Isa ka Importante Gid nga Pagpakigkita

MAY isa ako ka importante gid nga pangako nga makigkita. Isa ako ka bataon nga Katsila nga iloy, kag tuguti ako nga ipaathag kon ngaa naghimo ako sina nga pangako.

Wala gid sing paghidait kag paghiusa sa puluy-an sang akon mga ginikanan. Nasubuan gid ang amon pamilya sang mapatay ang akon manghod nga lalaki bangod sa aksidente sang apat sia ka tuig. Dugang pa, wala gid sing kalipay ang akon iloy sa ila pag-asawahay bangod sang malain nga bisyo sang akon amay. Apang, ina nga kabudlayan wala nag-upang sa akon iloy sa pagpatudok sang maayong paggawi sa akon magulang nga lalaki kag sa akon.

Pagligad sang tion, nagpangasawa ang akon magulang kag nagpamana man ako. Wala madugay, nabal-an nga may kanser ang akon iloy, nga ginbangdan sang iya kamatayon. Apang, antes sia mapatay, nagbilin sia sing bahandi sa amon.

Ang isa sang iya mga abyan, nagsugid sa iya sing Makasulatanhon nga paglaum sang pagkabanhaw, kag ginbaton sang akon iloy ang tanyag nga magtuon sa Biblia. Antes sia napatay, ang mensahe sang paglaum sa Biblia naghatag sing kalipay kag kahulugan sa iya kabuhi.

Sang nakita namon ang maayo nga epekto sang mensahe sang Biblia sa iya, nagtuon man kami nga mag-utod sa Pulong sang Dios. Ginbawtismuhan ako subong isa sang mga Saksi ni Jehova isa ka bulan antes mabun-ag ang akon ikaduha nga anak, isa ka matahom nga lapsag nga ginhingalanan namon Lucía.

Importante gid para sa akon ang adlaw sang akon bawtismo. Isa ka rason bangod iya na ako karon ni Jehova, kay gindedikar ko na ang akon kabuhi sa iya agod alagaron sia sing walay katapusan. Isa pa ka rason amo nga mapaambit ko na ang akon pagtuo sa akon palangga nga anak nga lalaki kag babayi.

Ang akon kalipay nga ipaambit sa akon anak ang akon pagtuo naupangan sa gilayon. Sang apat ka tuig si Lucía, nagbatyag sia sing tuman nga kasakit sa iya tiyan. Pagkatapos sang pila ka pag-eksamin, nagsiling ang doktor nga gintubuan ang iya atay sing tumor nga pareho kadaku sa kahil. Ginpaathag sang doktor nga si Lucía may neuroblastoma, isa ka makamamatay gid nga tumor. Nian nag-umpisa ang pito ka tuig nga pagpakig-away ni Lucía sa kanser, nga nagalakip sing malawig nga pagtener sa ospital.

Ang Masinakripisyuhon nga Panimuot

Sa tion sining mabudlay nga mga tinuig, ginpabakod ako ni Lucía sang iya mga hakos kag mga halok. Ang iya kalmado nga pag-atubang sa balatian, may positibo man nga epekto sa mga empleyado sa ospital. Luyag niya pirme magbulig sa mga nars sa pagdul-ong sang yogurt, juice, kag iban pa nga mga butang sa mga bata nga malapit lang sa iya hulot. Ginhatagan sia sang mga nars sing puti nga uniporme kag badge nga nagapakilala sa iya nga “kabulig sang nars.”

“Natandog gid ni Lucía ang akon tagipusuon,” siling sang isa ka empleyado sa ospital. “Mapagsik sia, madamo sing nahibaluan, kag nanamian magdrowing. Palaistorya sia kag hamtong, hamtong gid maggawi.”

Nakatigayon si Lucía sing kusog kag kabakod gikan sa Pulong sang Dios. (Heb. 4:12) Nagsalig sia nga sa bag-ong kalibutan, “wala na sing kamatayon, ukon paglalaw ukon paghibi ukon kasakit pa,” subong sang ginasaad sang Biblia. (Bug. 21:4) Interesado gid sia sa iban nga mga tawo amo nga gingamit niya ang tagsa ka higayon nga mapaambit ang mensahe sang Biblia. Ang malig-on nga paglaum ni Lucía sa pagkabanhaw nakabulig sa iya nga mangin kalmado kag masinadyahon bisan pa diutay lang gid ang tsansa nga mag-ayo ang iya balatian. (Isa. 25:8) Ginhuptan niya ina nga panimuot tubtob sang adlaw nga napatay sia sa kanser.

 Sa sina nga adlaw, ginhimo ko ang isa ka importante gid nga pangako nga makigkita. Halos indi na mamuklat ni Lucía ang iya mga mata. Gin-uyatan sang iya amay ang isa niya ka kamot kag ako naman sa isa. “Indi ka magkabalaka, indi ko ikaw pagbiyaan,” hutik ko. “Ginhawa lang sing hinayhinay. Kon magbugtaw ka sa pagkabanhaw, mapagros ka na. Indi ka na mag-antos pa sing kasakit, kag makitaay kita liwat.”

Gani dapat ko tumanon ina nga pangako. Nahibaluan ko nga ang paghulat sa iya pagkabanhaw indi mahapos. Apang nahibaluan ko man nga kon mapailubon ako nga nagasalig kay Jehova kag huptan ang akon integridad, magakitaay kami kon magbalik na sia sa pagkabanhaw.

Ang Ginbilin ni Lucía

Ang maisog nga halimbawa ni Lucía kag ang dalayawon nga pagsakdag sang kongregasyon, nagtandog gid sa akon bana nga indi Saksi. Sang adlaw nga napatay si Lucía, nagsiling ang akon bana nga binagbinagon niya liwat ang iya ginatuuhan. Pila ka semana sang ulihi, ginpangabay niya ang isa ka gulang sa kongregasyon nga tun-an sia sa Biblia. Wala madugay nagatambong na ang akon bana sa tanan nga miting. Sa bulig ni Jehova nag-untat sia sa pagpanigarilyo, butang nga indi gid niya anay mahimo.

Ang akon kasubo bangod sang kamatayon ni Lucía wala pa nadula sing bug-os, apang daku gid ang akon pasalamat kay Jehova tungod sa ginbilin ni Lucía. Nagalugpayanay kami sang akon bana sa matahom nga paglaum sang pagkabanhaw. Ginahanduraw namon ang tion nga makita liwat si Lucía, ang iya matahom kag matipulon nga mga mata kag ang yupok sa iya guya nga nagagua kon magyuhum sia.

Ang makapasubo nga eksperiensia sang akon anak nakatandog gid sa isa ka kasilingan. Isa ka Sabado sang aga, nagaulan-ulan sadto sang nagduaw sa amon puluy-an ang isa ka ginang nga ang iya anak kabutho ni Lucía. Napatay ang isa niya ka anak nga lalaki nga onse anyos sa amo man nga balatian. Sang nahibaluan sang ginang ang natabo kay Lucía, ginpangita niya ang amon balay agod duawon kami. Luyag niya mahibaluan kon paano ko naatubang ang kamatayon ni Lucía kag nagpanugda nga magtukod kami sing grupo agod lugpayan ang iban nga mga iloy nga yara man sa kaanggid nga kahimtangan.

Ginpaathag ko nga nakatigayon ako sing matuod nga lugpay sa isa sang mga saad sang Biblia, isa nga labaw gid sa bisan ano nga mahatag sang tawo. Nakibot gid sia sang ginbasa ko sa iya ang pinamulong ni Jesus nga narekord sa Juan 5:28, 29. Ginbaton niya ang isa ka pagtuon sa Biblia kag gilayon nabatyagan niya “ang paghidait sang Dios nga nagalabaw sa tanan nga panghunahuna.” (Fil. 4:7) Sa masami kon nagatuon kami sa Biblia, nagadulog kami kag ginahanduraw ang amon kaugalingon sa bag-ong kalibutan nga nagaabiabi sa amon mga hinigugma nga ginbanhaw.

Huo, ang malip-ot nga kabuhi ni Lucía nagbilin sing dayon nga palanublion. Ang iya pagtuo nagpahiusa sang amon pamilya sa pag-alagad sa Dios, kag labi nga ginpabakod sini ang akon determinasyon nga magpabilin nga malig-on sa pagtuo. Walay duhaduha nga kita tanan nga namatyan sing hinigugma may importante nga pagpakigkita sa tion sang pagkabanhaw.

[Piktyur sa pahina 20]

Ang paraiso nga gindrowing ni Lucía