Pagdiskobre sang Natago nga mga Bahandi

NAKADISKOBRE ka na bala sing bahandi sa lugar nga wala mo ginapaabot? Natabo ini sang Marso 27, 2005 kay Ivo Laud, nga isa ka Saksi ni Jehova sa Estonia. Ginabuligan niya sadto sa pagguba sang daan na nga balaybalay si Alma Vardja, isa ka may edad na nga Saksi. Samtang ginakakas nila ang dingding sa gua, may nakita sila nga tapi nga nagatabon sa kilid sang haligi. Sang ginkakas nila ini, may nasapwan sila nga guhab nga mga 10 sentimetros ang kalaparon, 1.2 metros ang kataason, kag 10 sentimetros ang kadalumon, nga ginatakpan sang amo man ka daku nga tapi. (1) Bulutangan ini sang natago nga mga bahandi! Ano ini nga mga bahandi? Sin-o ang nagtago sini?

May nakita sila didto nga mga butang nga naputos sang madamol nga papel. (2) Ang unod sining mga pinutos  amo ang mga literatura sang mga Saksi ni Jehova, nga ang kalabanan mga tulun-an nga artikulo sa Lalantawan. Ang iban sini, sang 1947 pa ang petsa. (3) Ginsulat ini sing maid-id sa Estoniano nga lenguahe. Ang iban nga pinutos may mga palatandaan kon sin-o ang nagtago sang literatura subong sang mga rekord sang pag-interogar sa bana ni Alma nga si Villem Vardja. May mga impormasyon man ini kon pila sia ka tuig nga ginpriso. Ngaa ginpriso sia sadto?

Si Villem Vardja nagapangalagad sa Kongregasyon sang Tartu kag sang ulihi sa Kongregasyon sang Otepää sa Estonia, nga ginatawag sadto Soviet Socialist Republics. Mahimo natun-an niya ang kamatuoran sa Biblia antes sang Inaway Kalibutan II. Pila ka tuig sang ulihi, sang Disiembre 24, 1948, gin-aresto si Villem Vardja sang Komunista nga pagginahom bangod sang iya hilikuton. Gin-interogar kag ginkastigo sia sang mga pulis samtang ginapilit sia nga isugid sa ila ang ngalan sang iban nga Saksi. Wala na sia gintugutan nga pangapinan ang iya kaugalingon sa korte, gani ginsentensiahan sia sing napulo ka tuig nga pagkapriso sa Rusya.

Si Villem Vardja nangin matutom kay Jehova tubtob napatay sia sang Marso 6, 1990. Wala gid sing ideya ang iya asawa nga may natago didto nga mga literatura. Mahimo nga luyag niya maamligan ang iya asawa kon interogahon gid man ini. Ngaa kinahanglan niya taguon ang mga literatura? Bangod sa masami, ang Soviet State Security Committee ukon KGB gulpi lang nga nagapangusisa kon bala may mga publikasyon sa mga balay sang mga Saksi ni Jehova. Mahimo nga gintago ni Utod Vardja ang mga literatura agod siguraduhon nga may mabilin gid nga espirituwal nga pagkaon para sa mga kauturan kon kuhaon gid man ini tanan sang KGB. May iban pa nga talaguan sang literatura nga nasapwan sang 1990. Ang isa nasapwan sa Tartu, sa nabagatnan nga Estonia. Si Villem Vardja man gihapon ang nagtago sadto nga literatura.

Ngaa makabig naton nga bahandi ini nga mga dokumento? Bangod ang pagpangabudlay sa pagsulat kag pagtago sini nga mga literatura nagapakita sang apresasyon sang mga Saksi sa espirituwal nga pagkaon sadto nga tion. (Mat. 24:45) Ginaapresyar mo bala ang espirituwal nga mga aman nga nabaton mo sa inyo lugar? Nalakip sa sini ang Lalantawan sa Estoniano nga lenguahe kag kapin sa 170 ka iban pa nga lenguahe.