Si Jehova Nagapamati sa Napiutan nga Nagapangayo sing Bulig

NAOBSERBAHAN sang maalam nga hari sang dumaan nga Israel nga si Solomon nga “ang tion kag ang wala ginapaabot nga hitabo nagakatabo sa [aton] tanan.” (Man. 9:11, NW) Mahimo kita makaeksperiensia sing mga trahedya kag masakit nga mga pagtilaw sa aton kabuhi. Halimbawa, ang hinali nga kamatayon sang suod nga katapo sang pamilya makapasubo gid. Bisan sinemana na ukon binulan pa gani ang nagligad, ang isa mahimo magbatyag gihapon sang tuman nga kasubo kag madulaan sing paglaum. Mahimo nga indi na niya mahibaluan kon ano ang iya himuon kag ayhan magbatyag sia nga indi na sia takus nga mangamuyo kay Jehova.

Kon amo sina ang kahimtangan sang isa, kinahanglan niya ang pagpalig-on, konsiderasyon, kag gugma. Si salmista David nagpalig-on: “Ang GINOO nagapatindug sang tanan nga nagakapukan, kag nagapabangon sang tanan nga nagadunguk.” (Sal. 145:14) Ang Biblia nagasiling: “Ang mga mata [ni Jehova] nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya.” (2 Cron. 16:9) “Upod [sia] sa napiutan kag mapainubuson, agod ipasag-uli ang kusog sang kubos kag ipasag-uli ang kaisog sang napiutan.” (Isa. 57:15, NW) Paano si Jehova nagaaman sang pagsakdag kag lugpay sa isa nga napiutan?

“Ang Polong sa Nagakaigo nga Dag-on”

Nagahatag si Jehova sing bulig sa aton sa nagakaigo nga tion paagi sa aton mga kauturan. Ginalaygayan ang mga Cristiano nga “lipayon ang mga kalag nga ginapung-awan.” (1 Tes. 5:14) Ang aton ginapabutyag nga gugma kag kabalaka sa aton masigkatumuluo sa tion nga may problema sia kag nagakasubo, mahimo makabulig sa iya. Bisan malip-ot lang ang pagpakig-istorya kon makapalig-on ini, daku gid ang mabulig sa isa nga ginaluyahan. Inang makapalig-on nga mga komento ayhan maghalin sa isa nga nagbatas sing amo man nga kahimtangan. Ukon ayhan maghalin sa isa ka abyan nga madamo na sing eksperiensia sa kabuhi. Sa sini nga paagi, sarang mapasag-uli ni Jehova ang kusog sang isa nga napiutan.

Binagbinaga ang natabo sa bag-o lang nakasal nga Cristianong gulang nga si Alex. Hinali lang napatay ang iya asawa bangod sa balatian nga indi mabulong. Nakabaton si Alex sing lugpay gikan sa isa ka mahinuklugon nga nagalakbay nga manugtatap nga namatyan man sing asawa apang sang ulihi nangasawa liwat. Ginsugid sa iya sang nagalakbay nga manugtatap kon ano anay ang iya ginbatyag. Indi niya mabatyagan ang kasubo kon upod niya ang mga kauturan sa ministeryo kag sa mga miting. Apang kon nagaisahanon na lang sia, nagabatyag sia sing tuman nga kasubo. “Naumpawan ako sang  mahibaluan ko nga normal lamang ang akon nabatyagan kay amo man sini ang nabatyagan sang iban,” siling ni Alex. Huo, “ang polong sa nagakaigo nga dag-on” matuod gid nga makapaumpaw sa isa nga ginasubuan.—Hulu. 15:23.

Ang isa pa ka Cristianong gulang nga madamo sing kilala nga namatyan sing tiayon, napahulag nga palig-unon man si Alex. Ginpatalupangod niya sing mahigugmaon nga nahibaluan ni Jehova kon ano ang aton ginabatyag kag kon ano ang aton kinahanglan. “Kon pagligad sang mga binulan kag mga tuig nga sa pamatyag mo kinahanglan mo ang kaupod,” siling sang utod, “ginapahanugutan ni Jehova ang pagminyo liwat.” Siempre pa, indi tanan nga namatyan sing tiayon nga nagahandum nga magminyo ang posible nga makaminyo liwat. Sang ginpamalandungan niya ang ginsiling sini nga utod, si Alex nagsiling, “Kon ginapahanumdom sa imo nga isa ini ka probisyon ni Jehova, madula ang imo negatibo nga panghunahuna nga basi mangin di-matutom ka sa imo tiayon ukon sa kahimusan ni Jehova sa pag-asawahay kon magminyo ka liwat.”—1 Cor. 7:8, 9, 39.

Si salmista David, nga nakaeksperiensia mismo sang madamo nga pagtilaw kag kabudlayan, nagsiling: “Ang mga mata sang GINOO yara nayon sa mga matarung, kag ang iya mga idulungug bukas sa pagtuaw nila.” (Sal. 34:15) Huo, ginasabat ni Jehova ang pagtuaw sang isa nga napiutan paagi sa makapalig-on nga mga pulong sang maluluy-on kag hamtong nga mga kauturan. Ina nga aman hamili gid kag mapuslanon.

Bulig Paagi sa Cristianong mga Miting

Ang isa nga naluyahan sing buot madali lang maghunahuna sang negatibo nga mahimo bangdan sang iya pagpahilayo. Apang ang Hulubaton 18:1 nagapaandam: “Ang nagapain sang iya kaugalingon nagapangita sang iya kaugalingon nga handum kag nagapakig-away sa tanan nga maayo nga kaalam.” (Hulu. 18:1) Si Alex nag-ako: “Kon mapatay ang imo tiayon, puro negatibo na lang ang imo mahunahuna.” Nadumduman niya nga ginpamangkot niya ang iya kaugalingon: “‘May mga butang bala nga wala ko mahimo? Kulang pa bala ang akon konsiderasyon kag paghangop nga ginpakita?’ Indi ko luyag mag-isahanon. Luyag ko  nga may kaupod. Mabudlay gid dulaon ini nga panghunahuna kon nagaisahanon ka lang adlaw-adlaw.”

Kon ang isa napung-awan, labi sia nga nagakinahanglan sing makapalig-on nga kaupdanan. Matigayon niya ini sa tion sang mga miting sang kongregasyon. Diri, mapun-an ang aton hunahuna sang positibo kag makapalig-on nga panghunahuna sang Dios.

Ang Cristianong mga miting magabulig sa aton nga mahangpan ang aton kahimtangan. Samtang ginapamatian naton kag ginapamalandungan ang mga teksto sa Biblia, masentro naton ang aton hunahuna sa importante nga mga isyu nga nadalahig—ang pagbindikar sa pagkasoberano ni Jehova kag ang pagpakabalaan sang iya ngalan—sa baylo nga sa aton personal nga problema. Dugang pa, sa tion sang mga miting, mapalig-on kita nga bisan wala nahibaluan sang iban ang aton problema ukon wala nila nahangpan ang aton ginabatyag, nahibaluan ini kag nahangpan ni Jehova. Nahibaluan niya nga “sa kasubo sang tagiposoon ang espiritu naboong.” (Hulu. 15:13) Luyag sang matuod nga Dios nga buligan kita, kag ini ang nagahatag sa aton sing kusog nga magpadayon.—Sal. 27:14.

Sang nagaatubang si Hari David sang tuman nga pag-ipit sa iya mga kaaway, nagtuaw sia sa Dios: “Nagpalangluya ako; nagpalaminhod ang akon tagipusuon.” (Sal. 143:4, NW) Ang isa mahimo madulaan sang pisikal kag emosyonal nga kusog bangod sa mga problema, kag mahimo pa gani magtig-a ang iya tagipusuon. Mahimo kita mag-antos bangod sa balatian ukon kasablagan sa lawas. Apang, makasalig kita nga si Jehova magabulig sa aton nga makabatas. (Sal. 41:1-3) Sa karon ang Dios wala na nagahimo sing milagro para magpang-ayo, apang ginahatagan niya sing kaalam kag kaisog ang isa nga nagaantos para makabatas. Dumdumon naton nga sang nabudlayan si David sa mga pagtilaw, nangayo sia sing bulig kay Jehova. Nag-amba sia, “Nadumduman ko ang mga adlaw sadto anay; ginpamalandungan ko ang tanan mo nga hinimuan; ginbinagbinag ko ang imo mga binuhatan.”—Sal. 143:5, NW.

Bangod ginrekord sa Pulong sang Dios ini nga balatyagon, ginapakita sini nga nahangpan ni Jehova ang aton ginabatyag. Nagapasalig ini nga pamatian man niya ang aton mga pangabay. Kon batunon naton ang bulig ni Jehova, ‘sia magaalay-ay sa aton.’—Sal. 55:22.

‘Indi Mag-untat sa Pagpangamuyo’

Ang Santiago 4:8 nagasiling: “Magpalapit kamo sa Dios, kag magapalapit sia sa inyo.” Ang isa ka paagi nga makapalapit kita sa Dios amo ang pangamuyo. Ginalaygayan kita ni apostol Pablo nga ‘indi mag-untat sa pagpangamuyo.’ (1 Tes. 5:17) Bisan pa nabudlayan kita nga ihambal ang aton ginabatyag, “ang espiritu mismo nagapangabay para sa aton kon nagaugayong kita apang indi makabungat.” (Roma 8:26, 27) Pat-od gid nga nahangpan ni Jehova ang aton ginabatyag.

Amo sini ang nabatyagan ni Monika nga may suod nga kaangtanan kay Jehova, sia nagsiling: “Paagi sa pangamuyo, pagbasa sang Biblia kag personal nga pagtuon, nabatyagan ko nga si Jehova amo ang akon pinakasuod nga Abyan. Nangin matuod gid sia sa akon kay nabatyagan ko ang iya padayon nga pag-atipan. Nalipay gid ako nga mahibaluan nga bisan indi ko mahangpan ang akon kaugalingon, nahangpan niya ako. Nahibaluan ko man nga ang iya kaayo kag mga pagpakamaayo wala sing katapusan.”

Gani, batunon naton ang mahigugmaon kag makapaumpaw nga pulong sang aton mga masigkatumuluo, iaplikar ang maluluy-on nga laygay kag makapalig-on nga pahanumdom sa Cristianong mga miting, kag ipabutyag naton kay Jehova ang aton ginabatyag paagi sa pangamuyo. Ining mga aman sa nagakaigo nga tion, nagapakita nga nagaulikid gid si Jehova sa aton. Napamatud-an ini ni Alex amo nga nakasiling sia, “Kon batunon naton ang ginaaman ni Jehova nga Dios nga mga bulig agod makapabilin kita nga malig-on sa espirituwal, matigayon naton ‘ang gahom nga labaw sa kinaandan’ nga makabulig sa aton nga mabatas ang ano man nga pagtilaw sa kabuhi.”—2 Cor. 4:7.

[Kahon/Retrato sa pahina 18]

Lugpay Para sa Napiutan

Mabasa naton sa mga salmo ang nanuhaytuhay nga balatyagon sang tawo kag ang mga pasalig ni Jehova nga nagapamati sia sa napiutan nga nagapangayo sing bulig. Binagbinaga ang masunod nga mga dinalan:

“Sa akon kalisdanan nagpanawag ako sa GINOO; nagtuaw ako sa akon Dios. Ginpamatian niya ang akon tingug kutub sa iya templo, kag ang akon pagtuaw sa atubangan niya naglambut sa iya idulungug.”—Sal. 18:6.

“Ang GINOO malapit sa mga boong sing tagiposoon, kag nagaluwas sang mga mahinulsulon sa espiritu.”—Sal. 34:18.

“Ginaayo [ni Jehova] ang boong sa tagiposoon, kag nagabugkos sang ila mga pilas.”—Sal. 147:3.

[Retrato sa pahina 17]

Ang “polong sa nagakaigo nga dag-on” makapaumpaw gid sa tion sang kalisdanan!