Pamangkot sang Amon mga Bumalasa

Nagsiling si Pablo nga ‘maluwas ang bug-os nga Israel.’ (Roma 11:26) Buot bala niya silingon nga may tion nga ang tanan nga Judiyo makumbertir sa Cristianismo?

Indi amo sina ang luyag ipahangop ni Pablo. Subong isa ka pungsod, ginsikway sang kaliwatan ni Abraham si Jesus bilang Mesias. Sang mga tinuig nga nagligad kutob sang napatay si Jesus, nangin maathag nga wala sing tingob nga pagkumbertir sang mga Judiyo sa Cristianismo. Apang sa gihapon, matuod ang ginsiling ni Pablo nga ‘maluwas ang bug-os nga Israel.’ Paano?

Ginsilingan ni Jesus ang Judiyong mga lider sang relihion sa iya tion: “Ang ginharian sang Dios kuhaon sa inyo kag ihatag sa isa ka pungsod nga nagapatubas sang mga bunga sini.” (Mat. 21:43) Bangod ginsikway sang pungsod sang Israel si Jesus, ginliso ni Jehova ang iya igtalupangod sa isa ka bag-o nga pungsod, nga ang mga katapo sini gintangdo paagi sa espiritu sang Dios. Gintawag ini ni Pablo nga “Israel sang Dios.”​—Gal. 6:16.

Ginapamatud-an sang iban nga teksto sa Cristianong Griegong Kasulatan nga ang “Israel sang Dios” nagalakip sing 144,000 nga ginhaplasan sang espiritu nga mga Cristiano. (Roma 8:15-17; Bug. 7:4) Ginapakita man sang Bugna 5:9, 10 nga ang ini nga grupo nagalakip sang mga di-Judiyo, bangod ang hinaplas nga mga Cristiano magagikan sa “tagsa ka tribo kag hambal kag katawhan kag pungsod.” Ginpili ang mga miembro sang espirituwal nga Israel agod mangin “ginharian kag mga saserdote . . . , kag magagahom sila sa duta subong mga hari.” Bisan pa nga ginsikway ni Jehova ang Israel subong pinili nga pungsod, mahimo gihapon makapasag-uli sa iya ang tagsa ka indibiduwal. Amo sina ang pribilehiyo sang mga apostoles kag sang unang mga Cristiano. Siempre pa, sila nga mga Judiyo, kaangay sang iban nga katawhan, kinahanglan man nga baklon sang dugo ni Jesucristo.​—1 Tim. 2:5, 6; Heb. 2:9; 1 Ped. 1:17-19.

Bisan nadula sang madamo nga mga Judiyo sang unang siglo ang kahigayunan nga mangin kaupod si Jesus sa paggahom, pat-od sa gihapon nga matuman ang katuyuan sang Dios. Indi gid ini mapaslawan kay paagi sa iya manalagna si Jehova nagpasalig: “Manginsubong sini ang akon polong nga nagagowa sa akon baba; indi magbalik ini sa akon sa wala sing pulus, kondi magatigayon ini sang akon nahamut-an, kag magauswag ini sa butang nga akon ginpadal-an sini.”​—Isa. 55:11.

Matuod ini kon tuhoy sa katuyuan sang Dios sa pagtangdo sing 144,000 nga mangin kaupod sang iya Anak nga magagahom sa langit. Ginpaathag sang Biblia nga 144,000 ang kabilugan nga tangduan sang Dios. Indi gid ini makulangan!​—Bug. 14:1-5.

Gani, sang nagsulat si Pablo nga ‘maluwas ang bug-os nga Israel,’ wala niya gintagna ang tingob nga pagkumbertir sang mga Judiyo sa Cristianismo. Kundi, ginpakita niya nga matuman ang katuyuan sang Dios nga ang 144,000 nga espirituwal nga mga Israelinhon magagahom sa langit kaupod sang iya Anak nga si Jesucristo. Sa gintalana nga tion sang Dios, pagaluwason niya ang kompleto nga kadamuon sang “bug-os nga Israel” kag mangin mga hari kag saserdote sila sa Mesianikong Ginharian.​—Efe. 2:8.

[Mga piktyur sa pahina 28]

Ang mga hinaplas magagikan sa “tagsa ka tribo kag hambal kag katawhan kag pungsod”