Ginakilala Mo Bala ang Pamatuod sang Panuytoy sang Dios?

WALA pa nakakita sing subong sini ang mga Israelinhon ukon ang mga Egiptohanon. Sang nagapagua ang mga Israelinhon sa Egipto, nagpundo malapit sa ila ang isa ka haligi nga panganod kag padayon ini nga nag-upod sa ila adlaw kag gab-i. Kon gab-i haligi ini nga kalayo. Makahalawhaw gid ini! Apang diin ini naghalin? Ano ang katuyuan sini? Bisan 3,500 ka tuig na ang nagligad, ano ang matun-an naton tuhoy sa pagtamod sang Israel sa “haligi nga kalayo kag panganud”?—Ex. 14:24.

Ginasugid sang Pulong sang Dios ang ginhalinan kag katuyuan sina nga haligi: “Ang GINOO nag-una sa ila sa adlaw sa isa ka haligi nga panganud sa pagtuytuy sa ila sa dalanon, kag sa gab-i sa isa ka haligi nga kalayo sa paghatag sa ila sing kapawa.” (Ex. 13:21, 22) Gingamit ni Jehova nga Dios ang haligi nga kalayo kag panganod agod tuytuyan ang iya katawhan paggua sa Egipto kag sa ila pagpanglakaton sa kahanayakan. Agod masundan nila ini, dapat handa sila sa pagsaylo. Sang buot na salakayon sang nagalagas nga mga Egiptohanon ang katawhan sang Dios, nagpatunga ang haligi kag nag-amlig sa mga Israelinhon. (Ex. 14:19, 20) Bisan pa wala sila gingiyahan sang haligi sa pinakadirekta nga ruta, ang pagsunod sa sini amo lamang ang paagi agod makalab-ot sila sa Ginsaad nga Duta.

Ang haligi nagapasalig sa katawhan sang Dios nga si Jehova nagaupod sa ila. Nagarepresentar ini kay Jehova, kag kon kaisa nagahambal sia paagi sa sini. (Num. 14:14; Sal. 99:7) Dugang pa, ang panganod nagapamatuod nga si Moises amo ang gintangdo ni Jehova sa pagpanguna sa Israel. (Ex. 33:9) Ang katapusan nga rekord nga nagpakita ang panganod amo ang tion nga gintangdo ni Jehova si Josue nga magbulos kay Moises. (Deut. 31:14, 15) Gani, ang kadalag-an sang pagpanglakaton sang mga Israelinhon nagadepende sa ila pagkilala sa pamatuod sang panuytoy sang Dios kag sa pagsunod nila sa sini.

Wala Nila Ginkilala ang Pamatuod

Nahayanghag gid ang mga Israelinhon sang una nila nga makita ang panganod. Apang makapasubo gid nga ining milagro nga upod nila pirme wala nakabulig sa ila nga mahuptan ang ila pagsalig kay Jehova. Pila ka beses nga ginduhaduhaan nila ang panuytoy sang Dios. Sang ginlagas sila sang mga soldado sang Egipto, wala sila nagsalig nga luwason sila ni Jehova. Sa baylo, ginpasibangdan nila si Moises nga amo ang nagtuytoy sa ila padulong sa kamatayon. (Ex. 14:10-12) Sa tapos sila ginluwas sa Pula nga Dagat, nagkumod sila kay Moises, Aaron, kag kay Jehova bangod kulang kuno sing pagkaon kag tubig. (Ex. 15:22-24; 16:1-3; 17:1-3, 7) Kag pagligad sang pila ka semana, ginpilit nila si Aaron nga maghimo sing baka nga bulawan. Handurawa ini! Sa pihak sang ila kampo, makita sang mga Israelinhon ang haligi nga kalayo kag panganod—ang tumalagsahon nga pamatuod sang Isa nga nagpagua sa ila sa Egipto. Apang indi malayo sa sini, nagasimba naman sila sa wala kabuhi nga idolo, nga nagasiling, “Amo ini ang imo Dios, O Israel, nga nagpagua sa imo sa duta sang Egipto.” Daw ano ka daku nga “pagpasipala”!—Ex. 32:4, NW; Neh. 9:18, NW.

Ang pagrebelde sang mga Israelinhon nagapakita sang ila hungod nga pagsikway sa panuytoy ni Jehova. Ang problema indi ang ila pisikal nga panan-aw kundi ang ila espirituwal nga panulok. Nakita nila ang haligi, apang wala na nila ginapabaloran ang kahulugan sini. Bisan pa “ginsakit nila ang balatyagon sang Balaan sang  Israel,” maluluy-on gihapon sila nga gintuytuyan ni Jehova paagi sa haligi tubtob nakalab-ot sila sa Ginsaad nga Duta.—Sal. 78:40-42, 52-54, NW; Neh. 9:19.

Kilalaha ang Pamatuod sang Panuytoy sang Dios sa Karon

Sa moderno nga tion, ginatuytuyan man ni Jehova ang iya katawhan. Subong nga wala niya ginpabay-an ang mga Israelinhon nga mangita sing kaugalingon nga alagyan, wala man niya kita ginpabay-an nga mangita sang aton kaugalingon nga paagi kon paano makadangat sa ginsaad nga bag-ong kalibutan. Si Jesucristo amo ang gintangdo nga Lider sang kongregasyon. (Mat. 23:10; Efe. 5:23) Gintugyan niya ang pila ka awtoridad sa matutom nga ulipon nga grupo, nga ginahuman sang hinaplas sang espiritu nga mga Cristiano. Ining ulipon nga grupo, amo ang nagatangdo sang mga manugtatap sang Cristianong kongregasyon.—Mat. 24:45-47; Tito 1:5-9.

Paano naton makilala ang matutom nga ulipon, ukon tulugyanan, nga grupo? Talupangda kon paano ini ginpakilala ni Jesus: “Sin-o gid ang matutom nga tulugyanan, ang isa nga mainandamon, nga itangdo sang iya agalon sa iya hubon sang mga alagad agod padayon nga maghatag sa ila sang bastante nga pagkaon sa nagakaigo nga tion? Malipayon ini nga ulipon, kon masapwan sia sang iya agalon nga nagahimo sini sa iya pag-abot!”—Luc. 12:42, 43.

Bangod ang tulugyanan nga grupo “matutom,” wala gid ini nagaluib ukon nagabiya kay Jehova, kay Jesus, sa mga kamatuoran sa Biblia, ukon sa katawhan sang Dios. Subong “mainandamon,” ang tulugyanan nga grupo nagapakita sing paghantop sa pagtuytoy sang labing importante nga hilikuton nga pagbantala sang “maayong balita sang ginharian” kag paghimo sang “mga disipulo sa mga tawo sang tanan nga pungsod.” (Mat. 24:14; 28:19, 20) Ining tulugyanan nga grupo matinumanon nga nagaaman sing makapaumpaw kag makapalig-on nga espirituwal nga pagkaon “sa nagakaigo nga tion.” Ang pamatuod sang kahamuot ni Jehova makita sa pagdamo sang iya katawhan, pagtuytoy sa importante nga mga desisyon, pag-uswag sang ila paghangop sa mga kamatuoran sa Biblia, pag-amlig batok sa ila mga kaaway, kag paghatag sa ila sing kalinong sa hunahuna kag tagipusuon.—Isa. 54:17; Fil. 4:7.

Magsunod sa Panuytoy sang Dios

Paano naton mapakita nga ginaapresyar naton ang panuytoy sang Dios? Si apostol Pablo nagsiling: “Mangin matinumanon sa mga nagapanguna sa inyo kag mangin mapinasakupon.” (Heb. 13:17) Indi pirme mahapos ang paghimo sini. Sa pag-ilustrar: Handurawa nga isa ikaw ka Israelinhon sang panahon ni Moises. Samtang nagalakat kamo, nagdulog ang haligi. Daw ano kadugay ini nga mapundo? Isa ka adlaw? Isa ka semana? Binulan? Mahimo magsiling ka, ‘Dapat ko bala haw-ason ang tanan ko nga dala?’ Mahimo nga ipagua mo lang anay ang mga kinahanglanon gid. Apang pagkatapos sang pila ka adlaw, bangod nabudlayan ka mangita sang imo pagkabutang, ginhaw-as mo na lang tanan. Pero sang dali mo na lang mahaw-as tanan, nakita mo nga naglakat naman ang haligi—kag kinahanglan nga mag-impake ka liwat! Indi ini mahapos. Apang dapat ‘maglakat’ gilayon ang mga Israelinhon.—Num. 9:17-22.

Ano ang aton reaksion kon makabaton kita sing panuytoy halin sa Dios? Ginatinguhaan bala naton nga iaplikar ini gilayon? Ukon nagapadayon kita gihapon sa aton naandan nga mga hilikuton? Pamilyar bala kita sa pinakabag-o nga mga panuytoy, subong sang pagdumala sing mga pagtuon sa Biblia sa puluy-an, pagbantala sa mga tawo nga tuhay sing lenguahe, regular nga pagpakigbahin sa pangpamilya nga pagsimba, pagkooperar sa mga Hospital Liaison Committee, kag paggawi sing nagakaigo sa mga kombension? Mapakita man naton nga ginaapresyar naton ang panuytoy sang Dios kon nagabaton kita sing laygay. Kon nagaatubang sing mabudlay nga mga desisyon, wala kita nagasalig sa aton kaugalingon nga kaalam kundi nagasandig kita kay Jehova kag sa iya organisasyon. Kaangay sang bata nga nagapanago sa iya ginikanan  kon may bagyo, nagadangop man kita sa organisasyon ni Jehova kon makaatubang kita sing kaangay bagyo nga mga kabudlayan.

Huo, ang mga nagapanguna sa dutan-on nga bahin sang organisasyon sang Dios indi man himpit kaangay ni Moises. Apang ang haligi amo ang makita nga pamatuod nga gintangdo sia kag nahamut-an sang Dios. Talupangda man nga indi ang mga Israelinhon ang magadesisyon kon san-o sila malakat. Kundi, ang katawhan nagahulag suno sa “sogo sang GINOO paagi kay Moises.” (Num. 9:23) Gani si Moises amo ang gingamit sang Dios sa paghatag sang panuytoy kon san-o sila malakat.

Sa karon, ginagamit ni Jehova ang tulugyanan nga grupo sa paghatag sing panuytoy. Paano nila ini ginahimo? Paagi sa mga artikulo sang Ang Lalantawan kag Ang Aton Ministeryo sa Ginharian, bag-o nga mga publikasyon, kag mga pamulongpulong sa mga asembleya kag kombension. Ginahatag man ang mga instruksion sa mga kongregasyon paagi sa mga nagalakbay nga manugtatap ukon paagi sa mga sulat kag mga eskwelahan nga ginatambungan sang mga kauturan nga may mga responsibilidad sa kongregasyon.

Nakita mo bala ang mga pamatuod nga ginatuytuyan kita sang Dios? Ginagamit ni Jehova ang iya organisasyon agod tuytuyan kita, nga iya mga katawhan, pagua “sa kahanayakan” sining katapusan nga mga adlaw sang malaut nga kalibutan ni Satanas. Subong resulta, naagom naton ang paghiusa, gugma, kag kalig-unan.

Sang nakalab-ot na sa Ginsaad nga Duta ang Israel, si Josue nagsiling: “Nakahibalo kamo sa bug-os ninyo nga mga tagiposoon kag sa bug-os ninyo nga mga kalag, nga wala sing isa ka butang nga nakulang sa tanan nga butang nga maayo nga ginpamolong nahanungud sa inyo sang GINOO nga inyo Dios; ang tanan nahanabu sa inyo.” (Jos. 23:14) Sing kaanggid, ang katawhan sang Dios pat-od man nga makalab-ot sa ginsaad nga bag-ong kalibutan. Apang subong indibiduwal, makalab-ot lamang kita didto kon mapainubuson naton nga ginasunod ang panuytoy sang Dios. Gani, dapat naton tanan padayon nga pabaloran ang mga pamatuod nga ginatuytuyan kita ni Jehova!

[Mga Retrato sa pahina 5]

Ginatuytuyan kita sang organisasyon ni Jehova sa karon

Bag-o nga mga gua

Mga eskwelahan

Paghanas sa mga miting antes magbantala