Jesus ang pagpaindisanay sang iya suod nga mga disipulo. (Luc. 20:46; 22:24) Siempre pa, himpit nga nalandas ni Jesus ang tanan nga kabudlayan nga naeksperiensiahan niya diri sa duta.
5 Indi milagruso ang pagkahibalo ni Jesus sang lenguahe sang tawo kundi natun-an niya ini sugod sa pagkalapsag. Daku gid ini nga pagbag-o sa kahimtangan sang isa nga nagamando anay sa mga anghel sa langit! Sang si Jesus nagkabuhi sa duta, mahimo nga nagpamulong sia sing isa sa mga “lengguahe sang mga tawo.” Tuhay gid ini sa ‘lengguahe sang mga anghel.’ (1 Cor. 13:1, Biblia Sang Katilingban Sang mga Kristiano) Apang, kon maayo nga mga pulong ang pagahambalan, wala gid sing tawo nga nakapamulong kaangay ni Jesus.—Luc. 4:22.
6 Binagbinaga man ang iban pa nga dalagku nga mga pagbag-o sa kabuhi sang Anak sang Dios sang nagkari sia sa duta. Bisan pa wala makapanubli si Jesus sang sala ni Adan, nangin tawo sia, kaangay sang iya mangin “mga kauturan” sa ulihi, ukon hinaplas nga mga sumulunod. (Basaha ang Hebreo 2:17, 18.) Sang katapusan nga gab-i sang iya dutan-on nga kabuhi, wala nagpangabay si Jesus sa iya Amay nga magpadala sing “kapin sa napulog-duha ka lehiyon sang mga anghel.” Apang hunahunaa lamang nga sia anay si Miguel Arkanghel nga nagamando sa madamo nga mga anghel! (Mat. 26:53; Jud. 9) Huo, naghimo si Jesus sing mga milagro; apang, tuman gid ka diutay ang tanan nga ginhimo niya sang yari sia sa duta kon ipaanggid sa iya mahimo kuntani kon didto sia sa langit.
7. Paano nanghikot ang mga Judiyo may labot sa Kasuguan?
7 Subong “ang Pulong” antes mangin tawo, mahimo nga si Jesus amo ang Humalambal sang Dios nga nagtuytoy sa mga Israelinhon sa kahanayakan. (Juan 1:1; Ex. 23:20-23) Apang, ang mga Israelinhon “nagbaton sang Kasuguan nga ginpaalinton sang mga anghel apang wala magtuman sini.” (Binu. 7:53; Heb. 2:2, 3) Ang matuod, ang Judiyo nga mga lider sang relihion sang una nga siglo wala makahangop sang katuyuan sang Kasuguan. Halimbawa, binagbinaga ang kasuguan tuhoy sa Adlaw nga Inugpahuway. (Basaha ang Marcos 3:4-6.) Ang mga escriba kag mga Fariseo nagpatumbaya sa “mas importante nga mga bahin sang Kasuguan, nga amo ang katarungan kag kaluoy kag katutom.” (Mat. 23:23) Walay sapayan sini, wala naghinakop si Jesus nga indi na sila magbag-o kag indi na sila dapat pagbantalaan pa sang kamatuoran.
8. Ngaa mabuligan gid kita ni Jesus?
8 Handa magbulig si Jesus. Ginpahulag sia sang iya gugma sa mga tawo kag luyag gid niya nga buligan sila. Wala gid nag-ugdaw ang iya kakugi sa pagbantala. Kag bangod matutom sia kay Jehova sang diri sia sa duta, si Jesus ‘nangin kabangdanan sang wala katapusan nga kaluwasan sang tanan nga nagatuman sa iya.’ Dugang pa, “bangod sia mismo nag-antos sang gintilawan sia, makasarang sia sa pagbulig sa mga ginatilawan” kaangay sa aton.—Heb. 2:18; 5:8, 9.
Lantip nga Ginhanas Subong Manunudlo
9, 10. Ano nga paghanas ang nabaton ni Jesus antes sia ginpadala sa duta?
9 Antes ipadala ang mga Cristiano karon subong mga misyonero, nagahimo anay sing kahimusan ang Nagadumala nga Hubon nga hanason sila. Ginhanas man bala si Jesus? Huo, apang wala sia nakaeskwela sa rabiniko nga mga eskwelahan antes sia ginhaplas subong Mesias; wala man sia gintudluan sa tiilan sang pila ka prominente nga mga lider sang relihion. (Juan 7:15; ipaanggid ang Binuhatan 22:3.) Kon amo, ngaa nangin lantip nga manunudlo si Jesus?
10 Magluwas nga gintudluan sia sang iya iloy kag sang iya tiyo nga si Jose, ang pinakamaayo nga paghanas nga iya nabaton sa pagministeryo naggikan kay Jehova mismo. Tuhoy sini, si Jesus nagsiling: “Wala ako naghambal gikan sa akon lamang kaugalingon, kundi ang Amay nga nagpadala sa akon nagsugo sa akon kon ano ang isiling kag kon ano ang ihambal.” (Juan 12:49) Talupangda nga ang Anak ginhatagan sing espesipiko nga instruksion kon ano ang iya itudlo. Antes sia magkari sa duta, pat-od nga naghinguyang gid sia sing madamong tion sa pagpamati sa ginatudlo sang iya Amay. May mas maayo pa bala sa sini nga paghanas?
11. Tubtob sa anong kasangkaron ginpadayag ni Jesus ang pagtamod sang iya Amay sa mga tawo?
11 Sugod sang gintuga ang Anak, suod gid sia sa iya Amay. Antes sia nangin tawo, natun-an ni Jesus ang pagtamod sang Dios sa mga tawo bangod nakita niya ang pagpakig-angot ni Jehova sa ila. Ang gugma sang Dios sa mga tawo nailog sang Anak, amo nga subong ginpersonipikar nga kaalam, makasiling sia: “Ang akon kalipay yara kaupud sa mga anak sang mga tawo.”—Hulu. 8:22, 31.
12, 13. (a) Ano ang natun-an ni Jesus sang ginpanilagan niya ang pagpakig-angot sang iya Amay sa mga Israelinhon? (b) Paano gingamit ni Jesus ang paghanas nga iya nabaton?
12 Lakip sa paghanas nga nabaton sang anak amo ang pagpanilag sa ginhimo sang iya Amay sa komplikado nga mga kahimtangan. Halimbawa, binagbinaga ang ginhimo ni Jehova sa batinggilan nga mga Israelinhon. Ang Nehemias 9:28 nagsiling: “Sang nakapahuway sila naghimo sila liwat sing malaut sa atubangan mo, busa ginbayaan mo sila sa kamut sang ila kaaway, sa bagay nga naggahum sila sa ila; apang sang nagbalik sila kag nagtu-aw sa imo nagpamati ka kutub sa langit, kag sa madamu nga tion ginluwas mo sila sono sa imo mga kalooy.” Bangod nakaupod kag napanilagan niya ang ginhimo ni Jehova, napakita man ni Jesus ang kaanggid nga kaluoy sa mga tawo sa iya teritoryo.—Juan 5:19.
13 Gingamit ni Jesus ang iya natun-an samtang nagapakig-angot sia sing maluluy-on sa iya mga disipulo. Sang gab-i antes sang iya kamatayon, ang tanan nga apostoles nga iya ginhigugma “nagbiya sa iya kag nagpalagyo.” (Mat. 26:56; Juan 13:1) Tatlo ka beses pa gani nga ginpanghiwala ni apostol Pedro si Cristo! Walay sapayan sini, ginhatagan pa sang tsansa ni Jesus ang iya mga apostoles nga makapanumbalik sa iya. Ginsilingan niya si Pedro: “Nagpangamuyo ako para sa imo agod indi madula ang imo pagtuo; kag kon makapanumbalik ka na, pabakura ang imo mga kauturan.” (Luc. 22:32) Ang espirituwal nga Israel ginpasad sa “mga apostoles kag mga manalagna,” kag ang sadsaran nga mga bato sang pader sang Bag-ong Jerusalem may ngalan sang 12 ka matutom nga mga apostoles sang Kordero nga si Jesucristo. Sa karon, ang hinaplas nga mga Cristiano kag ang ila mga kaupdanan, ang “iban nga mga karnero,” nagauswag subong organisasyon nga nagabantala sang Ginharian sa idalom sang gamhanan nga kamot sang Dios kag sa pagpanguna sang iya pinalangga nga Anak.—Efe. 2:20; Juan 10:16; Bug. 21:14.
Kon Paano Nagpanudlo si Jesus
14, 15. Ngaa tuhay gid ang pagpanudlo ni Jesus sangsa mga escriba kag mga Fariseo?
14 Paano gingamit ni Jesus ang iya nabaton nga paghanas sa pagtudlo sa iya mga sumulunod? Mas superyor ang paagi sang pagpanudlo ni Jesus sangsa pagpanudlo sang mga lider sang relihion sang mga Judiyo. Ang mga escriba kag mga Fariseo ‘nagpakawala sing pulos sa pulong sang Dios bangod sang ila tradisyon.’ Sa kabaliskaran, wala nagpamulong si Jesus gikan sa iya lamang kaugalingon; kundi gikan sa pulong ukon mensahe sang Dios. (Mat. 15:6; Juan 14:10) Amo man sini ang dapat naton himuon.
15 May isa pa ka rason kon ngaa tuhay gid si Jesus sa mga lider sang relihion. Tuhoy sa mga escriba kag mga Fariseo, sia nagsiling: “Ang tanan nga butang nga ginahambal nila sa inyo, buhata kag tumana, apang indi pagbuhata ang ila ginahimo, kay nagahambal sila apang wala nagabuhat.” (Mat. 23:3) Gin-aplikar ni Jesus ang iya gintudlo. Binagbinagon naton ang isa ka halimbawa nga nagapamatuod sa sini.
16. Ngaa masiling naton nga ginsunod gid ni Jesus ang iya ginsiling sa Mateo 6:19-21?
16 Ginlaygayan ni Jesus ang iya mga disipulo nga ‘magtipon sang mga bahandi sa langit.’ (Basaha ang Mateo 6:19-21.) Ginsunod man bala ni Jesus ini nga laygay? Huo, kay sa iya mismo pagkabuhi masiling gid niya: “Ang talunon nga mga ido may mga lungib kag ang mga pispis sa langit may mga hulunan, apang ang Anak sang tawo wala gid sing maunlan sang iya ulo.” (Luc. 9:58) Simple ang pagkabuhi ni Jesus. Masako gid sia sa pagbantala sing maayong balita sang Ginharian, kag ginpakita gid niya kon ano ang kabuhi sang tawo nga hilway sa kabalaka sang pagtipon sing bahandi sa duta. Ginpakita ni Jesus nga mas maayo gid nga magtipon sing bahandi sa langit, “diin wala sing sipit kag tuktok nga mang-ut-ot, kag diin wala sing mga kawatan nga mangrungkab kag mangawat.” Ginasunod mo bala ang laygay ni Jesus nga magtipon sing bahandi sa langit?
Mga Kinaiya ni Jesus nga Nagpasuod sa Iya sa mga Tawo
17. Ano nga mga kinaiya ang nakabulig agod mangin tumalagsahon nga ebanghelisador si Jesus?
17 Ano nga mga kinaiya ang nakabulig agod mangin tumalagsahon nga ebanghelisador si Jesus? Ang isa amo ang iya pagtamod sa mga tawo nga iya ginabuligan. Lakip sa mga kinaiya ni Jehova nga nailog ni Jesus amo ang pagkamapainubuson, gugma, kag kaawa. Talupangda kon paano ining mga kinaiya nagpasuod kay Jesus sa mga tawo.
18. Ngaa masiling naton nga mapainubuson si Jesus?
18 Bangod nagpasugot sia nga ipadala sa duta, “gin-uba niya [ang iya] dagway kag nagsuklob sang dagway sang ulipon kag nangin kaanggid sa mga tawo.” (Fil. 2:7) Isa gid ini ka pagpaubos. Dugang pa, wala ginpakanubo ni Jesus ang mga tawo. Wala sa iya ang panimuot nga: ‘Halin ako sa langit, gani dapat kamo mamati sa akon.’ Indi kaangay sang nagapangangkon nga mga mesias, wala ginpahambog ni Jesus nga sia amo ang matuod nga Mesias. Kon kaisa ginatugunan niya ang mga tawo nga indi nila pag-isugid sa iban kon sin-o sia kag kon ano ang iya ginhimo. (Mat. 12:15-21) Amo sini ang ginhimo ni Jesus bangod luyag niya nga magdesisyon ang mga tawo nga sundon sia pasad sa ila mismo nakita sa iya. Daw ano nga pagpakamaayo sa iya mga disipulo nga ang ila Ginuo wala nagapaabot nga mangin himpit sila kaangay sang mga anghel nga kaupod niya anay sa langit!
19, 20. Paano ang gugma kag kaluoy nagpahulag kay Jesus nga buligan ang mga tawo?
19 Ginpakita man ni Jesus ang gugma, ang nagapangibabaw nga kinaiya sang iya langitnon nga Amay. (1 Juan 4:8) Gugma ang nagpahulag kon ngaa gintudluan niya ang mga tawo. Halimbawa, binagbinaga ang ginbatyag niya sa isa ka pamatan-on nga manugdumala. (Basaha ang Marcos 10:17-22.) Si Jesus “nagbatyag sang gugma sa iya” kag luyag niya nga buligan sia, apang indi luyag sang pamatan-on nga manugdumala nga isakripisyo ang iya madamo nga pagkabutang agod mangin sumulunod ni Cristo.
20 Ang isa pa ka makagalanyat nga kinaiya ni Jesus amo ang iya pagkamaluluy-on. Bangod sa pagkadi-himpit, bisan yadtong mga nagaaplikar sang iya panudlo may mga problema gihapon kaangay sang iban nga mga tawo. Bangod nahangpan niya ini, gintudluan sila ni Jesus sing mainawaon kag sing maluluy-on. Bilang halimbawa: Isa ka bes, tuman gid kasako si Jesus kag ang iya mga apostoles amo nga wala na sila sing tion bisan sa pagkaon. Apang, ano ang reaksion ni Jesus sang nakita niya ang dakung kadam-an nga nagtipon? “Napahulag sia sang kaluoy sa ila, bangod subong sila sang mga karnero nga wala sing manugbantay. Kag nagpanudlo sia sa ila sang madamo nga butang.” (Mar. 6:34) Nakita ni Jesus ang makaluluoy nga kahimtangan sang mga tawo sa iya teritoryo kag gingamit niya ang iya kusog agod tudluan sila kag naghimo sing mga milagro agod mabuligan sila. Madamo ang nabuyok sa iya maayo nga mga kinaiya, napahulag sa iya ginsiling, kag nangin mga disipulo niya.
21. Ano ang aton binagbinagon sa masunod nga artikulo?
21 Madamo pa kita sing matun-an tuhoy sa ministeryo ni Jesus sa duta, subong sang ipakita sang masunod nga artikulo. Sa ano pa nga mga paagi mailog naton si Jesucristo, ang pinakamaayo nga Misyonero?
Ano ang Imo Sabat?
• Ano nga paghanas ang nabaton ni Jesus antes sia nagkari sa duta?
• Ngaa ang pamaagi sang pagpanudlo ni Jesus mas superyor sangsa pamaagi sang mga escriba kag mga Fariseo?
• Ano nga mga kinaiya ni Jesus ang nagpasuod sa iya sa mga tawo?
[Mga Pamangkot sa Pagtinuon]
[Piktyur sa pahina 15]
Paano gintudluan ni Jesus ang kadam-an?
