Madumduman Mo Bala?

Nakabenepisyo ka bala sa pagbasa sa ulihi nga mga gua sang Ang Lalantawan? Tilawi kon masabat mo ang masunod nga mga pamangkot:

• Paano naton mahambal sing talunsay ang “putli nga hambal,” nga amo ang kamatuoran tuhoy sa Dios kag sa iya mga katuyuan? (Sof. 3:9)

Kaangay sang isa ka lenguahe, agod mahambal sing talunsay ang “putli nga hambal” kinahanglan nga magpamati kita sing maayo, ilugon ang mga talunsay maghambal, sauluhon ang ngalan sang mga tulun-an sa Biblia kag pila ka teksto sa Biblia, sulitsuliton ang mga butang nga aton natun-an, magbasa, usisaon ang gramatika ukon sulundan sang kamatuoran, magpadayon sa pag-uswag, magtalana sing tion sa pagtuon, kag maghanas sa “paghambal” sing putli nga hambal.​—8/15, pahina 21-25.

• Ano ang pila ka butang nga nadalahig sa pagkilala sa Dios?

“Jehova ang iya ngalan,” kag luyag niya nga kilalahon naton sia sa sina nga ngalan. (Ex. 15:3, NW) Sia “ang Dios sang gugma kag paghidait.” (2 Cor. 13:11) Sia amo ang “Dios sang ihibalo” kag sang “kaluwasan.” (1 Sam. 2:3; Sal. 25:5) Magapalapit ang Dios sa mga nagakilala sa iya.​—9/1, pahina 4-7.

• Paano naaplikar sa pag-asawahay ang prinsipio sang “lubid nga tatlo ka dupli”?

Ang “lubid nga tatlo ka dupli” indi literal. (Man. 4:12) Kon ipatuhoy sa pag-asawahay, ang duha ka dupli amo ang bana kag asawa, kag nagasambod ini sa natung-an nga dupli, nga amo ang Dios. Mangin malipayon ang mag-asawa kon kaupod nila ang Dios bangod hatagan niya sila sing kusog sa pag-atubang sa mga problema.​—9/15, pahina 16.

• Sa ano nagapatuhoy ang “pagtungtong sang mga kamot” sa Hebreo 6:2?

Sa baylo nga ipatuhoy ini sa pagtangdo sa mga Cristiano nga mangin gulang, mahimo nga nagapatuhoy ini sa pagtungtong sang mga kamot agod ipaambit ang milagruso nga dulot nga balaan nga espiritu. (Binu. 8:14-17; 19:6)​—9/15, pahina 32.

• Ano nga mga kinahanglanon sang kabataan ang nahibaluan sang isa ka maayo nga Amay?

Ang pila sa ila kinahanglanon amo ang (1) iya pagpalangga, (2) maayo nga halimbawa, (3) malipayon nga palibot, (4) pagtudlo tuhoy sa Dios, (5) disiplina, (6) pangamlig.​—10/1, pahina 18-21.

• Paano mapakita sang mga nagapanguna ang pagpadungog sa iban?

Ang isa ka paagi nga mahimo ini sang isa ka gulang amo nga indi niya pagpangabayon ang iban sa paghimo sang mga butang nga indi niya mismo luyag himuon. Subong man, nagapakita man sia sing pagpadungog paagi sa pagpaathag sing mga rason tuhoy sa iya mga pangabay ukon mga instruksion.​—10/15, pahina 22.

• Ano ang pila ka sekreto agod mahuptan mo ang imo katutom sa imo tiayon?

Yari ang duha: (1) Unaha ang imo tiayon. (2) Likawi ang tanan nga sahi sang pagluib. May problema man ukon wala ang inyo pag-asawahay, dapat mahibaluan sang imo tiayon nga luyag mo gid mangin madinalag-on ang inyo pag-updanay; ining duha ka sekreto makabulig.​—11/1, pahina 18-21.

• Ano ang matun-an sang Cristianong mga gulang gikan sa paggamit sang mga Israelinhon sang isa ka sungkod?

Ang isa ka manugbantay nagagamit sing sungkod agod tuytuyan ang iya panong. Amo nga kon magsulod ukon maggua ang mga karnero sa toril, ‘nagasohot sila sa idalum sang sungkod,’ kag gani maisipan niya sila. (Lev. 27:32) Dapat nga kilala man sing maayo sang Cristianong manugbantay ang panong sang Dios kag nahibaluan ang kahimtangan sang tagsa ka karnero nga ginaatipan niya.​—11/15, pahina 9.

• Paano mapakita sang isa ka iloy nga importante para sa iya ang katinlo?

Mahimo mahigkuan ang pagkaon sa nanuhaytuhay nga paagi. Gani, luwas sa pagpanghinaw antes uyatan ang pagkaon, ginatakluban man niya ini. Ginahuptan niya nga matinlo ang balay agod malikawan ang problema sa mga ilaga, giting, kag mga insekto. Ang iban pa nga paagi amo ang paghupot sa mga bayo nga matinlo, regular nga pagpanghinaw kag pagpaligo. Ini nga mga pamaagi nahisanto sa prinsipio sang Biblia.​—12/1, pahina 9-11.