Tinguhai ang Paghidait
Tinguhai ang Paghidait
“Tinguhaan naton nga himuon ang mga butang nga nagadala sang paghidait.”—ROMA 14:19.
1, 2. Ngaa may paghidait sa tunga sang mga Saksi ni Jehova?
WALA sing matuod nga paghidait sa kalibutan subong. Bisan ang mga tawo nga pareho sing nasyonalidad kag lenguahe masami nga nabahinbahin sa relihion, pulitika, kag katilingban. Sa kabaliskaran, ang katawhan ni Jehova nahiusa bisan pa nga naghalin sila sa “tanan nga pungsod kag tribo kag katawhan kag hambal.”—Bug. 7:9.
2 Wala lamang natabuan nga may paghidait sa tunga naton. Bangod ini sang “aton paghidait sa Dios” paagi sa aton pagtuo sa iya Anak, nga ang ginpatulo nga dugo nagatabon sang aton mga sala. (Roma 5:1; Efe. 1:7) Dugang pa, ang matuod nga Dios nagahatag sang balaan nga espiritu sa iya matutom nga mga alagad, kag nalakip sa bunga sini nga espiritu ang paghidait. (Gal. 5:22) Ang isa pa ka rason amo nga kita “indi bahin sang kalibutan.” (Juan 15:19) Sa baylo nga makigbahin sa pulitika, neutral kita sa sini. Bangod ‘ginasalsal naton ang aton mga espada nga mga punta sang arado,’ wala kita nagapakigbahin sa bisan ano nga inaway.—Isa. 2:4.
3. Ano ang mahimo naton bangod sang paghidait, kag ano ang binagbinagon sa sini nga artikulo?
3 Ang paghidait sa tunga naton wala lamang nagapahangop sang paglikaw nga halitan ang aton mga utod. Bisan pa ang kongregasyon sang mga Saksi ni Jehova ginahuman sang mga indibiduwal halin sa lainlain nga etniko nga mga grupo kag kultura, ‘nagahigugmaanay kita.’ (Juan 15:17) Ang aton paghidait nagatugot sa aton nga ‘himuon kon ano ang maayo sa tanan, apang ilabi na sa mga may labot sa aton sa pagtuo.’ (Gal. 6:10) Dapat naton pakamahalon kag amligan ang paghidait sa espirituwal nga paraiso. Gani binagbinagon naton kon paano mahuptan ang paghidait sa sulod sang kongregasyon.
Kon Masandad Kita
4. Paano kita makapakighidait kon may nasaklaw sa aton?
4 Si disipulo Santiago nagsulat: “Kita tanan nagakasandad sing madamong beses. Kon ang bisan sin-o wala nagakasandad sa pulong, himpit sia nga tawo.” (Sant. 3:2) Gani kon kaisa may magautwas nga mga kinatuhayan kag indi paghangpanay sa mga masigkatumuluo. (Fil. 4:2, 3) Ini nga mga problema sarang malubad nga indi maguba ang paghidait sang kongregasyon. Halimbawa, binagbinaga ang laygay nga dapat naton iaplikar kon nahibaluan naton nga may nasaklaw sa aton.—Basaha ang Mateo 5:23, 24.
5. Paano naton matinguhaan ang paghidait kon may makasayop sa aton?
5 Ano abi kon kita ang nahimuan sang gagmay nga kasaypanan? Hulaton gid bala naton nga ang nakasayop ang magpalapit kag mangayo sing patawad? Ang ‘gugma wala nagaisip sang kahalitan,’ siling sang 1 Corinto 13:5. Kon masaklaw kita, ginatinguhaan naton ang paghidait paagi sa pagpasaylo kag kalimtan ang sayop, nga ‘wala nagaisip sang kahalitan.’ (Basaha ang Colosas 3:13.) Amo ini ang maayo nga himuon sa gagmay nga mga kasaypanan. Makabulig ini sa paghiusa sang kongregasyon kag makapahalipay sa imo bangod ginhimo mo ang husto. Ang isa ka hulubaton nagasiling: ‘Himaya ang pagpasaylo sang paglalis.’—Hulu. 19:11.
6. Ano ang aton himuon kon nabudlayan kita nga palipason ang sayop nga nahimo sa aton?
6 Ano abi kon nabudlayan kita nga palipason ang sayop? Indi gid maayo nga ipanugidsugid ini. Ang kutsokutso makaguba sa paghidait sang kongregasyon. Gani, ano ang dapat himuon para masolbar ini sing mahidaiton? Ang Mateo 18:15 nagasiling: “Kon ang imo utod makahimo sang sala, kadtui sia kag isugid ang iya sala nga kamohanon lang. Kon magpamati sia sa imo, napasag-uli mo ang imo utod.” Bisan pa ang Mateo 18:15-17 naaplikar sa mabug-at nga mga sala, ang prinsipio sa bersikulo 15 maaplikar man sa iban nga sitwasyon. Dapat naton istoryahon sa pribado ang nakasala kag tinguhaan nga mapabalik ang aton maayo nga kaangtanan sa iya. *
7. Ngaa dapat solbaron dayon ang mga di-paghangpanay?
7 Si apostol Pablo nagsulat: “Kon mangakig kamo, indi kamo magpakasala; indi pagpatunuri sang adlaw nga akig kamo, kag indi paghatagi sing duog ang Yawa.” (Efe. 4:26, 27) Si Jesus nagsiling: “Makighusay gilayon sa isa nga nagasumbong sa imo sa kasuguan.” (Mat. 5:25) Dapat nga solbaron dayon ang mga di-paghangpanay kon nagatinguha sang paghidait. Kay kon indi, pareho ini sang samad nga naimpeksion kay wala mabulong. Indi naton pagtugutan nga upangan kita sang bugal, kahisa, ukon gugma sa materyal nga mga butang sa pagsolbar dayon sang mga di-paghangpanay.—Sant. 4:1-6.
Kon Madamo ang Nadalahig sa Problema
8, 9. (a) Ano nga mga kinatuhayan sang pagtamod ang nagluntad sang unang siglo sa kongregasyon sang Roma? (b) Ano ang laygay ni Pablo sa mga Cristiano sa Roma tuhoy sa ila binangig?
8 Kon kaisa ang mga di-paghangpanay sa kongregasyon nagadalahig sa madamo. Amo sini ang natabo sa mga Cristiano sa Roma nga ginsulatan ni apostol Pablo. May problema sa tunga sang Judiyo kag Gentil nga mga Cristiano. Ang pila sa kongregasyon nga mabakod sing konsiensia nagapakanubo sa mga maluya sing konsiensia. Kag amo man sini ang ginahimo sa ila sang mga maluya sing konsiensia. Ginahukman nila ang iban base sa ila personal nga pagtamod. Ano ang laygay ni Pablo sa kongregasyon?—Roma 14:1-6.
9 Ginlaygayan ni Pablo ining duha ka grupo nga nagabinangig. Ginsilingan niya ang mga nakahangop nga wala sila sa idalom sang Mosaikong Kasuguan, nga indi pagpakanubuon ang ila mga kauturan. (Roma 14:2, 10) Ini nga panimuot makapasandad sa mga tumuluo nga indi gihapon makabatas magkaon sang mga butang nga wala anay ginatugot sa Kasuguan. “Untati ang pagguba sa buhat sang Dios tungod lamang sa pagkaon,” laygay ni apostol Pablo. “Maayo nga indi magkaon sang karne ukon mag-inom sang alak ukon maghimo sang bisan ano nga butang nga nagapasandad sa imo utod.” (Roma 14:14, 15, 20, 21) Sa pihak nga bahin, ginlaygayan ni Pablo ang mga Cristiano nga maluya sing konsiensia nga indi paghukman nga indi matutom ang may mabakod nga konsiensia. (Roma 14:13) Ginsilingan niya ang tanan nga ‘indi maghunahuna sang labaw sa iya kaugalingon sangsa kinahanglanon.’ (Roma 12:3) Matapos sila laygayan, si Pablo nagsulat: “Gani, tinguhaan naton nga himuon ang mga butang nga nagadala sang paghidait kag ang mga butang nga makapabakod sa isa kag isa.”—Roma 14:19.
10. Subong sang unang siglo nga kongregasyon sa Roma, ano ang kinahanglan agod malubad ang mga di-paghangpanay sa karon?
10 Makapat-od kita nga ginpamatian sang mga taga-Roma ang laygay ni Pablo kag nagpasibu sila. Kon may di-paghangpanay sa mga Cristiano subong, indi bala maayo kon lubaron naton ini paagi sa mapainubuson nga pagpangita kag pag-aplikar sang laygay sa Biblia? Subong sang natabo sa mga taga-Roma, dapat man magpasibu ang mga wala nagahangpanay sa karon agod “makighidait sa isa kag isa.”—Mar. 9:50.
Kon Tawgon Agod Magbulig
11. Ano ang halungan sang gulang kon may isa ka utod nga magsugid sang problema sini parte sa isa ka utod?
11 Ano abi kon may isa ka utod nga gusto makighambal sa gulang tuhoy sa iya problema sa isa ka himata ukon masigkatumuluo? Ang Hulubaton 21:13 nagasiling: “Ang bisan sin-o nga nagapabungul sa pagsinggit sang imol sia man magasinggit apang indi sia pagpamatian.” Ang mga gulang ‘indi dapat magpabungol.’ Ang isa pa ka hulubaton nagapaandam: “Ang nagapakilooy sing una sang iya kasaba daw matarung, apang ang iya isigkatawo nagaabut kag nagausisa sa iya.” (Hulu. 18:17) Ang mga gulang dapat mamati sing maayo kag maghalong nga indi dayon pag-apinan ang nagasugid. Puede niya pamangkuton kon bala naistorya na sini ang ginalainan sang iya buot. Mahimo man repasuhon sa iya sang gulang ang suno sa Biblia nga mga tikang nga dapat niya himuon agod tinguhaan ang paghidait.
12. Sambita ang mga halimbawa nga nagapakita nga makatalagam ang padasudaso nga reaksion kon makabati sang sumbong.
12 May tatlo ka halimbawa sa Biblia nga nagapakita sang katalagman sang padasudaso nga reaksion bisan isa pa lang ka bahin ang nabatian. Si Potifar nagpati dayon sang nanugid ang iya asawa nga gusto sia himuslan ni Jose. Sa kaakig, ginpabilanggo ni Potifar si Jose. (Gen. 39:19, 20) Si Hari David nagpati dayon kay Ziba sang nagsiling ini nga ang iya agalon nga si Mefiboset, nagdampig sa mga kaaway ni David. “Yari karon, mangin-imo ang tanan nga naigo kay Mefiboset,” ang insigida nga sabat ni David. (2 Sam. 16:4; 19:25-27) Si Hari Artajerjes ginsugiran nga gintukod liwat sang mga Judiyo ang mga pader sang Jerusalem bangod luyag nila nga magrebelde sa Emperyo sang Persia. Nagpati ang hari sa sayop nga report kag ginmando niya nga pauntaton ang pagtukod sang Jerusalem. Gani, nauntat ang pagtukod sang mga Judiyo sang templo sang Dios. (Esd. 4:11-13, 23, 24) Ginasunod sing maalamon sang mga gulang ang laygay ni Pablo kay Timoteo nga likawan ang padasudaso nga paghukom.—Basaha ang 1 Timoteo 5:21.
13, 14. (a) Ano ang mga limitasyon naton parte sa di-paghangpanay sang iban? (b) Ano nga bulig ang matigayon sang mga gulang sa paghatag sing husto nga paghukom sa mga masigkatumuluo?
13 Bisan daw maathag na ang tanan kay nabatian mo na ang duha ka bahin, dapat gihapon dumdumon nga “ang bisan sin-o nagahunahuna nga nakatigayon sia sang ihibalo tuhoy sa isa ka butang, wala pa niya mahibaluan ini subong sang dapat niya mahibaluan.” (1 Cor. 8:2) Nahibaluan na bala naton kon ano ang ginsuguran sang di-paghangpanay? Nahangpan gid bala naton kon ano ang gindak-an sini nga mga indibiduwal? Kon nagauyat sang kaso, importante gid nga ang mga gulang indi malimbungan sang kabutigan, malalangon nga mga taktika, ukon kutsokutso. Ang gintangdo sang Dios nga Hukom, si Jesucristo, nagahukom sing matarong. Wala sia “maghukom sono sa panolok sang iya mga mata, ukon maghusay sono sa pagpamati sang iya mga idulungug.” (Isa. 11:3, 4) Sa baylo, si Jesus ginatuytuyan sang espiritu ni Jehova. Ang mga gulang makabenepisyo sa panuytoy sang balaan nga espiritu sang Dios.
14 Antes maghukom sa mga masigkatumuluo, dapat mangamuyo ang mga gulang nga buligan sila sang espiritu ni Jehova. Ginatugutan nila ini nga magtuytoy sa ila paagi sa paggamit sang Biblia kag mga publikasyon sang “matutom kag mainandamon nga ulipon.”—Mat. 24:45.
Unahon Gid Bala Pirme ang Paghidait?
15. San-o naton dapat ireport ang mabug-at nga sala nga nahibaluan naton?
15 Subong mga Cristiano, ginapalig-on kita nga tinguhaan ang paghidait. Apang ang Biblia nagasiling man: “Ang kaalam nga gikan sa hitaas una sa tanan putli, dayon mahidaiton.” (Sant. 3:17) Ang mangin mahidaiton ikaduha sa kaputli, ang pagsakdag sang matinlo nga mga talaksan sa moral sang Dios kag pagsunod sa matarong niya nga mga kinahanglanon. Kon nahibaluan sang isa ka Cristiano nga nakahimo sing serioso nga sala ang iya masigkatumuluo, dapat palig-unon niya sia nga magtu-ad sa mga gulang. (1 Cor. 6:9, 10; Sant. 5:14-16) Kon indi ini paghimuon sang nakasala, dapat ini ireport sang Cristiano nga nakahibalo sang sala. Ang indi paghimo sini agod mahuptan ang paghidait upod sa makasasala nagahimo sa iya nga mangin bahin sang sala.—Lev. 5:1; basaha ang Hulubaton 29:24.
16. Ano ang matun-an naton sa pag-atubangay nanday Jehu kag Hari Jehoram?
16 Ginapakita sang isa ka hitabo kay Jehu nga mas importante ang pagkamatarong sang Dios sangsa pagpakighidait. Ginpadala sang Dios si Jehu agod ipadapat ang Iya paghukom sa panimalay ni Hari Ahab. Ang malaut nga si Hari Jehoram, nga anak nanday Ahab kag Jezebel, nagsakay sa iya kangga agod tabuon si Jehu kag nagsiling sia: “Paghidait bala, Jehu?” Ano ang sabat ni Jehu? “Ano bala nga paghidait, samtang nga tama kadamu ang pagkamakihilawason ni [Jezebel] nga imo iloy kag ang iya mga pagkadiwatahan?” (2 Hari 9:22) Dayon, ginbingat ni Jehu ang iya pana kag gin-igo si Jehoram sa iya tagipusuon. Pareho sa ginhimo ni Jehu, indi man dapat pagkunsintihon sang mga gulang ang di-mahinulsulon nga mga makasasala para lang sa paghidait. Gina-disfellowship nila ang indi mahinulsulon nga mga makasasala agod mahuptan ang paghidait sang kongregasyon.—1 Cor. 5:1, 2, 11-13.
17. Ano ang papel sang tanan nga Cristiano sa pagtinguha sang paghidait?
17 Sa masami ang di-paghangpanay sang mga kauturan indi man mabug-at nga mga sala nga kinahanglan nga asikasuhon sang judicial committee. Daw ano kaayo kon tabunan na lang ini sang gugma. “Ang nagatabon sang paglalis nagapangita sing gugma, apang ang nagasulitsulit sang butang nagapabulag sang mahirup nga abyan.” (Hulu. 17:9) Ang pagsunod sa sini makabulig sa aton tanan nga mahuptan ang paghidait sa kongregasyon kag ang maayo nga kaangtanan kay Jehova.—Mat. 6:14, 15.
Ang Pagtinguha sang Paghidait Nagadala sang mga Pagpakamaayo
18, 19. Ano nga mga benepisyo ang matigayon sang mga nagatinguha sang paghidait?
18 Ang pagtinguha naton sang “mga butang para sa paghidait” nagadala sa aton sing bugana nga mga pagpakamaayo. Nagasuod kita kay Jehova samtang ginailog naton ang iya mga paagi, kag makaamot kita sa paghidait sang aton espirituwal nga paraiso. Ang pagtinguha sang paghidait sa sulod sang kongregasyon nagabulig man sa aton nga makapangita sing paagi nga matinguhaan ang paghidait sa ginabantalaan naton sang “maayong balita sang paghidait.” (Efe. 6:15) Dapat handa kita nga mangin ‘malulo sa tanan, sampaton sa pagpanudlo, mapinaumuron.’—2 Tim. 2:24.
19 Dumduma man nga “may pagkabanhaw sang mga matarong kag mga di-matarong.” (Binu. 24:15) Kon matuman na ini sa duta, minilyon nga may nagkalainlain nga ginhalinan, panimuot, kag personalidad ang mabuhi liwat—bisan yadtong mga “kutob sa pagtukod sa kalibutan”! (Luc. 11:50, 51) Pribilehiyo gid naton nga tudluan ang mga ginbanhaw sang mga dalanon sang paghidait. Ang paghanas sa aton subong bilang manugpahidait daku gid nga bulig kon mag-abot na ina nga tion!
[Nota]
^ par. 6 Sa pag-atubang sang mabug-at nga mga sala kag paglimbong, tan-awa ang Oktubre 15, 1999, nga Ang Lalantawan, pahina 17-22.
Ano ang Imo Natun-an?
• Paano naton matinguhaan ang paghidait kon may nasandad sa aton?
• Ano ang dapat naton himuon agod matinguhaan ang paghidait kon may nakasayop sa aton?
• Ngaa indi maalamon nga may apinan kita kon may di-paghangpanay?
• Ngaa importante nga tinguhaan ang pagkamatarong sangsa pagpakighidait sa mga indi mahinulsulon?
[Mga Pamangkot sa Pagtinuon]
[Mga Retrato sa pahina 29]
Ginahigugma ni Jehova ang nagapatawad sa iban
