“Sila Amo ang Padayon nga Nagasunod sa Kordero”
“Sila Amo ang Padayon nga Nagasunod sa Kordero”
“Sila amo ang padayon nga nagasunod sa Kordero bisan diin sia magkadto.”—BUG. 14:4.
1. Paano gintamod sang matuod nga mga disipulo ni Jesus ang pagsunod sa iya?
SANG mga duha ka tuig kag tunga na nga nagaministeryo si Jesus, “nagpanudlo sia sa dayag nga pagtinipon sa Capernaum.” Bangod nakibot sa iya ginpanghambal, “madamo sa iya mga disipulo ang nagbalik sa mga butang nga ila ginbiyaan kag wala na maglakat upod sa iya.” Sang ginpamangkot ni Jesus ang iya 12 ka apostoles kon bala luyag man nila magbiya, si Simon Pedro nagsabat: “Ginuo, kay sin-o kami makadto? Ikaw ang may mga pinamulong sang kabuhi nga walay katapusan; kag nagapati kami kag nahibaluan namon nga ikaw ang Isa nga Balaan sang Dios.” (Juan 6:48, 59, 60, 66-69) Wala nag-untat sa pagsunod kay Jesus ang iya matuod nga mga disipulo. Pagkatapos nga ginhaplasan sila sang balaan nga espiritu, padayon sila nga nagsunod sa panuytoy ni Jesus.—Binu. 16:7-10.
2. (a) Sin-o ang “matutom kag mainandamon nga ulipon” ukon ang “matutom nga tulugyanan”? (b) Paano ini nga ulipon nakahimo sing maayo nga rekord sa ‘pagsunod sa Kordero’?
2 Kamusta naman ang hinaplas nga mga Cristiano sa panahon naton? Sa iya tagna tuhoy sa “tanda sang [iya] presensia kag sang katapusan sang sistema sang mga butang,” ginpatuhuyan ni Jesus ang grupo sang hinaplas nga mga sumulunod diri sa duta subong “matutom kag mainandamon nga ulipon,” ukon “matutom nga tulugyanan.” (Mat. 24:3, 45; Luc. 12:42) Subong isa ka grupo, ang ulipon may maayo nga rekord sa ‘pagsunod sa Kordero bisan diin sia magkadto.’ (Basaha ang Bugna 14:4, 5.) Ang mga katapo sini nagpabilin nga ulay sa espirituwal nga kahulugan paagi sa indi pagpadagta sa mga pagpati kag mga buhat sang “Babilonia nga Daku,” ang bug-os kalibutan nga emperyo sang butig nga relihion. (Bug. 17:5) Wala sing butig nga mga doktrina nga “nasapwan sa ila baba” kag nagpabilin sila nga ‘wala sing depekto’ gikan sa kalibutan ni Satanas. (Juan 15:19) Sa palaabuton, ang nabilin nga mga hinaplas sa duta “magasunod” sa Kordero pakadto sa langit.—Juan 13:36.
3. Ngaa importante nga saligan naton ang matutom nga ulipon?
3 Gintangdo ni Jesus ang matutom kag mainandamon nga ulipon sa “pagdumala sa iya panimalay,” nga amo ang indibiduwal nga katapo sang matutom nga ulipon, “sa paghatag sa ila sang ila pagkaon sa nagakaigo nga tion.” Gintangdo man niya ang ulipon ‘sa pagdumala sa tanan niya nga pagkabutang.’ (Mat. 24:45-47) Nalakip sa sini nga “pagkabutang” ang nagadamo nga “dakung kadam-an” sang “iban nga mga karnero.” (Bug. 7:9; Juan 10:16) Indi bala nga dapat saligan gid sang mga katapo sang hinaplas kag sang “iban nga mga karnero” ang ulipon nga nagadumala sa ila? May madamo nga rason kon ngaa dapat naton saligan ang matutom nga ulipon. Ang duha ka panguna nga rason amo: (1) Ginasaligan ni Jehova ini nga ulipon. (2) Ginasaligan man sila ni Jesus. Usisaon naton ang mga pamatuod nga bug-os gid ang pagsalig ni Jehova nga Dios kag ni Jesucristo sa matutom kag mainandamon nga ulipon.
Ginasaligan ni Jehova ang Ulipon
4. Ngaa makasalig kita sa ginaaman nga espirituwal nga pagkaon sang matutom kag mainandamon nga ulipon?
4 Binagbinaga kon paano makaaman ang matutom kag mainandamon nga ulipon sing suno sa tion kag makapapagros nga espirituwal nga pagkaon. “Ton-an ko ikaw kag tudloan ikaw sang dalanon nga dapat mo laktan,” siling ni Jehova. Sia nagdugang: “Laygayan ko ikaw nga ang akon mata yara sa ibabaw nimo.” (Sal. 32:8) Huo, ginatuytuyan ni Jehova ang iya ulipon. Gani, makasalig gid kita sa Makasulatanhon nga paghantop, paghangop, kag panuytoy sang ulipon.
5. Ano ang nagapamatuod nga ginahatagan ang ulipon sing gahom sang espiritu sang Dios?
5 Ginapakamaayo man ni Jehova ang ulipon paagi sa iya balaan nga espiritu. Ang espiritu ni Jehova indi makita, apang makita ang mga bunga sang espiritu sa mga ginatuytuyan sini. Hunahunaa kon ano na ang nahimo sang matutom kag mainandamon nga ulipon sa pagpanaksi sa bug-os nga kalibutan tuhoy kay Jehova nga Dios, sa iya Anak, kag sa Ginharian. Aktibo nga ginabantala sang mga sumilimba ni Jehova ang mensahe tuhoy sa Ginharian sa kapin sa 230 ka kadutaan kag mga kapuluan. Pamatuod gid ini nga ginatuytuyan sang espiritu sang Dios ini nga ulipon! (Basaha ang Binuhatan 1:8.) Sa pag-aman sang suno sa tion nga espirituwal nga pagkaon para sa katawhan ni Jehova sa bug-os nga duta, dapat maghimo sing importante nga mga desisyon ini nga ulipon. Sa paghimo kag pagpatuman sina nga desisyon, ginapakita sang ulipon ang gugma, kalulo, kag iban pa nga bunga sang espiritu.—Gal. 5:22, 23.
6, 7. Daw ano kadaku ang pagsalig ni Jehova sa matutom nga ulipon?
6 Agod mahangpan kon daw ano kadaku ang pagsalig ni Jehova sa matutom nga ulipon, hunahunaa ang ginsaad niya sa mga katapo sini. “Ang trumpeta magatunog,” sulat ni apostol Pablo, “kag ang mga patay banhawon nga di-madinulunton, kag pagabayluhan kita. Kay ini nga madinulunton dapat magsuklob sang pagkadimadinulunton, kag ini nga mamalatyon dapat magsuklob sang pagkadimamalatyon.” (1 Cor. 15:52, 53) Ang napatay nga hinaplas nga mga sumulunod ni Cristo, nga matutom nga nagaalagad sa Dios, pagabanhawon labaw pa sa espiritu nga mga tinuga nga makatigayon sing kabuhi nga dayon. Ginhatagan sila sing kabuhi nga di-mamalatyon—wala sing katapusan kag indi malaglag. Dugang pa, magabaton man sila sing lawas nga indi madunot kag magapadayon sa pagkabuhi nga wala nagadepende sa iban. Ginlaragway sang Bugna 4:4 ini nga mga ginbanhaw nga nagapungko sa mga trono kag sa ila ulo may bulawan nga korona. Ginalauman sang hinaplas nga mga Cristiano ang kahimayaan subong mga hari. Kag indi lang amo sina.
7 “Nag-abot na ang kasal sang Kordero kag nakahanda na ang iya asawa. Huo, gintugutan sia nga mapanaptan sang masilaw, matinlo kag pino nga lino, kay ginalaragway sang pino nga lino ang matarong nga mga binuhatan sang mga balaan,” siling sang Bugna 19:7, 8. Ginpili ni Jehova ang hinaplas nga mga Cristiano nga mangin palaabuton nga nobya sang iya Anak. Ang pagkadimadinulunton, pagkadimamalatyon, pagkaharianon, kag ang “kasal sang Kordero” dalayawon gid nga mga dulot! Makapakumbinsi gid ini nga mga pamatuod nga ginasaligan sang Dios ang mga hinaplas, nga “padayon nga nagasunod sa Kordero bisan diin sia magkadto.”
Ginasaligan ni Jesus ang Ulipon
8. Paano ginpakita ni Jesus nga may pagsalig sia sa iya hinaplas nga mga sumulunod?
8 Ano ang mga pamatuod nga ginasaligan gid ni Jesus ang iya hinaplas nga mga sumulunod? Sa katapusan nga gab-i sang kabuhi ni Jesus sa duta, ginsaaran niya ang iya 11 ka matutom nga mga apostoles. Nagsiling sia: “Kamo ang nagpabilin nga kaupod ko sa mga pagtilaw sa akon; kag nagapakigkatipan ako sa inyo para sa isa ka ginharian, subong nga ang akon Amay nagpakigkatipan sa akon, agod magkaon kamo kag mag-inom sa akon lamesa sa akon ginharian, kag maglingkod sa mga trono agod maghukom sa napulog-duha ka tribo sang Israel.” (Luc. 22:28-30) Ang pagpakigkatipan ni Jesus sa 11 ka apostoles magapadayon sa tanan nga 144,000 nga hinaplas nga mga Cristiano. (Luc.12:32; Bug. 5:9, 10; 14:1) Makigkatipan ayhan si Jesus sa ila kag hatagan sila sing bahin sa paggahom sa iya Ginharian kon wala sia sing pagsalig sa ila?
9. Ano ang nalakip sa ‘tanan nga pagkabutang ni Cristo’?
9 Dugang pa, gintugyan man ni Jesus sa matutom kag mainandamon nga ulipon ‘ang pagdumala sa tanan niya nga pagkabutang,’ nga nagapatuhoy sa tanan nga intereses sang Ginharian sa duta. (Mat. 24:47) Nalakip sa sini nga mga pagkabutang ang mga pasilidad sa ulong talatapan sang mga Saksi ni Jehova, ang mga sanga talatapan sa nagkalainlain nga lugar, ang mga Assembly Hall kag mga Kingdom Hall sa bug-os nga kalibutan. Nalakip man sa sini ang hilikuton nga pagbantala sang Ginharian kag paghimo sing disipulo. Itugyan kag ipagamit bala sang isa ang iya mga pagkabutang sa wala niya ginasaligan?
10. Ano ang nagapakita nga kaupod sang mga hinaplas si Jesucristo?
10 Wala madugay sa tapos sia magkayab sa langit, nagpakita ang ginbanhaw nga si Jesus sa iya matutom nga mga disipulo kag nagsaad sa ila: “Yari karon! ako kaupod ninyo sa tanan nga adlaw tubtob sa katapusan sang sistema sang mga butang.” (Mat. 28:20) Masaligan bala ini nga saad? Sang nagligad nga 15 ka tuig, nagdamo ang kongregasyon sang mga Saksi ni Jehova sa bug-os nga kalibutan halin sa mga 70,000 pakadto sa kapin sa 100,000. Kapin sa 40 porsiento ini nga pag-uswag. Kamusta naman ang kadamuon sang bag-o nga mga disipulo? Halos 4.5 milyones ka disipulo ang nabawtismuhan sang nagligad nga 15 ka tuig. Nagapahangop ini nga kapin sa 800 ang ginabawtismuhan kada adlaw. Ining daku nga pag-uswag nagapamatuod gid nga ginadumalahan ni Cristo ang iya hinaplas nga mga sumulunod sa ila ginahiwat nga mga miting sa kongregasyon kag nagasakdag sa ila paghimo sing disipulo nga hilikuton.
Ang Ulipon Matutom kag Mainandamon
11, 12. Paano nangin matutom kag mainandamon ang ulipon?
11 Bangod bug-os ang pagsalig ni Jehova kag ni Jesucristo sa matutom kag mainandamon nga ulipon, indi bala nga dapat amo man sini ang aton himuon? Ini bangod ginpamatud-an sang ulipon nga matutom sila sa ila hilikuton. Halimbawa, ginabalhag na sa sulod sang 130 ka tuig ang Lalantawan. Ang mga miting, mga asambleya, kag mga kombension sang mga Saksi ni Jehova padayon nga nagapalig-on sa aton sa espirituwal.
12 Mainandamon man ang matutom nga ulipon bangod wala sila nagauna sa mga panuytoy ni Jehova, ukon nagapalantang sa pagsunod sa maathag nga mga panuytoy sang Dios. Halimbawa, samtang ginatugutan ukon hayag nga ginaugyunan sang lider sang butig nga mga relihion ang makagod kag di-diosnon nga paggawi sang mga tawo, nagapaandam naman ang ulipon batok sa mga siod sining malaut nga sistema ni Satanas. Makahatag sing maalamon kag suno sa tion nga paandam ang ulipon bangod ginapakamaayo sila ni Jehova nga Dios kag ni Jesucristo. Gani, nagakaigo nga saligan gid naton sing bug-os ini nga ulipon. Apang, paano naton mapakita nga nagasalig kita sa matutom kag mainandamon nga ulipon?
“Magaupud” sa Hinaplas Samtang Nagasunod Sila sa Kordero
13. Suno sa tagna ni Zacarias, paano kita makapakita sing pagsalig sa matutom kag mainandamon nga ulipon?
13 Ang tulun-an sa Biblia nga Zacarias nagsiling tuhoy sa “napulo ka tawo” nga nagpalapit “sa isa ka Judiyo” kag nagsiling: “Magaupud kami sa inyo.”(Basaha ang Zacarias 8:23.) Bangod ang “isa ka Judiyo” ginpatuhuyan nga “inyo,” ginapakita sini nga isa sia ka grupo sang mga tawo. Sa aton tion, nagapatuhoy sia sa nagkalabilin nga hinaplas nga mga Cristiano—nga bahin sang “Israel sang Dios.” (Gal. 6:16) Ang “napulo ka tawo gikan sa tanan nga hambal sang mga pungsud” nagapatuhoy sa dakung kadam-an sang iban nga mga karnero. Subong nga ang hinaplas nga mga Cristiano nagasunod kay Jesus bisan diin sia magkadto, ang dakung kadam-an ‘nagaupud’ man sa matutom kag mainandamon nga ulipon. Indi gid dapat mahuya ang dakung kadam-an sa pagpakilala sang ila kaugalingon nga mga kaupod sang “mga umalambit sa langitnon nga pagtawag.” (Heb. 3:1) Wala man mahuya si Jesus sa pagtawag sa mga hinaplas nga iya “kauturan.”—Heb. 2:11.
14. Paano mapakita ang mainunungon nga pagsakdag sa mga kauturan ni Cristo?
14 Ginakabig ni Jesucristo ang mainunungon nga pagsakdag sa iya mga kauturan subong pagsakdag sa iya. (Basaha ang Mateo 25:40.) Paano masakdag sang mga may paglaum sa duta ang hinaplas nga mga kauturan ni Cristo? Ang panguna nga paagi amo ang pagbulig sa ila sa pagbantala sing Ginharian. (Mat. 24:14; Juan 14:12) Samtang nagadiutay ang mga hinaplas diri sa duta, nagadamo naman ang iban nga mga karnero. Kon nagapakigbahin sa pagbantala ang mga may paglaum sa duta, kon posible subong bug-os tion nga mga ebanghelisador, ginabuligan nila ang mga hinaplas sa pagtuman sang ila asaynment nga paghimo sing disipulo. (Mat. 28:19, 20) Ginapakita man nila ang ila pagsakdag sa sini nga hilikuton paagi sa pag-amot sa nanuhaytuhay nga paagi.
15. Ano ang dapat nga reaksion sang isa ka Cristiano tuhoy sa suno sa tion nga espirituwal nga pagkaon kag sa mga desisyon nga ginahimo sang ulipon para sa aton organisasyon?
15 Subong isa ka Cristiano, paano naton ginatamod ang suno sa tion nga espirituwal nga pagkaon nga ginaaman sang matutom nga ulipon paagi sa pasad sa Biblia nga mga publikasyon kag sa Cristianong mga pagtilipon? Mapinasalamaton bala naton nga ginabaton ini kag handa pirme sa pag-aplikar sang aton natun-an? Ano ang aton reaksion sa mga desisyon nga ginahimo sang ulipon para sa aton organisasyon? Ang aton kahanda sa pagsunod sa ila panuytoy nagapakita sang aton pagtuo sa kahimusan ni Jehova.—Sant. 3:17.
16. Ngaa dapat mamati ang tanan nga Cristiano sa mga kauturan ni Cristo?
16 “Ang akon mga karnero nagapamati sa akon tingog,” siling ni Jesus, “kag kilala ko sila, kag nagasunod sila sa akon.” (Juan 10:27) Matuod ini para sa hinaplas nga mga Cristiano. Kamusta naman ang mga ‘nagaupud’ sa ila? Dapat sila mamati kay Jesus. Dapat man sila mamati sa iya mga kauturan. Kay man, ginsalig sa ila ang panguna nga responsibilidad sa pagtatap sa espirituwal nga kaayuhan sang katawhan sang Dios. Ano ang nadalahig sa pagpamati sa tingog sang mga kauturan ni Cristo?
17. Ano ang nadalahig sa pagpamati sa ulipon?
17 Ang matutom kag mainandamon nga ulipon nga ginatiglawas sang Nagadumala nga Hubon, amo ang nagapanguna kag nagapahituhog sa hilikuton nga pagbantala sang Ginharian sa bug-os nga duta. Mga eksperiensiado kag hinaplas nga mga gulang ang katapo sang Nagadumala nga Hubon. Mahimo sila ilaragway subong “mga nagapanguna” sa aton. (Heb. 13:7) Sa pagtatap sang sobra sa 7,000,000 ka manugbantala sang Ginharian sa bug-os nga duta sa kapin 100,000 ka kongregasyon, ining hinaplas nga mga manugtatap “may madamo pirme nga ginahimo sa hilikuton sang Ginuo.” (1 Cor. 15:58) Ang pagpamati sa ulipon nagapahangop sang aton bug-os nga kooperasyon sa Nagadumala nga Hubon.
Ginapakamaayo ang mga Nagapamati sa Ulipon
18, 19. (a) Paano pakamaayuhon ang mga nagapamati sa matutom kag mainandamon nga ulipon? (b) Ano dapat ang aton determinado nga himuon?
18 Sugod sang pagtangdo sa ila, ang matutom kag mainandamon nga ulipon ‘nagpaliso sang madamu sa pagkamatarung.’ (Dan. 12:3) Nalakip sa ila ang mga may paglaum nga makalampuwas sa kalaglagan sining malaut nga sistema sang mga butang. Daku gid nga pagpakamaayo nga makatigayon sing matarong nga tindog sa atubangan sang Dios!
19 Sa palaabuton, kon ‘ang balaan nga siudad, ang Bag-o nga Jerusalem [nga ginahuman sang 144,000] magpanaug halin sa langit gikan sa Dios, nga nahanda subong isa ka nobya nga napunihan para sa iya bana,’ ano ang maeksperiensiahan sang mga nagapamati sa tingog sang ulipon? “Ang Dios mismo mangin kaupod nila,” siling sang Biblia. “Kag pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.” (Bug. 21:2-4) Gani, dapat kita mamati kay Cristo kag sa iya ginasaligan nga hinaplas nga mga kauturan.
Ano ang Imo Natun-an
• Ano ang pamatuod nga ginasaligan ni Jehova ang matutom kag mainandamon nga ulipon?
• Ano ang nagapakita nga ginasaligan sing bug-os ni Jesucristo ang ulipon?
• Ngaa takus sang aton pagsalig ang matutom nga tulugyanan?
• Paano naton mapakita nga nagasalig kita sa ulipon?
[Mga Pamangkot sa Pagtinuon]
[Retrato sa pahina 25]
Kilala mo bala kon sin-o ang ginpili ni Jehova nga mangin palaabuton nga nobya sang iya Anak?
[Retrato sa pahina 26]
Ginsalig ni Jesus ang iya “pagkabutang” sa matutom kag mainandamon nga ulipon
[Retrato sa pahina 27]
Kon nagapakigbahin kita sa pagbantala, ginasakdag naton ang mga hinaplas
