Magtuon sa ‘Balayan sang Kamatuoran’
“May balayan [kamo] sang ihibalo kag sang kamatuoran sa Kasuguan.”—ROMA 2:20.
1. Ngaa gusto naton mahangpan ang importansia sang Mosaikong Kasuguan?
ANG mga sinulatan ni apostol Pablo sa Biblia nagbulig sa aton nga mahangpan ang importansia sang madamo nga bahin sang Mosaikong Kasuguan. Halimbawa, sa iya sulat sa mga Hebreo, ginpaathag niya kon paano si Jesus bilang ang “matutom nga mataas nga saserdote” nagdulot sang “nagapasag-uli nga halad” sing makaisa gid lang para matigayon sang mga magatuo sa sini ang “wala katapusan nga pagtubos.” (Heb. 2:17; 9:11, 12) Ginpaathag man niya nga ang tabernakulo “landong sang langitnon nga mga butang” kag si Jesus amo ang Manugpatunga sa “mas maayo nga katipan” sangsa ginpatung-an ni Moises. (Heb. 7:22; 8:1-5) Ini nga mga paathag sa Kasuguan importante sa mga Cristiano sang tion ni Pablo kag tubtob subong. Nagabulig ini sa aton nga mahangpan sing bug-os ang mga aman sang Dios para sa aton.
2. Ano ang bentaha sang mga Judiyong Cristiano sa mga Gentil?
2 Sang nagsulat si Pablo sa mga Cristiano sa Roma, ginsentro niya ang iya igtalupangod sa mga Judiyo nga miembro sang kongregasyon kag gintudluan sa Mosaikong Kasuguan. Nagsiling sia nga bangod may ihibalo sila sa Kasuguan sang Dios, may yara na sila “balayan sang ihibalo kag sang kamatuoran” parte kay Jehova kag sa iya matarong nga mga prinsipio. Ang paghangop kag pagtahod sa sini nga ‘balayan sang kamatuoran’ makabulig sa mga Judiyong Cristiano nga ilugon ang matutom nga mga Judiyo nga nauna sa ila, sa pagtuytoy, pagtudlo, kag sa paghatag sing kapawa sa wala makahibalo sang Kasuguan nga ginhatag ni Jehova sa iya katawhan.—Basaha ang Roma 2:17-20.
MGA LANDONG SANG HALAD NI JESUS
3. Paano kita makabenepisyo sa pagtuon parte sa mga halad sang mga Judiyo sadto?
3 Ang balayan sang kamatuoran nga ginsambit ni Pablo importante gihapon para sa aton agod mahangpan naton ang katuyuan ni Jehova. Ang mga prinsipio sa Mosaikong Kasuguan wala magbag-o. Gani binagbinagon naton ang isa ka bahin sang Kasuguan—kon paano ang nanuhaytuhay nga mga halad kag mga dulot nagtudlo sa mapainubuson nga mga Judiyo kay Cristo kag nagbulig sa ila nga mahangpan ang ginapatuman sang Dios. Wala nagabag-o ang mga ginapatuman ni Jehova sa iya mga alagad. Sa amo, ang Iya mga kasuguan sa mga Israelinhon parte sa mga halad kag mga dulot makabulig man sa aton nga maanalisar ang kalidad sang aton sagrado nga pag-alagad.—Mal. 3:6.
4, 5. (a) Ano ang ginapahanumdom sang Mosaikong Kasuguan sa katawhan sang Dios? (b) Ang mga halad “landong” sang ano?
4 Madamo nga bahin sang Mosaikong Kasuguan ang nagapahanumdom sa mga Judiyo nga makasasala sila. Halimbawa, dapat magpaninlo ang isa nga nakatandog sang bangkay. Dapat sia maghalad sang pula nga baka. Ihawon ini kag sunugon kag ang abo sini taguon para sa “tubig nga sa pagkadimatinlo,” nga iwisik sa tawo nga putlion sa ikatlo kag sa ikapito nga adlaw pagkatapos nga nangin di-matinlo. (Num. 19:1-13) Bilang pahanumdom nga ang pagpanganak nagapapanubli sang pagkadihimpit kag sala, ang babayi nga nagbata nangin di-matinlo kag kinahanglan niya sang katumbasan paagi sa paghalad.—Lev. 12:1-8.
5 Ang mga halad nga sapat kinahanglan sa matag-adlaw nga pagkabuhi agod matumbasan ang mga sala. Nahibaluan man ini sang isa ka sumilimba ukon wala, ini nga mga halad kag ang mga ginahalad sa templo ni Jehova, mga “landong” sang himpit nga halad ni Jesus.—Heb. 10:1-10.
ANG HUSTO NGA PAGTAMOD SA MGA HALAD
6, 7. (a) Ano ang dapat binagbinagon sang mga Israelinhon kon nagapili sang ila inughalad, kag ano ang ginarepresentar sang paghalad sing pinakaali? (b) Ano ang mahimo naton ipamangkot sa aton kaugalingon?
6 Ginapatuman ni Jehova sa mga Israelinhon nga maghalad lamang sing mga sapat nga wala sing kasawayan—indi bulag, bali, piang, ukon masakiton. (Lev. 22:20-22) Kon maghalad ang mga Israelinhon sing mga bunga ukon mga uyas kay Jehova, dapat ang “nahaunang mga bunga,” ang “ali” sa ila patubas. (Num. 18:12, 29) Indi pagbatunon ni Jehova ang indi ali. Ang paghalad sang mga Israelinhon sing pinakaali nga mga sapat nagapakita nga ang mangin halad ni Jesus wala sing depekto kag wala sing higko. Ihatag ni Jehova ang labing maayo kag pinalangga gid niya agod luwason ang katawhan.—1 Ped. 1:18, 19.
7 Kon ginapasalamatan gid sang nagahalad ang kaayo ni Jehova, indi bala nga ihatag niya ang iya pinakaali? Ang kalidad sang halad nagadepende sa indibiduwal. Apang, nahibaluan niya nga indi malipay ang Dios sa may sablag nga halad bangod nagapakita ini nga ginatamod lamang niya ang paghalad subong pormalidad kag isa ka lulan. (Basaha ang Malaquias 1:6-8, 13.) Dapat man naton hunahunaon ang aton pag-alagad sa Dios: ‘Ano ang akon motibo sa pag-alagad kay Jehova? Dapat ko bala bag-uhon ang akon paagi sa pag-alagad? Ginahatag ko bala sa iya ang labing maayo?’
8, 9. Ngaa dapat naton binagbinagon ang panimuot sang mga Israelinhon kon maghalad sila?
8 Kon ang Israelinhon boluntaryo nga nagahalad kay Jehova para magpasalamat, ukon kon nagadulot sia sing halad-nga-sinunog para pangayuon ang Iya kahamuot, mahimo nga indi sia mabudlayan magpili sang iya ihalad nga sapat. Malipay sia nga ihatag kay Jehova ang iya pinakaali. Ang mga Cristiano subong wala na nagahalad sang ginapatuman sang Mosaikong Kasuguan. Pero nagahalad sila gihapon paagi sa paggamit sang ila tion, kusog, kag pagkabutang sa pag-alagad kay Jehova. Ginsambit ni apostol Pablo ang ‘dayag nga pagpahayag’ sang Cristianong paglaum kag “ang paghimo sing maayo kag ang pagpaambit sing mga butang sa iban” subong mga halad nga nagapahamuot sa Dios. (Heb. 13:15, 16) Makita sa aton panimuot sa pag-alagad kay Jehova kon daw ano ang aton pagpasalamat kag apresasyon sa tanan nga gin-aman Niya sa aton. Gani, pareho sa mga Israelinhon dapat man naton usisaon ang aton panimuot kag motibo sa pag-alagad kay Jehova.
9 Apang kamusta sa mga sitwasyon nga ginapatuman sang Mosaikong Kasuguan ang halad-tungod-sa-sala ukon ang halad-tungod-sa-paglapas? Bangod ini nga mga halad indi boluntaryo, sa banta mo mabudlayan bala ang isa ka Israelinhon nga himuon ini sing kinabubut-on? Mahimo ayhan nga magpasusung-ol sia sa paghalad sini? (Lev. 4:27, 28) Indi sia magbatyag sina kon luyag gid niya mahuptan ang maayo nga kaangtanan kay Jehova.
10. Ano nga “mga halad” ang mahimo sang mga Cristiano agod mapasag-uli ang naguba nga mga kaangtanan?
10 Sing kaanggid, ayhan may nahambal ka ukon nahimo nga indi mo hungod nga nakasaklaw sa imo utod. Mahimo konsiensiahon ka bangod sini. Kon gusto gid naton nga pahamut-an si Jehova, himuon naton ang aton bug-os nga masarangan para matadlong ang sayop. Nagakahulugan ini sing pagpangayo sing sinsero nga pasaylo sa nahimuan sang sayop ukon, sa kaso sang serioso nga sala, ang pagpangayo sing bulig sa mga gulang. (Mat. 5:23, 24; Sant. 5:14, 15) Buot silingon, may dapat kita himuon agod tadlungon ang aton sala sa aton isigkatawo ukon batok sa Dios mismo. Kon himuon naton ining “mga halad,” mapasag-uli naton ang aton kaangtanan kay Jehova kag sa aton utod kag matigayon ang matinlo nga konsiensia. Nagapasalig ini sa aton nga ang dalanon ni Jehova amo ang labing maayo.
11, 12. (a) Ano ang ginarepresentar sang mga halad-sa-paghidait? (b) Ano ang kaangtanan sini sa aton pag-alagad subong?
11 Ang iban nga mga halad nga ginapatuman sang Mosaikong Kasuguan ginatawag nga mga halad-sa-paghidait. Nagakahulugan ini sing pagpakighidait kay Jehova. Kaunon sang nagahalad kag sang iya pamilya ang karne sang ginhalad nga sapat, ayhan sa isa sa mga hulot nga kalan-an sa templo. Ang iban nga karne gikan sa halad ihatag sa nagadumala nga saserdote kag sa iban pa nga mga saserdote sa templo. (Lev. 3:1; 7:31-33) Nagahalad ang isa ka sumilimba bangod luyag niya matigayon ang maayo nga kaangtanan sa Dios. Daw pareho lang nga sia, ang iya pamilya, ang mga saserdote, kag si Jehova malipayon nga nagasalo sa pagkaon nga may paghidait.
12 Ano pa ang mas labaw sangsa agdahon si Jehova nga magkaon upod sa aton, sa simbuliko nga paagi, kag batunon niya ang aton pangagda? Siempre, gusto gid sang nagaagda nga ihanda ang pinakamaayo para sa pinakadungganon nga bisita. Ang mga halad-sa-paghidait, bahin sang balayan sang kamatuoran nga yara sa Kasuguan. Ginapakita sini nga ang tanan nga nagahandum sang suod kag mahidaiton nga kaangtanan sa Manunuga, makatigayon na sini paagi sa mas daku nga halad ni Jesus. Subong, mahimo man naton mangin abyan kag makaupod si Jehova kon kinabubut-on naton nga ginahalad ang aton mga pagkabutang kag kusog sa pag-alagad sa iya.
MGA DAPAT DUMDUMON KON NAGAHALAD
13, 14. Ngaa wala ginbaton ni Jehova ang ihalad kuntani ni Hari Saul?
13 Para batunon ni Jehova ang mga halad nga ginapatuman sang Mosaikong Kasuguan, dapat husto ang motibo sang nagahalad. Gani, ginsambit sa Biblia ang mga halimbawa sang mga halad nga wala ginabaton sang Dios. Ngaa? Hambalan naton ang duha ka sitwasyon.
14 Ginsilingan sang manalagna nga si Samuel si Hari Saul nga nag-abot na ang tion nga hukman ni Jehova ang mga Amaleknon. Gani, ginsugo si Saul nga papason ini nga pungsod lakip ang tanan nga kasapatan sini. Pero, sang magdaug si Saul, ginsugo niya ang iya mga soldado nga indi pagpatyon si Agag nga hari sang mga Amaleknon. Ginbilin man niya ang ali nga mga sapat para ihalad kay Jehova. (1 Sam. 15:2, 3, 21) Ano ang reaksion ni Jehova? Bangod sa paglapas ni Saul, ginsikway sia ni Jehova. (Basaha ang 1 Samuel 15:22, 23.) Ano ang aton matun-an sa sini? Ginapakita sini nga batunon lamang sang Dios ang halad kon ginatuman sang isa ang iya mga sugo.
15. Ano ang ginapakita sang mga Israelinhon nga nagahalad samtang nagahimo sing malain nga mga buhat?
15 May isa pa gid ka halimbawa sa tulun-an sang Isaias. Ang mga Israelinhon sang tion ni Isaias nagahalad para patawaron ni Jehova. Pero, wala sing pulos ang ila mga halad bangod padayon sila nga nagapakasala. “Ano bala sa akon ang kadam-an sang inyo mga halad?” pamangkot ni Jehova. “Tuman na ako sa mga halad-nga-sinonog nga mga carnero kag nga sapay sang mga sapat nga pinatambok; wala ako nagakalipay sa dugo sang tinday nga mga baka nga lalaki, ukon sang mga cordero, ukon sang mga kanding nga lalaki. . . . Dili na kamo magdala sing walay pulus nga mga halad; ang incienso kangil-aran sa akon.” Ano ang problema? Ginsilingan sila sang Dios: “Bisan kon maghimo kamo sing madamu nga pangamuyo, indi ako magpamati; ang inyo mga kamut puno sang dugo. Panghugas kamo; paninlo kamo; isikway ang malaut nga mga buhat ninyo sa atubangan sang akon mga mata; mag-untat sa paghimo sing malaut.”—Isa. 1:11-16.
16. Ano nga mga halad ang ginabaton sang Dios?
16 Wala nahamuot si Jehova sa mga halad sang di-mahinulsulon nga mga makasasala. Pero, ginabaton niya ang pangamuyo kag mga dulot sang mga nagatinguha nga matuman ang iya mga sugo. Ang balayan sang Kasuguan nagtudlo sa ila nga makasasala sila kag nagakinahanglan sing kapatawaran. (Gal. 3:19) Kon mahangpan ini sang isa, magahinulsol sia kag magapangayo sing kapatawaran ni Jehova. Dapat man naton kilalahon nga kinahanglan naton ang halad ni Cristo para matumbasan ang aton mga sala. Kon nahangpan naton kag ginapasalamatan ini, “magakalipay” si Jehova sa tanan nga ginahimo naton sa pag-alagad sa iya.—Basaha ang Salmo 51:17, 19.
MAGTUO SA HALAD NI JESUS!
17-19. (a) Paano naton mapakita nga nagapasalamat kita kay Jehova sa halad ni Jesus? (b) Ano ang aton binagbinagon sa masunod nga artikulo?
17 Ang nakita sang mga Israelinhon “landong” lamang sang katuyuan sang Dios. Pero, nakita naton ang katunayan sini. (Heb. 10:1) Ang mga kasuguan parte sa mga halad nagtudlo sa mga Judiyo nga kinahanglan ang husto nga motibo agod matigayon ang maayo nga kaangtanan sa Dios. Dapat ipakita nila ang pagpasalamat, nga luyag nila nga ihatag ang labing maayo sa iya, kag ginakilala nila nga kinahanglan nila ang gawad. Paagi sa Cristianong Griegong Kasulatan, nahangpan naton subong nga paagi sa gawad, dulaon sing bug-os ni Jehova ang sala kag kamatayon kag bisan subong pa lang ginatugutan na niya kita nga makatigayon sing matinlo nga konsiensia sa atubangan niya. Ang gawad isa ka hamili nga aman ni Jehova!—Gal. 3:13; Heb. 9:9, 14.
18 Agod makabenepisyo kita sa halad-gawad, indi lamang nga hangpon naton kon ano ini. Si Pablo nagsulat: “Ang Kasuguan nangin manunudlo naton nga nagadul-ong sa aton kay Cristo, agod mapahayag kita nga matarong bangod sa pagtuo.” (Gal. 3:24) Kag ini nga pagtuo dapat may binuhatan. (Sant. 2:26) Gani ginpalig-on ni Pablo ang unang siglo nga mga Cristiano nga may ihibalo sa balayan sang Mosaikong Kasuguan nga gamiton ining ihibalo. Kon himuon nila ini, magagawi sila suno sa mga prinsipio sang Dios nga gintudlo sa ila.—Basaha ang Roma 2:21-23.
19 Bisan pa nga ang mga Cristiano subong indi na obligado nga tumanon ang Mosaikong Kasuguan, dapat magpresentar sila sang mga halad nga kalahamut-an kay Jehova. Sa masunod nga artikulo, tun-an naton kon paano naton mahimo ini.
[Mga Pamangkot sa Pagtinuon]
[Blurb sa pahina 17]
Wala nagabag-o ang mga ginapatuman ni Jehova sa iya mga alagad
[Retrato sa pahina 18]
Diin sa sini ang ihalad mo kay Jehova?
[Retrato sa pahina 19]
Ginakahamut-an ni Jehova ang nagahatag sing nagakaigo nga mga halad
