Gamita ang Kada Adlaw sang Imo Kabuhi Para sa Kahimayaan sang Dios

“PAPAMATIA ako sa kaagahon sang imo malig-on nga paghigugma,” pangamuyo ni salmista David kay Jehova. “Pakilalaha ako sang dalan nga akon dapat laktan.” (Sal. 143:8) Pagbugtaw mo sa aga samtang nagapasalamat ka kay Jehova sa bag-o nga adlaw sang imo kabuhi, kaangay ka bala ni David nga nagapangabay kay Jehova nga giyahan ka sa paghimo sing pinakamaayo nga desisyon? Wala sing duhaduha nga ginahimo mo ina.

Subong dedikado nga mga alagad ni Jehova, ginatinguhaan naton nga himuon ‘ang tanan nga butang para sa kahimayaan sang Dios, nagakaon man kita, nagainom ukon nagahimo sang bisan ano nga butang.’ (1 Cor. 10:31) Nahibaluan naton nga ang aton ginahimo sa kada adlaw mahimo makahatag sing kadungganan ukon kahuy-anan kay Jehova. Ginadumdom man naton ang ginasiling sang Pulong sang Dios nga ginasumbong ni Satanas “sa adlaw kag gab-i” indi lamang ang mga utod ni Cristo kundi ang tanan nga alagad sang Dios sa duta. (Bug. 12:10) Gani, determinado kita nga sabton ang butig nga panumbungon ni Satanas kag pahalipayon ang tagipusuon ni Jehova paagi sa aton sagrado nga pag-alagad sa aton langitnon nga Amay “sa adlaw kag gab-i.”—Bug. 7:15; Hulu. 27:11.

Binagbinagon naton ang duha ka importante nga paagi nga magamit naton ang kada adlaw sang aton kabuhi sa kahimayaan sang Dios. Ang una nagadalahig sa aton pagpahamtang sing husto nga prioridad kag ang ikaduha amo ang pagpakita sing konsiderasyon sa iban.

Tumana ang Imo Panaad

Sang gindedikar naton ang aton kaugalingon kay Jehova, ginpabutyag naton ang aton tinagipusuon nga handum nga alagaron sia. Nanaad man kita kay Jehova nga tumanon naton sia “adlawadlaw”—huo, tubtob sa walay katubtuban. (Sal. 61:5, 8) Gani, paano naton matuman ang aton panaad? Paano naton mapakita ang aton bug-os tagipusuon nga gugma kay Jehova sa kada adlaw?

Maathag nga ginapakita sang Pulong sang Dios ang mga responsibilidad nga ginapaabot ni Jehova nga tumanon naton. (Deut. 10:12, 13) Ang pila sa sini makita sa kahon nga natig-uluhan  “Mga Responsibilidad nga Ginhatag sang Dios sa Aton,” sa pahina 22. Ini tanan nga salabton naghalin sa Dios, gani importante nga tumanon. Apang, ano abi kon ini nga mga salabton magdulungan? Ano ang dapat naton unahon?

Dapat naton unahon ang aton sagrado nga pag-alagad, subong sang pagtuon sa Biblia, pagpangamuyo, pagtambong sa Cristianong mga miting, kag pagministeryo. (Mat. 6:33; Juan 4:34; 1 Ped. 2:9) Apang wala ini nagakahulugan nga puro espirituwal nga mga hilikuton na lang ang aton himuon sa bug-os nga adlaw. May tion man kita sa pagtrabaho, pag-eskwela, kag pag-atipan sang mga hilikuton sa aton puluy-an. Walay sapayan sini, ginatinguhaan naton nga ang aton sekular nga trabaho kag ang iban pa nga hilikuton indi makasablag sa aton sagrado nga pag-alagad, subong sang pagtambong sa aton Cristianong mga miting. Halimbawa, kon nagaplano ka nga magbakasyon, pat-ura nga indi ini magtuon sa iskedyul sang pagbisita sang manugtatap sang sirkito, mga asembleya, ukon kombension. May mga tion nga mahimo naton madungan ang pila naton ka responsibilidad. Halimbawa, mahimo kita makapaninlo sang Kingdom Hall nga kaupod ang aton pamilya ukon makapanaksi sa aton mga katrabaho ukon kaeskwela sa tion sang tigpalanyaga. Ang matuod, ano man nga desisyon ang aton himuon sa kabuhi—ayhan  pagpangita sang trabaho, pagpili sang kurso ukon mga abyan—dapat makita sa aton mga desisyon nga ang pagsimba sa aton mahigugmaon nga Amay nga si Jehova, amo ang ginauna naton sa aton kabuhi.—Man. 12:13.

Magpakita sing Konsiderasyon sa Iban

Luyag ni Jehova nga magpakita kita sing kabalaka sa iban kag maghimo sing maayo para sa ila. Sa pihak nga bahin, ginapasanyog ni Satanas ang pagkamaiyaiyahon. Ang iya kalibutan puno sang mga tawo nga “mahigugmaon sa kaugalingon,” “mahigugmaon sa kinasadya,” kag ‘nagasab-ug para sa unod.’ (2 Tim. 3:1-5; Gal. 6:8) Madamo ang wala nagapamensar sang mangin epekto sang ila ginahimo sa iban. “Ang mga buhat sang unod” lapnag gid bisan diin.—Gal. 5:19-21.

Tuhay gid ang panimuot sang mga tawo nga ginapahulag sang balaan nga espiritu ni Jehova! Nagapakita sila sang gugma, kaayo, kag pagkamaayo sa ila pagpakig-angot sa iban. (Gal. 5:22) Ang Pulong sang Dios nagasugo sa aton nga unahon naton ang kinahanglanon sang iban. Gani, interesado kita sa pagbulig sa iban apang nagahalong kita nga indi naton mahilabtan ang ila personal nga kabuhi. (1 Cor. 10:24, 33; Fil. 2:3, 4; 1 Ped. 4:15) Nagapakita kita sing konsiderasyon ilabi na sa aton mga masigkatumuluo. Apang nagatinguha man kita nga buligan ang mga di-tumuluo. (Gal. 6:10) Makapangita ka bala sing kahigayunan nga mapakita  ang imo kaayo sa iban?—Tan-awa ang kahon nga  “Magpakita sing Konsiderasyon sa Ila,” sa pahina 23.

Ang pagpakita sing konsiderasyon wala sing ginapili nga panahon ukon sitwasyon. (Gal. 6:2; Efe. 5:2; 1 Tes. 4:9, 10) Sa baylo, kada adlaw interesado kita nga hibaluon ang kahimtangan sang iban kag mangin handa kita sa pagbulig sa ila kon kinahanglanon, bisan pa ang paghimo sini mabudlay para sa aton. Luyag naton mangin maalwan sa pagpaambit sang aton tion, materyal nga pagkabutang, eksperiensia, kag kaalam. Ginapasalig kita ni Jehova nga kon maalwan kita sa iban, mangin maalwan man sia sa aton.—Hulu. 11:25; Luc. 6:38.

Sagrado nga Pag-alagad sa “Adlaw kag Gab-i”

Posible bala kita makahimo sing sagrado nga pag-alagad kay Jehova sa “adlaw kag gab-i”? Huo, kon regular kita kag mapisan sa tanan nga aspekto sang aton pagsimba. (Binu. 20:31) Mahimo naton ini paagi sa pagbasa kag pagpamalandong sa Pulong sang Dios kada adlaw, sa pagpangamuyo sing dalayon, sa pagtinguha nga matambungan ang tanan nga miting, kag sa pagpanaksi sa tanan nga kahigayunan.—Sal. 1:2; Luc. 2:37; Binu. 4:20; 1 Tes. 3:10; 5:17.

Ginahimo bala naton ining sagrado nga pag-alagad kay Jehova? Kon huo ang aton sabat, dapat makita sa tanan nga aspekto sang aton kabuhi nga luyag naton pahamut-an si Jehova kag sabton ang panumbungon ni Satanas. Ano man ang aton ginahimo kag bisan diin man kita, ginatinguhaan naton nga himayaon si Jehova. Ginaaplikar naton ang iya mga prinsipio sa aton paghambal, paggawi, kag paghimo sang mga desisyon. Ginapakita naton ang aton apresasyon sa iya mahigugmaon nga pag-atipan kag pagsakdag paagi sa pagsalig sing bug-os sa iya kag sa paghimo sang aton tanan nga masarangan sa pag-alagad sa iya. Kag kon makasayop kita bangod sa aton pagkadihimpit, ginabaton naton ang iya laygay kag disiplina.—Sal. 32:5; 119:97; Hulu. 3:25, 26; Col. 3:17; Heb. 6:11, 12.

Gani, padayon naton nga gamiton ang kada adlaw sang aton kabuhi para sa kahimayaan sang Dios. Sa paghimo sini, matigayon naton ang kaumpawan kag mahigugmaon nga pag-atipan sang aton langitnon nga Amay sing walay katapusan.—Mat. 11:29; Bug. 7:16, 17.

[Kahon/Retrato sa pahina 22]

 Mga Responsibilidad nga Ginhatag sang Dios sa Aton

• Pagpangamuyo pirme.—Roma 12:12.

• Pagbasa kag pagtuon sang Biblia, kag pag-aplikar sini.—Sal. 1:2; 1 Tim. 4:15.

• Pagsimba kay Jehova sa kongregasyon.—Sal. 35:18; Heb. 10:24, 25.

• Pag-aman sing materyal, espirituwal, kag emosyonal nga kinahanglanon sang aton pamilya.—1 Tim. 5:8.

• Pagbantala sang maayong balita sang Ginharian, kag paghimo sing disipulo.—Mat. 24:14; 28:19, 20.

• Pag-atipan sang aton pisikal, espirituwal, kag emosyonal nga kapagros, nga nagalakip sang nagakaigo nga paglingawlingaw.—Mar. 6:31; 2 Cor. 7:1; 1 Tim. 4:8, 16.

• Pag-atipan sang aton mga responsibilidad sa kongregasyon.—Binu. 20:28; 1 Tim. 3:1.

• Pagmentinar sang aton puluy-an kag sang Kingdom Hall.—1 Cor. 10:32.

[Kahon/Retrato sa pahina 23]

 Magpakita sing Konsiderasyon sa Ila

• Isa ka tigulang nga utod nga lalaki ukon babayi.—Lev. 19:32.

• Isa nga may pisikal ukon emosyonal nga problema.—Hulu. 14:21.

• Isa ka utod sa kongregasyon nga nagakinahanglan sing insigida nga bulig nga puede mo mahatag.—Roma 12:13.

• Isa ka miembro sang imo pamilya.—1 Tim. 5:4, 8.

• Isa ka utod nga namatyan sing tiayon.—1 Tim. 5:9.

• Isa ka mapisan nga gulang sa inyo kongregasyon.—1 Tes. 5:12, 13; 1 Tim. 5:17.