Si Jehova Amo ang Aton “Manugluwas”

“Buligan sila kag luwason ni Jehova.”​—SAL. 37:40, NW.

1, 2. Anong kamatuoran tuhoy kay Jehova ang makapalig-on sa aton?

ANG mga landong nga tuga sang adlaw nagabag-obag-o. Samtang nagahulag ang duta, ang mga landong padayon nga nagahulag kag nagabag-obag-o. Apang wala nagabag-o ang Manunuga sang duta kag adlaw. (Mal. 3:6) Ang Biblia nagasiling: “Sa iya wala sing pagbag-o subong sang pagbag-obag-o sang landong.” (Sant. 1:17) Mapalig-on kita bangod sining kamatuoran tuhoy kay Jehova, ilabi na kon nagaatubang kita sing mga pagtilaw kag mga kabudlayan. Ngaa?

² Subong sang natun-an naton sa nagligad nga artikulo, nangin “Manugluwas” si Jehova sadto. (Sal. 70:5) Maminatud-on sia kag wala nagabag-o; amo kon ngaa makasalig gid ang iya mga sumilimba nga ‘buligan niya sila kag luwason.’ (Sal. 37:40) Paano ginaluwas ni Jehova ang iya mga alagad karon? Paano niya ini himuon sa kada isa sa aton?

Ginluwas Gikan sa mga Manugpamatok

3. Ngaa makasalig kita nga indi mapauntat sang mga manughingabot ang katawhan ni Jehova sa pagbantala?

³ Si Jehova takus simbahon gani indi mapunggan sang bisan ano nga paghingabot ni Satanas ang mga Saksi ni Jehova sa pagsimba sa iya. Ang Pulong sang Dios nagapasalig sa aton: “Wala sing hinganiban nga ginhimo batok sa imo nga magauswag, kag ang tagsa ka dila nga magtindug batok sa imo sa paghukom  tagudilian mo.” (Isa. 54:17) Wala nagmadinalag-on ang mga manugpamatok nga pauntaton ang katawhan sang Dios sa pagbantala. Binagbinaga ang duha ka halimbawa.

4, 5. Ano nga pagpamatok ang ginhimo sa katawhan ni Jehova sang 1918, kag ano ang resulta?

⁴ Sang 1918, naeksperiensiahan sang katawhan ni Jehova ang dugang nga paghingabot nga ginpadihot sang mga klerigo kay luyag nila nga pauntaton ang mga Saksi sa pagbantala. Sang Mayo 7, gindakop sanday J. F. Rutherford, manugtatap sang hilikuton sa pagbantala sa bug-os nga kalibutan sadto, kag ang pila pa niya ka kaupod sa ulong talatapan. Sa sulod lamang sang duha ka bulan, sayop nga ginsumbong sing paghimbon si Utod Rutherford kag ang iya mga kaupod kag ginpamatbatan sila sing malawig nga tinuig nga pagkabilanggo. Nagmadinalag-on bala ang mga manugpamatok nga pauntaton sing bug-os ang pagbantala? Wala gid!

⁵ Dumduma ang saad ni Jehova: “Wala sing hinganiban nga ginhimo batok sa imo nga magauswag.” Sa wala ginapaabot, sang Marso 26, 1919, napiyansahan sanday Utod Rutherford kag ang iya mga kaupod, pagligad lamang sang siam ka bulan. Sang masunod nga tuig, sang Mayo 5, 1920, naabsuwelto sila sa tanan nga panumbungon. Ginhingalitan sang mga kauturan ang ila kahilwayan kag nagpadayon sa pagbantala sang Ginharian. Ano ang resulta? Nangin talalupangdon gid ang pag-uswag sugod sadto! Ini tanan bangod sa bulig sang “Manugluwas.”​—1 Cor. 3:7.

6, 7. (a) Ano nga pagpamatok ang ginhimo sang Nazi sa Alemanya batok sa mga Saksi ni Jehova, kag ano ang resulta? (b) Ano ang ginapamatud-an sang modernong maragtas sang katawhan ni Jehova?

⁶ Binagbinaga naman ang ikaduha nga halimbawa. Sang 1934, nanumpa si Hitler nga ubuson ang mga Saksi ni Jehova sa Alemanya. Gintuodtuod niya ini. Nangin lapnag sa bug-os nga pungsod ang pagpangdakop kag pagbilanggo sa mga Saksi. Linibo sa ila ang nangin biktima; ginatos ang ginpamatay sa mga kampo konsentrasyon. Nagmadinalag-on bala si Hitler nga ubuson ang mga Saksi? Napauntat bala niya ang pagbantala sang maayong balita sa Alemanya? Wala gid! Nagbantala sing tago ang aton mga kauturan sa tion sang paghingabot. Pagkatapos nga nadula ang Nazi, nahilway sila kag nagpadayon sa pagbantala. Sa karon, kapin na sa 165,000 ang manugbantala sang Ginharian sa Alemanya. Gintuman liwat sang “Manugluwas” ang iya saad: “Wala sing hinganiban nga ginhimo batok sa imo nga magauswag.”

⁷ Ang modernong maragtas sang mga Saksi ni Jehova nagapamatuod nga indi pagtugutan ni Jehova nga mapapas ang iya katawhan. (Sal. 116:15) Apang kamusta naman ang kada isa sa aton? Luwason bala kita ni Jehova?

 Kamusta Naman ang Pisikal nga Pangamlig?

8, 9. (a) Ngaa makasiling kita nga indi sa tanan nga tion amligan kita ni Jehova sa pisikal? (b) Ano ang dapat naton dumdumon?

⁸ Subong mga indibiduwal, nahibaluan naton nga wala magsaad si Jehova nga amligan niya kita pirme sa pisikal. Ang aton tindog kaangay sang ginpabutyag sang tatlo ka matutom nga Hebreo nga wala magyaub sa imahen nga bulawan ni Hari Nabocodonosor. Wala magpaabot ang mga pamatan-on nga amligan sila sing milagruso ni Jehova. (Basaha ang Daniel 3:17, 18.) Apang, ginluwas sila ni Jehova gikan sa nagadabadaba nga hurno. (Dan. 3:21-27) Bisan pa gin-amligan sila ni Jehova, ang pagluwas sing milagruso talagsa lang nagakatabo sadto. Madamo gihapon sang matutom nga mga alagad ni Jehova ang ginpatay sang mga manugpamatok.​—Heb. 11:35-37.

⁹ Kamusta karon? Subong “Manugluwas,” masarangan ni Jehova nga amligan ang mga yara sa delikado nga mga kahimtangan. Mahibaluan bala naton kon sin-o ang iya ginaamligan ukon wala? Indi. Apang mahimo nga may magbatyag nga naluwas sia sa katalagman bangod ginbuligan sia ni Jehova. Indi naton sia mabasol kon amo sina ang iya pagpati. Apang, dapat naton dumdumon nga madamo sang matutom nga mga Cristiano ang napatay bangod sang paghingabot, subong sang natabo sang tion sang mga Nazi. Ang iban napatay bangod sang mga aksidente. (Man. 9:11) Mahimo mamangkot kita, ‘Indi na bala “Manugluwas” si Jehova bangod sining hilaw nga mga kamatayon?’ Indi ina matuod.

10, 11. Ngaa wala sing mahimo ang tawo sa kamatayon, apang ano ang mahimo ni Jehova sa sini?

¹⁰ Binagbinaga ini: Wala sing mahimo ang tawo sa kamatayon, kay wala sing “makaluwas sang iya kalag sa gahum sang Sheol,” ukon Hades, ang lulubngan. (Sal. 89:48) Apang kamusta si Jehova? Ang isa ka utod nga babayi nga nakalampuwas sa makahaladlok nga panahon sang mga Nazi naghinumdom sang ginsiling sang iya iloy agod lugpayan sia bangod napatay ang ila mga hinigugma sa mga kampo konsentrasyon: “Kon maulipon sing dayon sang kamatayon ang katawhan, indi bala nga mas gamhanan pa ini sa Dios?” Sa pagkamatuod, wala sing mahimo ang kamatayon sa labing gamhanan nga Tuburan sang kabuhi! (Sal. 36:9) Yara sa memorya ni Jehova ang mga sa Sheol, ukon Hades, kag luwason niya sila tanan.​—Luc. 20:37, 38; Bug. 20:11-14.

¹¹ Sa pihak nga bahin, interesado gid si Jehova sa iya matutom nga mga sumilimba karon. Binagbinagon naton ang tatlo ka paagi nga nangin “Manugluwas” gid naton sia.

Ginaamligan sa Espirituwal

12, 13. Ngaa importante gid ang espirituwal nga proteksion, kag paano kita sini ginaamanan ni Jehova?

¹² Ginaamligan kita ni Jehova sa espirituwal, nga amo ang labing importante nga pangamlig. Subong matuod nga mga Cristiano, nahangpan naton nga may mas hamili pa sangsa aton kabuhi karon. Ang aton labing hamili nga pagkabutang amo mismo ang aton kaangtanan kay Jehova. (Sal. 25:14; 63:3) Kon wala ini, mangin wala sing pulos ang aton kabuhi karon kag wala kita sing dayon nga palaabuton.

¹³ Agod mangin suod kita kay Jehova, ginabuligan niya kita paagi sa iya Pulong, balaan nga espiritu, kag sang mga kongregasyon sa bug-os nga kalibutan. Paano naton mapanginpuslan ini nga mga aman? Paagi sa regular kag maukod nga pagtuon sang iya Pulong, mapalig-on naton ang aton pagtuo kag paglaum. (Roma 15:4) Paagi sa pagpangamuyo sang iya espiritu, mabuligan kita nga mapakigbatuan ang mga buhat nga makaguba sang aton kaangtanan kay Jehova. (Luc. 11:13) Mapabakod man kita sa espirituwal sang “pagkaon sa nagakaigo nga tion” paagi sa pagsunod sa panuytoy nga ginaaman sang ulipon nga klase sa mga publikasyon nga pasad sa Biblia kag subong man sa mga miting, asambleya, kag mga kombension. (Mat. 24:45) Ini nga mga aman makabulig sa aton nga mangin suod sa Dios.​—Sant. 4:8.

14. Isugid ang eksperiensia nga nagapadaku sang espirituwal nga proteksion.

¹⁴ Agod mapadaku ining espirituwal nga  proteksion, dumduma ang mga ginikanan nga ginsambit sa nahauna nga parapo sang ginsundan sini nga artikulo. Pila ka adlaw pagkatapos nga ginreport nga nadula ang ila anak nga si Theresa, nabaton nila ang makapasubo nga balita: Ginpatay sia. * Ang Tatay naghinumdom: “Nangamuyo ako kay Jehova nga amligan sia. Sang nahibal-an nga ginpatay sia, ginaako ko nga sang primero nagpalibog ako kon ngaa wala ginsabat ang akon pangamuyo. Sa pagkamatuod, nahibaluan ko nga wala magpasalig si Jehova sang milagruso nga pangamlig sa kada isa sa iya katawhan. Padayon ako nga nangamuyo para sa paghangop. Naumpawan ako sa paghibalo nga ginaamligan ni Jehova ang iya katawhan sa espirituwal kag nagaaman sia sing kinahanglanon naton agod maamligan ang aton kaangtanan sa iya. Amo ini ang labing importante nga sahi sang pag-amlig, kay apektado sini ang aton dayon nga palaabuton. Amo sini ang pag-amlig kay Theresa; gin-alagad niya ang Dios sing matutom tubtob kamatayon. Naumpawan ako kay nahibaluan ko nga ang iya palaabuton yara sa mga kamot sang Dios.”

Ginsakdag Samtang Nagabalatian

15. Sa anong mga paagi nga mabuligan kita ni Jehova kon nagabalatian kita?

¹⁵ Sarang kita masakdag ni Jehova sa “higdaan sang pag-antus,” subong sang ginhimo niya kay David. (Sal. 41:3) Bisan pa nga wala nagapang-ayo si Jehova sing milagruso karon, ginabuligan niya kita. Paano? Ang mga prinsipio nga masapwan sa iya Pulong makabulig sa aton nga maghimo sing maalamon nga mga desisyon tuhoy sa pagpabulong kag sa iban pa nga mga butang. (Hulu. 2:6) Mahimo masapwan naton ang mapuslanon nga impormasyon kag praktikal nga mga panugda gikan sa mga artikulo nga yara sa Ang Lalantawan kag Magmata! nga nagabinagbinag tuhoy sa aton problema sa panglawas. Paagi sa iya balaan nga espiritu, mahimo hatagan kita ni Jehova sing “gahom nga labaw sa kinaandan” agod maatubang naton ang aton kahimtangan kag mahuptan ang aton integridad, bisan ano man ang matabo. (2 Cor. 4:7) Paagi sa sini, malikawan naton nga mabalaka gid sa aton balatian tubtob sa punto nga mapabay-an na naton ang aton kaangtanan kay Jehova.

16. Paano nalandas sang isa ka utod ang balatian?

¹⁶ Binagbinaga ang lamharon nga ginhinambitan sa nahauna nga parapo sang ginsundan sini nga artikulo. Sang 1998, nahibaluan nga may amyotrophic lateral sclerosis sia, ukon ALS, amo nga naparalisar sing bug-os ang iya lawas. * Paano niya nalandas ang iya balatian? Nagpaathag sia: “May mga tion nga luyag ko na lang nga mapatay bangod sang kasakit kag kahuol nga nabatyagan ko. Kon daw indi ko na maagwanta, nagapangamuyo ako kay Jehova nga hatagan niya ako sing tatlo ka butang: kalmado nga tagipusuon,  pagpailob, kag pagbatas. Nabatyagan ko nga ginsabat ni Jehova ang akon mga pangamuyo. Napamalandungan ko ang mga butang nga makapaumpaw bangod sang kalmado nga tagipusuon. Halimbawa, kon ano ang mangin kahimtangan ko kon makalakat na ako sa bag-ong kalibutan, makakaon sing manamit nga pagkaon, kag makapakighambal liwat sa akon pamilya. Nabuligan man ako sang pagpailob nga mabatas ang mga kabudlayan kag mga hangkat sang isa nga paralisado. Bangod sang pagbatas, nangin matutom ako kag nahuptan ko ang akon pagkabalanse sa espirituwal. Nahangpan ko gid si salmista David, kay nabatyagan ko nga ginasakdag ako ni Jehova sa akon higdaan sang pag-antos.”​—Isa. 35:5, 6.

Gin-amanan sing mga Kinahanglanon

17. Ano ang ginasaad ni Jehova sa aton, kag ano ang buot silingon sini?

¹⁷ Nagsaad si Jehova nga amanan niya kita sang aton materyal nga mga kinahanglanon. (Basaha ang Mateo 6:33, 34 kag Hebreo 13:5, 6.) Wala ini nagapahangop nga magpaabot na lang kita nga ihatag sing milagruso ang aton materyal nga mga kinahanglanon ukon indi na kita mag-obra. (2 Tes. 3:10) Ang buot silingon sini nga saad amo nga kon unahon naton sa aton kabuhi ang Ginharian sang Dios kag handa nga magtrabaho, makasalig kita nga buligan ni Jehova nga matigayon naton ang aton mga kinahanglanon sa pagkabuhi. (1 Tes. 4:11, 12; 1 Tim. 5:8) Makaaman sia sang aton mga kinahanglanon sa paagi nga wala naton ginapaabot, ayhan paagi sa aton masigkasumilimba nga magahatag sa aton sing materyal nga bulig ukon magatanyag sa aton sing obra.

18. Isugid ang eksperiensia nga nagapakita nga mahimo amanan kita sa tion sang aton kinahanglanon.

¹⁸ Dumduma ang nagasolo nga iloy nga ginsambit sa ginsundan sini nga artikulo. Sang nagsaylo sila sang iya bata nga babayi sa bag-o nga lugar, nabudlayan sia mangita sing obra. Sia nagpaathag: “Nagabantala ako sa aga, kag nagapangita naman sing trabaho sa hapon. Nadumduman ko nga nagkadto ako isa ka adlaw sa tiendahan agod magbakal sing gatas. Ginatan-aw ko lang ang mga utanon kay wala ako sing inugbakal. Sa bilog ko nga kabuhi, amo pa lang ako nakabatyag sing tuman nga kasubo. Sang nagpauli na ako, tuman kadamo nga utanon ang ginbutang sa balkonahe sa likod sang amon balay. Bastante ini sa pila namon ka bulan nga konsumo. Naghibi ako kag nagpasalamat kay Jehova.” Nahibaluan sang ulihi sining utod nga babayi nga ang mga basket ginbilin sang isa ka utod nga lalaki sa kongregasyon nga may talamnan sang utanon. Nagsulat sang ulihi ang utod nga babayi sa iya: “Bisan pa nga ginapasalamatan ko gid ikaw sadto nga adlaw, nagpasalamat man ako kay Jehova sa paggamit niya sang imo kaayo agod pahanumdumon ako sang iya gugma.”​—Hulu. 19:17.

19. Sa dakung kapipit-an, ano ang ginasaligan sang mga alagad ni Jehova, kag ano ang determinado naton nga himuon subong?

¹⁹ Maathag nga ang ginhimo ni Jehova sang tion sang Biblia kag subong man sa karon nagahatag sa aton sing rason nga saligan sia subong aton Manugbulig. Sa dili madugay, kon mahanabo ang dakung kapipit-an sa kalibutan ni Satanas, labi na gid nga kinahanglan naton ang bulig ni Jehova. Apang makasalig gid ang mga alagad ni Jehova sa iya. Magahangad sila kag magakalipay, nga nakahibalo nga malapit na lang ang ila kaluwasan. (Luc. 21:28) Sa karon, bisan ano man nga pagtilaw ang aton maatubang, mangin determinado kita nga magsalig kay Jehova, kay wala nagabag-obag-o ang aton Dios kag ang aton “Manugluwas.”

[Mga footnote]

Madumduman Mo Bala?

• Paano luwason ni Jehova yadtong nangin hilaw ang kamatayon?

• Ngaa labing importante ang espirituwal nga proteksion?

• Ano ang buot silingon sang saad ni Jehova nga amanan niya kita sang aton materyal nga mga kinahanglanon?

[Mga Pamangkot sa Pagtinuon]

[Piktyur sa pahina 8]

Sanday Utod Rutherford kag ang iya mga kaupod nga ginbilanggo sang 1918. Ginhilway sila sang ulihi kag naabsuwelto sa tanan nga panumbungon

[Piktyur sa pahina 10]

Sarang kita sakdagon ni Jehova sa “higdaan sang pag-antus”