Paano Ka Makabatas sa Pagbantala?

NAKAAGI ka na bala nga ginluyahan sing buot kag daw mauntat na sa pagbantala? Ang grabe nga paghingabot, kabalaka, balatian, pag-ipit sang imo mga kaupod, ukon ang indi pagsapak sang mga tawo mahimo magtilaw sang aton pagbatas. Apang, hunahunaa ang halimbawa ni Jesus. Ginbatas niya ang pinakamabudlay nga pagtilaw “tungod sa kalipay nga ginbutang sa iya atubangan.” (Heb. 12:2) Nahibaluan niya nga kon mapamatud-an niya nga indi matuod ang mga panumbungon batok sa Dios, mapahalipay niya ang tagipusuon ni Jehova.—Hulu. 27:11.

Kon magbatas ka sa pagbantala, mapahalipay mo man ang tagipusuon ni Jehova. Apang, paano kon ang pila ka kabudlayan mahimo mag-ubos sang imo kusog sa pagbantala? Si Krystyna nga tigulang na kag balatianon nga utod nagsiling: “Pirme gid ako ginakapoy kag ginaluyahan sing buot. Ang mga problema ko tungod sa katigulangon subong sang balatian kag kabalaka sa adlaw-adlaw nagabuhin sang akon kakugi kon kaisa.” Paano ka makabatas sa pagbantala sa pihak sining mga kabudlayan?

Iluga ang mga Manalagna

Agod makabatas sa pagbantala, mahimo tinguhaan sang matutom nga mga manugbantala nga ilugon ang mga manalagna sadto. Halimbawa, dumduma si Jeremias. Sang gintangdo sia nga mangin manalagna, namalibad sia sang primero. Apang, nabatas ni Jeremias ang iya mabudlay nga asaynment sing sobra 40 ka tuig bangod natun-an niya nga magsalig gid sa Dios.—Jer. 1:6; 20:7-11.

Si Henryk, napalig-on gid sang halimbawa ni Jeremias. Nagsiling sia: “Sa sobra 70 ka tuig ko nga pagbantala, nagaluya man ang akon buot kon kaisa bangod sa reaksion sang mga tawo, sa ila kapintas, ukon sa ila di-pagsapak. Sa sina nga mga tion, ginadumdom ko ang halimbawa ni Jeremias. Ang iya suod nga kaangtanan kag gugma kay Jehova amo ang nagpalig-on sa iya nga magpadayon sa pagpanagna.” (Jer. 1:17) Si Rafał napabakod man sang halimbawa ni Jeremias. Nagsiling sia: “Sa baylo nga panumdumon ang iya kaugalingon kag ang iya ginabatyag, nagsalig si Jeremias sa Dios. Maisugon sia nga nagpadayon bisan pa nga naakig gid ang mga tawo sa iya. Ginatinguhaan ko gid nga dumdumon ini pirme.”

Ang isa pa nga makabulig sa madamo agod makabatas sa ila pagbantala amo ang halimbawa ni manalagna Isaias. Ginsilingan sia sang Dios nga indi sia pagpamatian sang iya mga kasimanwa. “Patamboka ang tagiposoon sini nga katawohan, kag pabungula ang ila mga idulungug,” siling ni Jehova. Mapaslawan bala si Isaias? Sa pagtamod sang Dios, indi. Sang ginsugo sia nga magpanagna, nagsiling sia: “Yari ako! Ipadala ako.” (Isa. 6:8-10) Nagpadayon si Isaias sa pagpanagna. Amo man bala sini ang imo reaksion sa sugo nga magbantala?

Subong sang ginhimo ni Isaias, likawan man naton nga magkonsentrar sa negatibo nga mga reaksion. Kon himuon naton ini, makabatas kita sa pagbantala bisan pa wala nagasapak ang mga tawo. Nalandas ni Rafał ang kaluya sing buot. Paano? Sia nagsiling: “Wala ko ginapensar ang masakit nga ginahambal sang mga tawo kay pagusto lang sila kon ano ang ila ihambal.” Nagsiling man si Ana: “Ginalikawan ko nga pamensaron ang bisan ano nga butang nga makapaluya sa akon. Nakabulig sa akon ang pangamuyo kag pagbinagbinag sang teksto kada adlaw antes ako magbantala. Sa sini nga paagi, nagakadula lang dayon ang akon mga ginapamensar nga negatibo.”

Si manalagna Ezequiel nagpanagna sa batinggilan nga mga Judiyo nga gintapok sa Babilonia. (Ezeq. 2:6) Kon indi pag-isugid sang manalagna ang ginsiling sang Dios sa mga tawo, kag mapatay ang isa nga malaut nga wala napaandaman, may salabton si Ezequiel. Ginsilingan sia ni Jehova:  “Ang iya dugo kinahanglanon ko sa imo kamut.”—Ezeq. 3:17, 18.

Gintinguhaan ni Henryk nga ilugon ang pagtamod ni Ezequiel: “Luyag ko mangin matinlo sa dugo sang tanan nga tawo. Nakataya diri ang ila hamili nga kabuhi.” (Binu. 20:26, 27) Amo man sini ang ginbatyag ni Zbigniew: “Kinahanglan magpadayon si Ezequiel bisan ano man ang ihambal sang iban. Nakabulig ini sa akon nga tamdon ang pagbantala suno sa pagtamod sang Manunuga.”

Wala Ka Nagaisahanon

Wala ka nagaisahanon kon nagabantala. Kaangay ni apostol Pablo, makasiling kita: “Kami masigkamanugpangabudlay sang Dios.” (1 Cor. 3:9) Si Krystyna, nga pirme lang ginaluyahan sing buot, nagsiling: “Amo ini ang rason kon ngaa pirme ako nagapangayo sing kusog kay Jehova kag pirme gid niya ako ginapamatian.” Huo, kinahanglan gid naton ang pagsakdag sang espiritu sang Dios sa aton pagbantala!—Zac. 4:6.

Kon nagabantala kita, ang balaan nga espiritu makabulig man sa aton nga ipakita “ang mga bunga sang espiritu.” (Gal. 5:22, 23) Makabulig ini sa aton nga magpadayon sa pagbantala bisan ano man ang reaksion sang mga tawo. Si Henryk nagsiling: “Ang pagbantala nakabulig sa akon nga pauswagon ang akon personalidad. Natun-an ko nga magpasensia, magpakita sing konsiderasyon, kag indi dayon mag-ampo.” Ang pagbatas sa pagbantala bisan pa may mga kabudlayan makabulig sa aton nga palambuon pa gid ang mga bunga sang espiritu.

Ginagamit man ni Jehova ang mga anghel agod tuytuyan ining pinasahi nga hilikuton. (Bug. 14:6) Ginapakita sang Biblia nga may “linaksa ka linaksa kag linibo ka linibo” ka anghel. (Bug. 5:11) Sa idalom sang panuytoy ni Jesus, ang mga anghel nagabulig sa mga alagad sang Dios sa duta. Ginapanumdom mo bala ini kon nagabantala ka?

“Napalig-on gid ako kon dumdumon ko nga kaupod ko ang mga anghel sa akon pagbantala,” siling ni Ana. “Ginaapresyar ko ang ila bulig sa idalom sang panuytoy ni Jehova kag ni Jesus.” Pribilehiyo gid naton nga magbantala kaupod sining matutom nga mga anghel!

Kamusta naman ang aton kaupod nga mga manugbantala? Ginapakamaayo gid kita nga nangin kaupod naton ang madamo kag matutom nga mga Saksi. Wala sing duhaduha nga napamatud-an mo gid nga matuod ang ginsiling sang Biblia: “Ang salsalon nagapatalum sang salsalon, sa amo ang tawo nagapatalum sang nawung sang iya abyan.”—Hulu. 27:17.

Ang pagbantala upod sa iban nagahatag sa aton sing kahigayunan nga makatuon sa epektibo nga mga pamaagi sang iban nga mahimo bag-o sa aton. Nagsiling si Elżbieta: “Kon nagabantala ako upod sa lainlain nga kauturan, mapakita ko ang akon gugma sa ila kag sa mga tawo nga amon ginabantalaan.” Tilawi nga makig-upod sa lainlain nga kauturan. Mapauswag sini ang imo pamaagi sa pagbantala kag makadugang sa imo kalipay.

Atipana ang Imo Kaugalingon

Agod mahuptan ang aton kapagsik sa pagbantala dapat may maayo kita nga plano, maayo nga iskedyul para sa personal nga pagtuon, kag bastante nga pahuway. Buot silingon, dapat naton atipanon ang aton espirituwal kag pisikal nga kapagros.

Ang Biblia nagsiling: “Ang mga hunahuna sang mapisan nagapadolong lamang sa kabuganaan.” (Hulu. 21:5) Si Zygmunt nga 88 anyos na karon, nagsiling: “Ang maayo nga iskedyul sa pagbantala nakabulig sa akon nga malab-ot ang akon mga tulumuron. Ginabalanse ko sing maayo ang akon oras agod may bastante ako nga tion sa pagbantala.”

Ang madalom nga ihibalo sa Biblia makapabakod kag makabulig sa aton pagbantala. Subong nga kinahanglan naton ang pisikal nga pagkaon agod indi kita magluya, kinahanglan man naton ang regular nga espirituwal nga pagkaon agod makapadayon kita sa pagbantala. Ang pagkaon sing Pulong sang Dios adlaw-adlaw kag pagtigayon sing “pagkaon sa nagakaigo nga tion” makahatag sa aton sing kusog sa pagbantala.—Mat. 24:45-47.

Ginbag-o man ni Elżbieta ang iya estilo sa kabuhi agod mapauswag ang iya pagbantala. Nagsiling sia: “Ginbuhinan ko ang tion sa paglantaw  sing TV agod madugangan ang akon tion sa paghanda para sa pagbantala. Kon ginabasa ko ang Biblia kada gab-i, ginapensar ko ang mga tawo nga makilala ko sa teritoryo. Nagapangita ako sing mga teksto kag mga artikulo nga makabulig sa ila.”

Ang pagpahuway sing maayo makabulig sa imo nga mahuptan ang imo kusog agod makapakigbahin sa pagbantala tubtob sa imo masarangan. Sa pihak nga bahin, ang sobra nga paglingawlingaw makabuhin sa kalidad sang imo pagbantala. Ang mapisan nga manugbantala nga si Andrzej nagsiling: “Kon kulang ang imo pahuway madali ka makapoy, kag bangod sina madasig ka man nga maluyahan. Ginahimo ko gid ang tanan agod malikawan ini.”—Man. 4:6.

Sa pihak sang aton panikasog, diutay lang gihapon ang nagabaton sang maayong balita. Apang, indi pagkalimtan ni Jehova ang aton ginhimo. (Heb. 6:10) Bisan pa madamo ang indi mag-atubang sa aton, mahimo nga istoryahan nila ang aton pagbisita kon wala na kita. Ang resulta mangin kaangay sa aton mabasa tuhoy kay Ezequiel: “Magakilala sila [ang mga tawo] nga may manalagna sa tunga nila.” (Ezeq. 2:5) Indi gid mahapos ang aton pagbantala apang makabenepisyo kita sa sini subong man ang mga tawo nga nagapamati sa aton.

“Ang pagbantala nakabulig sa aton nga isuklob ang bag-o nga personalidad kag ipakita ang aton gugma sa Dios kag sa aton isigkatawo,” siling ni Zygmunt. “Pribilehiyo gid naton nga makigbahin sa sining nagaluwas-kabuhi nga hilikuton. Indi na gid ini masulit sa amo sini nga kasangkaron kag kahimtangan,” siling ni Andrzej. Makatigayon ka man sing madamo nga pagpakamaayo kon magbatas ka sa pagbantala karon.—2 Cor. 4:1, 2.

[Retrato sa pahina 31]

Ang pag-atipan sang aton espirituwal kag pisikal nga kinahanglanon makabulig sa aton nga magbatas sa pagbantala