Magpadayon sa Pagbantay—Ngaa Importante Gid Ini?

“ANO ang mangin tanda sang imo presensia kag sang katapusan sang sistema sang mga butang?” (Mat. 24:3) Bilang sabat, ginhatagan ni Jesus ang iya mga disipulo sang isa ka tanda nga maathag, detalyado, sigurado, kag madali matalupangdan. Mabasa ini sa Mateo kapitulo 24, Marcos kapitulo 13, kag Lucas kapitulo 21. Nagsiling pa sia: “Magpadayon kamo sa pagbantay.”—Mat. 24:42.

Kon ang tanda maathag na, ngaa may dugang pa sia nga laygay? Binagbinaga ang duha ka posible nga rason. Una, mahimo nga indi pagsapakon sang iban ang tanda kay nawili sila sa ila mga hilikuton. Nagluya ang ila espirituwalidad kag nag-untat sila sa pagbantay. Ikaduha, mahimo makilala sang isa ka Cristiano ang pila ka bahin sang tanda apang indi niya ini maeksperiensiahan sa ila lugar. Ayhan mangatarungan sia nga ang “dakung kapipit-an,” ang katapusan sang tagna ni Jesus, madugay pa kag indi pa man kinahanglan nga ‘magpadayon sa pagbantay.’—Mat. 24:21.

“Wala Sila Magsapak”

Ginpahanumdom ni Jesus ang iya mga sumulunod parte sa mga tawo sang adlaw ni Noe. Nasaksihan nila ang pagbantala ni Noe, pagtukod sang arka, kag ang kasingki sa ila palibot. Apang “wala sila magsapak.” (Mat. 24:37-39) Amo man sini ang panimuot sang mga tawo sa mga paandam subong. Halimbawa, maathag ang mga karatula nga nagasiling kon ano lang dapat kadasig ang pagmaneho, apang madamo ang wala nagasapak sa sini. Amo nga ang awtoridad nagakapilitan nga magbutang sing mga hamp sa mga kalye sa siudad agod maobligar ang mga drayber nga magbahar. Sing kaanggid, mahimo nakilala sang isa ka Cristiano ang tanda sang katapusan nga mga adlaw apang ang iya ginahimo baliskad sa iya ginapatihan. Naeksperiensiahan ini sang tin-edyer nga si Arielle nga taga-West Africa.

Nanamian si Arielle magtan-aw sa TV sang mga babayi nga nagahampang sang handball. Sang nag-organisar sang team ang ila eskwelahan, wala na niya mahunahuna nga posible magluya ang iya espirituwalidad kon mag-entra sia. Nag-entra gid sia kag nangin goalkeeper. Ano ang natabo? Nagpaathag sia: “Ang iban ko nga upod may mga nobyo nga nagadroga kag nagapanigarilyo. Ginalangolango nila ako kay lain ako sa ila, kag abi ko masarangan ko ini. Wala gid ako maghunahuna nga magluya ang akon espirituwalidad. Handball na lang ang unod sang akon ulo. Bisan ara ako sa Kingdom Hall, ang akon pensar didto sa halampangan. Nagbag-o man ang akon personalidad. Ang huyog ko sa hampang nabuslan sang obsesyon nga magdaug. Todo gid ang akon praktis kay gusto ko magdaug. Gani, nagdugang man ang akon stress. Ginsakripisyo ko pa gani pati ang akon mga abyan.

“Ang pinakagrabe nga natabo amo sang ginhatagan sing penalty shot ang amon kontra.  Tungod determinado ako nga bantayan gid nga indi magsulod ang bola sang kontra, wala ko na matalupangdan nga nagapangamuyo na gali ako kay Jehova nga buligan niya ako! Didto ko narealisar nga nagluya na gid ang akon espirituwalidad. Paano ko ini napabakod liwat?

“Natan-aw ko na ang aton DVD nga Young People Ask—What Will I Do With My Life? * Pero gintan-aw ko pa ini liwat sing maayo. Pareho abi kami sing kahimtangan ni André, ang pamatan-on sa drama. Gintandaan ko gid ang ginpanugda sang gulang nga himuon niya—basahon kag pamalandungan ang Filipos 3:8. Nakabulig gid ini sa akon. Gin-untatan ko ang hampang.

“Daku gid ini nga pagbag-o! Nadula ang akon stress kag huyog sa kompetisyon. Mas malipayon ako kag nagsuod sa mga kauturan. Mas naapresyar ko ang espirituwal nga mga hilikuton. Makakonsentrar na ako sa mga miting kag nalipay sa sini. Nag-uswag man ang akon ministeryo. Kag subong regular ako nga nagaauxiliary payunir.”

Kon may mga butang nga nagaimpluwensia sa imo nga balewalaon ang tanda nga ginhatag ni Jesus sa aton, maghimo sing serioso nga tikang, pareho ni Arielle. Mahimo mo tilawan ang masunod. Tan-awa ang Watch Tower Publications Index, nga ginatawag isa ka mapa sang natago nga mga bahandi. Itudlo sini sa imo ang mga reperensia sang mga laygay kag mga eksperiensia sang iban nga nakaatubang sang mga pagsulay. Panginpusli sing maayo ang Cristianong mga miting paagi sa paghanda kag pagkuha sing nota. Natalupangdan sang iban nga mas maayo kon sa unahan sila mapungko. Kon may pamangkot kag sabat, tinguhai nga makasabat sa umpisa pa lang. Magpabilin man nga nagabugtaw sa espirituwal paagi sa pagpaanggid sang bag-o nga mga balita sa bahin sang tanda kag sang iban pa nga mga hitabo sa “katapusan nga mga adlaw.”—2 Tim. 3:1-5; 2 Ped. 3:3, 4; Bug. 6:1-8.

“Pamatud-i Man Ninyo nga Handa Kamo”

Ang tanda sang katapusan nga mga adlaw nagakahanabo sa “bug-os napuy-an nga duta.” (Mat. 24:7, 14) Minilyon ang nagaistar sa mga lugar nga may mga peste, kulang ang kalan-on, linog, kag iban pa nga hitabo nga gintagna. Pero madamo naman ang yara sa mga lugar nga indi tanto kagamo. Kon ikaw mismo indi apektado sang pila ka bahin sang tanda, mangatarungan ka bala nga madugay pa ang dakung kapipit-an? Sayop gid ina nga panghunahuna.

Halimbawa, pamalandungi ang tagna ni Jesus parte sa “mga peste kag kakulang sa kalan-on.” (Luc. 21:11) Una, wala sia nagsiling nga dungan ini nga matabo sa tanan nga lugar ukon palareho ang epekto sini. Sa baylo, nagsiling sia nga matabo ini “sa nagkalainlain nga duog.” Gani, indi naton mapaabot nga dungan kag palareho ang matabo sa kada lugar. Ikaduha, sa tapos nasiling ni Jesus ang parte sa kakulang sing kalan-on, ginpakita man niya nga dapat mangin alisto ang iya mga sumulunod nga indi magpasobra sa pagkaon: “Mag-andam kamo nga ang inyo tagipusuon indi gid mabug-atan sang sobra nga pagkaon.” (Luc. 21:34) Kon amo, indi mapaabot sang tanan nga Cristiano nga maeksperiensiahan nila ang tanan nga bahin sang tanda. Sa baylo, si Jesus nagsiling: “Kon makita ninyo nga nagakahanabo ini nga mga butang,  mahibaluan ninyo nga ang ginharian sang Dios malapit na.” (Luc. 21:31) Bisan ano man ang aton maeksperiensiahan sa aton lugar, makita naton ang tanan nga bahin sang tagna bangod sa moderno nga komunikasyon.

Dumduma man nga natalana na ni Jehova ang “adlaw kag oras” sang pagsugod sang dakung kapipit-an. (Mat. 24:36) Indi ini mapabag-o sang mga hitabo sa duta.

Ginlaygayan ni Jesus ang mga Cristiano bisan diin man sila: ‘Pamatud-i ninyo nga handa kamo.’ (Mat. 24:44) Importante gid nga pirme kita handa. Siempre, indi man puede nga adlaw-adlaw puro lang teokratiko nga hilikuton ang aton himuon. Isa pa, wala sa aton sing nakahibalo kon ano ang aton ginahimo pag-abot sang dakung kapipit-an. Ang iban mahimo nga yara sa uma ukon sa ila balay. (Mat. 24:40, 41) Gani, paano naton mapamatud-an nga handa kita?

Sanday Emmanuel kag Victorine, kag ang ila anom ka anak nga babayi, nagaistar sa isa ka bahin sang Aprika diin indi nila mabatyagan sing maayo ang epekto sang tanda. Agod mabuligan ang ila kaugalingon nga mangin handa, namat-od sila nga maghinun-anon sa espirituwal kada adlaw. Si Emmanuel nagpaathag: “Mabudlay mangita sing tion nga kombeniente sa amon tanan. Ginpili namon sang ulihi ang alas seis asta alas seis y media sa aga. Pagkatapos mabinagbinag ang matag-adlaw nga teksto, nagahanda kami sing pila ka parapo sa isa ka publikasyon nga pagatun-an sa kongregasyon sina nga semana.” Nakabulig bala ini nga programa sa ila agod magpabilin nga nagamata? Huo! Si Emmanuel amo ang koordenitor sang hubon sang mga gulang sa kongregasyon. Si Victorine pirme nagaauxiliary payunir kag nakabulig sa madamo nga batunon ang kamatuoran. Ang ila mga anak nga babayi nagauswag tanan sa espirituwal.

Si Jesus nagalaygay sa aton: “Magpadayon kamo nga nagabantay, magpadayon kamo nga nagamata.” (Mar. 13:33) Indi pagtuguti nga dulaon sang mga tublag ang imo pagkaalisto sa espirituwal. Sa baylo, talupangda ang maayo nga laygay sa aton mga publikasyon kag sa mga miting sa kongregasyon, subong sang ginhimo ni Arielle. Kaangay sang pamilya ni Emmanuel, tilawi nga maghimo sing mga butang kada adlaw nga makabulig sa imo nga mangin handa kag “nagabantay.”

[Nota]

[Retrato sa pahina 4]

Ang paghinun-anon sa espirituwal kada adlaw nakabulig kay Emmanuel kag sa iya pamilya nga mangin ‘handa’