Madumduman Mo Bala?

Nakabenepisyo ka bala sa pagbasa sa ulihi nga mga gua sang Ang Lalantawan? Tilawi kon masabat mo ang masunod nga mga pamangkot:

• Sa ano nga paagi ang Dios mahimo magpamanggad sa imo?

Sang una, ginpakamaayo ni Jehova sing materyal nga kamanggaran ang pila ka tawo, subong nanday Abraham kag Solomon. Apang ang kamanggaran nga ilabi na nga kinahanglanon sang mga Cristiano kag masapwan nila sa bulig sang Dios amo ang pagtuo, paghidait, pagkakontento, kag kalipay.—9/1, pahina 3-7.

• Ano ang matun-an naton sa pagluwas ni Jesus kay Pedro sang amat-amat sia nga nagalugdang sa dagat? (Mat. 14:28-31)

Kon ang isa ka utod daw nakulangan sing pagtuo, mahimo naton malaragwayon nga mauntay ang aton kamot agod buligan sia nga mapalig-on ang iya pagtuo.—9/15, pahina 8.

• Ano ang ginsakripisyo ni Jehova agod maluwas kita?

Tuman nga kasakit ang nabatyagan ni Jehova sang ginpaantos kag ginyaguta ang iya Anak. Kag, subong sang ginpakita sang kahanda ni Abraham sa paghalad sang iya anak, ginbatas ni Jehova ang kasakit sang ginpatay ang iya Anak subong isa ka kriminal.—9/15, pahina 28-29.

• Ngaa ang Vatican Codex isa ka bahandi?

Isa ini ka Griego nga manuskrito nga halos 300 ka tuig lang ang antad sa tapos makompleto ang Biblia. Nagaunod ini sang halos kompleto nga teksto sang Hebreong Kasulatan kag Cristianong Griegong Kasulatan. Isa ini ka kasangkapan nga gingamit sang mga iskolar agod mapat-od nila kon ano gid ang nasulat sa orihinal nga Biblia.—10/1, pahina 18-20.

• Ano nga leksion ang ginatudlo sang Hulubaton 24:27 tuhoy sa ‘pagpatindog sang balay’?

Ang isa ka lalaki nga luyag mangasawa kinahanglan gid nga mangin handa sa sina nga responsibilidad. Nalakip sa sini amo ang pag-aman sang materyal nga kinahanglanon sang isa ka pamilya kag pagpanguna sa espirituwal nga hilikuton sang isa ka panimalay.—10/15, pahina 12.

• Ngaa indi nagakaigo nga kabigon ang mga Saksi ni Jehova nga isa ka Protestante nga relihion?

Ang Protestante nga relihion nagsugod sa Europa sang ika-16 nga siglo sang gintinguhaan nila nga bag-uhon ang Romano Katoliko. Ang tanan nga nagasunod sang mga katuyuan sang Repormasyon gintawag nga “Protestante.” Ang mga Saksi ni Jehova bug-os tagipusuon nga nagasalig sa Biblia. Wala sila nagapati nga ang papa may daku nga awtoridad kag ginasikway man nila ang mga panudlo kag buhat nga indi suno sa Biblia nga kinaandan na nga ginahimo sang Protestante nga mga relihion.—11/1, pahina 19.

• Dapat bala ang isa ka tawo magtuon sang Hebreo kag Griego agod maintiendihan niya ang Biblia?

Indi. Bisan pa ang isa ka tawo nakahibalo sining mga lenguahe, indi niya madali mahangpan ang mensahe sang Biblia. Ang isa nga nakatuon sinang mga lenguahe nagakinahanglan gihapon magkonsulta sa mga diksionaryo kag mga libro sang grammar. Bangod gintipigan sang Dios ang mga pulong ni Jesus sa mga badbad sang Biblia sa karon, sarang matun-an sang mga tawo ang kamatuoran kag maaplikar ini sa ila kabuhi nga indi na kinahanglan magtuon sang dumaan nga mga lenguahe.—11/1, pahina 20-23.

• Paano si Jehova kag si Jesus nagpahamtang sang halimbawa sang maayong pamatasan para sa aton?

Bisan pa si Jehova ang Soberano sang bug-os nga uniberso, ginapakig-angutan niya ang mga tawo nga may kalulo kag pagtahod. Sa orihinal nga lenguahe, sang nagpakigsugilanon si Jehova kay Abraham kag kay Moises, naggamit sia sang tinaga nga palihug antes sia mangabay. (Gen. 13:14; Ex. 4:6) Ang Dios nagapamati man sa mga tawo. (Gen. 18:23-32) Amo man sini si Jesus, handa sia pirme sa pagbulig sa mga tawo nga nagakinahanglan, kag ginatawag pa gani niya sila sa ila mga ngalan.—11/15, pahina 25.

• Ngaa wala ginaselebrar sang mga Cristiano ang Chinese New Year?

Ang Chinese New Year isa ka importante nga selebrasyon sa Asia. Ginaselebrar ini sang mga tawo para suertehon kuno sila kag agod ipakita ang ila respeto sa mga espiritu. Ang mga Cristiano nagarespeto kag nagapadungog sa ila mga ginikanan, apang wala sila nagahiwat sang mga kinaonkaon nga nasentro sa pagpati nga makaupod nila ang ila napatay nga katigulangan para amligan sila ukon mangayo sing pabor sa mga dios sang ila balay.—12/1, pahina 20-23.