“Ang mga Matarong Magasilak sing Masanag Kaangay sang Adlaw”
“Ang mga Matarong Magasilak sing Masanag Kaangay sang Adlaw”
“Sa amo nga tion ang mga matarong magasilak sing masanag kaangay sang adlaw sa ginharian sang ila Amay.”—MAT. 13:43.
1. Ano nga mga aspekto sang Ginharian ang ginpaathag ni Jesus paagi sa mga ilustrasyon?
SI Jesucristo naggamit sang madamo nga ilustrasyon ukon mga parabola agod ipaathag ang nanuhaytuhay nga aspekto sang Ginharian. Naghambal sia sa kadam-an “paagi sa mga ilustrasyon. Sa pagkamatuod, kon wala sing ilustrasyon indi sia maghambal sa ila.” (Mat. 13:34) Sa iya ilustrasyon tuhoy sa pagsab-ug sang binhi sang kamatuoran sang Ginharian, ginpadaku ni Jesus ang papel sang kahimtangan sang tagipusuon sang isa ka tawo sa pagbaton sang mensahe, kag ang papel ni Jehova sa espirituwal nga pagtubo sini. (Mar. 4:3-9, 26-29) Gin-ilustrar man ni Jesus ang talalupangdon nga pag-uswag sang intereses sang Ginharian diri sa duta, bisan pa ang mga resulta sang aton hilikuton indi gilayon makita. (Mat. 13:31-33) Dugang pa, ginpadaku niya nga indi tanan nga nagabaton sang mensahe sang Ginharian mangin mga sakop sini.—Mat. 13:47-50. *
2. Sa ilustrasyon ni Jesus tuhoy sa mga trigo kag mga gamhon, ano ang ginapatuhuyan sang maayo nga binhi?
2 Ang isa sa mga ilustrasyon ni Jesus nasentro sa pagtipon sa mga magahari kaupod niya sa iya Ginharian. Narekord ini sa Mateo kapitulo 13 kag masami ini ginatawag nga parabola sang mga trigo kag mga gamhon. Sa isa pa niya ka ilustrasyon, nagsiling si Jesus nga ang binhi nga ginsab-ug amo ang “pulong sang ginharian.” Apang sa sini nga ilustrasyon, tuhay ang ginapatuhuyan ni Jesus sang maayo nga binhi—sila amo “ang mga anak sang ginharian.” (Mat. 13:19, 38) Indi sila mga sakop sang Ginharian kundi “mga anak,” ukon mga manunubli, sang Ginharian.—Roma 8:14-17; basaha ang Galacia 4:6, 7.
Ang Ilustrasyon Tuhoy sa mga Trigo kag mga Gamhon
3. Ipaathag ang problema sang tawo sa ilustrasyon. Paano niya ini gin-atubang?
3 Amo ini ang ilustrasyon: “Ang ginharian sang langit kaangay sa isa ka tawo nga nagsab-ug sang maayo nga binhi sa iya uma. Samtang nagakatulog ang mga tawo, nag-abot ang iya kaaway kag nagsab-ug sang mga gamhon sa tunga sang mga trigo, kag nagbiya. Sang nag-ulhot ang dahon kag nagpamunga, nagtubo man ang mga gamhon. Gani ang mga ulipon sang agalon sang panimalay nagpalapit kag nagsiling sa iya, ‘Agalon, indi bala maayo nga binhi ang ginsab-ug mo sa imo uma? Ti, ngaa may nagtubo nga mga gamhon?’ Nagsiling sia sa ila, ‘Ang kaaway, isa ka tawo, ang naghimo sini.’ Nagsiling sila sa iya, ‘Luyag mo bala nga gabuton namon ini?’ Sia nagsiling, ‘Indi; kay basi sa paggabot ninyo sing mga gamhon, magabot ninyo pati ang mga trigo. Pabay-i nga magtubo anay ini sing dungan tubtob sa pag-ani; kag sa tig-alani suguon ko ang mga mangangani, Gabuta anay ang mga gamhon kag hugpunga ini agod sunugon, dayon tipuna ang mga trigo sa akon tambubo.’”—Mat. 13:24-30.
4. (a) Sin-o ang tawo sa ilustrasyon? (b) San-o kag paano ginsugdan ni Jesus ang pagsab-ug sang binhi?
4 Sin-o ang tawo nga nagsab-ug sang maayo nga binhi sa iya uma? Ginpaathag ni Jesus ang sabat sa iya mga disipulo: “Ang manugsab-ug sang maayo nga binhi amo ang Anak sang tawo.” (Mat. 13:37) Si Jesus, ang “Anak sang tawo,” naghanda sang uma para tamnan sa sulod sang tatlo ka tuig kag tunga nga pagministeryo niya sa duta. (Mat. 8:20; 25:31; 26:64) Dayon sugod sang Pentecostes 33 C.E., nagsab-ug sia sang maayo nga binhi—“ang mga anak sang ginharian.” Nahangpan naton nga ang pagsab-ug nagsugod sang ginpasagahay ni Jesus, subong tiglawas ni Jehova, ang balaan nga espiritu sa iya mga disipulo, kag ginhaplas sila subong mga anak sang Dios. * (Binu. 2:33) Ining maayo nga binhi nagtubo kag nangin mga trigo. Gani, ang katuyuan sang pagsab-ug sang maayo nga binhi amo ang pagtipon sang kompleto nga kadamuon sang manunubli kag gumalahom nga mangin kaupod ni Jesus sa iya Ginharian.
5. Sin-o ang kaaway sa ilustrasyon, kag sin-o ang ginalaragway sang mga gamhon?
5 Sin-o ang kaaway, kag sin-o ang mga gamhon? Si Jesus nagsiling nga ang kaaway “amo ang Yawa.” Ang mga gamhon ginlaragway subong “ang mga anak sang isa nga malauton.” (Mat. 13:25, 38, 39) Kon sa literal nga gamhon, mahimo nga ang ginpatuhuyan ni Jesus amo ang bearded darnel. Ining makahililo nga tanom daw pareho gid sang trigo kon bag-o pa lang magtubo kag wala pa maggulang. Nagakaigo gid nga paglaragway sa butig nga mga Cristiano, nga nagapangangkon nga mga anak sang Ginharian, apang wala nagapatubas sang maayo nga mga bunga! Sa pagkamatuod, ining salimpapaw nga mga Cristiano nga nagapangangkon nga mga sumulunod ni Cristo bahin gid sang “binhi” ni Satanas nga Yawa.—Gen. 3:15.
6. San-o nagtubo ang mga gamhon, kag paano “nagtulog” ang mga tawo sadto?
6 San-o nagtubo ining tulad-gamhon nga mga Cristiano? “Samtang nagakatulog ang mga tawo,” siling ni Jesus. (Mat. 13:25) San-o ini? Makita naton ang sabat sa ginsiling ni apostol Pablo sa mga gulang sa Efeso: ‘Nahibaluan ko nga kon makahalin na ako ang mapiguson nga mga lobo magasulod sa tunga ninyo kag indi makig-angot sing mapinalanggaon sa panong, kag gikan sa inyo mismo may mga tawo nga magalutaw kag magahambal sang tiko nga mga butang agod ipahilayo ang mga disipulo kag pasundon sa ila.’ (Binu. 20:29, 30) Naghatag sia sing paandam sa mga gulang nga dapat sila magpabilin nga nagabugtaw sa espirituwal. Sang ang mga apostoles nga nagapanghikot “subong pugong” batok sa apostasya nagtulog na sa kamatayon, madamo nga Cristiano ang nagtulog man sa espirituwal. (Basaha ang 2 Tesalonica 2:3, 6-8.) Sa sina nga tion nagsugod ang daku nga apostasya.
7. May mga trigo bala nga nangin mga gamhon sang ulihi? Ipaathag.
7 Si Jesus wala nagsiling nga ang mga trigo mangin mga gamhon, kundi ang gamhon ginsab-ug sa tunga sang mga trigo. Gani, ang gamhon sa ilustrasyon wala nagalaragway sa matuod nga mga Cristiano nga nagtalikod sa kamatuoran. Kundi nagalaragway ini sa panikasog ni Satanas nga pasudlon sa Cristianong kongregasyon ang malaut nga mga tawo agod gub-on ini. Ining apostasya nangin maathag sang tion nga tigulang na ang pinakaulihi nga apostol nga si Juan.—2 Ped. 2:1-3; 1 Juan 2:18.
“Pabay-i nga Magtubo Anay Ini sing Dungan Tubtob sa Pag-ani”
8, 9. (a) Ngaa madali mahangpan sang mga tagpalamati ni Jesus ang ginsiling sang Agalon sa iya mga ulipon? (b) Paano natuman nga ang mga trigo kag mga gamhon nagtubo sing dungan?
8 Ang mga ulipon sang Agalon nagsugid sa iya sang problema kag namangkot: “Luyag mo bala nga gabuton namon [ang mga gamhon]?” (Mat. 13:27, 28) Makapakibot gid ang sabat sang Agalon. Nagsiling sia nga pabay-an anay nga magtubo sing dungan ang mga trigo kag mga gamhon tubtob sa pag-ani. Ina nga sugo mahimo nga nahangpan gid sang mga disipulo ni Jesus. Nakahibalo sila kon daw ano kabudlay kilalahon ang trigo sa gamhon nga bearded darnel. Ang mga may eksperiensia sa pagpanguma nakahibalo nga ang gamot sang gamhon nga bearded darnel masami nga nagasambod sa gamot sang trigo. * Gani indi katingalahan nga ginsilingan sila sang Agalon nga maghulat!
9 Sing kaanggid, sa pagligad sang mga siglo, ang nanuhaytuhay nga sekta sang Cristiandad nakapatubas na sang madamo nga gamhon—una sa Romano Katoliko kag Ortodokso nga mga simbahan kag dayon sa nanuhaytuhay nga grupo sang Protestante nga nag-ululhot sang ulihi. Sa sini man nga tion, ang pila ka binhi sang matuod nga trigo ginsab-ug sa bug-os nga kalibutan. Ang agalon sang panimalay sa ilustrasyon mapailubon nga naghulat sa pagtubo sini, tubtob mag-abot ang malip-ot lang nga tion sang pag-ani.
Ang Madugay Na Ginapaabot nga Tion sang Pag-ani
10, 11. (a) San-o ang tion sang pag-ani? (b) Paano ang simbuliko nga mga trigo ginadala sa tambubo ni Jehova?
10 Si Jesus nagsiling: “Ang tig-alani amo ang katapusan sang sistema sang mga butang, kag ang mga mangangani amo ang mga anghel.” (Mat. 13:39) Sa katapusan nga mga adlaw sining malaut nga sistema sang mga butang, may pagpainpain nga mahanabo—ang mga anak sang Ginharian pagatipunon kag painon gikan sa mga tulad-gamhon. Si apostol Pedro nagsiling tuhoy sa sini: “Ini ang gintalana nga tion nga ang paghukom magsugod sa balay sang Dios. Karon kon magsugod ini sa aton, ano ayhan ang madangatan sang mga indi matinumanon sa maayong balita sang Dios?”—1 Ped. 4:17.
11 Sang nagsugod ang katapusan nga mga adlaw, ukon “katapusan sang sistema sang mga butang,” wala madugay nagsugod man ang paghukom sa mga nagapangangkon nga tunay nga mga Cristiano—kon bala tunay gid sila nga “mga anak sang ginharian” ukon “mga anak sang isa nga malauton.” Sa umpisa sang pag-ani, mapukan “anay” ang Babilonia nga Daku, kag “dayon” tipunon ang mga anak sang Ginharian. (Mat. 13:30) Apang, paano ginadala ang simbuliko nga mga trigo sa tambubo ni Jehova? Mahimo ini nagapatuhoy sa pagdala sang mga gin-ani sa napasag-uli nga Cristianong kongregasyon sa diin natigayon nila ang kahamuot kag pangamlig sang Dios, ukon sa pagbaton nila sang ila langitnon nga padya.
12. Daw ano kalawig magapadayon ang tig-alani?
12 Daw ano kalawig ini nga paghukom? Ginpatuhuyan ini ni Jesus nga isa ka “tig-alani,” buot silingon magapadayon ini sa isa ka hut-ong sang tion. (Bug. 14:15, 16) Ang paghukom sa indibiduwal nga mga hinaplas magapadayon tubtob sa tion sang katapusan. Matapos ini sa tion nga mabaton na nila ang katapusan nga pagpat-in.—Bug. 7:1-4.
13. Sa ano nga paagi ang mga gamhon nagapasandad, kag paano sila nagahimo sang pagkamalinapason?
13 Sin-o ang pagakuhaon gikan sa Ginharian, kag paano sila nagapasandad kag nagahimo sang pagkamalinapason? (Mat. 13:41) Ang tulad-gamhon nga mga klero sang Cristiandad nagapatalang sang minilyon sa sulod na sang mga siglo. Ginahimo nila ini paagi sa ila mga panudlo nga wala nagapadungog sa Dios, mga butang “nga nagapasandad,” subong sang doktrina nga pagpaantos sa kalayuhon nga impierno kag sang makalilibog kag misteryoso nga Trinidad. Madamo nga lider sang relihion ang nangin malain nga halimbawa sa ila mga miembro bangod sang ila makihilahion nga pagpakig-abyan sa sining kalibutan kag paagi sa ila tuman ka imoral nga paggawi. (Sant. 4:4) Dugang pa, ginatolerar sang Cristiandad ang imoralidad nga ginahimo sang ila mga katapo. (Basaha ang Judas 4.) Walay sapayan sini tanan, ginapakita nila nga kuno abi debotado sila kag mga diosnon. Daw ano ka makalilipay para sa mga anak sang Ginharian nga napain sila gikan sa tulad-gamhon nga mga impluwensia kag butig nga mga panudlo nga nagapasandad!
14. Paano ang mga tulad-gamhon nagahibi kag nagabagrot sang ila mga ngipon?
14 Paano ang mga tulad-gamhon nagahibi kag nagabagrot sang ila mga ngipon? (Mat. 13:42) “Ang mga anak sang isa nga malauton” nagaantos bangod ginabuyagyag sang “mga anak sang ginharian” ang ila makahililo nga kahimtangan sa espirituwal. Nagapangasubo man sila bangod sa nagadiutay nga suporta sang ila mga miembro kag sa pagkadula sang ila kontrol sa sini.—Basaha ang Isaias 65:13, 14.
15. Ano ang buot silingon sang pagsunog sa kalayo sang mga tulad-gamhon?
15 Ano ang buot silingon sang paggabot kag pagsunog sa kalayo sang mga gamhon? (Mat. 13:40) Nagapatuhoy ini sa ila madangatan. Ang simbuliko nga pagtagbong sa ila sa nagadabadaba nga kalayo nagapahangop sang ila dayon nga kalaglagan. (Bug. 20:14; 21:8) Ang butig ukon tulad-gamhon nga mga Cristiano, ang mga impostor, pagalaglagon sa tion sang “dakung kapipit-an.”—Mat. 24:21.
“Magasilak [Sila] sing Masanag Kaangay sang Adlaw”
16, 17. Ano ang gintagna ni Malaquias tuhoy sa templo sang Dios, kag paano ini natuman?
16 San-o “magasilak sing masanag kaangay sang adlaw” ang mga tulad-trigo? (Mat. 13:43) Si Malaquias nagtagna tuhoy sa pagtinlo sa templo sang Dios: “Ang Ginoo nga ginapangita ninyo, magasulud sing hinali sa iya templo; ang manugbalita sang katipan nga inyo ginahandum, yari karon, nagapakari sia, nagasiling ang GINOO sang mga kasoldadosan. Apang sin-o bala ang makabatas sang adlaw sang iya pagkari, kag sin-o bala ang makatindug kon magpahayag sia? ‘Kay sia kaangay sang kalayo sang manugtunaw kag kaangay sang habon sang mga manugpamunak; magalingkod sia subong sang manugtunaw kag manug-ulay sang pilak, kag putlion niya ang mga anak ni Levi kag ulayon sila subong sang bulawan kag pilak, tubtub nga magdolot sila sa GINOO sing mga halad sa pagkamatarung.’”—Mal. 3:1-3.
17 Nahangpan naton nga ang moderno nga katumanan sini nga tagna nagsugod sang 1918 sang si Jehova, upod “ang manugbalita sang katipan” nga si Jesucristo, nag-usisa sa espirituwal nga templo. Si Malaquias nagasugid sa aton sang matabo kon matapos na ang pagpaninlo: “Magabalik kamo kag magakilala sang matarung kag sang malauton, sang nagaalagad sa Dios kag sang wala nagaalagad sa iya.” (Mal. 3:18) Ang madasig nga pag-uswag sang hilikuton sang napasag-uli nga matuod nga mga Cristiano nagapakita nga nag-umpisa na ang tion sang tig-alani.
18. Ano ang gintagna ni Daniel nga mahanabo sa aton panahon?
18 Si manalagna Daniel nagtagna tuhoy sa aton adlaw: “Ang mga maalam magasidlak subong sang kasiga sang kahawaan; kag ang mga nagaliso sang madamu sa pagkamatarung, subong sang kabitoonan sa gihapon kag sa gihapon.” (Dan. 12:3) Sin-o ining mga nagasilak sing masanag? Sila amo ang hinaplas nga mga Cristiano, ang tunay nga mga trigo nga ginpatuhuyan ni Jesus sa iya ilustrasyon! Ang katumanan sang “paggabot” sa tulad-gamhon nga mga Cristiano maathag nga nakita sang dakung kadam-an sang tulad-karnero nga mga indibiduwal. Paagi sa pagpakig-upod nila sa mga nagkalabilin nga bahin sang espirituwal nga Israel, ginapasilak man sining palaabuton nga mga sakop sang Ginharian ang ila kapawa sa sining madulom nga kalibutan.—Zac. 8:23; Mat. 5:14-16; Fil. 2:15.
19, 20. Ano ang malangkagon nga ginahulat sang “mga anak sang ginharian,” kag ano ang pagabinagbinagon sa masunod nga artikulo?
19 Sa karon, “ang mga anak sang ginharian” malangkagon nga nagahulat sang ila langitnon nga padya. (Roma 8:18, 19; 1 Cor. 15:53; Fil. 1:21-24) Apang samtang wala pa nag-abot ina nga tion, dapat sila magpabilin nga matutom kag padayon nga nagasilak sing masanag kag ipakita nga tuhay sila sa mga “anak sang isa nga malauton.” (Mat. 13:38; Bug. 2:10) Daw ano ka makalilipay nga pribilehiyo nga masaksihan naton ang mga resulta sang simbuliko nga “paggabot” sang mga gamhon sa aton tion!
20 Apang ano ang kaangtanan sining mga anak sang Ginharian sa dakung kadam-an nga may paglaum nga mabuhi sing walay katapusan sa duta subong sakop sang Ginharian? Ini nga pamangkot pagasabton sa masunod nga artikulo.
[Mga Nota]
^ par. 1 Para sa dugang nga impormasyon tuhoy sa sini nga mga ilustrasyon, tan-awa ang Hulyo 15, 2008 nga Ang Lalantawan, pahina 12-21.
^ par. 4 Sa sini nga parabola, ang pagsab-ug wala nagapatuhoy sa pagbantala kag paghimo sing disipulo nga hilikuton, nga mahimo magdugang sang mga bag-uhan nga mangin mga hinaplas nga Cristiano. Tuhoy sa maayo nga binhi nga ginsab-ug sa uma, si Jesus wala nagsiling nga sila mangin mga anak sang Ginharian kundi sila “amo ang mga anak sang ginharian.” Gani, ang pagsab-ug nagapatuhoy sa paghaplas sang mga anak sang Ginharian sa uma nga amo ang kalibutan.
^ par. 8 Ang mga gamot sang bearded darnel nagasambod sa mga gamot sang trigo, gani kon gabuton sila antes ang tig-alani mahimo madala man sa paggabot ang iban nga trigo.—Tan-awa ang Insight on the Scriptures, Tomo 1, pahina 1178.
Nadumduman Mo Bala?
Sa ilustrasyon ni Jesus tuhoy sa mga trigo kag mga gamhon ano ang ginapatuhuyan sang mga masunod?
• Ang maayo nga binhi
• Ang tawo nga nagsab-ug sang binhi
• Ang pagsab-ug sang binhi
• Ang kaaway
• Ang mga gamhon
• Ang tig-alani
• Ang tambubo
• Ang paghibi kag pagbagrot sang mga ngipon
• Ang nagadabadaba nga kalayo
[Mga Pamangkot sa Pagtinuon]
[Mga Retrato sa pahina 20]
Ang pagsab-ug sang maayo nga binhi nagsugod sang Pentecostes 33 C.E.
[Retrato sa pahina 23]
Ang simbuliko nga mga trigo ginadala na karon sa tambubo ni Jehova
[Credit Line]
Pictorial Archive (Near Eastern History) Est.
