Pauswaga ang Imo mga Pangamuyo Paagi sa Pagtuon sa Biblia
Pauswaga ang Imo mga Pangamuyo Paagi sa Pagtuon sa Biblia
“O Ginoo, magtalupangud karon ang imo idulungug sa pangamuyo sang imo alagad.”—NEH. 1:11.
1, 2. Ngaa makabenepisyo kita kon binagbinagon naton ang mga pangamuyo nga narekord sa Biblia?
ANG pangamuyo kag pagtuon sa Biblia importante gid nga bahin sang matuod nga pagsimba. (1 Tes. 5:17; 2 Tim. 3:16, 17) Ang Biblia indi isa ka libro sang mga pangamuyo. Apang, nagaunod ini sang madamo nga pangamuyo, lakip na ang mga pangamuyo sa tulun-an sang mga Salmo.
2 Samtang ginabasa mo kag ginatun-an ang Biblia, mahimo mabasahan mo ang mga pangamuyo nga pareho gid sa kahimtangan nga imo ginaatubang. Sa pagkamatuod, magauswag ang imo mga pangamuyo kon magkuha ka sing ideya sa mga pangamuyo nga narekord sa Kasulatan. Ano ang matun-an mo sa pangamuyo sang mga alagad sang Dios sang una? Ngaa ginsabat ang ila mga pangamuyo?
Hibalua kag Sunda ang Panuytoy sang Dios
3, 4. Ano ang misyon sang alagad ni Abraham, kag ano ang matun-an naton sa nangin resulta sini?
3 Sa imo pagtuon sa Biblia, nahibaluan mo nga dapat ka pirme mangayo sing panuytoy sang Dios paagi sa pangamuyo. Binagbinaga ang natabo sang ginpadala ni Abraham ang iya pinakatigulang nga alagad nga si Eliezer sa Mesopotamia agod mangita sing mahinadlukon sa Dios nga asawa para kay Isaac. Sang may nakita sia nga mga babayi nga nagasag-ub sa bubon, ang alagad nangamuyo: “O GINOO, . . . pahanabu-a nga ang dalaga nga sa iya magsiling ako, ‘Ipapanaug ang imo tibud, ginaampo ko, agud nga mag-inum ako,’ kag sia magasiling, ‘Inum ka, kag paimnon ko man ang imo mga camelyo’—mangin-amo sia ang ginpat-ud mo nga sa imo alagad nga si Isaac. Sa sini makilala ko nga nagpakita ka sing malig-on nga paghigugma sa akon agalon.”—Gen. 24:12-14.
4 Ang pangamuyo sang alagad ni Abraham ginsabat sang ang iya mga kamelyo ginpainom ni Rebeca. Nag-upod dayon si Rebeca sa iya sa Canaan kag nangin pinalangga nga asawa ni Isaac. Siempre, indi ka makapaabot nga hatagan man ikaw sang Dios sing pinasahi nga tanda. Apang, tuytuyan niya ikaw sa imo kabuhi kon mangamuyo ka kag mangin determinado nga magpatuytoy sa iya espiritu.—Gal. 5:18.
Ang Pangamuyo Makapahaganhagan sang Kabalaka
5, 6. Ano ang talalupangdon sa pangamuyo ni Jacob sang manugkitaay na sila ni Esau?
5 Ang pangamuyo makapahaganhagan sang kabalaka. Halimbawa, sang si Jacob nag-atubang sing katalagman sa iya kapid nga si Esau, nangamuyo sia: “O GINOO . . . indi ako takus sang kubus gid sang tanan nga malig-on nga paghigugma kag sang tanan nga pagkatutum nga imo ginpakita sa imo alagad . . . Luwasa ako, ginaampo ko sa imo, sa kamut sang akon utud, sa kamut ni Esau, kay nahadluk ako sa iya, basi mag-abut sia kag laglagon kami tanan, ang mga iloy kaupud sang kabataan. Apang ikaw nagsiling, ‘Ako magahimo sa imo sing maayo, kag magahimo sang imo mga kaliwatan subong sang balas sang dagat, nga indi sarang maisip bangud sang kadamuon.’”—Gen. 32:9-12.
6 Bisan pa nagpangandam si Jacob sa ila pagkitaay ni Esau, ginsabat ang iya pangamuyo sang nagkit-anay sila nga mahidaiton. (Gen. 33:1-4) Basaha sing maayo ang iya pangamuyo, kag makita mo nga wala lamang nangayo sing bulig si Jacob. Ginpabutyag niya ang iya pagtuo sa ginsaad nga Binhi kag ginpasalamatan ang wala tupong nga kaayo sang Dios. Nagabatyag ka man bala sing “kahadlok” kon kaisa? (2 Cor. 7:5) Kon amo, dumduma nga ginpakita sang eksperiensia ni Jacob nga ang mga pangamuyo makapahaganhagan sang kabalaka. Apang, inang mga pangamuyo dapat nga indi lamang mga pangabay, kundi dapat nga magapakita man sang aton pagtuo.
Mangamuyo Para sa Kaalam
7. Ngaa nangamuyo si Moises kay Jehova nga hatagan sia sing ihibalo tuhoy sa Iya dalanon?
7 Ang aton handum nga pahamut-an si Jehova amo dapat ang magpahulag sa aton nga mangamuyo para sa kaalam. Amo sina ang ginhimo ni Moises. “Tan-awa,” pangamuyo niya, “nagasiling ka [Jehova] sa akon, ‘Pataklara ining katawohan [gikan sa Egipto]’ . . . Busa karon, ginaampo ko sa imo, kon nakapahamuut ako sa imo itololok, ipakilala mo sa akon karon ang imo mga dalanon, . . . sa katuyoan nga makapahamuut ako sa imo itololok.” (Ex. 33:12, 13) Bilang sabat, ginhatagan sang Dios si Moises sing daku nga ihibalo sa Iya mga dalanon nga kinahanglanon gid niya agod mapangunahan ang katawhan ni Jehova.
8. Paano makabulig sa imo ang pagpamalandong sa 1 Hari 3:7-14?
8 Si David nangamuyo man: “Ipakita sa akon ang imo mga dalanon, O GINOO.” (Sal. 25:4) Ang iya anak nga si Solomon nagpakitluoy sa Dios nga hatagan sia sang kaalam nga iya kinahanglan agod matuman niya ang iya mga katungdanan subong hari sa Israel. Ang pangamuyo ni Solomon nagpahamuot kay Jehova. Gani, wala lamang sia ginhatagan sang iya ginpangabay kundi ginhatagan man sia sing manggad kag kadungganan. (Basaha ang 1 Hari 3:7-14.) Kon nakabaton ka sing mga pribilehiyo sa kongregasyon kag nagabatyag nga daw indi mo ini masarangan, mangamuyo sing kaalam kag mangin mapainubuson. Sa amo, buligan ka sang Dios nga matigayon ang ihibalo kag kaalam nga imo kinahanglan agod maatipan mo ang imo mga katungdanan sa nagakaigo kag mahigugmaon nga paagi.
Mangamuyo Gikan sa Tagipusuon
9, 10. Ano ang natalupangdan mo sa pagsambit ni Solomon sang tagipusuon sa iya pangamuyo sa inagurasyon sang templo?
9 Agod pamatian ang aton pangamuyo, dapat nga magagikan ini sa aton tagipusuon. Sa 1 Hari kapitulo 8, si Solomon nagpabutyag sing tinagipusuon nga pangamuyo sa atubangan sang nagtipon nga kadam-an sa Jerusalem para sa inagurasyon sang templo ni Jehova sang 1026 B.C.E. Pagkatapos mabutang ang kaban sang katipan sa Labing Balaan kag napuno sang panganod ni Jehova ang templo, gindayaw ni Solomon ang Dios.
10 Tun-i ang pangamuyo ni Solomon, kag talupangda nga pila ka beses niya ginsambit ang tagipusuon. Ginkilala ni Solomon nga si Jehova gid lamang ang makabasa sang tagipusuon sang tawo. (1 Hari 8:38, 39) Ginpakita man sini nga pangamuyo nga may yara paglaum ang isa nga nakasala nga luyag ‘magbalik sa Dios sing bug-os tagiposoon.’ Kon ang katawhan sang Dios mabihag sang ila kaaway, ang ila mga pangamuyo pamatian kon ang ila tagipusuon bug-os para kay Jehova. (1 Hari 8:48, 58, 61) Gani, maathag nga ang aton mga pangamuyo dapat naggikan gid sa aton tagipusuon.
Kon Paano ang mga Salmo Makapauswag sang Imo mga Pangamuyo
11, 12. Ano ang matun-an mo sa pangamuyo sang isa ka Levinhon nga indi makakadto sa santuaryo sang Dios?
11 Ang pagtuon sa mga Salmo makabulig sa imo nga mapauswag ang imo mga pangamuyo kag mangin mapailubon sa paghulat nga sabton ini sang Dios. Binagbinaga ang pagpailob sang isa ka gintapok nga Levinhon. Bisan pa indi sia makakadto sa santuaryo ni Jehova, nag-amba sia: “Ngaa bala nagakasubo ka, O kalag ko, kag ngaa bala indi ka mapahamtang? Maghulat ka sa Dios, kay dayawon ko sia subong akon daku nga manluluwas kag akon Dios.”—Sal. 42:5, 11; 43:5, NW.
12 Ano ang imo matun-an sa sina nga Levinhon? Kon nabilanggo ka bangod sa pagkamatarong kag indi na makapakig-upod sa imo mga masigkatumuluo sa duog sang pagsimba, mapailubon nga maghulat sa bulig sang Dios. (Sal. 37:5) Pamalandungi ang imo makalilipay nga mga tion sa pag-alagad, kag mangamuyo nga makabatas ka samtang ‘nagahulat sa Dios’ nga hilwayon ka kag makapakig-upod liwat sa iya katawhan.
Mangamuyo nga May Pagtuo
13. Suno sa Santiago 1:5-8, ngaa dapat kita mangamuyo nga may pagtuo?
13 Bisan ano man ang imo kahimtangan, mangamuyo pirme nga may pagtuo. Kon ginatilawan ang imo integridad, sunda ang laygay ni disipulo Santiago. Mangamuyo ka kay Jehova, kag indi magduhaduha nga hatagan ka niya sing kaalam nga kinahanglanon mo sa pag-atubang sa pagtilaw. (Basaha ang Santiago 1:5-8.) Nakahibalo ang Dios kon ano ang nagatublag sa imo hunahuna, kag sarang ka niya maggiyahan kag malugpayan paagi sa iya espiritu. Ipabutyag ang imo balatyagon nga may bug-os nga pagtuo nga “wala gid nagaduhaduha,” kag batuna ang panuytoy sang iya espiritu kag ang laygay sang iya Pulong.
14, 15. Ngaa makasiling kita nga si Ana nangamuyo kag nanghikot nga may pagtuo?
14 Si Ana nga isa sa duha ka asawa sang Levinhon nga si Elcana, nangamuyo kag nanghikot nga may pagtuo. Bangod si Ana wala sing anak, ginayaguta sia sang isa pa ka asawa ni Elcana nga si Penina, nga madamo sing anak. Nagkadto si Ana sa tabernakulo kag nanaad nga kon makabun-ag sia sing isa ka anak nga lalaki, ihatag niya ini kay Jehova. Bangod nagakutibkutib ang iya mga bibig samtang nagapangamuyo, naghunahuna ang Mataas nga Saserdote nga si Eli nga hubog sia. Sang nahibaluan ni Eli nga indi gali hubog si Ana, nagsiling sia: “Ang Dios sang Israel maghatag sa imo sang imo pangabay.” Bisan pa wala nahibaluan ni Ana kon ano gid ang mangin resulta sang iya pangamuyo, nagtuo sia nga sabton ini sang Dios. Gani, “ang iya nawung indi na masubu.” Wala na sia naluyahan sing buot.—1 Sam. 1:9-18.
15 Sang nabun-ag kag nalutas na si Samuel, gindala sia ni Ana sa tabernakulo agod mag-alagad kay Jehova. (1 Sam. 1:19-28) Ang pagpamalandong sa pangamuyo ni Ana makabulig sa imo nga mapauswag ang imo mga pangamuyo. Kon mangamuyo ka nga may pagtuo kag magsalig nga sabton ini ni Jehova, malandas mo ang bisan ano nga kasubo nga imo nabatyagan bangod sa problema.—1 Sam. 2:1-10.
16, 17. Ano ang natabo bangod nangamuyo si Nehemias kag nanghikot nga may pagtuo?
16 Ang matarong nga tawo nga si Nehemias nga nagkabuhi sang ika-5 nga siglo B.C.E. nangamuyo kag nanghikot nga may pagtuo. Nangabay sia: “O Ginoo, magtalupangud karon ang imo idulungug sa pangamuyo sang imo alagad, kag sa pangamuyo sang imo mga alagad nga nagakalipay sa pagkahadluk sa imo ngalan; kag pauswaga ang imo alagad sining adlaw, kag kalooyi sia sa itololok sining lalaki.” Sin-o ‘ining lalaki’? Sia amo ang hari sang Persia nga si Hari Artajerjes nga ginaalagaran ni Nehemias subong manugtagay.—Neh. 1:11.
17 Nangamuyo si Nehemias nga may pagtuo sa sulod sang pila ka adlaw sang nahibaluan niya nga ang nahilway nga mga Judiyo gikan sa pagkatapok sa Babilonia “yara sa dakung kapipit-an kag kahuluy-an; [kag] ang kuta sang Jerusalem man nalumpag.” (Neh. 1:3, 4) Ginsabat ang mga pangamuyo ni Nehemias sing labaw sangsa iya ginpaabot sang gintugutan sia ni Hari Artajerjes nga magkadto sa Jerusalem agod tukuron liwat ang pader sini. (Neh. 2:1-8) Wala magdugay, natapos ang pagkay-o sang pader. Ang mga pangamuyo ni Nehemias ginsabat bangod nakasentro ini sa matuod nga pagsimba kag may pagtuo. Amo man bala sina ang imo mga pangamuyo?
Indi Pagkalimti ang Pagdayaw kag Pagpasalamat
18, 19. Ano ang mga rason kon ngaa ang mga alagad ni Jehova dapat magdayaw kag magpasalamat sa iya?
18 Sa imo mga pangamuyo, dumduma nga dayawon kag pasalamatan si Jehova. Madamo sing rason kon ngaa dapat naton ina himuon! Halimbawa, nalangkag gid si David nga dayawon ang pagkahari ni Jehova. (Basaha ang Salmo 145:10-13.) Ginapakita bala sang imo mga pangamuyo nga ginaapresyar mo ang pribilehiyo nga magbantala sang Ginharian ni Jehova? Ang pinamulong sang mga salmista makabulig man sa imo nga mapabutyag sa Dios paagi sa pangamuyo ang imo tinagipusuon nga pagpasalamat sa Cristianong mga miting, asembleya, kag mga kombension.—Sal. 27:4; 122:1.
19 Ang pag-apresyar sa imo hamili nga kaangtanan sa Dios mahimo magapahulag sa imo nga mangamuyo sing tinagipusuon kaangay sini: “Magapasalamat ako sa imo, O GINOO, sa tunga sang mga katawohan; magaambahan ako sa imo sing mga pagdayaw sa tunga sang mga pungsud. Kay ang imo malig-on nga paghigugma daku sa kalangitan, kag ang imo kamatooran sa kahawaan. Pakataason ka, O Dios, sa ibabaw sang kalangitan! Maglabaw sa bug-os nga duta ang imo himaya!” (Sal. 57:9-11) Daw ano ka makapalig-on ina nga pinamulong! Nagaugyon ka bala nga inang makatalandog nga mga tinaga sang mga Salmo makaimpluwensia gid kag makapauswag sang imo mga pangamuyo?
Mangamuyo sa Dios nga May Pagtahod
20. Paano ginpabutyag ni Maria ang iya debosyon sa Dios?
20 Ang pagtahod sa Dios dapat makita man sa imo mga pangamuyo. Ang matinahuron nga pangamuyo ni Maria sang nahibaluan niya nga mangin iloy sia sang Mesias kaanggid man sa pangamuyo ni Ana sang ginpresentar niya ang iya bata nga si Samuel para mag-alagad sa tabernakulo. Ang pagtahod ni Maria sa Dios makita sa iya mga pulong: “Ginapakadaku ko si Jehova, kag indi mapunggan sang akon tagipusuon nga magkalipay sing daku sa Dios nga akon Manluluwas.” (Luc. 1:46, 47) Mapauswag mo man bala ang imo mga pangamuyo paagi sa pagpabutyag sing kaanggid nga mga pinamulong? Indi katingalahan nga ang diosnon nga si Maria amo ang ginpili nga mangin iloy sang Mesias nga si Jesus.
21. Paano ang mga pangamuyo ni Jesus nagapakita sing pagtahod kag pagtuo?
21 Si Jesus nangamuyo man nga may pagtahod upod ang bug-os nga pagtuo. Halimbawa, antes niya ginbanhaw si Lazaro, “Si Jesus nagtangla kag nagsiling: ‘Amay, nagapasalamat ako sa imo nga ginpamatian mo ako. Matuod, nakahibalo ako nga pirme mo ako ginapamatian.’” (Juan 11:41, 42) Makita man bala sa imo mga pangamuyo inang pagtahod kag pagtuo? Tun-i ang matinahuron nga modelo nga pangamuyo ni Jesus, kag makita mo nga ang importante nga mga bahin sini amo ang pagpakabalaan sa ngalan ni Jehova, ang pagkari sang iya Ginharian, kag ang pagtuman sang iya kabubut-on. (Mat. 6:9, 10) Hunahunaa man ang imo mga pangamuyo. Ginapakita bala sini ang imo hanuot nga interes sa Ginharian ni Jehova, sa paghimo sang iya kabubut-on, kag sa pagpakabalaan sa iya ngalan? Dapat lang.
22. Ngaa makapat-od ka nga hatagan ka ni Jehova sing kaisog nga mabantala ang maayong balita?
22 Bangod sa mga paghingabot kag iban pa nga mga pagtilaw, masami nga ginalakip naton sa aton pangamuyo ang pagpangayo sing bulig nga hatagan kita sing kaisog sa pag-alagad kay Jehova. Sang ginmanduan sang Sanhedrin sanday Pedro kag Juan nga mag-untat sa ‘pagpanudlo sa ngalan ni Jesus,’ maisog sila nga nagpanindugan nga indi mag-untat. (Binu. 4:18-20) Sang ginbuy-an sila, ginsugiran nila ang ila mga masigkatumuluo sang natabo. Nian ang tanan nga yara didto nangamuyo sa Dios nga buligan sila nga maghambal sang iya pulong nga may kaisog. Pat-od gid nga nakunyag sila sang ginsabat ang ila pangamuyo, kay “napuno sila tanan sing balaan nga espiritu kag naghambal sila sang pulong sang Dios nga may kaisog.” (Basaha ang Binuhatan 4:24-31.) Subong resulta, madamo ang nangin mga sumilimba ni Jehova. Ang pangamuyo makapabakod man sa imo nga ibantala ang maayong balita nga may kaisog.
Padayon nga Pauswaga ang Imo mga Pangamuyo
23, 24. (a) Magsambit sang pila ka halimbawa nga nagapakita nga ang pagtuon sa Biblia makapauswag sang imo mga pangamuyo. (b) Ano ang himuon mo agod mag-uswag ang imo mga pangamuyo?
23 Madamo pa sing iban nga halimbawa nga nagapakita nga ang pagbasa kag pagtuon sang Biblia makapauswag gid sang imo mga pangamuyo. Halimbawa, kaangay ni Jonas, mahimo mo ipabutyag sa imo pangamuyo nga “ang kaluwasan nagagikan sa GINOO.” (Jon. 2:1-10) Kon ginatublag ka gihapon bangod sa isa ka mabug-at nga sala bisan pa nangayo ka na sing bulig sa mga gulang, ang balatyagon nga ginpabutyag ni David sa iya mga salmo makabulig sa imo nga ipabutyag ang imo paghinulsol paagi sa pangamuyo. (Sal. 51:1-12) Sa pila ka pangamuyo, mahimo mo madayaw si Jehova kaangay sang ginhimo ni Jeremias. (Jer. 32:16-19) Kon nagapangita ka sing tiayon, tun-i ang pangamuyo nga masapwan sa Esdras kapitulo 9, kag ipangamuyo ini. Makapalig-on ini sa imo nga tumanon ang Dios paagi sa pagminyo “lamang sa Ginuo.”—1 Cor. 7:39; Esd. 9:6, 10-15.
24 Magpadayon sa pagbasa, pagtuon, kag pag-usisa sa Biblia. Mangita sing mga punto nga mahimo mo malakip sa imo mga pangamuyo. Ining mga Makasulatanhon nga mga ideya mahimo mo malakip sa imo mga pag-ampo kag mga pangamuyo sang pagpasalamat kag pagdayaw. Makapat-od ka nga mangin suod pa gid ang imo kaangtanan kay Jehova nga Dios samtang ginapauswag mo ang imo mga pangamuyo paagi sa pagtuon sa Biblia.
Ano ang Imo Sabat?
• Ngaa dapat naton hibaluon kag sundon ang panuytoy sang Dios?
• Ano ang dapat magpahulag sa aton nga mangayo sing kaalam sa pangamuyo?
• Paano mapauswag sang mga Salmo ang aton mga pangamuyo?
• Ngaa dapat kita mangamuyo nga may pagtuo kag pagtahod?
[Mga Pamangkot sa Pagtinuon]
[Retrato sa pahina 8]
Ang alagad ni Abraham nangayo sing panuytoy sa Dios. Amo man bala sina ang imo ginahimo?
[Retrato sa pahina 10]
Ang Pangpamilya nga Pagsimba makapauswag sang imo mga pangamuyo
