Ang Pulong ni Jehova Buhi

Talalupangdon nga mga Punto Gikan sa mga Tulun-an sang Galacia, Efeso, Filipos, kag Colosas

SANG nabalitaan ni apostol Pablo nga ang pila ka Cristiano naglisa sa putli nga pagsimba bangod sa impluwensia sang mga sumalakdag sa Judaismo, nagsulat sia sang makapahulag nga sulat “para sa mga kongregasyon sa Galacia.” (Gal. 1:2) Mahimo ginsulat ini sang 50-52 C.E., kag nagaunod sang direkta nga laygay kag mabaskog nga pagpalig-on.

Mga pulo ka tuig sang ulihi samtang yara si Pablo sa Roma subong isa ka “bilanggo kay Cristo Jesus,” nagsulat sia sa mga kongregasyon sa Efeso, Filipos, kag Colosas agod hatagan sila sang praktikal nga laygay kag mahigugmaon nga pagpalig-on. (Efe. 3:1) Makabenepisyo man kita karon paagi sa pagtalupangod sa mensahe sa mga tulun-an sang Biblia sa Galacia, Efeso, Filipos, kag Colosas.​—Heb. 4:12.

‘GINPAHAYAG NGA MATARONG’​—PAANO?

(Gal. 1:1–6:18)

Bangod malalangon nga gintinguhaan sang mga sumalakdag sang Judaismo nga pangduhaduhaan ang pagkaapostol ni Pablo, ginpangapinan niya ini paagi sa paghatag sang pila ka detalye sang iya kabuhi. (Gal. 1:11–2:14) Ginpamatukan ni Pablo ang ila butig nga mga panudlo, nagsiling sia: “Ang isa ka tawo ginapahayag nga matarong, indi bangod sa mga buhat sang kasuguan, kundi paagi lamang sa pagtuo kay Cristo Jesus.”​—Gal. 2:16.

“Paagi sa pagbakal mahilway [ni Cristo] ang mga yara sa idalom sang kasuguan” agod matigayon ang Cristianong kahilwayan, siling ni Pablo. Ginlaygayan niya ang mga taga-Galacia: “Magtindog kamo sing malig-on, kag indi na magpasakop liwat sa gota sang pagkaulipon.”​—Gal. 4:4, 5; 5:1.

Sabat sa mga Pamangkot sa Kasulatan:

3:16-18, 28, 29​—Ang katipan kay Abraham nagapadayon pa bala gihapon tubtob karon? Huo. Ang Kasuguan nga katipan gindugang, indi kabaylo sa katipan sang Dios kay Abraham. Gani, ang katipan kay Abraham nagapadayon gihapon bisan “gindula” na ang Kasuguan. (Efe. 2:15) Ang mga saad sini natuman sa matuod nga “binhi” ni Abraham​—si Cristo Jesus, ang panguna nga binhi, kag sa mga “iya ni Cristo.”

6:2​—Ano “ang kasuguan ni Cristo”? Ining kasuguan nagaunod sang tanan nga gintudlo kag ginsugo ni Jesus. Ilabi na nga nalakip sa sini ang sugo nga “maghigugmaanay.”​—Juan 13:34.

6:8​—Paano kita “nagasab-ug para sa espiritu”? Ginahimo naton ini kon ginatugutan naton ang balaan nga espiritu nga mag-impluwensia sa aton pagkabuhi. Ang pagsab-ug para sa espiritu nagadalahig sa bug-os tagipusuon nga pagpakigbahin sa mga hilikuton sa diin ginapasagahay ni Jehova ang iya espiritu.

Mga Leksion Para sa Aton:

1:6-9. Kon may problema nga mag-utwas sa kongregasyon, kinahanglan maabtik nga manghikot ang Cristianong mga gulang. Nagagamit sang mga pangatarungan nga napasad sa Kasulatan, ginapamatud-an nila sa gilayon nga sala ang tiko nga mga pangatarungan.

2:20. Ang gawad isa ka personal nga dulot sang Dios sa aton. Dapat amo gid sini ang aton pagtamod.​—Juan 3:16.

5:7-9. Ang malain nga pagpakig-upod ‘makaupang sa aton sa padayon nga pagtuman sa kamatuoran.’ Maalamon nga likawan naton sila.

6:1, 2, 5. Yadtong may “espirituwal nga mga kalipikasyon” mahimo magbulig sa aton sa pagdala sang kabug-atan nga aton naatubang subong resulta sang sayop nga desisyon nga wala naton matalupangdan. Apang kon tuhoy sa pagdala sang lulan sang aton espirituwal nga salabton, kita mismo ang responsable sa sini.

 ‘PAGTIPON SANG TANAN NGA BUTANG KAY CRISTO’

(Efe. 1:1–6:24)

Sa iya sulat sa mga taga-Efeso, ginpadaku ni Pablo ang Cristianong paghiusa. Naghambal sia tuhoy sa “isa ka pagdumalahan sa katapusan sang gintalana nga mga tion . . . agod tipunon liwat ang tanan nga butang kay Cristo, ang mga butang sa langit kag ang mga butang sa duta.” Naghatag si Cristo sang “mga dulot nga mga lalaki” agod buligan ang tanan nga ‘makadangat sa pag-isa sa pagtuo.’​—Efe. 1:10; 4:8, 13.

Agod mapadunggan ang Dios kag mapalambo ang paghiusa, ang mga Cristiano dapat “magsuklob sang bag-o nga personalidad” kag ‘magpasakop sa isa kag isa tungod sa kahadlok kay Cristo.’ Kinahanglan man sila ‘magtindog sing malig-on batok sa mga pahito sang Yawa’ paagi sa pagsuklob sang kompleto nga hinganib gikan sa Dios.​—Efe. 4:24; 5:21; 6:11.

Sabat sa mga Pamangkot sa Kasulatan:

1:4-7​—Paano ang hinaplas nga mga Cristiano gintangdo na nga daan antes sila mabun-ag? Gintangdo na nga daan sila subong isa ka grupo, indi subong indibiduwal. Natabo ini nga pagtangdo antes pa maliton sang aton unang ginikanan ang sala sa ila una nga anak. Ang tagna nga narekord sa Genesis 3:15, nga ginpahayag antes ginpanamkon ang makasasala nga tawo, nagalakip sang katuyuan sang Dios nga may pila ka sumulunod si Cristo nga magagahom upod sa iya sa langit.​—Gal. 3:16, 29.

2:2​—Paano ang espiritu sang kalibutan kaangay sa hangin, kag paano ini nagagahom sa kalibutan? “Ang espiritu sang kalibutan”​—ang espiritu sang pagkaindependiente kag pagkamalalison—​yara bisan diin kaangay sang hangin nga ginaginhawa naton. (1 Cor. 2:12) Nagagahom ini sa kalibutan bangod sang makusog kag dalayon nga impluwensia sini.

2:6​—Paano ang hinaplas nga mga Cristiano yara “sa langitnon nga mga duog” samtang yari pa sila sa duta? Ang mga tinaga diri nga “langitnon nga mga duog” wala nagapatuhoy sa ginsaad sa ila nga langitnon nga paglaum. Sa baylo, nagapatuhoy ini sa ila nabayaw nga tindog upod sa Dios bangod “ginpat-inan [sila] sing ginsaad nga balaan nga espiritu.”​—Efe. 1:13, 14.

Mga Leksion Para sa Aton:

4:8, 11-15. “Nagdala [si Jesucristo] sang mga bihag,” buot silingon, nagkuha sia sang mga lalaki gikan sa idalom sang pagkontrol ni Satanas agod gamiton sila subong mga dulot para sa pagtukod sang Cristianong kongregasyon. “Paagi sa gugma magtubo kita sa tanan nga butang nga nahisanto . . . [kay] Cristo” paagi sa pagtuman kag pagpasakop sa nagapanguna sa aton kag paagi sa pagkooperar sa mga kahimusan sa kongregasyon.​—Heb. 13:7, 17.

5:22-24, 33. Luwas sa pagpasakop sa iya bana, ang isa ka asawa dapat man magtahod sa iya bana. Mahimo niya ini paagi sa pagpakita sing “malinong kag malulo nga espiritu” kag paagi sa pagtinguha nga tahuron ang iya bana sa paghambal sing maayo tuhoy sa iya kag pagkooperar agod mangin madinalag-on ang iya mga desisyon.​—1 Ped. 3:3, 4; Tit. 2:3-5.

5:25, 28, 29. Subong nga “ginapakaon” sang bana ang iya kaugalingon, dapat man niya atipanon ang pisikal kag emosyonal nga kinahanglanon sang iya asawa kag buligan sia nga mahuptan ang mabakod nga kaangtanan kay Jehova. Palanggaon man sang bana ang iya asawa paagi sa paghinguyang sang bastante nga tion upod sa iya kag pakig-angutan sia sing mainayuhon sa hambal kag buhat.

6:10-13. Agod mapamatukan ang puersa sang mga demonyo, kinahanglan bug-os tagipusuon kita nga magsuklob sang kompleto nga hinganib gikan sa Dios.

‘PADAYON NGA MAGLAKAT SING MAHIM-ONG’

(Fil. 1:1–4:23)

Sa iya bug-os nga sulat sa mga taga-Filipos, ginpadaku ni Pablo ang gugma. “Amo ini ang padayon ko nga ginapangamuyo,” siling niya, “nga kabay nga ang inyo gugma magbugana sing labi pa gid nga may sibu nga ihibalo kag bug-os nga paghantop.” Ginbuligan niya sila nga likawan ang siod sang sobra nga pagsalig sa kaugalingon, nagsiling siya: “Padayon ninyo nga panikasugi ang inyo kaugalingon nga kaluwasan nga may kahadlok kag pagkurog.”​—Fil. 1:9; 2:12.

 Ginapalig-on ni Pablo ang mga hamtong nga magtinguha “padulong sa lalambuton tungod sa padya nga langitnon nga pagtawag sang Dios.” Nagsiling sia: “Sa kasangkaron nga nakahimo kita sang pag-uswag, padayon kita nga maglakat sing mahim-ong sa sini man nga rutina.”​—Fil. 3:14-16.

Sabat sa mga Pamangkot sa Kasulatan:

1:23​—Sa anong “duha ka butang” yara sa tungatunga si Pablo, kag ano nga “kahilwayan” ang ginahandum niya? Bangod sang iya kahimtangan, yara si Pablo sa tungatunga sang duha ka posibilidad: kabuhi ukon kamatayon. (Fil. 1:21) Bisan wala niya ginsiling kon ano ang iya pilion, ginpahibalo niya ang iya ginahandum​—“ang kahilwayan kag mangin kaupod ni Cristo.” (Fil. 3:20, 21; 1 Tes. 4:16) Ini nga “kahilwayan” sa tion sang presensia ni Cristo magaresulta sa pagbaton ni Pablo sang padya nga gin-aman ni Jehova para sa iya.​—Mat. 24:3.

2:12, 13​—Sa anong paagi ginpahanabo sang Dios nga “magbuot [kita] kag manghikot”? Ang balaan nga espiritu ni Jehova makapanghikot sa aton tagipusuon kag hunahuna agod magdugang ang aton handum nga himuon ang aton labing masarangan sa pag-alagad sa iya. Gani, may nagabulig gid sa aton samtang ‘padayon naton nga ginapanikasugan ang aton kaugalingon nga kaluwasan.’

Mga Leksion Para sa Aton:

1:3-5. Bisan imol sa materyal ang mga taga-Filipos, nagpakita sila sing maayo nga halimbawa sang pagkaalwan.​—2 Cor. 8:1-6.

2:5-11. Subong sang ginapakita sang halimbawa ni Jesus, ang pagkamapainubuson indi tanda sang kaluyahon kundi sang moral nga kabakod. Dugang pa, ginapakataas ni Jehova ang mga mapainubuson.​—Hulu. 22:4.

3:13. “Ang mga butang sa likuran” mahimo amo ang mga butang subong sang daku sing kita nga karera, may kalig-unan bilang katapo sang isa ka manggaranon nga pamilya, ukon serioso nga mga sala nga ginhinulsulan na naton kay “ginhugasan” na kita. (1 Cor. 6:11) Dapat kalimtan na naton ining mga butang, buot silingon, indi na naton pagkabalak-an pa, kag ‘lab-uton ang mga butang sa unahan.’

“NAPABAKOD SA PAGTUO”

(Col. 1:1–4:18)

Sa iya sulat sa mga taga-Colosas, ginbuyagyag ni Pablo ang sayop nga mga pagtamod sang butig nga mga manunudlo. Nangatarungan sia nga ang kaluwasan wala nasandig sa mga ginapatuman sang Kasuguan kundi sa ‘pagpadayon sa pagtuo.’ Ginapalig-on ni Pablo ang mga taga-Colosas nga “padayon . . . nga maglakat nga nahiusa [kay Cristo] nga nagapanggamot kag natukod sa iya kag napabakod sa pagtuo.” Ano ang epekto sini nga pagpabakod sa ila?​—Col. 1:23; 2:6, 7.

“Dugang pa sa sining tanan nga butang,” sulat ni Pablo, “panapti ninyo ang inyo kaugalingon sang gugma, kay amo ini ang himpit nga higot sang paghiusa. Subong man, tuguti ang paghidait ni Cristo nga maggahom sa inyo tagipusuon.” Ang apostol nagsiling sa ila: “Bisan ano ang inyo ginahimo, himua ninyo ini sing bug-os kalag subong nga kay Jehova, kag indi sa mga tawo.” Tuhoy sa mga indi bahin sang kongregasyon, nagsiling sia: “Padayon kamo nga maglakat sing maalamon” sa ila.​—Col. 3:14, 15, 23; 4:5.

Sabat sa mga Pamangkot sa Kasulatan:

2:8​—Sa anong “nahauna nga mga butang sa kalibutan” ginpaandaman kita ni Pablo? Nagapatuhoy ini sa panguna nga mga butang ukon mga prinsipio nga nagahuman, nagagiya ukon nagapahulag sa kalibutan ni Satanas. (1 Juan 2:16) Nalakip sa sini ang pilosopiya, materyalismo, kag butig nga mga relihion sining kalibutan.

4:16​—Ngaa ang sulat sa mga taga-Laodicea indi bahin sang Biblia? Ini bangod ang sulat wala nagaunod sang impormasyon nga kinahanglan naton karon. Ukon ayhan ginsulit lamang sini ang mga punto sa iban pa nga mga sulat.

Mga Leksion Para sa Aton:

1:2, 20. Ang gawad nga gin-aman sang Dios bangod sang iya wala tupong nga kaayo, makatinlo sang aton konsiensia kag makahatag kalinong sa kaugalingon.

2:18, 23. Ang “salimpapaw nga pagkamapainubuson,” pakitakita nga pagkamapainubuson sa iban nga ginasikway ang materyal nga mga butang ukon ginasakit ang lawas, nagapadayag nga ang isa “nagapahambog . . . paagi sa iya undanon nga panghunahuna.”