Ang Paggahom ni Jehova Napamatud-an nga Amo ang Pinakamaayo!
Ang Paggahom ni Jehova Napamatud-an nga Amo ang Pinakamaayo!
“Ang Labing Mataas nagagahum sa ginharian sang mga tawo.”—DAN. 4:17.
1, 2. Ano ang pila ka rason ngaa napaslawan ang paggahom sang tawo?
ANG paggahom sang tawo napaslawan! Maathag ini katama. Ang isa ka rason kon ngaa napaslawan ini bangod kulang ang kaalam sang mga tawo sa paggahom sing madinalag-on. Ang kapaslawan sang paggahom sang tawo makita naton sa aton panahon sa diin madamo nga gumalahom ang nangin ‘mahigugmaon sa kaugalingon, mahigugmaon sa kuarta, nagapabugal sang kaugalingon, matinaastaason, di-mainunungon, indi magsugot sa bisan ano nga kasugtanan, mabinutangbutangon, wala sing pagpugong sa kaugalingon, mabangis, wala sing gugma sa kon ano ang maayo, maluib, kag nagapahambog.’—2 Tim. 3:2-4.
2 Madamo nga tinuig na ang nagligad, ginsikway sang aton una nga mga ginikanan ang paggahom sang Dios. Ginhimo nila ini kay abi nila mangin independiente sila sa Dios. Apang, ang matuod, ginpasakop nila ang ila kaugalingon sa paggahom ni Satanas. Ang anom ka libo ka tuig nga paggahom sang tawo sa idalom sang impluwensia sang “manuggahom sini nga kalibutan” nga si Satanas, amo ang pinakamalain nga dag-on sa maragtas sang tawo. (Juan 12:31) Sang nagkomento ang The Oxford History of the Twentieth Century tuhoy sa kahimtangan sang katawhan karon, nagsiling ini nga wala sing pulos ang “paghandum sang isa ka himpit nga kalibutan.” Nagpaathag ini: “Indi mapaluntad sang mga tawo [ang himpit nga kalibutan], kag ang pagtinguha nga paluntaron ini nagresulta sa dalagku nga mga problema, diktatoryal, kag makasiligni nga inaway.” Isa gid ka bunayag nga pag-ako nga napaslawan ang paggahom sang tawo!
3. Ano ang masiling naton sa paggahom sang Dios kon wala kuntani nagpakasala sanday Adan kag Eva?
3 Gani, daw ano ka makapasubo nga ginsikway sang aton una nga mga ginikanan ang nagaisahanon nga madinalag-on nga paggahom—ang paggahom sang Dios! Huo, wala kita nakahibalo kon paano dumalahan ni Jehova ang duta kon nagpabilin nga matutom sanday Adan kag Eva. Apang, makasalig kita nga ang paggahom sang Dios sa katawhan mapasad gid sa gugma kag wala sing pinasulabi. (Binu. 10:34; 1 Juan 4:8) Bangod sa wala tupong nga kaalam sang Dios, makapat-od kita nga kon nagpasakop lang ang katawhan sa paggahom ni Jehova, nalikawan kuntani ang mga kasaypanan nga resulta sang paggahom sang tawo. Nangin madinalag-on kuntani ang teokrasya, ang paggahom sang Dios, sa ‘pagbusug sang handum sang tagsa ka butang nga buhi.’ (Sal. 145:16) Isa ini kuntani ka himpit nga paggahom. (Deut. 32:4) Daw ano gid ka makapasubo nga ginsikway ini sang mga tawo!
4. Tubtob sa ano nga kasangkaron ginpahanugutan si Satanas nga maggahom?
4 Dapat naton dumdumon nga bisan pa gintugutan ni Jehova ang mga tawo nga maggahom sa ila kaugalingon, wala niya gintugyan ang iya kinamatarong sa paggahom sa iya mga tinuga. Bisan ang gamhanan nga hari sang Babilonia napilitan sa pagbaton nga “ang Labing Mataas [amo gihapon ang] nagagahum sa ginharian sang mga tawo.” (Dan. 4:17) Sa ulihi, ang Ginharian sang Dios amo ang magatuman sang iya kabubut-on. (Mat. 6:10) Huo, gintugutan ni Jehova si Satanas nga maggahom sa malip-ot nga tion subong “dios sining sistema sang mga butang” agod masabat sing bug-os ang mga hulusayon nga iya ginpautwas. (2 Cor. 4:4; 1 Juan 5:19) Apang, may limitasyon nga ginpahamtang si Jehova kay Satanas, kag indi sia puede maglampas sa sini. (2 Cron. 20:6; ipaanggid ang Job 1:11, 12; 2:3-6.) May mga indibiduwal pirme nga namat-od nga magpasakop sa Dios, bisan pa nagapuyo sila sa kalibutan nga ginagamhan sang panguna nga Kaaway sang Dios.
Ang Paggahom sang Dios sa Israel
5. Ano nga panaad ang ginhimo sang Israel sa Dios?
5 Sugod pa sa tion ni Abel tubtob sa panahon sang mga patriarka, madamo nga matutom nga indibiduwal ang nagsimba kay Jehova kag nagtuman sa iya mga sugo. (Heb. 11:4-22) Sang panahon ni Moises, nakigkatipan si Jehova sa mga kaliwat sang patriarka nga si Jacob, kag nangin pungsod sila sang Israel. Sang 1513 B.C.E., nanaad ang mga Israelinhon kag ang ila mga kaliwat nga batunon nila si Jehova subong ila Manuggahom, nga nagasiling: “Ang tanan nga napamolong sang GINOO himoon namon.”—Ex. 19:8.
6, 7. Paano gingamhan sang Dios ang Israel?
6 May katuyuan si Jehova sa pagpili sa mga Israelinhon subong iya katawhan. (Basaha ang Deuteronomio 7:7, 8.) Indi lamang ini para sa kaayuhan sang mga Israelinhon. Ang mas importante nga nadalahig sa sini amo ang ngalan kag pagkasoberano sang Dios. Ang Israel amo ang gamiton ni Jehova subong saksi nga sia ang lamang matuod nga Dios. (Isa. 43:10; 44:6-8) Gani, si Jehova nagsiling sa sina nga pungsod: “Ikaw katawohan nga balaan sa GINOO nga imo Dios, kag ang GINOO nagpili sa imo nga mangin-iya katawohan nga kaugalingon, labaw sa tanan nga mga katawohan nga yara sa kadaygan sang duta.”—Deut. 14:2.
7 Ang paggahom sang Dios sa mga Israelinhon nagahatag sing konsiderasyon sa ila pagkadihimpit. Apang, ang iya mga kasuguan himpit kag nagapabanaag sang mga kinaiya sang Manughatag sini. Ang mga sugo nga ginhatag ni Jehova paagi kay Moises nagpadaku sa Iya pagkabalaan, sa Iya gugma sa katarungan, sa Iya kahanda sa pagpatawad, kag sa Iya pagkamapailubon. Sang ulihi, sang panahon ni Josue kag sang iya kaliwatan, gintuman sang pungsod ang mga sugo ni Jehova kag naagom nila ang paghidait kag espirituwal nga mga pagpakamaayo. (Jos. 24:21, 22, 31) Ginapakita sina nga hut-ong sang maragtas sang Israel ang madinalag-on nga paggahom ni Jehova.
Ang Paggahom sang Tawo May mga Disbentaha
8, 9. Anong di-maalamon nga pangabay ang ginhimo sang Israel, kag ano ang nangin resulta?
8 Pagligad sang tion, sulitsulit nga ginsikway sang mga Israelinhon ang paggahom sang Dios kag sa amo, nadula nila ang iya pangamlig. Sang ulihi, ang Israel nagpangabay paagi kay manalagna Samuel nga hatagan sila sing isa ka tawo nga hari nga makita nila. Ginsilingan ni Jehova si Samuel nga ihatag ang ila ginapangayo. Apang, nagdugang si Jehova: “Wala sila magsikway sa imo, kondi nagsikway sila sa akon agud nga indi ako maghari sa ila.” (1 Sam. 8:7) Bisan pa gintugutan ni Jehova ang Israel nga makatigayon sang isa ka hari nga makita nila, ginpaandaman niya sila nga ang paggahom sang isa ka tawo nga hari may yara mga disbentaha.—Basaha ang 1 Samuel 8:9-18.
9 Ginpamatud-an sang maragtas ang kamatuoran sang ginsiling ni Jehova. Naeksperiensiahan sang Israel ang dalagku nga mga problema sang gingamhan sila sang mga hari nga tawo kag ilabi na gid sang nangin di-matutom yadtong mga hari. Subong sang natabo sa Israel, indi man kita matingala kon ngaa sa sulod sang malawig nga tion, ang mga panguluhan nga ginagamhan sang mga tawo nga wala nakakilala kay Jehova wala gid nakahatag sing permanente nga kaayuhan. Huo, ginapangabay sang pila ka pulitiko ang pagpakamaayo sang Dios sa ila mga panikasog nga maagom ang paghidait kag kalig-unan. Apang, paano sila pakamaayuhon sang Dios kon wala gani sila nagapasakop sa iya paggahom?—Sal. 2:10-12.
Isa ka Bag-o nga Pungsod sa Idalom sang Paggahom sang Dios
10. Ngaa ginbuslan ang Israel subong pinili nga pungsod sang Dios?
10 Ang pungsod sang Israel napamatud-an nga indi matutom kay Jehova. Sang ulihi, ginsikway nila ang gintangdo sang Dios nga Mesias kag sa amo, ginsikway man sila ni Jehova kag namat-od Sia nga buslan sila sang isa ka grupo sang mga tawo nga mangin isa ka bag-o nga pungsod. Nian, sang tuig 33 C.E. nabun-ag ang Cristianong kongregasyon sang hinaplas nga mga sumilimba ni Jehova. Sa amo, ina nga kongregasyon nangin isa ka bag-o nga pungsod sa idalom sang paggahom ni Jehova. Gintawag ini ni Pablo subong “ang Israel sang Dios.”—Gal. 6:16.
11, 12. Tuhoy sa pagdumala, sa ano magkaanggid ang dumaan nga Israel kag “ang Israel sang Dios”?
11 May yara kinatuhayan kag pagkaanggid ang dumaan nga pungsod sang Israel kag ang bag-o nga “Israel sang Dios.” Indi kaangay sang dumaan nga Israel, ang Cristianong kongregasyon karon wala sing hari nga tawo kag wala na nagahalad sing mga sapat para sa sala. Ang isa ka pagkaanggid sang pungsod sang Israel sa Cristianong kongregasyon amo ang kahimusan nga pagdumala sang mga tigulang, ukon mga gulang. (Ex. 19:3-8) Ang Cristianong mga gulang wala nagagahom sa panong. Sa baylo, ginabantayan nila ang kongregasyon kag mapisan sila sa pagpanguna sa Cristianong mga hilikuton. Ginapakig-angutan nila sing mahigugmaon ang kada indibiduwal sa kongregasyon kag ginahatagan nila sing kadungganan kag dignidad ang tanan.—2 Cor. 1:24; 1 Ped. 5:2, 3.
12 Paagi sa pagpamalandong sa pagpakig-angot sang Dios sa Israel, ang mga katapo sang “Israel sang Dios” kag ang ila kaupod nga “iban nga mga karnero” nakapalambo sing daku nga apresasyon kay Jehova kag sa iya paggahom. (Juan 10:16) Halimbawa, ginapakita sang maragtas nga ang mga gumalahom nga tawo sa Israel may daku gid nga impluwensia sa ila mga sakop, sa kaayuhan man ukon sa kalainan. Ginapahanumdom sini ang mga nagapanguna sa Cristianong kongregasyon karon nga bisan pa indi sila mga gumalahom kaangay sang dumaan nga mga hari, dapat gid sila mangin maayo nga mga halimbawa sa pagtuo.—Heb. 13:7.
Kon Paano Karon Nagagahom si Jehova
13. Ano ang talalupangdon nga natabo sang 1914?
13 Ginabantala karon sang mga Cristiano sa kalibutan nga ang paggahom sang tawo malapit na matapos. Sang 1914, gintukod ni Jehova ang iya Ginharian sa langit nga ginagamhan sang iya gintangdo nga Hari, si Jesucristo. Sa sina nga tion, ginhatagan niya si Jesus sing awtoridad nga ‘magpangdaug kag tapuson ang iya pagpangdaug.’ (Bug. 6:2) Ang bag-ong gintangdo nga Hari ginsilingan: “Gahum ka sa tunga sang imo mga kaaway!” (Sal. 110:2) Sing makapasubo, sulitsulit nga ginasikway sang mga pungsod ang paggahom ni Jehova. Padayon sila nga nagapanghikot nga daw “wala sing Dios.”—Sal. 14:1.
14, 15. (a) Paano kita ginagamhan sang Ginharian sang Dios karon, kag ano nga mga pamangkot ang dapat naton ipamangkot sa aton kaugalingon? (b) Paano makita sa karon nga ang paggahom sang Dios amo gid ang pinakamaayo?
14 May pila pa ka nagkalabilin nga mga katapo “ang Israel sang Dios,” kag subong mga utod ni Jesus, padayon sila nga nagapanghikot subong ‘mga embahador nga salili para kay Cristo.’ (2 Cor. 5:20) Gintangdo sila subong matutom kag mainandamon nga ulipon agod magtatap kag mag-aman sing espirituwal nga pagkaon para sa mga hinaplas kag para sa kadam-an sang minilyon nga mga Cristiano, nga may paglaum nga mabuhi sing walay katapusan sa duta. (Mat. 24:45-47; Bug. 7:9-15) Ang espirituwal nga kabuganaan nga ginaagom karon sang matuod nga mga sumilimba isa ka pamatuod sang pagpakamaayo ni Jehova sa sini nga kahimusan.
15 Gani, maayo nga pamangkuton sang kada isa sa aton ang iya kaugalingon: ‘Nakahibalo bala ako sang mga salabton nga dapat ko tungdan sa sulod sang Cristianong kongregasyon? Ginasakdag ko bala sing nagakaigo ang paggahom ni Jehova? Ginakalipay ko bala nga sakop ako sang nagagahom nga Ginharian ni Jehova? Determinado bala ako nga padayon nga sugiran ang iban tuhoy sa Ginharian sang Dios tubtob sa akon masarangan?’ Subong isa ka grupo, kinabubut-on kita nga nagapasakop sa panuytoy nga ginahatag sang Nagadumala nga Hubon kag nagakooperar kita sa gintangdo nga mga gulang sa kongregasyon. Sa sini nga mga paagi, ginapakita naton nga ginabaton naton ang paggahom sang Dios. (Basaha ang Hebreo 13:17.) Ang kinabubut-on nga pagpasakop nagaresulta sa bug-os kalibutan nga paghiusa nga pinasahi gid sa sining nabahinbahin nga kalibutan. Nagadala man ini sing paghidait kag katarungan kag nagahimaya kay Jehova. Kag ginapakita sini nga ang iya paggahom amo gid ang pinakamaayo.
Ang Paggahom ni Jehova Magamadinalag-on
16. Ano nga desisyon ang dapat himuon sang kada indibiduwal sa karon?
16 Malapit na lang masolbar ang mga hulusayon nga ginpautwas sa Eden. Gani, tion na karon para sa mga tawo nga magdesisyon. Ang kada indibiduwal dapat magdesisyon kon bala batunon niya ang paggahom ni Jehova ukon magapabilin sia sa paggahom sang tawo. Pribilehiyo naton nga buligan ang mga mahagop sa paghimo sing husto nga desisyon. Sa indi madugay, sa Armagedon, ang paggahom ni Jehova amo ang magabulos sing permanente sa paggahom sang tawo nga yara sa impluwensia ni Satanas. (Dan. 2:44; Bug. 16:16) Matapos na ang paggahom sang tawo, kag ang Ginharian sang Dios amo na ang magagahom sa bug-os nga duta. Sa sina nga tion, ang paggahom sang Dios mabindikar na sing bug-os.—Basaha ang Bugna 21:3-5.
17. Ano nga mga kamatuoran ang makabulig sa mga mahagop nga maghimo sing husto nga desisyon kon ano ang pilion nila nga paggahom?
17 Para sa mga wala pa nakahimo sing pat-od nga desisyon nga magdampig kay Jehova, dapat mapinangamuyuon nga binagbinagon nila ang mga benepisyo nga ihatag sang paggahom sang Dios sa katawhan. Wala masolbar sang paggahom sang tawo ang problema sa krimen, lakip na ang terorismo, apang dulaon sang paggahom sang Dios ang tanan nga kalautan sa duta. (Sal. 37:1, 2, 9) Ang paggahom sang tawo nagresulta sa wala untat nga inaway, apang ang paggahom sang Dios ‘magapatonong sang mga inaway tubtub sa ukbung sang duta.’ (Sal. 46:9) Ipasag-uli pa gani sang paggahom sang Dios ang paghidait sa ulot sang mga tawo kag mga sapat! (Isa. 11:6-9) Ang paggahom sang tawo nagresulta sa kaimulon kag gutom, apang ini nga mga butang dulaon sang paggahom sang Dios. (Isa. 65:21) Bisan pa ang mga gumalahom nga tawo nga may maayo nga katuyuan indi makadula sang balatian kag kamatayon, apang sa idalom sang paggahom sang Dios, ang mga tigulang kag masakiton magabalik sa kapagsik sang pagkapamatan-on. (Job 33:25; Isa. 35:5, 6) Sa pagkamatuod, ang duta mangin paraiso kag banhawon pa gani ang mga patay.—Luc. 23:43; Binu. 24:15.
18. Paano naton mapakita nga nagapati kita nga ang paggahom sang Dios amo gid ang pinakamaayo?
18 Huo, baliskaron sang paggahom sang Dios ang tanan nga halit nga natuga sang pag-impluwensia ni Satanas sa aton una nga mga ginikanan nga talikdan ang ila Manunuga. Kag binagbinaga nga ang halit nga gintuga ni Satanas sa sulod sang mga 6,000 ka tuig, pagadulaon sang Dios sa sulod lamang sang 1,000 ka tuig paagi kay Cristo! Daw ano kaathag nga pamatuod nga ang paggahom sang Dios amo gid ang pinakamaayo! Subong mga Saksi sang aton Dios, ginabaton naton sia subong aton Manuggahom. Gani, ipakita naton kada adlaw, huo, kada oras, nga mga sumilimba kita ni Jehova, mga sakop sang iya Ginharian, nga nagakalipay nga mangin iya mga Saksi. Gamiton naton ang tanan nga kahigayunan nga sugiran ang bisan sin-o nga magapamati nga ang paggahom ni Jehova amo gid ang pinakamaayo.
Tuhoy sa Paggahom sang Dios, Ano ang Natun-an Naton sa Pagbasa sang . . .
• Hebreo 13:17?
• Bugna 21:3-5?
[Mga Pamangkot sa Pagtinuon]
[Mga Retrato sa pahina 29]
Wala gintugyan ni Jehova sa iban ang iya kinamatarong sa paggahom
[Retrato sa pahina 31]
Ang kinabubut-on nga pagpasakop sa paggahom ni Jehova nagaresulta sa bug-os kalibutan nga paghiusa
